Read idoma ƆDĀ NĒÉ MAFÚ LƐ UJƆ́ƆNI 17 Bible Online

ƆDĀ NĒÉ MAFÚ LƐ UJƆ́ƆNI 17 - idoma bible

ƆDĀ NĒÉ MAFÚ LƐ UJƆ́ƆNI 17

¹Anɔ́ɔ éyi kú aálelékwū-ōtɛ̄hɔ̄ ahāapa nēe bī aócíbú ahāapa ā gā ɛgiyí um, gaá da um kahíníī, “Wā cɛ́ɛ́ ká n̄ mafú ga awɔ ɛ́gɛ́nɛ̄ é gáā yá akwuna olōofu nɛ̄hi ā italā ā. Anú wɛ igelī nɛ̄hi nēé gwó kwu pī aísu alɛwa ɔ́ɔmā á.

²Aɔ́cɛ́ kú ɛcɛ ā cikpó akwuna nyā, anɔ́ɔ ācɛ kú ipú ɛcɛ tū mu mla ajā ō gbo mɛ́mla ikpɔ́nyā ō ce ŋmá ɛgiyí nū bɛ̄ɛka ācɛ nɛ̄ ejé le uwá kwú āá

³Alelékwū Ihɔ kwú um anɔ́ɔ alelékwū-ōtɛ̄hɔ̄ ā lɛ um bī ga ipú ígbíli éyi á. Abɔ́ɔ ā, n má ɔnyā éyi cīīce ɛyí ɛbɛ́ obɔ̄bí nɔ̄wá yōōō éyi. Ɛbɛ́ ā lɛ iyē ɛyɛ́ɛyɛ́yí nēe wɛ atufú lɛ Ɔwɔicō nēe tá tū ɔ̄ ɔkpíyē ɛbɛɛbɛ kpɛ́mm. Ɛbɛ́ obɔ̄bí nyā lɛ īkpɛ̄yí ahāapa mɛ́mla ajī igwó

⁴Ɔnyā ā lɛ otōmbíyē mɛ́mla awulú nɔ̄wá yōōō wiyē. Ó lɛ ɔdōyíifa kú ugóolu mɛ́mla ɔká mɛ́mla íhō mɛ́mla ɛcɔ̄ ogbɔɔ́lá kpó klá iyē jágbáá. Ó bī ikókwū kú ugóolu abɔ̄ nōo le mu mla ɔdīcíci,mɛ́mla ucē ɛbí, mɛ́mla ɔdēelihɔ̄ nōo ŋmá lɛ ajā nōó gē gbo ā.

⁵É lɛ iyē nɛ̄ ɔ̄cɛ í jé ɛyí nū ŋ́ mā tá bū údɔ̄bū kú nū ka, ‘Ubábīlɔn nɛ̄hi, ɛ́nɛ́ kú odúúdú aákwuna mɛ́mla ɔdīcíci kú ipú ɛcɛ nyā’.

⁶N má ka oyī kú ācɛ ɔlɛ́ Ɔwɔicō mɛ́mla oyī kú ācɛ nēé ŋmó ohígbū keé yɛce Ujísɔ̄si kpaakpa ā lɛ ɔ́ kwú ɛ́gɛ́nɛ̄ ejé gē kwú ɔ̄cɛ ā. Eko nɛ̄ n má ɔ̄ ā, n le hídáagó dúúdú.

⁷Amáŋ alelékwū ōtɛ̄hɔ̄ ā da um ɔ̄kā kahíníī, “Ɔdíyá nɛ̄ a le hídáagó ā? N géē da uwɔ ɛyí kú ɔdā otayínū lɛyíkwu ɔnyā ā mɛ́mla ákú ɛbɛ́ obɔ̄bí nōo lɛ īkpɛ̄yí ahāapa mɛ́mla ajī igwó, nōo bī ɔnyā ā.

⁸Ɛbɛ́ obɔ̄bí ɔ́ɔmā tɛtɛ yēeyī, amáŋ abālɔbányā ó yēeyī gɛ ŋ́. Eko kpiíí ā, ó géē bɛ̄cɛ ŋmá ɔ̄gɔ̄ nōó lɛ oŋmɛ́yí ŋ́ mā, cɛ́ɛ́ kéē kwú ɔ̄ yíífi píyóó. Ācɛ nēe lā ipú ɛcɛ nēé tá iyē kú uwā tāajɛ ipú ɔkpá kú oyēeyī gbɔbū lɛ eko nēé yá ɛcɛ ŋ́ mā géē hídáagó abɔ̄ é lɛ ɛbɛ́ obɔ̄bí ā má ā. Ó tɛtɛ yēeyī, abālɔbányā ó yēeyī gɛ ŋ́, amáŋ ó kē í hɛ́wɛ̄ɛ̄cɛ kpɔ́.

