Read idoma ƆDĀ NĒÉ MAFÚ LƐ UJƆ́ƆNI 13 Bible Online

ƆDĀ NĒÉ MAFÚ LƐ UJƆ́ƆNI 13 - idoma bible

ƆDĀ NĒÉ MAFÚ LƐ UJƆ́ƆNI 13

¹Anɔ́ɔ n má ɛbɛ́ éyi yɔ̄ ī bɛ̄cɛ ŋmá ísu á. Ó lɛ ajī igwó mɛ́mla īkpɛ̄yí ahāapa. Ó lɛ ukata eyééye kwu aájī igwó kú nū ā. Iyē éyééyē nōo ī bīya iyē kú Ɔwɔicō bá éyééye kú aíkpɛ̄yí kú nū ā.

²Ɛbɛ́ nɛ̄ n má ā lɛbɛ̄ɛka ɛjɛ ā, ikpó kú nū lɛbɛ̄ɛka ikpó kú ɛbɛ obɔ̄bí ɔhá nēé hī ka Ubɛ́ɛ ā. Okónu kú nū lɛbɛ̄ɛka okónu kú ágábá ā. Anɔ́ɔ ɛbɛ obɔ̄bí nɛ̄hi kú aflɛ́yí ā kwú ɔfú kú nū, akpa kú ɔcɛ́ kú nū, mɛ́mla íkwu nɛ̄hi nōó lɛ ā í kpó lɛ ɛbɛ́ ɔhá ā.

³Éyi kú īkpɛ̄yí kú ɛbɛ́ obɔ̄bí ɔ́mpa ā lɛ odée nōo lɛbɛ̄ɛka ofu kú ágbe nōo cíkā ō ŋmó ɔ̄ glá ā, amáŋ ágbe obɔ̄bí bɔ̄bí ā le jé ɛɛ́. Odúúdú ācɛ kú ipú ɛcɛ le kpó hídáagó, anɔ́ɔ é bá ī yɛce ɛbɛ́ obɔ̄bí ā á.

⁴Ɛjɛ̄ɛ̄jī ācɛ bá ī gbā ɛbɛ́ obɔ̄bí nɛ̄hi kú aflɛ́yí ā ɛ̄gbā ohígbū koó kwú odúúdú íkwu kú nū í kpó lɛ ɛbɛ́ ɔ́mpa ā. É bá ī gbā ɛbɛ́ ɔ́mpa ā ɛ̄gbā dúú, bá ī ka kahíníī, “Ɔ̄nyɛ lɛbɛ̄ɛka ɛbɛ́ ɔ́mpā ā gɛ? Ɔ̄nyɛ nuunu tú ɔ̄ glá gɛ?

⁵É lɛ ɛga je lɛ ɛbɛ́ ɔ́mpa ā kóō gwō, klla kɛlā nōo wɛ atufú lɛ Ɔwɔicō. Anɔ́ɔ Ɔwɔicō lɛ ɛga je lɛ ɔ́ kóō lɛ íkwu yá ɔdā nōo he ɔ́ ɔtū ɔyā ofɛpa ce ɛpa

⁶Ó gbɔɔ́ ō ka atufú lɛ Ɔwɔicō, ī bīya iyē kú nū mɛ́mla iyē kú ācɛ nēe lā ɔkpáncō ā.

⁷É je ɛga lɛ ɔ́ kóō nuunu tú ācɛ ɔlɛ́ Ɔwɔicō kóō yá uwā lé. Ɔwɔicō je íkwu lɛ ɔ́ lɛyíkwu ipɔ́ɔma dóódu, éwo dóódu, ucē dóódu mɛ́mla ācɛ dóódu

⁸Odúúdú ācɛ nēe lā ipú ɛcɛ ā géē gbā ɔ̄ ɛ̄gbā. Ācɛ nēé tá iyē kú uwā tū ipú ɔkpá kú oyēeyī gbɔbū nēé yá ɛcɛ ā ōfōōfū uwā í gáā gbā ɔ̄ ɛ̄gbā ŋ́ má. Ɔkpá ā wɛ ákú Ɔyí álá nēé ŋmó ā.

⁹Ɔ̄cɛ dúúmā nōo ī páhɔ̄ ayíkā ō pó ɛlā nyā.

