Read idoma UJÚUDU 1 Bible Online

UJÚUDU 1 - idoma bible

UJÚUDU 1

¹Ami Ujúudu, ɔ̄cocɛ̄hɔ̄ kú Ujísɔ̄si Ohɔ́nyɛtá, nōo klla wɛ ɔyínɛ́ nɛ̄ŋ́cɛ́ kú Ujémīsi gē tɔ́kpá fu ācɛ nēe he Ɔwɔicō Ádā ā ɔtū, nɛ̄ Ujísɔ̄si Ohɔ́nyɛtá gē leyīkwu uwá ā á.

²N gē gbɔ̄ɔkɔ kú Ɔwɔicō kóō yɔ̄ gē méyīnyinyi aá, yɔ̄ ī je ɛbɔ́ lɛ aá, klla yɔ̄ ī ma ihɔtū fú lɛ aá ā nwunééné fíyɛ́.

³Ācohumɔtū, ó hímáyī kwu um ɔtū kú n̄ lɛ ɔkpá tá fu aá ohígbū ka Ɔwɔicō lɛ alɔ nyatá tɔ̄há, eko nɛ̄ n má koó cɛgbá kú n̄ lɛ ɔkpá tá fú aá yɔ̄ gē lɛ ɔfú tū aá iyē cɛ́ɛ́ kú aá kóō nunu cɛ̄pɔ̄ ɔtōōkpóce Ohɔ́nyɛtá nɛ̄ Ɔwɔicō je le ācɛ ɔlɛ́ nū igbɛ ékpónú, nōó kē pīyabɔ̄ glá ŋ́ mā.

⁴N gē ka ɛ̄nyā ohígbū ka ācɛ nēé jé Ɔwɔicō ŋ́ mā le plla wɛɛlɛ i tá ipú aá ɛɛ́. Ōwē nɛ̄ Ɔwɔicō géē yá ɛdɔ ācɛ nēe bá nyā, é lɛ ɔ́ ka tɛ́ɛcɛ ipú Ɔkpíihɔ eko otɛtɛ nōo yɛ ā. Ācɛ nēe bá nyā gē lɛ abɔ̄ bá ɔ̄kā kú ɛhi kú eyīnyinyi kú Ɔwɔicō lɛ ācɛ ā kéē yá ɔdōōbɔ̄bí kú uwā. É klla tá Ujísɔ̄si Ohɔ́nyɛtá, nōo wɛ Ɔkpani mɛ́mla Óndú nɛ̄ alɔ lɛ ōfōōfūnū ā.

⁵Nááná nɛ̄ aá kōō lɛ ɛjɛ̄ɛ̄jī ɛ̄nyā jé ā, n tíne ō tū aá ɛlā kwu ɛ́gɛ́nɛ̄ Óndú nyā ācɛ kú Ísrɛ̄lu tá ŋmá abɔ̄ kú ācɛ Íjīpiti ā, amáŋ igbīhāajɛ ā Ɔwɔicō lɛ ācɛ nēé kpɔ́tūce ŋ́ mā kpó yíífi.

⁶Aá gbɛlá kwu aálelékwū-ōtɛ̄hɔ̄ nɛ̄ ɛga kú ɔfú nɛ̄ Ɔwɔicō je lɛ uwá kéē bá ā í jɛ̄ uwā eyī ŋ́ mā, nēé nyɛ̄ɛ̄ ŋmá abɔ́ɔ á. Ɔwɔicō lɛ agbá ō yɔ̄ piyóó tū uwá ipú ajoodobū, ɛga nōó yɔ̄ gē lɛ uwá tū ī gbēyī ɛ̄cī nōó géē kɛpɔ̄ tū uwā ā.

⁷Aá gbɛlá kwu ācɛ kú Usɔ́dɔm mɛ́mla Ugomóra mɛ́mla aígelī nēe yɔ̄ kwu uwā ajaajɛ ā. É yá ucē bɛ̄ɛka aálelékwū-ōtɛ̄hɔ̄ ɔ́ɔmā, bá ī yá unwū obɔ̄bī kú ikpɔ́nyā ōce mɛ́mla ɛdɔ kú ikpɔ́nyā ōce nōo wɛ ɛyɛ́ɛ́yí gwu ákú ācɛ ɔlamu tá. Ɔlá lɛ aígelī nēe bá nyā mɛ́mla ācɛ nēe bá ipú uwā ā kpó yi tāajɛ piyóó. Ōwē nyā kóō wɛ ahɔ̄ nēé gē pi ācobīyíne anú á.

