Read idoma 3 UJƆ́ƆNI 1 Bible Online

3 UJƆ́ƆNI 1 - idoma bible

3 UJƆ́ƆNI 1

¹ Ami Ujɔ́ni, ɔnyākwɔ́cɛ tɔ́kpá nyā gé lɛ Ugáyɔ̄si ɔ̄cɛ ohe um ɔtū, nōo kē he um ɔtū kú ɔkwɛ̄yi ā á.

²Ɔ̄cɛ ohe um ɔtū, n gbɔ̄ɔkɔ ká ɔdā dóódu kóō nyɔ̄ ɔbū lɔhi gā awɔ, ká iyē kóō lɔfú gā awɔ, ɛ́gɛ́nɛ̄ ɔdā dóódu í yá odo kú uwɔ ŋ́ mā ā.

³N gwéeyē nwunééné eko nɛ̄ ācɔ̄lóhɔ́nyɛtá ōhī wā gaá da um ɛ́gɛ́nɛ a kpɔ́tūce Ɔwɔicō ɔ̄kwɛ̄yi ā lɛ ā, ɛ́gɛ́nɛ̄ a kē yēeyī ī lɛyítáajɛ lɛ ɔ̄kwɛ̄yi ā.

⁴O ka ka ayí um bá gē lɛyítáajɛ lɛ ɔ̄kwɛ̄yi ā cɛ̄ gā um gwéeyē fíyɛ́ ɔdā ɔhá dóódu á.

⁵Ɔ̄cɛ ohe um ɔtū, a gē lɛ ɔtū kú uwɔ yéékpó ipú úklɔ́ nɛ̄ a gē yá lɛ ācɔ̄lóhɔ́nyɛtá ā, óó kōō wɛ eko nēé wɛ aúgbɔga nááná.

⁶É gē cījáalí kú ihɔtū kú uwɔ iyɔ̄bū ācɛ icɔ́ɔci kú amānyā ā. A gē yá lɔhi ɔ́dāŋ́ ka ī tū uwā abɔ̄ kéē pīya tá ɔwɛ kú iyāwu kú uwā, ɔwɛ nɛ̄ ɔtū gē he Ɔwɔicō.

⁷Ohígbū ka uwá ī nyɔ̄ iyāwu ɔ́ɔmā ohígbū iyē kú anú nōo wɛ Ɔwɔicō ā. É kē mīyɛ ɔdā dúúmā ŋmá ɛgiyí ācɛ opɛ́cí ā ŋ́.

⁸Ohígbū ɔ́ɔmā alɔ nōo wɛ ācɔ̄lóhɔ́nyɛtá ā cíkā ō tá ācɛ ɛ́gɛ́nyā abɔ̄, cɛ́ɛ́ ká ālɔ̄ wɛ ācɛ o yúklɔ́ tɔ̄há ipú ɔkwɛ̄yi ā.

⁹N lɛ odée lígíí tá tū ɔkpá fu ācɛ icɔ́ɔci ā lɛyíkwu ɛlā ā ɛɛ́. Amáŋ Udiyotrɛ́fīsi nōo tíne ō le pīya otrɛ̄yí kú uwā ā í gáā lɛyítáajɛ lɛ ɛlā nɛ̄ n ka ā ŋ́.

¹⁰Ohígbū ɔ́ɔmā, eko nɛ̄ n gā ā, n géē tū ɔ̄ ɛlá kwu ɔdā nōó yá ā, ɔdōbɔ̄bí nɛ̄hi nōó ka lɛyíkwu alɔ mɛ́mla ɛ̄kɛ̄mgbɛ̄ nɛ̄ ó ī ka ā. Ó wɛ ɔdā nyā ōfūnū nɛ̄ ó gē yá ā ŋ́, ó gē mīya ācɔ̄lóhɔ́nyɛtá wā ɔlɛ́ nū ŋ́ mā a, ó klla gē cɛ̄ ká ācɛ ɔhá kéē mīyɛ ācɛ ā tū ɔlɛ́ uwā ŋ́. Ó klla gē (cēyītīkwū) kóō lɛ ācɛ ā kpó nū ŋmá ipú icɔ́ɔci.

¹¹Ɔ̄cɛ ohe um ɔtū, ā híī gbla ɔdōbɔ̄bí yá ŋ́, amáŋ gbla ɔdā olɔhi yá. Ɔ̄cɛ nōo yá ɔdā olɔhi wɛ ákú Ɔwɔicō, amáŋ ɔ̄cɛ nōo yá ɔdōbɔ̄bí í má Ɔwɔicō ɛ́ɛ́ ŋ́.

¹²Ācɛ dóódu ī ka olɔhi kú Udɛmɛ́trīyɔ̄si, ɛlā ɔ̄kwɛ̄yi ā kē ī ka olɔhi kú nū dúú. Alɔ kē ī cījáalí nū dúú, a kē jé ka ɔdā nɛ̄ alɔ ka ā wɛ ɔkwɛ̄yi.

¹³N lɛ ɔdā alɛwa ō ka gā awɔ, amáŋ ń tíne ō tá ɔ̄ tū ɔkpá ŋ́.

¹⁴Amáŋ n kē leyīce ka n géē má uwɔ ānāānā, cɛ́ɛ́ ká ālɔ̄ kē í lɛ okónu kwu okónu.

¹⁵Ɛbɔ́ kóō yɔ̄ gā awɔ. Odúúdú aóklóbīya alɔ hókónu tū uwɔ. Hókónu tū aóklóbīya alɔ éyééye.