Read idoma ƆDĀ NĒÉ MAFÚ LƐ UJƆ́ƆNI 14 Bible Online

ƆDĀ NĒÉ MAFÚ LƐ UJƆ́ƆNI 14 - idoma bible

ƆDĀ NĒÉ MAFÚ LƐ UJƆ́ƆNI 14

¹N pīyeyī, anɔ́ɔ n má Ɔyí álá ā ce ɛyí ɛfu kú Usáyɔn á. Ācɛ úlā ofigwáahātá nēe bī iyē kú Ɔyí álá ā mɛ́mla iyē kú Ádā nū fu uwá ukɔ̄ udɔbu ā bá mɛ́mla anú.

²Anɔ́ɔ n pó ɔkɔ éyi ŋmá ɔkpáncō nōo kɛlā bɛ̄ɛka ekwukwu kú éŋkpɔ̄ nōo gē pɛ́ ŋmá icō wāajɛ ā. Ó klla kɛlā bɛ̄ɛka ɔkɔ kú akpáabana nɛ̄hi ā. Ɔkɔ ā klla kɛlā bɛ̄ɛka ɔkɛ̄la kú aógwúmogwú alɛwa nɛ̄ ācɛ alɛwa bá gē gwō ā.

³Ācɛ úlā ofigwáahātá māháyi iyɔ̄bū akpa kú ɔcɛ́, iyɔ̄bū aɔ́dā oyēeyī ɛnɛ ā mɛ́mla iyɔ̄bū anyākwɔ́cɛ ā. É bá gē gwííjē ɛ̄yīpɛ̄ éyi, nɛ̄ uwá ōfōōfūwā nwū glá ā. Ó ŋmá ipú odúúdú ācɛ kú ipú ɛcɛ ā, uwá ōfōōfūwā nēé fula ā.

⁴É wɛ ācɛ nēe lɛ īyī uwā tū yēŋēē ohígbū keé ciikpɔ́nyā jééjé ɛ́ ŋ́. É gē tú Ɔyí álá ɔkwu ɛga dúú nōó nyɔ̄ ā. É lɛ uwá fula ŋmá ipú ācɛ ohile, uwā ā kē wɛ ācɛ aflɛ́yí nēé je kpó gwɛ́ɛya lɛ Ɔwɔicō mɛ́mla Ɔyí álá ā á.

⁵É kē kɛmgbɛ jééjé ɛ́ ŋ́, é kē lɛ ɛnyá dúúmā ŋ́.

⁶Anɔ́ɔ n má alelékwū-ōtɛ̄hɔ̄ ɔhá nōo yɔ̄ ī wu icō fíyēlíí ipú ɔkpáncō á. Ó bī olɛhɔ̄ kú ɔ̄kōolɔhi nōo ī mɛ ŋ́ mā wā gaá ka tɛ́ɛcɛ lɛ ācɛ kú ipú ɛcɛ, kwú ɛjɛ̄ɛ̄jī ācɛ, mɛ́mla ipɔ́ɔ́ma, mɛ́mla ucē, mɛ́mla éwo.

⁷Anɔ́ɔ ó lɛ ɔkɔ cɛyí dɛ̄gba kahíníī, “Aá lɛ ojīlīmā ce Ɔwɔicō cɛ́ɛ́ kú aá cɛ̄tra ɔ́ kú ɛ́gɛ́nɛ̄ ó lɔfú lɛ ā. Ohígbū ka eko nōó gáā kɛpɔ̄ tū alɛɛcɛ ā le yá ɛɛ́. Aá gbā anú nōo yá ɔkpáncō mɛ́mla ɛcɛ, mɛ́mla ísu nɛ̄hi mɛ́mla njɔlɔ kú éŋkpɔ̄ ā ɛ̄gbā!”

⁸Alelékwū-ōtɛ̄hɔ̄ ɔ́mpa tú ákú aflɛ́yí ā ɔkwu yɔ̄ ī ka kahíníī, “Ó kwú gblífi ɛɛ́! Ubábīlɔn nɛ̄hi ā kwú gblífi ɛɛ́! Ucē obɔ̄bí kú Ubábīlɔn ā lɛ odúúdú aéwo kú ipú ɛcɛ kpó bīya, lɛbɛ̄ɛka ejé olɔfú nōo kpó lɛ uwá gwá kwú uwā ā.”

⁹Alelékwū-ōtɛ̄hɔ̄ ɔ́mɛtá, tú aɛ́pa kú aflɛ́yí ā ɔkwu, lɛ ɔkɔ cɛyí yɔ̄ ī dɛ̄gba kahíníī, “Ɔ̄cɛ dúúmā nōo gē gbā ɛbɛ́ obɔ̄bí ā mɛ́mla ojibó kú nū ɛ̄gbā, nōo klla cɛ̄ lɛ uwá lɛ ɔ́ fukɔ̄ udɔ̄bū ámāŋ ka abɔ̄lɔ́ná,

¹⁰géē jé ɔnɔ kú italā nɛ̄ Ɔwɔicō abɔ̄yī nū géē yá ɔ̄ ohígbū ícɔ̄nū nɛ̄hi kú nū ā, lɛbɛ̄ɛka ɔ̄cɛ nōo ī gwá ejé olɔfú nēé lɛ ɔdā dúú pū ɔ̄ ipú ŋ́ mā. É géē bī ɔlá mɛ́mla ɛcɔ̄ ōwō le yá ācɛ nēe bá nyā ōwē ipéyī aálelékwū-ōtɛ̄hɔ̄ ā mɛ́mla ipéyī Ɔyí álá ā.

