Read idoma ƆDĀ NĒÉ MAFÚ LƐ UJƆ́ƆNI 12 Bible Online

ƆDĀ NĒÉ MAFÚ LƐ UJƆ́ƆNI 12 - idoma bible

ƆDĀ NĒÉ MAFÚ LƐ UJƆ́ƆNI 12

¹Anɔ́ɔ ɔdā ō hídáagó nɛ̄hi éyi le hɛ́wɛ̄ɛ̄cɛ ɔkpáncō á. Ɔnyā éyi yɔ̄, nōo lɛ ɛnɔ wiyē bɛ̄ɛka úwé ā, kē lɛ aíkpó gwó ce ɛyí ɔyā. Ó kē lɛ ukata nɛ̄ aínyílɔ́wɔ igwɛ́ɛpa kwu ɔ́ kwɛyí.

²Ó yīīpú, le bá ō mɔyí. Ɔnɔ kú ɔma cɛ̄ lɛ ɔ́ yɔ̄ ī jikwū.

³Anɔ́ɔ ɔdā ohídáagó nɛ̄hi ɔhá le hɛ́wɛ̄ɛ̄cɛ ipú ɔkpáncō á. Ɛbɛ obɔ̄bí nɛ̄hi éyi yɔ̄, nōo wɛ ɔnɔ̄wá, kē lɛ ɛyí ahāapa mɛ́mla ajī igwó. Ó klla lɛ ukata kwu éyééye kú aɛ́yí ahāapa ā.

⁴Ó bī ugbé kú nū lɛ āyā éyi ŋmá ipú okɔ̄ ɛga ɛtá kú álūka kú aínyílɔ́wɔ pi wāajɛ ŋmá icō, anɔ́ɔ ó lɛ uwá tá wāajɛ wā ipú ɛcɛ á. Ó háyi iyɔ̄bū ɔnyā ā cɛ́ɛ́ eko dúú nōó lɛ ɔyí ma bōōbū kóō kwú ɔyí ɔnyā ā ú kwú lé.

⁵Anɔ́ɔ ɔnyā ā lɛ ɔyínɔ̄nyīlɔ ma á. Ɔyí nōó ma ā gáā bī ogbló kú oje le gbō odúúdú aéwo á. Amáŋ gbɔbū ka ɛbɛ́ obɔ̄bí ā kóō í kwú ɔyí ā, é lɛ ɔyí ā nú ga ɔkpáncō gaá lɛ Ɔwɔicō ɛgiyí akpa kú ɔcɛ́ kú nū.

⁶Ɔnyā ā le kwu tá ipú ígbíli ga ɛga nɛ̄ Ɔwɔicō tútū gbēyī nū ā, nēé géē leyīkwu ɔ́ ɛ̄cī ulá ɛtá ce ofɛtá ā.

⁷Anɔ́ɔ igbeékpónú é gbɔɔ́ ō kpɛ́fú ɔkpáncō. Otrɛ̄yí kú alelékwū-ōtɛ̄hɔ̄, Umáyíkɛ̄lu mɛ́mla aálelékwū-ōtɛ̄hɔ̄ nōó kpó trɛ̄yí ā bá ī nuunu tú ɛbɛ́ obɔ̄bí ā. Anɔ́ɔ ɛbɛ́ obɔ̄bí ā mɛ́mla aálelékwū-ōtɛ̄hɔ̄ nōó kpó trɛ̄yí ā kē nuunu tū uwā kwúcē á.

⁸Amáŋ é lɛ ɛbɛ́ obɔ̄bí ā yálé, anɔ́ɔ é je ɛga lɛ anú mɛ́mla aálelékwū-ōtɛ̄hɔ̄ kú nū kéē bá ɔkpáncō gɛ ŋ́ má.

⁹Anɔ́ɔ é lɛ ɛbɛ obɔ̄bí nɛ̄hi ɔ́ɔmā tá wāajɛ á. Ɛbɛ́ obɔ̄bí ɔ́ɔmā nōo wɛ ‘Ɛgwā kú ígblé ɔ́ɔmā’, nēé hī ka ebilíi ámāŋ ka Usétan, nōo plla odúúdú ācɛ kú ipú ɛcɛ á. É lɛ ɔ́ tá wāajɛ gā ipú ɛcɛ, mɛ́mla odúúdú aálelékwū-ōtɛ̄hɔ̄ nōó kpó trɛ̄yí ā.

