Read idoma ƆDĀ NĒÉ MAFÚ LƐ UJƆ́ƆNI 11 Bible Online

ƆDĀ NĒÉ MAFÚ LƐ UJƆ́ƆNI 11 - idoma bible

ƆDĀ NĒÉ MAFÚ LƐ UJƆ́ƆNI 11

¹É kwú ɔcí nōo lɛbɛ̄ɛka okwutɛ ā nɛ̄ ɔ̄cɛ lɔfú bī le miya ɔdā glá ú ga um anɔ́ɔ é da um kahíníī, “Nyɔ̄ ká ā lɛ Agblīihɔ nɛ̄hi kú Ɔwɔicō mɛ́mla ede ō gwɛ́ɛya ɛyí nū ā kpó miya cɛ́ɛ́ ká ā lɛ ācɛ nēe gē gbā Ɔwɔicō ɛ̄gbā ipú Agblīihɔ-nɛ̄hi ā gbaálūka

²Amáŋ ā híīī miya odúúdɔ̄lɛ́ eyīyɛ̄ɛcɛ kú Agblīihɔ-nɛ̄hi ā ŋ́, ohígbū ka Ɔwɔicō kwú abɔ́ɔ í lɛ aílɔ́wá, nēe géē lɛ ikpó da igelī kú Ɔwɔicō ā tāajɛ ɔyā ofɛpa cɛpa

³N géē je íkwu lɛ ācocījáalí kú um ɛpa nēe géē lɛ úwé ekwu wiyē ā. É géē cɛ̄ olɛhɔ̄ kú Ɔwɔicō ɛplá ɛ̄cī úlā ɛtá ce ofɛtá ɔ́ɔmā ā.”

⁴Ācocījáalí ɛpa ā wɛ aɔ́cí kú olīifu ɛpa mɛ́mla aɔ́dā o le agege ce uwá ɛpa nēe hayi iyɔ̄bū Óndú kú ɛcɛ ā á.

⁵Ɔ́dāŋ́ ka ɔ̄cɛ dúúmā tíne ō yá uwā odée nɛɛ, ɔlá gē tá bɛ̄cɛ ŋmá okónu kú uwā cɛ́ɛ́ ó lɛ aólɛlā kú uwā kpó yíífi. Ɔwɛ nyā nēé gē bī le ŋmó ɔ̄cɛ dúúmā nōo tíne ō yá uwā odée ā.

⁶Ɔwɔicō lɛ ɔfú je lɛ uwá kéē cɛ̄ lɛ ɔwɔ yá ŋ ɛpléeko nēé bá ī cɛ̄ olɛhɔ̄ kú Ɔwɔicō tɛ́ɛcɛ ā. É lɔfú lɛyíkwu aŋ́jɔlɔ kú éŋkpɔ̄, kéē je uwá pīya oyī. É klla lɔfú kéē tū aámíyā nɛ̄hi ɛdɔ ɛyɛ́ɛyɛ́yí dóódu klá ɛcɛ igbalɛwa ɛ́gɛ́ dúúmā nōo he uwá ɔtū

⁷Eko nēé lɛ olɛhɔ̄ kú uwā cɛ̄ kwɛyí ā, ɔ̄cɛ nēé hī ka ‘Ɛbɛ obɔ̄bí’ nōo ŋmá ɔ̄gɔ̄ kú ɔlíkɔtɔ ā géē wā í nuunu tū uwā. Ó géē yá uwā lé klla í kpó uwā ŋmó

⁸Aókwū kú uwā géē bá ajɛ úláyi kú igelī nɛ̄hi ā, ɛga nēé je Óndú uwā nyɔ́kpá ā. Iyē ācīije kú igelī ɔ́ɔmā lé ka Usɔ́dɔm ámāŋ ka Íjīpiti

⁹Ācɛ ŋmá odúúdú aéwo, mɛ́mla aípɔ́ɔma, mɛ́mla aúcē mɛ́mla ɛdɔ ācɛ̄ géē héyī kwu aókwū kú uwa ɛcí ɛtá ce ohɛ́ɛpa kú ɛ̄cī éyi. É gáā cɛ̄ lɛ ɔ̄cɛ dúúmā kpó uwā nyi ŋ́.

¹⁰Ɛjɛ̄ɛ̄jī ācɛ ɛga dóódu kú ɛcɛ ā géē gwéeyē ohígbū kéē lɛ ācocījáalí ɛpa nyā kpó ŋmó ɛɛ́. É géē yá ucɛ klɛɛcɛ, géē tū ɔdā ɛhi gé lɛ aɔ́mpa uwā. Ohígbū ka ācocījáalí ɛpa ā yá alɛɛcɛ ōwē nɛ̄hi.

