Read idoma ƆDĀ NĒÉ MAFÚ LƐ UJƆ́ƆNI 6 Bible Online

ƆDĀ NĒÉ MAFÚ LƐ UJƆ́ƆNI 6 - idoma bible

ƆDĀ NĒÉ MAFÚ LƐ UJƆ́ƆNI 6

¹N má Ɔyí álá ā lɛ éyi kú ɔja ahāapa ā fō ŋmá épɔ̄kpá oōhā ā, anɔ́ɔ n pó ɔkɔ kú éyi kú aɔ́dā oyēeyī ɛnɛ ā bɛ̄ɛka ɛ́gɛ́nɛ̄ akpáabana gē kɛlā ā á. Ó kahíníī, “Gāa!”

²N je eyī gicō anɔ́ɔ n má ɔnya nɛ̄hɛ́ éyi. Ɔ̄cɛ nōo ce ɛyí nū ā bī ɔ́tā. É kwú ukata kú ɔcɛ́ ú lɛ ɔ́. Anɔ́ɔ ó nyɛ̄ɛ̄ ŋmá ɔkpáncō cɛyí ɔnya ā ga ipú ɛcɛ ɔ̄cɛ nōo le yálé gbɔbū ɛɛ́, nōo kē í yá aólɛlā kú nū lé kpɔ́ ɛ́.

³Anɔ́ɔ Ɔyí álá ā lɛ ɔja ɔ́mpa ā fō ŋmá ɔkpá ā á. N pó ɔkɔ kú ɔdā oyēeyī ɔ́mpa ā kahíníī, “Gāa!”

⁴Anɔ́ɔ ɔnya ɔhá nōo wɛ ɔnɔ̄wá yōō gā ɛcɛ á. É kwú ɔkpacaŋ́gelī nɛ̄hi éyi ú lɛ ɔ̄cɛ nōo ce ɔnya ā, lɛ íkwu je lɛ ɔ́ kóō kwú ɛbɔ́ ú ŋmá ɛcɛ. Cɛ́ɛ́ kóō cɛ̄ lɛ ācɛ kpɛ́fú, cɛ́ɛ́ kéē ŋmó ɔ́mpa uwā.

⁵Anɔ́ɔ Ɔyí álá ā lɛ ɔja ɔ́mɛtá ā fō ŋmá ɔkpá ā. N pó ɔkɔ kú ɔdā oyēeyī ɔ́mɛtá ā kahíníī, “Gāa!” N jééyī gicō anɔ́ɔ n má ɔnya nōbí á. Ɔ̄cɛ nōo ce ɔnya ā bī ɔdōōmiya ɔdā abɔ̄.

⁶N pó ɔdā nōo lɛbɛ̄ɛka ɔkɔ kú ɔ̄cɛ ɔlamu yɔ̄ ī kɛlā bɛ̄cɛ ŋmá ɛgiyí aɔ́dā oyēeyī ɛnɛ ā. Ó kahíníī, “Ɔ́lá igbóngbó ocikāpā éyi wɛ ulé kú úklɔ́ kú ɛ̄cī odunkulu, igbóngbló igwu ɛtá kē wɛ ulé kú úklɔ́ kú ɛ̄cī odunkulu. Amáŋ a híīī kpó aɔ́cí kú olíifu mɛ́mla ákú Ufáyin bīya ŋ́.”

⁷Anɔ́ɔ Ɔyí álá ā lɛ ɔja ɔ́mɛnɛ ā fō ŋmá ɔkpá ā á. N pó ɔkɔ kú ɔdā oyēeyī ɔ́mɛnɛ ā kahíníī, “Gāa!”