⁸Nááná ɔwɛ ékpónú ɔ́ɔmā dúú ā, ācɛ nēe bá nyā gē nā ɔ̄na nōo gē cɛ̄ lɛ uwā gē je iyē kú uwā tēelihɔ. É gē leyī gwu íkwu kú Ɔwɔicō bónū, é klla gē kɛlā obɔ̄bí kú aálelékwū-ōtɛ̄hɔ̄ o lɔfú nēe bá ɔkpáncō ā.

⁹Amáŋ Umáyíkɛ̄lu nōo wɛ otrɛ̄yí kú aálelékwū-ōtɛ̄hɔ̄ ā í kōō bɔ́tū bī ɛcá le ŋmó ebilíi ɛpɔ̄bí eko nēe yɔ̄ gē nya klla ī yá ikpɛ́lā ce okwū kú Umósīsi ā ŋ́. Amáŋ ó da ɔ́ kahíníī, “Óndú ā lɛ ɛgba dɛ̄ tū uwɔ.”

¹⁰Amáŋ ācɛ nēe bá nyā gē bī ɛcá ī ka obɔ̄bí kú ɔdā dúú nēé jɛ́ɛyí nū ŋ́. Anɔ́ɔ aɔ́dā nēé jɛ́ɛyí uwā bɛ́gɛ́nɛ̄ aɛ́bɛ́ nēé gē gbɛlá ŋ́ mā gē jé ɛyí ɔdā ā, wɛ aɔ́dā nēe gē kpó uwā yíífi á.

¹¹É le jí ɛɛ́, ohígbū kéē yá ɛdɔ ucē nɛ̄ Ukéni yá ā. Ohígbū ije é gbɔɔ́ ō kā ɛdɔ kú ɛ̄kɛ̄mgbɛ̄ nɛ̄ Ubálam ka ā. É yá ɛdɔ kú īkpɛ̄yí olɔfu nɛ̄ Ukóra yá ā. É géē kpó uwā yíífi ɛ́gɛ́nɛ̄ é je Ukóra yíífi ā.

¹²Ācɛ nēe bá nyā lɛbɛ̄ɛka ɔdā oblínyī otū uwēyī ɛgiyí ɔdōlé ō lé tɔ̄há ipú ihɔtū kú aá, abɔ̄ é bá gē wīyā ā. É gē je ɔdōlé lɛ iyī uwā ōfōōfū uwā. É lɛbɛ̄ɛka ojuja nɛ̄ owu gē kpó ī yɛ icííci nōó gē yā ɔwɔ ŋ́ mā ā. É klla lɛbɛ̄ɛka ɔcí nōó gē gwá ikpō ŋ́, ó kōō wɛ eko ɔgwā nááná. Ɔcí nēé lɛ uwá fu tɛgba tɛgba nēe gekwú dúúdú ā.

¹³É lɛbɛ̄ɛka úgbagwú otūufi nɛ̄hi kú ísu ā. Ɔdā uwēyī ō yá kú uwā lɛbɛ̄ɛka ūwū oblínyī nɛ̄ úgbagwú ī kpó bá okónu ísu ā. É lɛbɛ̄ɛka aínyílɔ́wɔ nēé lɛ ɔlɛ́ ŋ́. Ɔwɔicō lɛ ɛga nōo dobū fíyɛ́ dúú ā tū gbēyī uwā kéē bá abɔ́ɔ piyóó ɛɛ́.

¹⁴Énɔ̄ku nōo wɛ ayááyí ɔ́maahāapa ŋmá Ádām ā wɛ ɔ̄cɛ nōo mɛ́ɛbɛ lɛyíkwu ācɛ nēe bá nyā á. Ó kahíníī, “Óndú ā géē wā mla úlúúlā kú aálelékwū-ōtɛ̄hɔ̄ ō tīihɔ kú nū.