⁹Ɔdānyā cɛgbá ka ɔ̄cɛ kóō jééyī klla jɛyí ɛlā ɛ́ kóō jɛ́yí nū. Īkpɛ̄yí ahāapa ā kwɛyí ɛfu nɛ̄ŋ́cɛ́ ahāapa nɛ̄ ɔnyā ā cīīce ɛyí uwā ā.

¹⁰Īkpɛ̄yí ahāapa ā kwɛyí aɔ́cɛ́ ahāapa dúú. Ɛhɔ̄ kú uwā le pɛ́ gekwú ɛɛ́. Éyi kú uwā cɔɔcɛ́ abālɔbányā, ɔhá ā í kē hɛ́wɛ̄ɛcɛ ɛ́ ŋ́. Eko nōó gā ó gáā cɔɔcɛ́ gbojī ajɛ ŋ́.

¹¹Ɛbɛ́ obɔ̄bí nōo tɛtɛ yēeyī, amáŋ nóō yēeyī gɛ ŋ́ mā géē wɛ ɔ̄cɛ ɔmahātá á. Amáŋ ó wɛ éyi kú ahāapa ā. Ó kē yɔ ī nyɔ̄ kéē je ɔ́ yíífi.

¹²Aájī igwó nɛ̄ a má ā kwɛyí aɔ́cɛ́ igwó nēe lé ɔcɛ́ ɛ́ ŋ́, amáŋ é géē je íkwu lɛ uwā kéē lé ɔcɛ́ eko kpiíí mɛ́mla ɛbɛ́ obɔ̄bí ā.

¹³Ɔdā ékpó nɛ̄ aɔ́cɛ́ igwó ā gáā bī ɔtū á, é kē í je ɔfú mɛ́mla íkwu kú uwā kpó lɛ ɛbɛ́ obɔ̄bí ā.

¹⁴Ɛbɛ́ obɔ̄bí ā mɛ́mla aɔ́cɛ́ igwó ā géē kpɛ́fú tú Ɔyí álá ā. Amáŋ Ɔyí álá ā mɛ́mla ācɛ nɛ̄ Ɔwɔicō hīgwú klla fu, nēe klla háyi kpaakpa ā, géē yá uwā lé. Ohígbū ka Ɔyí álá ā wɛ Óndú kú aóndú, klla wɛ Ɔcɛ́ kú aɔ́cɛ́ á.

¹⁵Anɔ́ɔ alelékwū-ōtɛ̄hɔ̄ ā, da um kahíníī, “Aítekwú alɛwa nɛ̄ a má akwuna ā cīīce ɛyí uwā ā kwɛyí aɛ́wa kú ācɛ aéwo mɛ́mla aúcē ōka alɛwa.

¹⁶Aájī igwó nɛ̄ a má ā mɛ́mla ɛbɛ́ obɔ̄bí ā géē wɔ́tū akwuna ā, géē kpó ɛjɛ̄ɛ̄jī ɔdā nōó lɛ ā, cɛ́ɛ́ é habɔ̄tá tóohɛ́ɛwa. É géē je ɛbɛ́ nū lé, klla géē je ɔ́ tɔ́lá bónū.

¹⁷Ɔwɔicō kwú ɔtū í lɛ uwá nēé géē cɛ̄ tɔ̄há kéē yá ɔdā nōo he ɔ́ ɔtū ā. Ó yá kéē cɛ̄tɔ̄há kwú ɔfú nēé ī bī le gbāājɛ ā kpó lɛ ɛbɛ́ obɔ̄bí ā jāā gbéeko nɛ̄ ɛlā kú Ɔwɔicō le yá jīla.

¹⁸Ɔnyā nɛ̄ a má ā wɛ igelī olɔfu nɛ̄hi nɛ̄ ɔcɛ́ kú nū gē gbō aɔ́cɛ́ kú aéwɔhá kú ɛcɛ ā á.