Read idoma ĀCOHƐ́PƆ̄ 9 Bible Online

ĀCOHƐ́PƆ̄ 9 - idoma bible

ĀCOHƐ́PƆ̄ 9

¹Abímɛ́lɛ̄ki, ɔyí kú Ugídīyɔn ā le tá Usɛ́kɛm, ɛga nɛ̄ odúúdú ācɛ ɔlɛ́ ɛ́nɛ́ nū bá ā, anɔ́ɔ ó gāá da uwá ka

²ɛ́ɛ lɛ ɔ̄kā da ācɛnyīlɔ kú Usɛ́kɛm ka, ɛ̄nyá kú ipú ayí ofɛtá cigwó kú Ugídīyɔn ā, he uwá ɔtū fíyɛ́, ipú odúúdú ayí ā kóō gbō uwā ā. Ɔ̄cɛ ékpónú kɛ̄ɛ ka odúúdú uwā. Ó kéē bla ka Abímɛ́lɛ̄ki wɛ oyī mɛ́mla ɔkpíyē kú uwá ā.

³Ācɛ ɔlɛ́ ɛ́nɛ́ nū ā lɛ ɛlā ka lɛ ācɛnyīlɔ kú abɔ́ɔ ā lɛ ɔ́, anɔ́ɔ ācɛ kú Usɛ́kɛ̄m cɛ̄ ka aá ɔ́ɔ géē yɛce Abímɛ́lɛ̄ki, ohígbū koó wɛ ɔmáapú uwā ā.

⁴É le ije nɛ̄hɛ́ ofɛtá ce igwó kpó lɛ ɔ́ ŋmá ipú agbla kú ojibó kú Ubáalu, ɛka ocɛyí kú uwā. Ó bī ije nyā, le ācɛ oyúfú kpó gāá blla iyī nū iyē.

⁵Ó le yɛ tá ɔlɛ́ ádā nū, Ɔ́fra. Ó le ayínɛ́ nū, ayí kú ádā nū, Ugídīyɔn, ofɛtá cigwó, kpó ŋmó ɛyí ɛcɔ̄ ékpónú abɔ́ɔ. Amáŋ, Ujɔ́tam, ɔyí ámōōmɛ kú Ugídīyɔn ā, le kwu tayínū. Ohígbū ɔ́ɔmā, ó ŋ́mó anú ā ŋ́.

⁶Anɔ́ɔ odúúdú ācɛ kú Usɛ́kɛm mɛ́mla Ubɛtimílo le pīya tɔ̄há le pɛ́ ga ɔkwu kú ɔcí óokú nōo kwú pīyɛ ɔ́kpa kú ɛcí nōo kwu abɔ́ɔ ā, gāá kwú Abímɛ́lɛ̄ki ú yá ɔcɛ́ á.

⁷Eko nɛ̄ Ujɔ́tam le ɛ̄nyā pó ā, ó le yɛ gaá háyi ɛyí ɛfu kú Ugɛ́rīsim, anɔ́ɔ ó dɛ̄gba le ɛlā ka lɛ uwá kéē jāhɔ̄ lɛ anúɔ, ācɛ kú Usɛ́kɛm, cɛ́ɛ́ ká Ɔwɔicō kóō jāhɔ̄ lɛ uwá!

⁸Anɔ́ɔ ó da uwá ka eko éyi, aɔ́cí ɔ́ɔ le túbá cɛ́ɛ́ kéē lɛ ɔcɛ́ fu lɛ īyī uwā. É da ɔcí nēé hī ka ólīifu ka anú géē wɛ ɔcɛ́ kú aá á.

⁹Ɔcí nēé hī ka ólīifu ā tá uwā ohi ka oyá ɛ́ɛ́ kú anúɔ géē gbō uwā glá ā, ayíka anúɔ í gáā yá anɔ̄ kú anúɔ̄ nēé gē bī le je ojīlīma lɛ aɔ́wɔ mɛ́mla ācɛ ā, glá gɛ ŋ́.

¹⁰Anɔ́ɔ aɔ́cí ā da ɔcí nēé hī ka ufígi ā kóō kwú pīya ɔcɛ́ kú aá.