⁸N je eyī gicō, anɔ́ɔ n má ɔnya ɔgalúlā á. Iyē kú ɔ̄cɛ nōo ce ɔnya ā lé ka Ikwū, anɔ́ɔ ɔlékwū kē yɔ̄ ī tú ɔ̄ ɔkwu ajaajɛ á. Ɔwɔicō lɛ íkwū je lɛ uwá kéē lɛ āyā éyi kóōkɔ ɛga ɛnɛ kú ācɛ ɛcɛ kpó ŋmó bū ɔwɛ kú ɛfú okpó, ɔkpɛtā, ōcē obɔ̄bí mɛ́mla aɛ́bɛ́ obɔ̄bí kú ipácí.

⁹Anɔ́ɔ Ɔyí álá ā lɛ ɔja ɔ́mɛhɔ̄ ā fō ŋmá ɔkpá ā á. N má aódo kú ācɛ nēé ŋmó ohígbū keé tɔ́ɔna kú ɛla kú Ɔwɔicō mɛ́mla ɔtū ékpónú kpaakpa ā bá ɛháajɛ ede ā.

¹⁰É lɛ ɔkɔ cɛyí dɛ̄gba kahíníī, “Óndú, nōo lɔfú fíyɛ́ dúú. A tīīhɔ, a klla tōo lɔtūce ɔkwɔ̄ɔ̄kwɛ̄yi! Eko nyá nɛ̄ a géē kɛpɔ̄ tū ācɛ nēe kpó alɔ ŋmó ā cɛ́ɛ́ ká ā lɛ italā yá uwā ā.”

¹¹É le awulú nɛ̄hɛ́ kpó lɛ ɔnyɔ̄ɔnyɛ kú uwā, anɔ́ɔ é da uwá kéē lɔtūlé kéē mlɛ́nyɔ̄ lígíí kpɔ́ ɛ́ jāā gbéeko nɛ̄ áluka kú ācocɛ̄hɔ̄ ɔ́mpa uwa mɛ́mla ācɔ̄lóhɔ́nyɛtá ɔ́mpa uwā, ɛnɛ é gáā ŋmó bɛ̄ɛka uwá ā le jīla.

¹²Eko nɛ Ɔyí álá ā le ɔja ɔ́mɛhīlī ā fō ŋmá ɔkpá ā, ajɛ le jíliyā nɛ̄ɛ̄nɛ̄hi. Anɔ́ɔ ɛnɔ kwú pīya onōbí fiyuu bɛ̄ɛka īlī ekwu ā, anɔ́ɔ ɔyā kwú pīya ɔnɔ̄wá dúúdú bɛ̄ɛka oyī ā á.

¹³Aínyílɔ́ɔwɔ nōo bá ɔkpáncō kwú gwō wāajɛ ɛ́gɛ́nɛ̄ īkpō kú ɔkpɔ́ɔmā í gwō wāajɛ eko nɛ̄ owu lɛ ɔcí nū jíliyē ā.

¹⁴Anɔ́ɔ ɔkpáncō gebí tāajɛ bɛ̄ɛka ēpɔ̄kpá nēé ī hā ŋmá ajɛ ā. Ɛfu mɛ́mla idɔ dóódu le fu ŋmá ɛga nēé tɛtɛ bá gbɔbū ā.

¹⁵Anɔ́ɔ dúúdú aɔ́cɛ́ kú aéwo kú ipú ɛcɛ nyā mɛ́mla ācɛ nɛ̄hi mɛ́mla aótrɛ̄yí kú aícɔ́ɔja mɛ́mla ācɛ nōo lɛ agbénú mɛ́mla ācɛ olɔfú, mɛ́mla oduudu ācɛ ɔha, kwu aɔ́fiyɛ mɛ́mla ācɛ nēe lɛ īyī uwā ā, le pɛ́ tayínū ipú aɔ́gɛ̄cɔ̄ nɛ̄hi mɛ́mla ɔkwu aɛ́cɔ̄ nɛ̄hi kú aɛ́fu ā.

¹⁶É da aɛ́fu ā mɛ́mla aápátɛ́cɔ̄ ā kéē wā í klá aá báajɛ cɛ́ɛ́ kéē kwú aá í kpó tayínū ