Read idoma ƆDĀ NĒÉ MAFÚ LƐ UJƆ́ƆNI 18 Bible Online

ƆDĀ NĒÉ MAFÚ LƐ UJƆ́ƆNI 18 - idoma bible

ƆDĀ NĒÉ MAFÚ LƐ UJƆ́ƆNI 18

¹Igbīhi ɛ̄nyā n má alelékwū ōtɛ̄hɔ̄ éyi yɔ̄ ī wāajɛ ŋmá ɔkpáncō. Alelékwū-ōtɛ̄hɔ̄ lɛ íkwu nɛ̄hi. Ɔlá nōo fíyaajɛ yɛjīla ɔ́ tá ā cɛ̄ lɛ ɛjɛ̄ɛ̄jī ɛcɛ tá péee.

²Anɔ́ɔ ó lɛ ɔkɔ cɛyí dɛ̄gba kahíníī, O kwú gblífi ɛɛ́! Ubábīlɔn, igelī nɛ̄hi ā kwú gbífi ɛɛ́! Aébilíi mɛ́mla aálelékwū oblínyī lā Ubábīlɔn abālɔbányā á. Ɛjɛ̄ɛ̄jī ɛdɔ aígbáanɔ oblinyi nēe he ācɛ ɔtū ŋ́ mā lā ipú nū á.

³Ohígbū ka odúúdú aéwo lɛ ejé olɔfu kú unwū obɔ̄bí kú nū gwá ɛɛ́. Aɔ́cɛ́ kú ipú ɛcɛ ā le ikpó nū ce. Ācotɔ́sú nɛ̄hi kú ɛcɛ ā le gbagbénú ŋmá lɛ unwū ɔdā kú nu nōó ī kwú tū ŋ́ mā.”

⁴Anɔ́ɔ n pó ɔkɔ ɔhá ŋmá ɔkpáncō yɔ̄ ī ka kahíníī, “Le bɛ̄cɛ, ācɛ ɔlɛ um! Aá le bɛ̄cɛ ŋmá ipú Ubábīlɔn! Cɛ́ɛ́ kú aá bīyíne kú Ɔwɔicō ɛ́gɛ́nɛ̄ ācɛ Ubábīlɔn gē yá ā ŋ́. Cɛ́ɛ́ kú Ɔwɔicō kóō kē yá aá italā, ɛ́gɛ́nɛ̄ ó gáā yá igelī nyā ŋ́.

⁵Ohígbū ka íneobīya kú nū le tīkwū ŋmá ajɛ jāā ga ɔkpáncō Ɔwɔicō í kē je mlanyi ucē ɔbíipú kú nū ŋ́.

⁶Aá yá Ubábīlɔn ɔdōōbɔ̄bí ɛ́gɛ́nɛ̄ ó yá ācɛ ɔhá ā. Aá kóō yá ɔ̄ ce ɛpa kú ɔdā nóō yá ācɛ ɔhá ā. Lɛ ejé nōo lɔfú igbɛpa kú ɛ̄nɛ̄ ó je lɛ ācɛ ɔhá ā tū íkókwū kú nū lɛ ɔ́.

⁷Je ōwē mɛ́mla ɔtūnōbí lɛ ɔ́ kwiyí ɛ́gɛ́nɛ̄ ó gwō ka anúɔ wɛ ɔ̄cɛ nɛ̄hi, klla gwō ipú abahi ā. Ohígbū koó yɔ̄ ī da īyī nū piyóó ka, ‘Ami cīīce ɛyí akpa kú ɔcɛ́ kú um yɔ̄ ī gbāajɛ mɛ́mla odúúdú íkwu yɔ̄ á! Ń wɛ ɔnyōkwū ŋ́, ń kē gáā jé ɔtūnōbí kú ɔnyōkwū gbóógbóō ŋ́.’

⁸Ohígbū ɛ̄nyā ā, ipú ɛ̄cī ékpó aámíyá nɛ̄hi kú ōcē mɛ́mla ɔtūnōbí mɛ́mla ɔkpɛtā géē yá ɔ̄. Ɔlá géē je ɔ́ yi ohígbū ka Óndú nōo wɛ Ɔwɔicō nōo gē kɛpɔ̄ tū ɔ̄ ā lɔfú nɛ̄hi.”

⁹Aɔ́cɛ́ kú ɛcɛ ā nēe cikpó nū, klla gwō ipú ūnwū ikpɔ́nyā ō cē bɛ̄ɛka anú ā, géē tɛ̄gíkwu klla í dɛ̄ ohígbū igelī ā eko nēé lɛ ódūdū kú ɔlá nōó je ɔ́ yi ā má.

¹⁰É géē hayi ɛcɛɛcɛ ohígbū kéē gē yúúfi ōwē nōí yɔ̄ ī má ā. Anɔ́ɔ ɛgba hɛ́ uwā okónu kahíníī, “Ɛhɛ́ɛ, ɛhɛ́ɛ! Ɛ̄nyā bɔ̄bí nɛ̄hi! Ubábīlɔn, awɔ nōo wɛ igelī nɛ̄hi nōo lɔfú nɛ̄hi ā! Ipú eko kpiíí ōfōōfūnū, é le italā yá uwɔ’’.

¹¹Ācotɔ́sú kú odúúdú ɛcɛ ā jikwū klla yēkwū igelī nyā, ohígbū ka ɔ̄cɛ nōo í lá iyó ɔ́hí kú uwā í yɔ̄ gɛ ŋ́.

¹²Aíyó ɔ́hí kú uwā nōó tɛtɛ ī lā ā wɛ ugóolu, mɛ́mla ɛcɔ̄ ogbɔɔ́lá nɛ̄hi, mɛ́mla oje nɛ̄hɛ́, mɛ́mla ɔká, mɛ́mla íhō, mɛ́mla īlī nɛ̄hɛ́ o ceyī ŋmɛɛ́ŋmɛ́ɛ, mɛ́mla īlī otōmbíyē, mɛ́mla ahilíki, mɛ́mla īlī nɔ̄wá yōōlō, mɛ́mla odúúdú ɛdɔ ɔcí okpóocu, mɛ́mla ɔdā dóódu nēé bī ayīnu adāgbá yá ā, mɛ́mla ɔdā dóódu nēé bī ɔcí ogbɔɔ́lá le gbā ā, mɛ́mla oje udɔ, mɛ́mla oje ɔlamu, mɛ́mla ɛcɔ̄ nɛ̄hɛ́ nēé ī le gwó ɔlɛ́ ɔ̄cɛ nɛ̄hi ā,

¹³usínāmɔn, mɛ́mla anɔ̄ okpóocu, mɛ́mla utulalī, mɛ́mla umáar, mɛ́mla ufránkīnsɛns, mɛ́mla ejé, mɛ́mla anɔ̄, mɛ́mla umu, mɛ́mla uwíiti, mɛ́mla aɛ́na mɛ́mla aálá, mɛ́mla aɔ́nya mɛ́mla aúgbɔ́ɔnya ō bī iyó, mɛ́mla aɔ́fiyɛ mɛ́mla ācɛ nēé kwú ŋmá ɔgbɛ́fú ā dúú.

¹⁴Ācotɔ́sú ā da ɔnyā ā kahíníī, “Odúúdú aɔ́dā olɔhi nɛ̄ ɔtū kú uwɔ kwu ɔ́ ō lɛ ā le pɛ́ gebí tāajɛ ɛɛ́. Aágbénú mɛ́mla aɔ́dā o tū ɛgahi kú uwɔ ā mɛ ɛɛ́, á kē gáā má uwā gɛ ŋ́!”

¹⁵Ācotɔ́sú nēe je pīya ācoliije ŋmá ɔ́hí nēé tá ipú igelī ɔ́ɔmā géē hayi ɛcɛɛcɛ, ohígbū keé gē yúúfi kéē híīī wɛ ipú ōwē kú nū ā ŋ́. É ge jikwū klla í tɛ̄gíkwū.

¹⁶kahíníī, “Ɛhɛ́ɛ, ɛhɛ́ɛ! Ó kwíyē lɛ igelī nɛ̄hi ā íbí! Anú nōo tɛtɛ gē bī īlī nɛ̄hɛ́ ŋmlɛ́ ŋmlɛ́, mɛ́mla otōmbíyē mɛ́mla īlī nɔ̄wá yōōlō ā le yíifa, klla gē bī ugóolu mɛ́mla ɔká mɛ́mla íhō le yíífa ā!