¹¹Amáŋ ɔcí nēé hī ka ufígi ā tá uwā ohi ka gbɔbū ɛ́ɛ́ ká anúɔ géē wɛ ɔcɛ́ kú uwā aá ā, ayíka anúɔ ɔ́ɔ klla gáā gwá īkpō olɔnyɛ kú anúɔ ā ɛ́ɛ́ gɛ ŋ́.

¹²Anɔ́ɔ aɔ́cí ā da ɔcí nēé hī ka ufáyin ā ka ɔ́ɔ í lɛ ɔcɛ́ kú aá lé.

¹³Amáŋ ɔcí nēé hī ka ufáyin ā tá uwā ohi koó lɛ ā, anúɔ í klla gáā yá ejé nōo gē yá ká ɔtū kóō he aɔ́wɔ mɛ́mla alɛɛcɛ ā ɛ́ɛ́ gɛ ŋ́.

¹⁴Anɔ́ɔ odúúdú aɔ́cí ā da ɔcí olujē ka ɔ́ɔ wā í lɛ ɔcɛ́ kú aá lé.

¹⁵Anɔ́ɔ ɔcí olujē tá uwā ohi ka ɔ́dāŋ kéē tíne ka anúɔ lé ɔcɛ́ kú uwā ɔkwɔ̄ɔ̄kwɛ̄yi, ayíka é wā í mlɛ́nyɔ́ obobowú kú anúɔ. Ɔ́dāŋ kéē wā ŋ́, ɔlá ɔ́ɔ géē yi ŋmá ābɔ̄ ō lɛ ujē kú anúɔ cɛ́ɛ́ ó kwú aɔ́cí nēé hī ka aúsɛ́da kú Ulɛ́bānɔn ā ú kpó yi.

¹⁶Ujótam klla da uwá ɔ̄kā kéē kɛlā ɔkwɛ̄yi lɛ īyī uwā eko nēé je Abímɛ́lɛ̄ki lé ɔcɛ́ nyā ā? Ó klla da uwá kéē blakwu ipɔ́ɔ́nū kú Ugídīyɔn klla lɛ ojīlīma ká ɔdā nōó yá lɛ uwá ā ce ɔ́ ɔ̄ɔ̄?

¹⁷Ó da uwá kéē bla ka ádā anúɔ ɔ́ɔ kpɛ́fú lɛ uwá, klla le ɛyí cikwū le uwá nyatá ŋmá abɔ̄ kú ācɛ Umídiya ā.

¹⁸Amáŋ ícɛ nyā, é le pīya gbɔɔ́ ō bɛ́yíkwu ipɔ́ɔ́nu kú ádā anúɔ ɛɛ́. Ó klla da uwá kéē le ayí nū ofɛtá cigwó kpó ŋmó ɛyí ɛcɔ̄ ékpónú. Ka ohígbū ka ɔyí obībá kú nū, Abímɛ́lɛ̄ki wɛ ɔmáapu uwā ā, ka ɛ́ɛ kwú ɔ̄ ú pīya ɔcɛ́ kú Ussɛ́kɛm.

¹⁹Ó da uwá ka ɔ́dāŋ ka ɔdā nēé yá Ugídīyɔn mɛ́mla ayí nū ícɛ nyā ā le kpaakpa, ayíka uwá mɛ́mla Abímɛ́lɛ̄ki géē bá ɛbɔ́.

²⁰Amáŋ ɔ́dāŋ koó kē le kpaakpa ŋ́, ɔlá kóō bɛ̄cɛ ŋmá abɔ̄ kú Abímɛ́lɛ̄ki gaá lɛ ācɛnyīlɔ kú Ussɛ́kɛm mɛ́mla Ubɛtimílo yi tāajɛ. Ɔlá kóō kē ŋmá ɛgiyí ācɛnyīlɔ kú Ussɛ́kɛm mɛ́mla Ubɛtimílo gaá lɛ Abímɛ́lɛ̄ki yi tāajɛ.

²¹Abɔ̄ Ujótam gē yúúfi ɔyínɛ́ nū Abímɛ́lɛ̄ki ā, ó le kwu gāá lā Ubíyɛ.

²²Abímɛ́lɛ̄ki gbō ācɛ kú Ísrɛ̄lu iháyí ɛtá.

²³Anɔ́ɔ Óndú cɛ̄ lɛ Abímɛ́lɛ̄ki mɛ́mla ācɛ kú Usɛ́kɛ̄m kwú gbɛlá á. Anɔ́ɔ é lɛyítáajɛ lɛ ɔ́ ɛ́ɛ́ gɛ ŋ́ má.

