Read idoma ƆDĀ NĒÉ MAFÚ LƐ UJƆ́ƆNI 2 Bible Online

ƆDĀ NĒÉ MAFÚ LƐ UJƆ́ƆNI 2 - idoma bible

ƆDĀ NĒÉ MAFÚ LƐ UJƆ́ƆNI 2

¹Le tá gé lɛ alelékwū-ōtɛ̄hɔ̄ kú icɔ́ɔci nōo yɔ̄ igelī nɛ̄hi nēé hī ka Ɛ́fēsɔsi ā ka ami nōo bī aínyílɔ́wɔ ahāapa abɔ̄lɔ́ná kú um, nōo ī yāwu ipú aɔ́dā o lɛ agege ce uwá kú ugoolu ā, kahíníī,

²N jé ɛjɛ̄ɛ̄jī ucē nɛ̄ aá nēe wɛ ācɔ̄lóhɔ́nyɛtá abɔ́ɔ ā yá ā. N jé ɛ́gɛ́nɛ̄ aá cēyītīkwū yúklɔ́ kú ɛlā kú um lɛ āa, mɛ́mla ɔtū nɛ̄ aá lé eko nēé yá aá ōwē ohígbū um ā ā. N jé ɛ́gɛ́nɛ̄ aá gē jɛɛga lɛ ācobɔ̄bíipú ŋ́, amáŋ aá lɛ ācɛ nēe ka aá wɛ ācotɛ̄hɔ̄ nááná nēe kē wɛ ŋ́ mā jámá, aá kē le má keé wɛ ācokɛ̄mgbɛ̄.

³Aá lɛ ɔtūlé lɛ ōwē má ohígbū um nɛ̄hi, nááná ɛ̄jɛ̄ í kē jɛ̄ aá ŋ́.

⁴Amáŋ ó lɛ ɔdā nōó he um ɔtū ŋ́ lɛyíkwu aá. Aá yíhɔtū abālɔbányā bɛ̄ɛka ɛ́gɛ́nɛ̄ a tɛtɛ yá eko nɛ̄ aá je pīya ācɛ kú um bōōbū ā gɛ ŋ́.

⁵Aá gbɛlá kwu ɛ́gɛ́nɛ̄ aá tɛtɛ gē yíhɔtū lɛ aā, ɛ́ nɛ̄ aá mā ɔ̄ tá ā. Aá le pīyabɔ̄ ŋmá ucē ɔ́bíipú ɔ́ɔmā. Cɛ́ɛ́ kú aá gbɔɔ́ ō yá ucē nɛ̄ aá tɛtɛ ī yá eko aflɛ́yí nɛ̄ aá je pīya ācɛ ɔlɛ́ um ā. Ɔ́dāŋ ka aá pīyabɔ̄ ŋ́, n géē wā ɛgiyí aá cɛ́ɛ́ n kwú ɔdā o lɛ agege ce kú aá ú ŋmá ɛga nōo gē hayi ā.

⁶Amáŋ ó lɛ ɔdā okpaakpa éyi nɛ̄ aá ī yá. Ɔ́ɔmā kē wɛ ka ɔdā nɛ̄ ígwu nōo ī yɛce Uníkōlāwus ā gē yá ā gē wu aá ɔtū ɛ́gɛ́nɛ̄ ó gē wu um ɔtū ā dúú.

⁷Ɔ̄cɛ nōo ī páhɔ̄, kóō jāahɔ̄ lɛ ɔdā nɛ̄ Alelékwū Ihɔ ā ī ka lɛ aícɔ́ɔci ā ā! Ācɛ nēe le ɔfú kú ebilíi yálé, n géē jɛɛga lɛ uwá kéē le īkpō kú ɔcí nōo ī je oyēeyī nōo kwu ipu ɛhɔ̄ kú Ɔwɔicō ā.

⁸Anɔ́ɔ ó da um kahíníī, “Le tá gé lɛ Ɔ̄cotɛ̄hɔ̄ kú icɔ́ɔci kú Usimɛ́ɛ́na ā ka ami nōo wɛ aflɛ́yí mɛ́mla ámōōmɛ, nōo gekwú klla le héyī kpɔ́ ā kahíníī,

⁹‘N jé ɛ́kɛma kú aá. N kē jé ka aá gbɛhá. Amáŋ ákú aídééma ā, aá gbagbénú nɛ̄hi. N jé aɔ́dā obɔ̄bí nɛ̄ ācɛ nēe je īyī uwā ka aá wɛ ācɛ Ujíyu, nááná nēe wɛ ŋ́ mā, ka lɛyíkwu aá ā. Amáŋ é wɛ ígwu nēe gē gbā ebilíi ɛ̄gbā. É lɛbɛ̄ɛka ɛgogbɔ̄ɔkɔ kú ebilíi ā.