¹¹Ɔlá nēé gáā bī le yá uwā ōwē ā géē yɔ̄ gē yi piyóó. Ōwē kú ācɛ nēe gē gbā ɛbɛ́ obɔ̄bí ā mɛ́mla ojíbó kú nū ɛ̄gbā ā, mɛ́mla ákú ācɛ nēe cɛ̄ nēé lɛ iyē kú ɛbɛ́ obɔ̄bí ā fu uwá ukɔ̄ ā í lɛ ō jɛga lɛ uwā kéē mlɛ́nyɔ̄ ŋ́, kwu otú kwu ɔlɛ́ɛnɔ.”

¹²Ɛ̄nyā mafú ka kú ācɛ ɔlɛ́ Ɔwɔicō nēe gē lɛyítáajɛ lɛ íne kú nū ā klla gē yɛce Ujísɔ̄si kpaakpa ā cíkā ō lɔtūlé.

¹³Anɔ́ɔ n pó ɔkɔ éyi ŋmá ɔkpáncō yɔ̄ ī kɛlā ga um kahíníī, “Lɛ ɛ̄nyā tá tāajɛ. Ákú ācɛ nēe géē kwú ohígbū keé bá ī yɛce Óndú ā kpaakpa ŋmá abālɔbányā gɔbū ā lɔhi nɛ̄hi.” Alelékwū Ihɔ ā tóohi kahíníī, “Īī, ɔ́ɔmā wɛ ɔkwɛ̄yi! É géē mlɛ́nyɔ́ ipú abahi ŋmá ipú ōwē nēé má ā, ohígbū ka úklɔ́ nēé yá ā géē yɛce uwá, géē cījáalí lɛ uwá!”

¹⁴N pīyeyī, n má ojuja nɛ̄hɛ́, anɔ́ɔ n má ɔdā nōo lɛbɛ̄ɛka ɔlɛɛcɛ ā cīīce ɛyí ojuja. Ó lɛ ukata kú ugóolu kwɛyí, anɔ́ɔ ó bī ɛwā nēé ī bī cɔ̄dɛ̄hɔ̄ olulé abɔ̄

¹⁵Anɔ́ɔ alelékwū ōtɛ̄hɔ̄ ɔhá le bɛ̄cɛ ŋmá ipú Agblīihɔ-nɛ̄hi, lɛ ɔkɔ cɛyí dɛ̄gba nɛ̄hi da ɛ̄nɛ̄ o cīīce ɛyí ojuja ā kahíníī, “Kwú ɛwa o cɔ̄dɛ̄hɔ̄ kú uwɔ ú ká ā cɔ̄dɛ̄hɔ̄, ohígbū ka eko nēé ī cɔ̄dɛhɔ ā le yá ɛɛ́. Ɛcɛ le pīya kéē cē ɔ̄ bɛ̄ɛka ɔdɛ̄hɔ̄ ā ɛɛ́

¹⁶Anú nōo cīīce ɛyí ojuja ā tá ɛ̄wā o cɔ̄dɛ̄hɔ̄ kú nū ga ipú ɛcɛ, anɔ́ɔ ó lɛ ɛcɛ ce bɛ̄ɛka ɛhɔ̄ ā á.

¹⁷Anɔ́ɔ alelékwū ōtɛ̄hɔ̄ ɔhá le bɛ̄cɛ ŋmá Agblīihɔ-nɛ̄hi nōo yɔ̄ ɔkpáncō ā. Ó bī ɛwa ocɔ̄dɛ̄hɔ̄ olulé abɔ̄ dúú.

¹⁸Alelékwū ōtɛ̄hɔ̄ nōo leyīkwu ɔlá, ga ŋmá ɛgiyí ede ā. Ó lɛ ɔkɔ cɛyí dɛ̄gba nɛ̄hi da alelékwū-ōtɛ̄hɔ̄ nōo bī ɛwa ocɔ̄dɛ̄hɔ̄ olulé abɔ̄ ā káhíníīī, “Bī ɛ̄wā ocɔ̄dɛ̄hɔ̄ kú uwɔ ká ā lɛ aíkpɔ̄cí kú ɔcí ufáyin kú ɛcɛ ā kpó cē, ohígbū ka aíkpɔ̄cí ā le pīya ɛɛ́.”

¹⁹Anɔ́ɔ alelékwū ōtɛ̄hɔ̄ ā lɛ ɛ̄wā ocɔ̄dɛ̄hɔ̄ kú nū tá ga ipú ɛcɛ, lɛ alítā kú aíkpɔ̄cí ufáyin ā hɛ́ ŋmá ɔcí ufáyin ā. Ó lɛ uwá kpó tá tū ɛga nɛ̄hi kú ícɔ̄nū kú Ɔwɔicō nēé gē da uwá, ī yá ejé ŋmá uwá ā. Ɔ́ɔmā kwɛyí ícɔ̄nū kú Ɔwɔicō.

²⁰É lɛ ikpó wú aíkpɔ̄cí ufáyin ā ipú ɛga o yá ejé nōo yɔ̄ eyīyɛ̄ɛcɛ kú igelī ā. Oyī nōo bɛ̄cɛ ŋmá anú ā pɛ́ bɛ̄ɛka ukilómīta ofigwo ā. Olipú kú nū kē wɛ umíta ɛpa.