Read idoma ĀCOHƐ́PƆ̄ 8 Bible Online

ĀCOHƐ́PƆ̄ 8 - idoma bible

ĀCOHƐ́PƆ̄ 8

¹Anɔ́ɔ ācɛ kú Ɛ́frem da Ugídīyɔn ɔ̄kā ka ɔdíyá nēé hī aá igwú eko nēé nyɔ̄ í kpɛ́fú tá ācɛ Umídiya ā ŋ́ mā?” É cɔ̄nū nɛ̄hi ohígbū ɛ̄nyā ā. Ɔtū kú uwā le bīya.

²Amáŋ Ugídīyɔn tá uwā ohi kahíníī, Ɔdā nɛ̄ anúɔ yá ā nyɛ́ fíyɛ́ ɔdā dóódu nɛ̄ ɛ́ɛ yá ā á. Ka olígíí nɛ̄ uwá nēe wɛ ācɛ kú Ɛ́frem yá ā, ɔ́ɔ fíyɛ́ odúúdú ɔdā nɛ̄ anúɔ mɛ́mla ācɛ ɔlɛ́ anúɔ yá ā á.

³Ó ka ofíyɛ́ dúú ā, óŋmá lɛ ɔfú kú Ɔwɔicō ā, ɛ́ɛ le aɔ́cɛ́ kú Umídiya, Órēbu mɛ́mla Usíibu kpó ŋmó. Ka ɔdí nɛ̄ anúɔ géē yá nōo fíyɛ́ ɔ́ɔmā ā? Eko nōó le ohi tá uwā lɛ ā ā, é klla cɔ̄nū ɛ́ɛ́ gɛ ŋ́.

⁴Eko ɔ́ɔmā, Ugídīyɔn mɛ́mla aícɔ́ɔja ofu igwɛ́ɛhɔ̄ kú nū ā gā ísu kú Ujɔ́dan, klla kwú bēhé nū ɛɛ́. Ɛ̄jɛ̄ le jɛ̄ uwā amáŋ é bá ī nū aólɛlā kú uwā kpɔ́.

⁵Eko nēé gā Usúkɔ̄tu ā, ó da ācɛ abɔ́ɔ kéē kócōō lɛ igbō je lɛ ācɛ ɔlɛ́ anúɔ kéē lé. Ka ɛ̄jɛ̄ le jɛ̄ uwā, anúɔ yɔ̄ ī nū Usɛ́ba mɛ́mla Usálumúna, aɔ́cɛ́ kú Umídiya ā inya.

⁶Amáŋ, aótrɛ̄yí kú Usúkɔ̄tu ā da ɔ́ ɔ̄kā ka ɔdíyá nɛ̄ aá géē je ɔdōlé dúúmā lɛ ɔ́ mɛ́mla aícɔ́ɔja kú ɔlɛ́ nū ā, nēé kwú Usɛ́ba mɛ́mla Usalumúna ɛ́ɛ́ ŋ́ mā?

⁷Anɔ́ɔ Ugídīyɔn da uwá ka ɔ́ɔ lɔhi, eko nɛ̄ Óndú ā ɔ́ɔ kwú Usɛ́ba mɛ́mla Usalumúna ú lɛ anúɔ, ka anúɔ géē bī itali ujē lɛ gɔ́ uwā, jāā gbéeko nɛ̄ iyē kú uwā ɔ́ɔ le plla.

⁸Ugídīyɔn le yɛ tá Upɛ́nūwɛ̄lu gaá lɛ ɛdɔ ɛ̄ba ékpónú ɔ́ɔmā ba, amáŋ ɛdɔ ohi ékpónú nɛ̄ ācɛ kú Usúkɔ̄tu tá ɔ̄ ā, nɛ̄ ācɛ Upɛ́nūwɛ̄lu tá ɔ̄ dúú á.

⁹Anɔ́ɔ ó da uwá ka anúɔ géē cīgbīhi wā ɔlɛ́ ɛbɔ́, amáŋ eko nɛ̄ anúɔ gā, anúɔ géē je inu ɛgolɔfú kú uwā ā, wúlatāajɛ.

¹⁰Usɛ́ba mɛ́mla Usalumúna bá Ukákɔ mɛ́mla aícɔ́ɔja kú uwā. Ipú odúúdú ācɛ kú aípɔ́ɔma kú ɛnɔ̄ɔ̄cī kú ígbíli ā, ācɛ o lɛbɛ̄ɛka úlā ofu igwo ahātá ce ula igwɛ́ɛhɔ̄ (15,000) hile mɛ́ɛ̄ á. É lɛ aícɔ́ɔja úlā ofu igwɛ́ɛhɔ̄ cē igwó (120,000) kpó ŋmó.