¹⁷Ipú eko kpiíí ōfōōfūnū odúúdú agbénú ā le kpó yíífi.” Odúúdú aótrɛ̄yí kú ācɛ nēe ī pɛ́ aúgbéenyi ā, mɛ́mla ācɛ nēe ī yɛ ipú aúgbéenyi, mɛ́mla ācɛ nēe ī pɛ́ úgbéenyi ā, mɛ́mla ɛjɛ̄ɛ̄jī ācɛ nēe gē lé ŋmá úklɔ́ nēe gē yá eyī ísu ā, māháyi ɛcɛɛcɛ ɛgaligbó,

¹⁸Anɔ́ɔ é dɛ̄ tɛ́ɛcɛ abɔ̄ é lɛ ódūdū kú ɔlá nōo je igelī ā yi tāajɛ ā má ā kahíníī, “Igelī ɔhá dúúmā í lɛbɛ̄ɛka igelī nɛ̄hi nyā jééjé ɛ́ ŋ́!”

¹⁹Anɔ́ɔ é le úmúlá wu klá ɛyí bá ī jikwū klla yēkwu kú igelī ā á. É bá ī ka kahíníī, “Ɛhɛ́ɛ, ɛhɛ́ɛ! Ó kwíyē lɛ igelī nɛ̄hi ā íbí! Ó wɛ ɔlɛ́ nɛ̄ odúúdú ācɛ nēe lɛ aúgbéenyi nēe gē yɛ ísu nɛ̄hi ā, gē yá ije kú uwā ŋmá agbénú kú nū. Ipú eko kpiíí ōfōōfūnū nɛ̄ ɛjɛ̄ɛ̄jī agbénú kú nū le kpú yíífi.”

²⁰Aá nēe lā ɔkpáncō ā, ɔtū kóō he aá, ohígbū ka Ɔwɔicō kwú Ubábīlɔn yíífi ɛɛ́! Ācɛ ɔlɛ́ Ɔwɔicō mɛ́mla ācotɛ̄hɔ̄ kú Ohɔ́nyɛtá mɛ́mla ācomɛ́ɛbɛ kú Ɔwɔicō, ɔtū kóō he aá! Ohígbū ka Ɔwɔicō lɛ Ubábīlɔn ŋmɛ́pɔ̄bí ohígbū aɔ́dā nōó yá aá ā ɛɛ́

²¹Anɔ́ɔ alelékwū ōtɛ̄hɔ̄ nōo lɔfú nɛ̄hi éyi kwú ɛcɔ̄ nōo nwuné bɛ̄ɛka ɛgɔ̄ nɛ̄hi ā ú, anɔ́ɔ ó lɛ ɔ́ tɛ́cɔ̄ í gwōtū ipú isu yɔ̄ ī ka kahíníī, “Ɛ́gɛ́nyā nēé gáā je Ubábīlɔn, igelī nɛ̄hi ā yíífi abɔ̄fú lɛ ā á, nɛ̄ ɔ̄cɛ dúúmā í klla gáā má ɔ̄ ɛ́ gɛ ŋ́ má

²² Ubábīlɔn, é gáā pó ijē kú ogwúmogwú mɛ́mla ācogwííjē mɛ́mla ācɛ o tá ɔkpancīlē mɛ́mla ācɛ o tá opo ipú uwɔ ɔhá gɛ ŋ́. É gáā má ɔ̄coyúklábɔ̄ dúúmā ipú uwɔ gɛ ŋ́. Ɔdā ō gbā ɛgɔ̄ í kē gáā yɔ̄ ipú uwɔ gɛ ŋ́ dúú

²³É gáā hɛ́ ɔlá kwu agege dúúmā ipú uwɔ gɛ ŋ́. Ɔnyā ō lɛ dúúmā í kē gáā yá ipú uwɔ gɛ ŋ́ dúú. Āctɔ́sú kú uwɔ ā wɛ ācɛ nɛ̄hi fíyɛ́ dúú ipú odúúdú ɛcɛ á. A bī úklɔ́ imabɔ̄ kú uwɔ lɛ odúúdú ācɛ kú ɛcɛ ā kpó plla!”

²⁴É yá Ubábīlɔn italā ohígbū koó lɛ́pɔ̄bí kú ācomɛ́ɛbɛ mɛ́mla ācɛ ɔlɛ́ Ɔwɔicō ɔhá ō ŋmó. Ó kē lɛ́pɔ̄bí ācɛ ō ŋmó ɛbɛɛbɛ kú ipú ɛcɛ.