¹⁰Anɔ́ɔ n pó ɔkɔ éyi nēe dɛ̄gba kɛlā ŋmá ɔkpáncō yɔ̄ ī ka kahíníī, “Abālɔbányā, Ɔwɔicō géē nya ācɛ ɔlɛ́ nū tá! Abālɔbányā, ó géē bī ɔfú kú nū gbō ɛcɛ bɛ̄ɛka ɔcɛ́ ā. Ohɔ́nyɛtá nōó fu ā kē í bī íkwu kú nū le gbō ɛcɛ abālɔbányā! Ohígbū ka ebilíi nōo gē hayi iyɔ̄bū ɔwɔicō ī kpɛ́lāce ayínɛ́ alɔ ɔlɛ́ɛnɔ mɛ́mla otú ā, é lɛ ɔ́ tá wāajɛ ŋmá ɔkpáncō ɛɛ́.

¹¹Oyī kú Ɔyí álá ā mɛ́mla olɛhɔ̄ ɔkwɔ̄ɔ̄kwɛ̄yi nēé ka tɛ́ɛcɛ ā cɛ̄ lɛ uwá le ebilíi ā yálé ɛɛ́. Ohígbū keé kóō yúufi ikwū ŋ́, amáŋ é le tútū ō kwú.

¹²Ohígbū ɔ́ɔmā, odúúdú aá nēe lā ɔkpáncō ā, aá gwéeyē. Amáŋ ācɛ nēe lā ipú ɛcɛ mɛ́mla ísu ā le jí ɛɛ́, ohígbū ka ebilíi gāajɛ gaá tá ipú aá ɛɛ́. Ó le cɔ̄nū nɛ̄hi, ohígbū koó jé ka eko ɔ́ɔ hile kpiíí lɛ anúɔ.”

¹³Eko nɛ̄ ɛbɛ́ obɔ̄bí ā le jé kéē lɛ anúɔ tá wāajɛ ŋmá ɔkpáncō ā, ó gbɔɔ́ ō nū ɔnyā nōo ma ɔyínɔ̄nyīlɔ ā inya.

¹⁴É lɛ acá ɛpa kú okpé kpó lɛ ɔnyā ā, cɛ́ɛ́ kóō le wu ga ɔlɛ́ nū ipú ígbíli, ɛga nēé géē leyīkwu ɔ́ iháyí ɛtá ce ɔyā ɛhīlī.

¹⁵Anɔ́ɔ ɛbɛ́ obɔ̄bí ā le éŋkpɔ̄ nōo nwuné bɛ̄ɛka ísu ā gba ŋmá okónu lɛyíkwu ɔnyā ā cɛ́ɛ́ kú enyi ā kóō kwú ɔ̄ ú.

¹⁶Amáŋ ɛcɛ lɛ ɔnyā a tábɔ̄. Ajɛ lɛ okónu nwúla anɔ́ɔ ó kwú éŋkpɔ̄ nōo ŋmá okónu kú ɛbɛ́ obɔ̄bí ā í mlɛ á.

¹⁷Ɛbɛ́ obɔ̄bí ā le cɔ̄nū nɛ̄hi abɔ̄ ɔnyā ā le kwu ā, anɔ́ɔ ó nyɛ̄ɛ̄ gaá gbɔɔ́ ō nuunu tú ayááyí kú ɔnyā ā á. Ó nuunu tú odúúdú ācɛ nēe lɛyítáajɛ lɛ íne kú Ɔwɔicō ā, mɛ́mla ācɛ nēe cɛ̄ɛ̄lā ɔkwɛ̄yi nɛ̄ Ujísɔ̄si mafú ā.

¹⁸Anɔ́ɔ ɛbɛ́ obɔ̄bí ā māháyi[1] okónu ísu āá.