²⁴Ɔdā nyā yá cɛ́ɛ́ ká Abímɛ́lɛ̄ki mɛ́mla ācɛ kú Ussɛ́kɛm nēe cɛ̄ lɛ ɔ́ kpó ayí kú Ugídīyɔn ofɛtá cigwó ŋmó ā kéē mīyɛ ulé kú ɔdōbɔ̄bí nēé yá ā.

²⁵Ācɛ kú Ussɛ́kɛm lɛ ācɛ kpó kwū ajɛ ipácí ɛyí ɛfu ā gē gbēyī Abímɛ́lɛ̄ki. Ɔ̄cɛ dóódu nōo gáā bū ɔwɛ ɔ́ɔmā, é gē wī ɔ̄ uwī. É le ɔdā ā ka lɛ Abímɛ́lɛ̄ki.

²⁶Anɔ́ɔ Ugáálu, ɔyí kú Ébēdi gā Ussɛ́kɛm mɛ́mla ayínɛ́ nū, anɔ́ɔ ācɛ kú Ussɛ́kɛm kwú ɔtū ú kpó ce ɔ́ á.

²⁷Odúúdú uwā le pɛ́ tá ɛhɔ̄ kú ācɛ Ussɛ́kɛm, le ikpō kú ufáyin kú uwā kpó hɛ́, le ejé yá ŋmá anú, klla le ucɛ yá. É le tá ipú agbla kú ɛcí kú uwā gāá le lé, klla le gwá, klla kɛlā obɔ̄bí nɛ̄hi lɛyíkwu Abímɛ́lɛ̄ki abɔ́ɔ.

²⁸Ugáálu dɔɔ̄ka ka ɛdɔ ācɛ nyá nɛ̄ ɛ́ɛ wɛ Ussɛ́kɛm abɔ́ɔ ā mɛ́ɛ̄? Ɔdíyá nɛ̄ aá gē gbā Abímɛ́lɛ̄ki ɛ̄gbā āa? Ɔ̄nyɛ nɛ̄ ɔ́ɔ kōō wɛ fúlufúlu āa? Kóō wɛ ɔyí kú Ugídīyɔn áncā, ka Usébulu ɔ́ɔ kē wɛ igabɔ̄ kú nū á. Ó kéē cɛ̄ ācɛ nēe wɛ ayááyí kú Uhámɔ, nōo wɛ ádáádā kú ācɛ Ussɛ́kɛm ɛhɔ̄. Ó ka ɔdíyá nɛ̄ aá cíkā ō gbā ɔ̄ ɛ̄gbā āa?

²⁹Ó ka ɔ́dāŋ ka anúɔ gē leyīkwu ācɛ ā á nɛɛ, anúɔ géē yɛ í lɛ Abímɛ́lɛ̄ki ŋmó. Anúɔ géē yɛ í da ɔ́ kóō lɛ aícɔ́ɔja kú nū tútū kóō wā í kpɛ́fú tá aá!

³⁰Usébulu, otrɛ̄yí kú ɔlɛ́ ā, le cɔ̄nū eko nōó lɛ ɛlā nɛ̄ Ugáálu ka ā pó ā.

³¹Ó lɛ ɛhɔ̄ tū fu Abímɛ́lɛ̄ki ajɛ kú Arúma ka Ugáálu, ɔyí kú Ébēdi mɛ́mla ayínɛ́ nū gā Ussɛ́kɛm, kéē gáā cɛ̄ lɛ ɔ́ wā ipú igelī nɛ̄hi ā ɛ́ɛ́ gɛ ŋ́.

³²Ó da ɔ́ ka anú mɛ́mla ācɛ ɔlɛ́ nū, kéē gbɔɔ́ ō wā otú, cɛ́ɛ́ kéē gaá le pɛ́ tayínū ipácí.

³³Cɛ́ɛ́ kéē cāŋjɛ ɔcɔɔ̄cī kéē kpɛ́fú tá igelī nɛ̄hi ā igbledū. Eko nɛ̄ Ugáálu mɛ́mla ācɛ ɔlɛ́ nū ɛ́ɛ gā ɛcɛ lɛyíkwu ɔ́ ɛɛ́, cɛ́ɛ́ ó yá uwā ɔdā nōo he ɔ́ ɔtū, ɛ́gɛ́nɛ̄ ɔ́ɔ lɔfú í kwu lɛ ā.