¹⁰Á híīī yúúfi ōwē nɛ̄ a gáā má ā ŋ́. Mɔ́ɔ̄, ebilíi géē kpó ācɛ ōhī kú aá tū ipú agbá o yá kóō jé á má, aá kéē í móōwē jāā ɛ̄cī igwó. Aá kpɔ́tūce um kpɔ́, ɔ́dāŋ keé kōō lɛ aá ŋmó ohígbū nū nááná, n kē í je oyēeyī lɛ aá bɛ̄ɛka ɔdā nēé ī le kwu ɔ̄cɛ nōo le yálé ɛyí ā.

¹¹Ɔ̄cɛ nōo ī páahɔ̄, kóō jāhɔ̄ lɛ ɔdā nɛ̄ Alelékwū Ihɔ ka lɛ aícɔ́ɔci ā ā! Ɔ̄cɛ nōo le ɔfú kú ebilíi yálé, ikwū igbɔɔ́mpa, nōo wɛ ikwū opiyóó ā, í gáā lɛ abɔ̄ kwu ɔ́ gɛ ŋ́.

¹²Anɔ́ɔ o da um kahíníī, “Le tá fu ɔ̄cotɛ̄hɔ̄ kú icɔ́ɔci kú Upɛgámum ā ka ami nōo bī ɔkpacaŋgelī o leyi ɛpa ā kahíníī,

¹³‘N jé ka aá lā ɛga nɛ̄ ebilíi ce ɔ̄cɛ ā ā. Aá háyi kpaakpa ga um, aá klla kē kpɔ́tuce um kpɔ́. Nááná nōó wɛ ipéeyi aá cāā nēé ŋmó Ántīpasi nōo ucē mɛ́mla ɛlā kú nū ī cīijáalí kóō wɛ ɔ̄cɛ nōo ī yɛce um ā, ɛga nɛ̄ ebilíi lā á ā.

¹⁴Amáŋ ó lɛ aɔ́dée ōhī nōó he um ɔtū ŋ́ lɛyíkwu aá. Aá lɛ ācɛ ōhī ipú aá nēe yɛce ɔdā nɛ̄ Ubálam nwū ā. Ó nwū Ubálāki ɔwɛ nōo í bī le plla ācɛ kú Ísrɛ̄lu kéē bīya íne kú Ɔwɔicō. Ó plla uwá kéē lé ɛbɛ́cí, kéē klla bīyíne ŋmá lɛ ikpɔ́nyā nēé wɛ ɔnyā uwā ŋ́ ō ce.

¹⁵Ɔwɛ ékpó ɔ́ɔmā nɛ̄ aá lɛ ācɛ ipú aá nēe yɛce ɔdā nɛ̄ ígwu nōo ī yɛce Uníkōlāwusi ā gē nwū ā á.

¹⁶Aá le pīyabɔ̄ ŋmá íne o bīya! Ɔ́dāŋ́ ka aá yá lɛ ā ŋ́, n géē wā fíyaa gaá bī ɔkpcaŋgelī nōo ī bɛ̄cɛ ŋmá okónu kú um ā nuunu tú ācɛ nēe ī yá aɔ́dée ɔ́ɔmā ā.

¹⁷Ɔ̄cɛ nōo ī páhɔ̄, kóō jāhɔ̄ lɛ ɔdā nɛ̄ Alelékwū Ihɔ ī ka lɛ aícɔ́ɔci ā ā! Ɔ̄cɛ nōo le ɔfú kú ebilíi yálé, n géē je umaana nēé le tayínū ā lɛ ɔ́. N klla géē je ɛcɔ̄ nɛ̄hɛ́ nēe tá iyē ɛ̄yīpɛ̄ tū ɔ̄ lɛ ɔ̄cɛ ɛ́gɔ́ɔmā. Iyē nēé tá tū ɔ̄ ā ɔ̄cɛ ɔhá dúú í já ɔ̄ ŋ́, ɛ́mba ɔ̄cɛ nōo mīyɛ ā ōfōōfūnū.”