¹⁵Kéē kɛpɔ̄ tū odúúdú ācɛ, kéē ŋmó uwā ɛpɔ̄bí ohígbū ucē ɔbíipú nēé yá ā, mɛ́mla ohígbū ɛlā o bɔ̄bí nɛ̄ ācobīyíne nēé je Ɔwɔicō ŋ́ gē ka lɛyíkwu ɔ́ ā!”

¹⁶Ācɛ nēe bá nyā wɛ ācɛ nēe ī ka iŋini mɛ́mla ācɛ nēe ī ŋmó ācɛ ɔhá okónu. É bá gē yá ɔdée ohígbū unwū obɔ̄bí kú uwā ōfōōfūnū. É gē bī iyī uwā gwō nɛ̄hi klla gē yá ācɛ ɛbɛ́ cɛ́ɛ́ kéē lɛ odée lɛ ŋmá ɛgiyí uwā.

¹⁷Amáŋ ācohumɔtū, aá bla kwú ɔdā nɛ̄ ācotɛ̄hɔ̄ kú Óndú Ujísɔ̄si Ohɔ́nyɛtá da aá eko nōo yɛ ā.

¹⁸É da aá kahíníī, “Eko nɛ̄ ɛ̄cī ámōōmɛ ā gā, ācɛ o yá ācɛ ɛbɛ í hɛ́ wɛ̄ɛcɛ, ācɛ nēe gē yɛce únwū obɔ̄bí kú Ɔwɔicō á jé ŋ́ kú uwā.”

¹⁹Ācɛ nēe bá nyā gē hɛ́ iyī uwā gɛcɛ ŋmá ācɛ ohile, ācɛ nēe gē yá ucē bū ɔdā nēé gē gbɛlá ŋ́ mā ā, é klla lɛ Alelékwū kú Ɔwɔicō ŋ́.

²⁰Amáŋ aá, ācohumɔtū, aá kóō yɔ̄ gē bī iyī aá jɛ̄ ipú ɔtū nɛ̄ aá kpóce Ɔwɔicō ōfōōfūnū ā. Aá gbɔ̄ɔkɔ ɛ́gɛ́nɛ̄ Alelékwū Ihɔ ī bī aá jɔ́ɔwɛ lɛ ā.

²¹Aá lā oyēēyī nōo géē cɛ̄ lɛ Ɔwɔicō yíhɔtū tá aá. Aá gbēyī ɛhi kú oyēeyī nōó gē mɛ ŋ́ nɛ̄ Óndú alɔ Ujísɔ̄si Ohɔ́nyɛtá géē je lɛ aá ohígbū koó gē méyīnyinyi ācɛ ā.

²²Aá méyīnyinyi ācɛ nēe lɛ ɔtū obɛ́ɛpa lɛyíkwu ɛlā kú Ɔwɔicō ā.

²³Aá cɛ̄ lɛ ācɛ ohile ā ga ipú ɔlíkɔtɔ ŋ́, aá lɛ uwā pi wā ɔwɛ okpaakpa, amáŋ aá leyī kwɛcɛ gɛɛ kú aá cɛ̄ lɛ uwā kpó ínoōbīya tū aá ŋ́.

²⁴Abālɔbányā, ālɔ̄ cɛ̄tra Ɔwɔicō nōo nyā aá tá ā. Ó lɔfu lɛ aá tū cɛ́ɛ́ kú aá híīī nyɛ̄ɛ̄ ŋmá o kpɔ́tūce Ɔwɔicō ŋ́. Ó klla kē lɔfu yá nɛ̄ aá gáā lɛ ɛnyá ŋ, cɛ́ɛ́ kóō lɛ aá bī wā ɛgiyí nū nōo tū ɛgahi nɛ̄hi ā. Aá kē gē bá ī gwéeyē nɛ̄hi iyɔ̄bū nū.

²⁵Alɔ cɛ̄tra Ɔwɔicō nōo nya alɔ tá bū Ujísɔ̄si Ohɔ́nyɛtá, Óndú alɔ ā. Anú ōfūnu nɛ̄ ɛjɛ̄ɛ̄jī ɛgahi, ojīlīmā kú ɔcɛ́, ɔfú mɛ́mla íkwu wɛ ákú nū gbɔbū nōó yá ɛcɛ ā, kwu abālɔbányā á, kwu eko nōo í wā piyóó á. Aamí.