¹¹Ugídīyɔn le bū ɔwɛ okónōgwu kú ɛnɔ̄ɔ̄cī kú Unóba mɛ́mla Ujógbéha nyɔ̄ í fu uwá wɛɛ́ igbledū, gbɔɔ́ ō kpɛ́fú tú uwā.

¹²Usɛ́ba mɛ́mla Usalumúna, aɔ́cɛ́ ɛpa kú Umídiya ɛpa ā le pɛ́ kwu. Amáŋ ó nū uwā gāá le uwá kpó kwú. Ɛ̄nyā yá kú odúúdú aícɔ́ɔja kú uwā kéē gbɔɔ́ ō yúúfi nɛ̄hi.

¹³Eko nɛ̄ Ugídīyɔn pīyɛyí ŋmá ɛfú, le bū ɔwɛ kú Uhɛ́rɛss ā,

¹⁴Ó le oklóbīya éyi kwú ŋmá Usúkɔ̄tu, ó le ɔ̄kā da ɔ́. Anɔ́ɔ oklóbīya ā le odúúdú iyē kú anyākwɔ́cɛ ofɛtá cigwó ahāapa kú Usúkɔ̄tu ā kpó tá lɛ ɔ́ á.

¹⁵Ugídīyɔn le tá ɛgiyí ācɛ Usúkɔ̄tu, anɔ́ɔ ó da uwá ɔ̄kā ka ɛ́ɛ blakwu eko nēé tá ō tá anúɔ abɔ̄ āa? Uwá ɔ́ɔ ka aá í gáā je ɔdōlé dúúmā lɛ aícɔ́ɔja kú anúɔ ŋ́, eko nɛ̄ ɛ̄jɛ̄ le jɛ̄ uwā ā ŋ́, ohígbū ka anúɔ ɔ́ɔ kwú Usɛ́ba mɛ́mla Usalumúna ɛ́ɛ́ ŋ́. Ācɛ ɛpa ā ɔ́ɔ bá yɔ̄ á.

¹⁶Anɔ́ɔ ó kwú itali kú ɔcí ujē kú ūpū ā ú le anyākwɔ́cɛ kú Usúkɔ̄tu gɔ́, klla le italā yá uwā á.

¹⁷Ó klla kwú ínu olɔfú kú Upínūwɛlu ā ú wúlatāajɛ, klla kwú ācɛ kú igelī nɛ̄hi ɔ́ɔmā ú kpó ŋmó.

¹⁸Ugídīyɔn da Uséba mɛ́mla Usalumúna ɔ̄kā ka ācɛ nēé ŋmó Utábɔ ā, ka abɔ̄ é lɛ āa? É tá ɔ̄ ohi ka ācɛ ā ɛ́ɛ gbla anú. Ka odúúdú uwá ɛ́ɛ lɛbɛ̄ɛka ayí kú ɔcɛ́ ā.

¹⁹Ugídīyɔn da uwá kéē wɛ ayínɛ́ anúɔ, ayí nɛ̄ ɛ́nɛ́ anúɔ ma ā nɛ. Ó klla da uwá ka ɔ́dāŋ keé yɛ í ŋmó ācɛ ɔ́ɔmā ŋ́ nɛɛ, anúɔ í kē yɛ í ŋmó uwā ŋ́ dúú.

²⁰Anɔ́ɔ ó da Ujɛ́ta, ɔ́kplá kú nū ā kóō lɛ uwá kpó ŋmó á. Amáŋ ɔyí ā í pi ɔkpacaŋ́gelī kú nū wɛ̄ɛcɛ ŋmá apɛ́ kóō ŋmó uwā glá ŋ́. Ó yɔ̄ gē yúúfi ohígbū koó wɛ ɔyípɛ̄ kpɔ́ ɛ́ɛ́.

²¹Anɔ́ɔ Usɛ́ba mɛ́mla Usalmúna da Ugídīyɔn koó wā í lɛ aá kpó ŋmó abɔ̄yī nū. É da ɔ́ ka ɔ̄cɛnyīlɔ ɔ́ɔ gē yúklɔ́ kú ɔ̄cɛnyīlɔ á. Anɔ́ɔ Ugídīyɔn le uwá kpó ŋmó, le ɔká nēé tū aínyankwūlūmī kú uwá ɔkɔ ā kpó plla á.

²²Igbīhi ɛ̄nyā ā, ācɛ kú Ísrɛ̄lu da Ugídīyɔn kóō kwú pīya ɔcɛ́ ohɛ́pɔ̄ kú aá. Anú mɛ́mla ayááyí kú nū, nōo géē gboce ɔ́ ā. É ka ɔ́ɔ le aá nyatá ŋmá abɔ̄ kú ācɛ Umídiya ɛɛ́.