³⁴Anɔ́ɔ Abímɛ́lɛ̄ki mɛ́mla ācɛ ɔlɛ́ nū gbɔɔ́ otú gaá le tayínū ipácí lɛ īyī uwā hɛ́ ígwu ɛnɛ á.

³⁵Eko nɛ̄ Abímɛ́lɛ̄ki mɛ́mla ācɛ ɔlɛ́ nū ā le Ugáálu má háyi okónɔɔwɛ kú igá kú igelī nɛ̄hi ā, é cāŋjɛ ŋmá ɛga nēé tayínū ā.

³⁶Anɔ́ɔ Ugáálu le uwá má, anɔ́ɔ ó da Usébulu koó má ācɛ nēe bá ī wā ajɛ ŋmá ɛyí ɛfu ā. Usébulu tá ɔ̄ ohi kéē wɛ ācɛ ŋ́, kéē wɛ ojiji kú ɛyí ɛfu nɛ.

³⁷Ugáálu klla da ɔ́ igbɔhá koó má ācɛ bá ī wā ajɛ ŋmá owúlatū kú ɛfu ā, aígwu ɔhá bá ī wā ŋmá ɔwɛ kú ɔkwu ɔcí kú óokú kú ɔ̄cɛ ogwɛ́ɛbā ā.

³⁸Usébulu tá ɔ̄ ohi da ɔ́ ɔ̄kā ka iní nɛ̄ ɛlā ōkā nɛ̄hi kú nū ā ɔ́ɔ yɔ̄ ā gɛ? Ó da ɔ́ ka anú ɔ́ɔ wɛ ɔ̄cɛ nōó dɔɔ̄kā ɔdā nōo yá ɛ́ɛ́ nɛ̄ aá gē gbā Abímɛ́lɛ̄ki á. Ó klla da ɔ́ ka ācɛ nɛ̄ ɔ́ɔ gē cá uwā ɛcá ā ɔ́ɔ bá abɔ́ɔ á, koó nyɔ̄ gɛcɛ í kpɛ́fú tá uwā mɛ́ɛ́nɛ.

³⁹Ugáálu lɛ ācɛ kú Ussɛ́kɛm kpó ga ɛcɛ í kpɛ́fú tá Abímɛ́lɛ̄ki.

⁴⁰Ugáálu lɛ inya kwu. Abímɛ́lɛ̄ki nū ɔ̄ inya. É yá ācɛ alɛwa ágbe okónu igá kú igelī nɛ̄hi ā.

⁴¹Abímɛ́lɛ̄ki lā Arúma, anɔ́ɔ Usébulu le Ugáálu mɛ́mla ayínɛ́ nū, nū bɛ̄cɛ ŋmá Ussɛ́kɛm á. É lā abɔ́ɔ glá ɛ́ɛ́ gɛ ŋ́.

⁴²Oŋmɔ́ɔ̄cī nū, Abímɛ́lɛ̄ki le pó ka ācɛ kú Ussɛ́kɛm, ɛ́ɛ bá ī túbā kéē ga ipácí.

⁴³Anɔ́ɔ ó lɛ ācɛ ɔlɛ́ nū kpó lɛ uwá kɔ̄ ígwu ɛtá, má tayínū ipácí bá ī gbēyī uwā. Eko nōó má ācɛ ā bá í bɛ̄cɛ ŋmá igelī ā, ó gā ɛcɛ ŋmá ɛga nōó tayínū ā, anɔ́ɔ ó le uwá kpó ŋmó á.

⁴⁴Abɔ̄ Abímɛ́lɛ̄ki mɛ́mla ígwu kú nū ā le inya kwu nyɔ̄ í gbō okónɔɔwɛ kú igá kú igelī nɛ̄hi ā, ígwu ɛpa nēe hile ā, le ɛfú kpó tá ācɛ ohile ipácí, le uwá kpó ŋmó.

⁴⁵É kpɛ́fú ā ɛ̄cī ɔ́ɔmā dúúdú. Anɔ́ɔ Abímɛ́lɛ̄ki mīyɛ igelī nɛ̄hi ā. Ó le odúúdú ācɛ kú igelī nɛ̄hi ā kpó ŋmó, klla le ɔlɛ́ ā wúlatāajɛ, le ɔmā pīya klá ajɛ kú ɔlɛ́ ā.

