Read idoma ƆDĀ NĒÉ MAFÚ LƐ UJƆ́ƆNI 16 Bible Online

ƆDĀ NĒÉ MAFÚ LƐ UJƆ́ƆNI 16 - idoma bible

ƆDĀ NĒÉ MAFÚ LƐ UJƆ́ƆNI 16

¹Anɔ́ɔ n pó ɔkɔ éyi dɛ̄gba nɛ̄hi yɔ̄ ī kɛlā ŋmá Agblīihɔ-nɛ̄hi ā gá lɛ aálelékwū-ōtɛ̄hɔ̄ ahāapa ā á. Ó kahíníī, “Áa nyɔ̄ gaá lɛ ocíbú ahāapa kú ícɔ̄nū kú Ɔwɔicō ā cē klá ɛcɛ.”

²Alelékwū-ōtɛ̄hɔ̄ kú aflɛ́yí ā le yɛ tɛ́ɛcɛ í lɛ ɔdā nōo yɔ̄ ipú ocíbú kú nū ā cē klá ɛcɛ. Ámata obɔ̄bí olɔnɔ wā í ce klá ācɛ nēé fukɔ̄ lɛ ɛbɛ́ obɔ̄bí ā udɔ̄bū mɛ́mla ācɛ nēe gbā ojíbó kú nū ɛ̄gbā ā.

³Alelékwū-ōtɛ̄hɔ̄ ɔ́mpa ā lɛ ɔdā nōo yɔ̄ ipú ocíbú kú nū ā ce tū ipú ísu nɛ̄hi ā. Éŋkpɔ̄ ā kwú pīya bɛ̄ɛka oyī kú ɔ̄cɛ nōo gekwú ā. Anɔ́ɔ ɛjɛ̄ɛ̄jī aɔ́dā nēe yēeyī ipú ísu nɛ̄hi ā kpɛmm ā le pɛ́ gekwú á.

⁴Alelékwū-ōtɛ̄hɔ̄ ɔ́mɛtá ā lɛ ɔdā nōo yɔ̄ ocíbú kú nū ā pīya tū ipú aísu nɛ̄ŋ́cɛ́ mɛ́mla njɔlɔ kú éŋkpɔ̄ ā, anɔ́ɔ é le pīya oyī á.

⁵N pó ɔkɔ kú alelékwū-ōtɛ̄hɔ̄ nōo gē leyīkwu éŋkpɔ̄ ā kahíníī, “Italā nɛ̄ a yá ācɛ ɛcɛ ā le kpaakpa. “Awɔ nōo wɛ Ɔwɔicō otīīhɔ ā yɔ̄ abālɔbányā, awɔ kē tɛtɛ hímáyī yɔ̄ á.

⁶Ohígbū ka alɛɛcɛ le ācɛ ɔlɛ́ uwɔ mɛ́mla ācomɛ́ɛbɛ kú uwɔ kpó ŋmó, anɔ́ɔ a kē lɛ je oyī lɛ uwá kéē gwá á. Ɔdā nōo cíkā lɛ uwá ā nēé bá ī mīyɛ á.”

⁷Anɔ́ɔ n pó ɔkɔ éyi dɛ̄gba ŋmá ɛgiyí ede yɔ̄ ī ka kahíníī, “Īī, ɔkwɛ̄yi, Óndú nōo wɛ Ɔwɔicō nōo lɔfu fíyɛ́ dúú ā! Aɛ́pɔ̄ nɛ̄ a ka tū uwā ā wɛ ɔkwɛ̄yi, italā nɛ̄ a yá ā uwā klla le kpaakpa.”

⁸Anɔ́ɔ alelékwū ōtɛ̄hɔ̄ ɔ́mɛnɛ ā lɛ ɔdā nōo yɔ̄ ocíbú kú nū ā cē klá ɛnɔ. Ohígbū ɔ́ɔmā ɛnɔ le kwɔ́lá nɛ̄ɛ̄nɛ̄hi, anɔ́ɔ idɔlá ā gbɔɔ́ ō yi ācɛ iyē ɔlá á.”

⁹Idɔlá nɛ̄ɛ̄nɛ̄hi kú ɛnɔ ā yɔ̄ ī yi ācɛ iyē ɔlá. É kē bá ī ka atufú lɛ Ɔwɔicō nōo lɛ íkwu bī aámíyā mbá ā gé lɛ uwá ā. Amáŋ é kē cɛ̄ ō pīyabɔ̄ ŋmá ɔ́bíipú kú uwā cɛ́ɛ́ kéē cɛ̄tra Ɔwɔicō ŋ́.

¹⁰Anɔ́ɔ alelékwū ōtɛ̄hɔ̄ ɔ́mɛhɔ̄ ā lɛ ɔdā nōo yɔ̄ ocíbú kú nū ā cē klá akpa ɔcɛ́ kú ɛbɛ́ obɔ̄bí ā. Ajɛ kwu dobū ɛjɛ̄ɛ̄jī ajɔ̄ɔ̄cɛ́ kú ɛbɛ́ obɔ̄bí aflɛ́yí ā. Ācɛ bá ī lɛ aīnu kwú akpókónu ohígbū ɔnɔ nēé yɔ̄ gē jé ā.