¹⁸Anɔ́ɔ o da um kahíníī, “Le tá fu ɔ̄cotɛ̄hɔ̄ kú icɔ́ɔci kú Utiyatíra ā ka ami nōo wɛ Ɔyínɔ̄nyīlɔ kú Ɔwɔicō nɛ̄ īkpēyī kú nū ī cɛ̄ bɛ̄ɛka ɔlá ā, nɛ̄ ikpó kú nū kē ī ceyī bɛ̄ɛka oje udɔ nēé ī na ɔlá ā kahíníī,

¹⁹‘N jé ucē nɛ̄ aá ī yá ā. N kē jé ɛ́gɛ́nɛ̄ aá gē yíhɔtū tá īyī aá lɛ ā, mɛ́mla ɛ́gɛ́nɛ̄ aá háyi kpaakpa ga um lɛ ā ā. N jé úklɔ́ nɛ̄ aá yá ohígbū um ā mɛ́mla ɛ́gɛ́nɛ̄ a lɔ́tū gbojī ipú ōwē lɛ ā ā. N jé ka aá yɔ̄ ī yá abālɔbányā fíyɛ́ ɛ́gɛ́nɛ̄ aá tɛtɛ yá obōōbū nɛ̄ aá je pīya ācɛ ɔlɛ́ um ā.

²⁰Amáŋ ó le odée nōó he um ɔtū ŋ́ lɛyíkwu aá. Á jɛɛga lɛ ɔnyā nēé hī ka Ujésɛ̄bɛl ɔ́ɔmā, nōo ka anúɔ wɛ ɔ̄comɛ́ɛbɛ nɔ̄nyā kú Ɔwɔicō ā. O ŋmá lɛ ɔdā nōó ī nwū ā, ó lɛ ācocɛ̄hɔ̄ kú um plla tū íne o bīya kú ikpɔɔnya nōó wɛ ɔnyā uwá ŋ́ ō ce mɛ́mla o cɛ̄ lɛ uwá le ɔdōlé nēé le gwɛ́ɛya lɛ ɛcí.

²¹N je eko lɛ ɔ́ kóō le pīyabɔ̄, amáŋ ó tá ō pīyabɔ̄ ŋmá aúcē obɔ̄bí nōó ī yá ā.

²²Ohígbū ɔ́ɔmā n géē tū ɔ̄ ōcē, n kē í cɛ̄ lɛ ācɛ nēe ī gbaja mɛ́mla anú ā móōwē nɛ̄ɛ̄nɛ̄hi ɔ́dāŋ́ nēé pīyabɔ̄ ŋmá ucē obɔ̄bí nēé yá mɛ́mla anú ā ŋ́.

²³N géē ŋmó ācɛ nēe ī yɛce ɔ́ ā. Cɛ́ɛ́ ɛjɛ̄ɛ̄jī aícɔ́ɔci ā le jé ka n jé ɔdā nɛ̄ ācɛ gē gbɛlá ā mɛ́mla ɔdā nēé gē dɔɔ̄kā ā. N kē géē je lɛ ɔnyɔɔnyɛ kú aá ɛ́gɛ́nɛ̄ o cíkā lɛ ɔdā nōó yá āa.

²⁴Amáŋ aá ohile nēe bá Utiyatíra í yɛce ɔdōōbɔ̄bí nɛ̄ Ujésɛ̄bɛl ī nwū nyā ŋ́. Aá kē je ɔdā nɛ̄ ācɛ nēe ī yɛce ɔ́ ā gē hī ka ‘ɔkwɛ̄yi otayínū nɛ̄ ebilíi gē mafú ā’ ŋ́! Aá ā, ń gáā je úklɔ́ dúú ɔhá wu aá ɔkɔ fíyɛ́ gɛ ŋ́.

²⁵Amáŋ aá kóō lɛ abɔ̄ bī ɔdā nɛ̄ a lɛ ā lɔfulɔfu jāā gbéeko nɛ̄ n cīgbīhi wā.

²⁶Ɔ̄cɛ nōo le ɔfú kú ebilíi yálé nōo klla gē yá ɔdā nɛ̄ n da ɔ́ kóō yá ā gajaajɛ,

²⁷n géē je ɛdɔ kú íkwu nɛ̄ Ádā um je ga um ā lɛ ɔ́ lɛyíkwu aéwo ā. Ó géē bī ogblo kú oje le gbō uwā, klla í ca uwá ɛ́gɛ́nɛ̄ ɛtɛ́ gē ca putuu ā.

²⁸N klla í je ínyílɔ́ɔwɔ nōo ī bɛ̄cɛ eko nɛ̄ eyī gē nyā ā lɛ ɔ́

²⁹Ɔ̄cɛ nōo ī páhɔ̄, kóō jāhɔ̄ lɛ ɔdā nɛ̄ Alelékwū Ihɔ gē ka lɛ aícɔ́ɔci ā ā.