Read idoma ƆDĀ NĒÉ MAFÚ LƐ UJƆ́ƆNI 10 Bible Online

ƆDĀ NĒÉ MAFÚ LƐ UJƆ́ƆNI 10 - idoma bible

ƆDĀ NĒÉ MAFÚ LƐ UJƆ́ƆNI 10

¹Anɔ́ɔ n má alelékwū-ōtɛ̄hɔ̄ olɔfú nɛ̄hi ɔhá yɔ̄ ī wāajɛ ŋmá ɔkpáncō. Ojuja nōó le wiyē kú úwé ā, ɔwɔ le hɔ́gwā yɛ ɔ́ ɛyí biílí, eyī kú nū gē ceyī bɛ̄ɛka ɛnɔ ā, aíkpó kú nū lɛbɛ̄ɛka aúpíla kú ɔlá ā.

²Ó bī ēpɔ̄kpá éyi nōo le nwúla abɔ̄. Ó lɛ ikpó abɔ̄lɔ́ná ce eyī ísu, ó kē lɛ ikpó abɔ̄lúfīyē ce ɛyí ajɛ.

³Anɔ́ɔ ó lɛ ɔkɔ cɛyí hīgwú bɛ̄ɛka ɔkɔ kú ágábá nóō yɔ̄ ī tōoji ā á. Eko nōó lɛ igwú nyā hī ā, akpáabana cīgwú gbo igbo ahāapa mɛ́mla uya nɛ̄hi.

⁴Eko nɛ̄ akpáabana le gbo igbo ahāapa ā, n gáā tá ɔdā nōó ka ā tū ɔkpá, anɔ́ɔ n pó ɔkɔ ŋmá ɔkpáncō kahíníī, “Kwú ɔdā nɛ̄ akpáabana nōo gbo igbo ahāapa ā ka ā ú tayínū. A híīī tá ɔ̄ tāajɛ ŋ́.”

⁵Anɔ́ɔ alelékwū ōtɛ̄hɔ̄ nɛ̄ n má māháyi eyī ísu mɛ́mla ɛyí ajɛ ā lɛ abɔ̄lɔ́ná kú nū jegiico lɛyíkwu ɔkpáncō.

⁶Anɔ́ɔ ó bī iyē kú Ɔwɔicō nōo yēeyī eko dóódu piyóó, nōo yá ɔkpáncō, mɛ́mla ɛcɛ mɛ́mla ísu, mɛ́mla ɛjɛ̄ɛ̄jī ɔdā dóódu nōo yɔ̄ ipú uwā ā, lɛ ɔkpá gbo á. Aálelékwū-ōtɛ̄hɔ̄ ā kahíníī, “Ɔkwu opiyajɛ dúú í gáā yɔ̄ gɛ ŋ́.

⁷Amáŋ eko nɛ̄ alelékwū-ōtɛ̄hɔ̄ ɔ́mahāapa ā lɛ opo kú nū tá, cɛ́ɛ́ ɔdā nɛ̄ Ɔwɔicō miya tayínū ā le yá jīla kwɛyí, ɛ́gɛ́nɛ̄ ó ka ɔ́ tɛ́ɛcɛ lɛ ācotɛ̄hɔ̄ kú nū, ācomɛ́ɛbɛ ā.

⁸Anɔ́ɔ ɔkɔ nɛ̄ n pó gbɔbū yɔ̄ ī kɛlā ŋmá ɔkpáncō ā klla lɛ ɛlā ka ga um kpɔ́ kahíníī, “Nyɔ̄ gaá mīyɛ ēpɔ̄kpá nōo yɔ̄ ipú abɔ̄ kú alelékwū-ōtɛ̄hɔ̄ nōo hayi eyī ísu mɛ́mla ɛyí ajɛ ā.

⁹Anɔ́ɔ n le yɛ tá ɛgiyí alelékwū-ōtɛ̄hɔ̄ ā gaá da ɔ́ kóō kwú ēpɔ̄kpá ā ú ga um á. Ó da um kahíníī, “Kwú ɔ̄ ú ká ā kwú lé. Ó géē cɛ̄ lɛ ɔtūomá yá uwɔ amáŋ ó kē í lɔnyɛ bɛ̄ɛka ɛnwú ā ipú okónu kú uwɔ.”

¹⁰N kwú ēpɔ̄kpá nɛ̄ŋcɛ́ ā ú ŋmá abɔ̄ alelékwū-ōtɛ̄hɔ̄ ā, anɔ́ɔ n kwú ɔ̄ ú lé ā. Ó lɔnyɛ bɛ̄ɛka ɛnwú ā okónu kú um, amáŋ eko nɛ̄ n lɛ ɔ́ cēmlɛ ā, ó cɛ̄ lɛ ɔtūomá gbɔɔ́ ō yá um.

¹¹Anɔ́ɔ é da um kahíníī, “A géē nyɔ̄ í cɛ̄ olɛhɔ̄ kú Ɔwɔicō lɛyíkwu aéwo alɛwa, ācɛ alɛwa, aúcē alɛwa mɛ́mla aɔ́cɛ́ alɛwa tɛ́ɛcɛ piíí kpɔ́ ɛ́.”