¹¹É bá ī ka atufú lɛ Ɔwɔicō nōo yɔ̄ ɔkpáncō ā ohígbū ámata kú uwā mɛ́mla ɔnɔ nēé yɔ̄ ī má ā. Amáŋ é habɔ̄ ucē obɔ̄bí kú uwā tá ŋ́.

¹²Anɔ́ɔ alelékwū-ōtɛ̄hɔ̄ ɔ́mɛhīlī ā lɛ ocíbú kú nū cē klá ísu nɛ̄hi nēé hī ka Uyúfarētīisi ā á. Éŋkpɔ̄ kú nū le ŋmó ŋmaajɛ kloklo, cɛ́ɛ́ kú aɔ́cɛ́ nēe géē wā ŋmá ɛnɔ̄ɔ̄cī kéē lɛ ɔwɛ nēé í yɛ ā má.

¹³Anɔ́ɔ n má aálelékwū oblínyī ɛtá nēe lɛbɛ̄ɛka aklé ā bá gē bɛ̄cɛ ŋmá okónu kú ɛbɛ obɔ̄bí nɛ̄hi ā, ŋmá okónu kú ɛbɛ́ obɔ̄bí ɔ́mpa ā mɛ́mla okónu kú ɔ̄comɛ́ɛbɛ ɛ̄kɛ̄mgbɛ̄ ā.

¹⁴É wɛ alelékwū kú ebilíi nēe gē yá aɔ́dā o hídáagó. Aálelékwū ɛtá mbá ā gē gɛcɛ ɛgiyí odúúdú aɔ́cɛ́ kú ɛcɛ ā, kéē lɛ uwá kpó wā í jīla tɔ̄há ohígbū ɛfú nēé gáā kpó ɛ̄cī nɛ̄ Ɔwɔicō nōo lɔfú fíyɛ́ dúú gē kɛpɔ̄ tū ācɛ ā.

¹⁵“Aá jāhɔ̄! N yɔ̄ ī wā bɛ̄ɛka uwī ā! Ɔ̄cɛ dúúmā nōo lɛ eyī kwɛcɛ, í gbiyɔ̄lā ŋ́, nōo kē lɛ úwé kú nū tútū, cɛ́ɛ́ kóō híīī tóōhɛ́ɛwa yɔ̄ gē yɛ ipéyī ācɛ kú uwēyī kóō kwú ɔ̄ ŋ́. Ákú ɔ̄cɛ ɔ́ɔmā lɔhí.”

¹⁶Anɔ́ɔ aálelékwū ā lɛ aɔ́cɛ́ ā túbá ɛgéégée, ɛga nēé hī okónu Uhíbru ka, Amágɛ̄dɔn ā.

¹⁷Alelékwū ōtɛ̄hɔ̄ ɔ́mahāapa ā lɛ ɔdā nōo yɔ̄ ocíbú kú nū ā cē tū ipú owu. Anɔ́ɔ ɔkɔ éyi dɛ̄gba nɛ̄hi ŋmá akpa ɔcɛ́ kú Ɔwɔicō nōo yɔ̄ ipú Agblīihɔ-nɛ̄hi ā yɔ̄ ī ka kahíníī, “Ó le yá mɛ ɛɛ́!”

¹⁸Anɔ́ɔ ɔwɔ límanya, uya nɛ̄hi yá, akpáabana gbo klla gbo, ajɛ klla le jíliyē nɛ̄ɛ̄nɛ̄hi. Ɛdɔ ajɛ nōo jíliyē ɔ́ɔmā í yá jééjée ŋmífī nɛ̄ Ɔwɔicō yá alɛɛcɛ ā ɛ́ ŋ́. Ajɛ nōo jíliyē ɔ́ɔmā bɔ̄bí fíyɛ́ dúú á.

¹⁹Igelī nɛ̄hi ā le yíla āyā ɛtá, anɔ́ɔ ɛjɛ̄ɛ̄jī aígelī kú odúúdú aéwo kú ɛcɛ nyā le kpó yíífi á. Ɔwɔicō le blakwu Ubábīlɔn nɛ̄hi ā, anɔ́ɔ ó cɛ̄ lɛ ɔ́ le ōwē má ohígbū ícɔ̄nū nɛ̄hi kú nū ā, lɛbɛ̄ɛka ɔ̄cɛ nēé ī pī ɔ̄ ejé ā.

²⁰Ɛjɛ̄ɛ̄jī aídɔ ā gebí tāajɛ, ɛjɛ̄ɛ̄jī aɛ́fu ā mɛ tāajɛ.

²¹Alɛwa kú ɛcɔ̄ɔwɔ nōo gbɛnú bɛ̄ɛka ukílōgram ofɛpa cigwó ā, bá ī míya wāajɛ ŋmá ɔkpáncō wā í ce ācɛ báajɛ. Ācɛ kē bá ī ka atufú lɛ Ɔwɔicō kú ámíyā nɛ̄hi kú ɛcɔ̄ɔwɔ ā, ohígbū koó bɔ̄bí nɛ̄ɛ̄nɛ̄hi.