Read idoma ƆDĀ NĒÉ MAFÚ LƐ UJƆ́ƆNI 15 Bible Online

ƆDĀ NĒÉ MAFÚ LƐ UJƆ́ƆNI 15 - idoma bible

ƆDĀ NĒÉ MAFÚ LƐ UJƆ́ƆNI 15

¹Anɔ́ɔ n má ɔdā idáagó nɛ̄hi ɔhá nōo yéyījii ɔkpáncō. Aálelékwū-ōtɛ̄hɔ̄ ahāapa bī aámíyā nɛ̄hi ahāapa nēe wɛ ákú ámōōmɛ ā abɔ̄. Eko nɛ̄ aɛ́nyā le yá kwɛyí, ícɔ̄nū kú Ɔwɔicō kē kwɛyí ɛɛ́.

²Anɔ́ɔ n má odée nōo lɛbɛ̄ɛka ísu kú ogigo nōo le wīya tɔ̄há mɛ́mla ɔlá ā. N klla má ācɛ nēe yá ɛbɛ́ obɔ̄bí ā mɛ́mla ojíbó kú nū mɛ́mla álūka nōo kwɛyí iyē nū ā lé ā. É māháyi pi ísu nōo gē ceyī bɛ̄ɛka ogigo ā bī ogwúmogwú nɛ̄ Ɔwɔicō je lɛ uwá ā abɔ̄.

³É bá gē gwííjē nɛ̄ Umósīsi, ɔ̄cocɛ̄hɔ̄ kú Ɔwɔicō, gwó ā. É bá ī gwíijē nɛ̄ Ɔyí álá ā gwó ā dúú É bá ī gwó kahíníī, “Óndú nōo wɛ Ɔwɔicō nōo lɔfú fíyɛ́ dúú ā, aɔ́dā nɛ̄ a gē yá ā nwuné nɛ̄hi, klla wɛ ɔdīīdáagó! Ɔcɛ́ kú odúúdú aéwo,[2] ɔwɛ nɛ̄ a gē yá odée kú uwɔ āle kpaakpa, klla wɛ ɔkwɔ̄ɔ̄kwɛ̄yi.

⁴Ɔ̄nyɛ í gáā yúúfi, klla cɛ̄tra iyē kú uwɔ ŋ mā, Óndú? Awɔ ōfōōfūwɔ tīihɔ ā. Odúúdú aéwo ā géē wā í gbā uwɔ ɛ̄gbā, ohígbū ka ɛjɛ̄ɛ̄jī ācɛ má úklɔ́ okpaakpa kú uwɔ.”

⁵Igbīhi ɛ̄nyā n pīyeyī, n má ɛga nōo tīihɔ̄ fíyɛ́ dúú kú Áklɔ̄kpīihɔ kú ɔkpáncō ā le nwūla tɔ́ɔtɛ́.

⁶Anɔ́ɔ aálelékwū-ōtɛ̄hɔ̄ ahāapa nēe bī aámíyā nɛ̄hi ā le bɛ̄cɛ ŋmá Áklɔ̄kpīihɔ ā á. É lɛ īlī nɛ̄hɛ́ oceyī wiyē, anɔ́ɔ é klla lɛ īlī (igbogbo) kú ugóolu kwú ɔtū kú uwā á.

⁷Éyi kú aɔ́dā oyēeyī ɛnɛ ā lɛ ocíbú ahāapa nēé le ícɔ̄nū kú Ɔwɔicō nōo yēeyī piyóó ā tū uwā omōōmu ā, kpó lɛ aálelékwū-ōtɛ̄hɔ̄ ahāapa ā.

⁸Ódūdū le mu Áklɔ̄kpīihɔ ā ohígbū ojāglīmā mɛ́mla ɔfú kú Ɔwɔicō, anɔ́ɔ ɔ̄cɛ dúú í bēhé ga ipú Agblīihɔ-nɛ̄hi ā glá ŋ́ jāā gbéeko nɛ̄ aámíyā nɛ̄hi ahāapa nɛ̄ aálelékwū-ōtɛ̄hɔ̄ ahāapa bī ā le yá kwɛyí.