¹⁰Ɔ̄cɛ dúú nēé le miya kéē lɛ ɔ́ kwú, é géē kwú ɔ̄ piíí. ɔ̄cɛ dúú nēé le miya ka ɔkpacaŋ́gelī nēé géē bī le ŋmó ɔ̄ á, ɔkpacaŋ́gelī nēé géē bī le ŋmó ɔ̄ piíí á. Ɛnyā ī mafu ka ācɛ ɔlɛ́ Ɔwɔicō cíkā ō lɔtūlé kéē háyi kpaakpa lɛ Ohɔ́nyɛtá piíí.

¹¹Anɔ́ɔ n má ɛbɛ́ ɔhá ɔ́mɛ́tá nōo bɛ̄cɛ ŋmá ipú ajɛ á. Ó lɛ ajī ɛpa bɛ̄ɛka ajī kú omlede ā, ó kē kɛlā bɛ̄ɛka ɛbɛ́ obɔ̄bí nɛ̄hi éyi ā.

¹²Ó bī ɛjɛ̄ɛ̄jī íkwu kú ɛbɛ́ ɔ́mpa ā le yúklɔ́ ipéyī ɔ́mpa ā. Ó pi odúúdú ācɛ nēe bá ipú ɛcɛ ā abɔ̄fú kéē gbā ɛbɛ́ ɔ́mpa nɛ̄ ágbe kú nū jé ā ɛ̄gbā.

¹³Ɛbɛ́ ɔmɛ́tá nyā yá ɔdā o hídáagó nɛ̄hi. Ó kōō yá kú ɔlá kóō wāajɛ ŋmá ɔkpáncō wā ipú ɛcɛ ipéyī kú ɛjɛ̄ɛ̄jī ācɛ.

¹⁴Ɔwɔicō lɛ ɛga je lɛ ɛbɛ́ ɔ́mɛtá ā kóō yúklɔ́ o hɛ ācɛ idáagó iyɔ̄bū ɛbɛ́ obɔ̄bí ɔ́mpa ā cɛ́ɛ́ kóō bī ɔwɛ nyā lɛ ācɛ nēe lā ipú ɛcɛ ā plla cɛ́ɛ́ kéē bīya íne kú Ɔwɔicō. Ɛbɛ́ ɔ́mɛtá ā da ācɛ ā kéē lɛ ojíbó gbā gbla ɛbɛ́ obɔ̄bí ɔ́mpā nēé bī ɔkpacaŋ́gelī yá ɔ̄ ágbe amáŋ nōo yēeyī ā.

¹⁵Ɔwɔicō lɛ ɛga je lɛ ɛbɛ́ ɔ́mɛtá ā kóō lɛ owu kú oyēeyī fu tū ojíbó ā kóō lɔfú kɛlā, cɛ́ɛ́ kóō yá kéē lɛ ācɛ nēé gáā gbā ɔ̄ ɛ̄gbā ŋ́ mā kpó ŋmó.

¹⁶Ɛbɛ́ ɔ́mɛtá ā pi odúúdú ācɛ abɔ̄fú, ācɛ nɛ̄hi mɛ́mla ācɛ nɛ̄ŋ́cɛ́, aólɔdu mɛ́mla aólɛhá, ācɛ nēe lɛ īyī uwā mɛ́mla aɔ́fiyɛ, kéē lɛ uwá fukɔ̄ abɔ̄lɔ́ná amáŋ ka udɔ̄bū kú uwā.

¹⁷Ɔ̄cɛ dúú nēé fu ɔ́ ɔkɔ̄ nyā mɛ́mla iyē kú ɛbɛ́ obɔ̄bí ɔ́mpa ā ámāŋ ka álūka nōo kwɛyí iyē kú nū ā ŋ́, í gáā lá ɔ́lá glá ŋ́, ó kē gáā je ɔlá lá glá ŋ́.

¹⁸Ɛnyā ā wɛ ɔdā nōo cɛ̄gbá íjéeyī. Ɔ̄cɛ nōo jɛ́yí odée kóō lɛ ɛyí álūka nōo kwɛyí kú iye kú ɛbɛ́ ɔ́mpa ā bllatɛ̄ɛcɛ kóō lɛ ɔ́ jé. Ohígbū ka álūka ā kwɛyí iyē kú ɔ̄cɛ. Áluka ā kē wɛ úlā ce ofigwahātá ce ɛhīlī (666).