¹¹Amáŋ abɔ̄ ɛ̄cī ɛtá ce ohɛ́ɛpa kú ɛ̄cī éyi le yá ā, owu kú oyēeyī ŋmá ɛgiyí Ɔwɔicō le tá ipú uwā, anɔ́ɔ é nyāŋjɛ háyicō ā. Ufi le odúúdú ācɛ nēe má uwa ā kwú

¹²Anɔ́ɔ ācocījáalí ɛpa ā pó ɔkɔ éyi dɛ̄gba kɛlā lɛ uwá ŋmá ɔkpáncō kahíníī, “Aá wā icō amānyā.” Abɔ̄ aólɛlā kú uwā bá gē má uwā ā, é yɛ ipú ojuja le pɛ́ tá ɔkpáncō.

¹³Ɔkwɔɔkwu ɔ́ɔmā ajɛ jíliyē nɛ̄ɛ̄nɛ̄hi, anɔ́ɔ āyā éyi ŋmá ipu okɔ̄ ɛga igwó kú igelī ā le gbliífi á. Ācɛ úlā igwáahāapa ce ofigwó le pɛ́ gekwú. Ufi gbɔɔ́ ō yá ācɛ ohile ā nɛ̄ɛ̄nɛ̄hi, anɔ́ɔ é cɛ̄tra ɔfú nɛ̄hi kú Ɔwɔicō nōo yɔ̄ ɔkpáncō ā á.

¹⁴Ɔdā ámíyā nɛ̄hi ɔ́mpa ā mɛ ɛɛ́, amáŋ ɔ́mɛtá ā gē wā fíyaa.

¹⁵Alelékwū ōtɛ̄hɔ̄ ɔ́mahāapa ā lɛ opo kú nū tá, anɔ́ɔ n pó aɔ́kɔ nēe bá ī kɛlā gbōmgbōm ipú ɔkpáncō. É kahíníī, “Ɔfú nēé gē bī le gbō ɛcɛ ā wɛ ákú Óndú alɔ mɛ́mla ákú Ohɔ́nyɛtá nōó fu ā abālɔbányā, ó kē í cɔcɛ́ eko dóódu piyóó!”

¹⁶Anɔ́ɔ anyākwɔ́cɛ ofucɛnɛ nēe cīīce aúgādā ɔcɛ́ kú uwā iyɔ̄bū Ɔwɔicō ā má gbo klá ajɛ, lɛ eyī pīya kláajɛ, le ɛ̄gbā gbā Ɔwɔicō á.

¹⁷É kahíníī, “Alɔ tá uwɔ ahínyá Óndú, Ɔwɔicō nōo lɔfú fíyɛ́ dúú ā. Awɔ yɔ̄ abālɔbányā, awɔ kē tɛtɛ hímáyī yɔ̄ á! Ahínyá,ohígbū ka a bī íkwu nɛ̄hi kú uwɔ ā, wā gaá cɔcɛ́ ɛɛ́.

¹⁸Aílɔ́wá ā le cɔ̄nū, ohígbū ka eko nɛ̄ a gáā ma ícɔ̄nū kú uwɔ fú ā le yá ɛɛ́. Eko nɛ̄ a géē kɛpɔ̄ tū odúúdú ācɛ nēe gekwú ɛɛ́ mā le yá ɛɛ́. Eko le yá nɛ̄ a géē gbā ulé lɛ ācocɛ̄hɔ̄ kú uwɔ, nēe wɛ ācomɛ́ɛbɛ ā, mɛ́mla odúúdú ācɛ ɔlɛ́ uwɔ, nēe gē lɛ ojīlīmā ce uwā, kwu ācɛ nɛ̄hi mɛ́mla ācɛ nɛ̄ŋ́cɛ́ ɛɛ́. Eko ga nɛ̄ a géē ŋmó ācɛ nēe gē kpó ācɛ ŋmó ipú ɛcɛ ā ɛɛ́”

¹⁹Agblīihɔ nɛ̄hi kú Ɔwɔicō nōo yɔ̄ ɔkpáncō ā le nwūla tɔ́ɔtɛ́, anɔ́ɔ é lɛ Ikpati Ɛka kú nu má abɔ́ɔ á. Anɔ́ɔ ɔwɔ gbɔɔ́ ō límanya máa máa, uya nɛ̄hi yá, akpáabana kē yɔ̄ ī gbo klá gbo gblágádáá. Ajɛ yɔ̄ ī jíliyē nɛ̄hi, ɔwɔ owɛ́cɔ̄ nɛ̄hi kē yɔ̄ ī yā.