²³Ugídīyɔn tá uwā ohi ka anúɔ í gáā wɛ ɔcɛ́ kú uwā ɛ́ɛ́ nɛ̄ ɔyí anúɔ dúúmā géē wɛ ɔcɛ́ ŋ́. Ó ka Óndú ā ɔ́ɔ gáā wɛ ɔcɛ́ kú uwā á.

²⁴Ó klla da uwá ka ɔnyɔɔnyɛ kú uwā kóō lɛ ɔdā ō plahɔ̄ nēé kpó ā kpó gé lɛ anúɔ. Ācɛ kú Umídiya gē le ɔdōplahɔ̄ kú ugóólu pla ahɔ̄ ohígbū keé wɛ ācɛ Íssmɛ̄lu.

²⁵Ācɛ ā tá ɔ̄ ohi ka ɔtū ɔ́ɔ géē he aá nɛ̄hi kú aá kpó ɔdōplahɔ̄ ā lɛ ɔ́. É lɛ īlī nāńdaa, klá ajɛ ɛcɛ, anɔ́ɔ ɔnyɔɔnyɛ gāá lɛ ɔdōplahɔ̄ nōó kpó ā kpó tū ɔ̄ á.

²⁶Ɔdōplahɔ̄ kú ugóólu nɛ̄ Ugídīyɔn mīyɛ ā, gbɛnú bɛ̄ɛka Ukílōgram ofu ā. Ɔká, agbá ōtɔ̄ɔkɔ, mɛ́mla ahilíki kú aɔ́cɛ́, mɛ́mla ɔdōōtɔ̄ɔkɔ kú aínyankwūlūmī í wɛ anú ɛ́ɛ́ ŋ́.

²⁷Ugídīyɔn le ojibó kú ɛcí ma ŋmá anú, anɔ́ɔ ó kwú ɔ̄ í ce igelī nɛ̄hi kú ɔlɛ́ nū Ɔ́fra. Anɔ́ɔ odúúdú ācɛ kú Ísrɛ̄lu kwú igbīhi ú cē kwu Ɔwɔicō gaá gbɔɔ́ ō gbā ojibó kú Ugídīyɔn ɛ̄gbā á. Ɛ̄nyā kwú píya ukpa lɛ Ugídīyɔn mɛ́mla ācɛ ɔlɛ́ nū.

²⁸Ācɛ kú Ísrɛ̄lu lɛ Umídiya yálé. Umídiyan í klla wɛ ɔdūufi lɛ uwá ɛ́ɛ́ gɛ ŋ́. Ajɛ kú Ísrɛ̄lu yɔ̄ ɛbɔ́ iháyí ofɛpa, jāā gbéeko nɛ̄ Ugídīyɔn gekwú.

²⁹Ugídīyɔn lɛ tá ɔlɛ́ nū gāá lā abɔ́ɔ.

³⁰Ó lɛ ayí ofɛtá cigwó, ohígbū koó lɛ anyā alɛwa.

³¹Ɔnyā ōcikpó kú nū éyi yɔ̄ Usɛ́kɛm. Ɔnyā ā mɔyí éyi lɛ ɔ́, nōó hī ɔ̄ ka Abímɛ́lɛ̄ki.

³²Ugídīyɔn, ɔyí kú Ujówāsi gekwú eko nōó le hīla ā. Anɔ́ɔ é le ɔ́ nyi Unóji kú ádā nū, Ujówāsi ɔlɛ́ uwā, Ɔ́fra, nōo yɔ̄ ajɛ kú ipɔ́ɔma kú Abíyɛ̄sa ā.

³³Eko nɛ̄ Ugídīyɔn gekwú ā, ācɛ kú Ísrɛ̄lu le íne kú Ɔwɔicō bīya kpɔ́. É gbɔɔ́ ō gbā ojibó kú Ubáalu ɛ̄gbā kpɔ́. É le ɛka gbo kwú Ubáalu ú pīya ɔwɔ kú úwā.

³⁴É klla gbā Óndú ā, nōo wɛ Ɔwɔicō kú uwā, nōo nya uwá tá ŋmá ɛgiyí odúúdú aólɛlā kú uwā nēe yɛ uwá jīla ā ɛ́ɛ́ gɛ ŋ́.

³⁵Ɔdā olɔhí dóódu nɛ̄ ipɔ́ɔ́nū kú Ugídīyɔn yá lɛ uwá ā, í jɛ̄ uwá eyī ɛ́ɛ́ gɛ ŋ́.