⁴⁶Eko nɛ̄ odúúdú ācɛ nēe bá ipú inu olɔfú kú ɔkplɛ́fú kú Ussɛ́kɛm ā, le ɔdā nōo yá ā pó ā, é le kwu gaá tayínū ipú agbla kú Ubáal-kú-ɛka ā.

⁴⁷É le da Abímɛ́lɛ̄ki ka odúúdú ācɛ ā le iyī uwā túbá abɔ́ɔ.

⁴⁸Anɔ́ɔ ó le tá ɛyí ɛfu mɛ́mla ācɛ ɔlɛ́ nū, kwú āgā ú, lɛ abɔ̄ kú ɔcí hɛ́, kwú ɔ̄ ú ce ɔkɔ á. Ó da ācɛ ɔlɛ́ nū ā kéē lɛ ɔdā ékpónú ɔ́ɔmā yá fíyaa.

⁴⁹Anɔ́ɔ, ɔnyɔɔnyɛ le abɔ̄ kú ɔcí hɛ́ ce ɔkɔ, anɔ́ɔ é yɛce Abímɛ́lɛ̄ki gāá lɛ ɔcí ā túbá ɛga ékpónú ɛga nɛ̄ ācɛ ā bá ā. Anɔ́ɔ é le ɔlá hɛ́ kwu ɔ́ nááná nɛ̄ ācɛ ā bá ipú nū ā. Anɔ́ɔ odúúdú ācɛ nēe bá inu ɛcí abɔ́ɔ ā kwú kpó yɔlá. Ācɛ nēé kwú abɔ́ɔ ā lɛbɛ̄ɛka úlā ɛpa ce ofu igwó (1,000) ā.

⁵⁰Abímɛ́lɛ̄ki le tá Utébēs, le íbɔm cē tū igelī nɛ̄hi ɔ́ɔmā.

⁵¹É lɛ inu olɔfú kú ɔkplɛ́fú gwó kwu igelī abɔ́ɔ, anɔ́ɔ odúúdú ācɛ kú abɔ́ɔ, kwu ācɛnyā mɛ́mla ācɛnyīlɔ, le kwu ga ipú nū, lɛ ɔwɛ gwū tū īyī uwā ipú nū, le pɛ́ tá icō nū.

⁵²Anɔ́ɔ Abímɛ́lɛ̄ki ga okónu ɔwɛ kú inu olɔfú kú ɔkplɛ́fú ā, kóō tɔ̄lá á.

⁵³Amáŋ ɔ̄cɛnyā éyi le ɛgɔ̄ kú nū tá wā ajɛ í ce Abímɛ́lɛ̄ki ɛyí, anɔ́ɔ ɛgɔ̄ ā lɛ ɔ́ ɛyí ca á.

⁵⁴Anɔ́ɔ ó da ɔyípōklóbīya nōo bī iyɛ́fú kú nū ā koó le ɛ̄wā kú nū pi fíyaa kóō lɛ anúɔ ŋmó á. Ó ka anúɔ í tíne ka ācɛ kóō ka ka ɔ̄cɛnyā ɔ́ɔ ŋmó anúɔ ā ŋ́. Anɔ́ɔ ɔyípōklóbīya lɛ ɔkpacaŋ́gelī gwū ó bēé, anɔ́ɔ ó gekwú á.

⁵⁵Eko nɛ̄ ācɛ kú Ísrɛ̄lu má ka Abímɛ́lɛ̄ki ɔ́ɔ gekwú ā, é le pɛ́ kwúcē ga ɔlɛ́.

⁵⁶Ɔwɛ nyā, Óndú ā lɛ ulé kú ɔdōbɔ̄bí nɛ̄ Abímɛ́lɛ̄ki yá ádā nū oŋmá lɛ ayínɛ́ nū ofɛtá cigwó nōó kpó ŋmó ā cila anú.

⁵⁷Óndú ā yá ká ācɛ kú Ussɛ́kɛm kéē móōwē kú ɔ́bíipú kú uwā ɛ́gɛ́nɛ̄ Ujótam ɔyí kú Ugídīyɔn da uwá eko nōó tá okónu lɛ uwá ā.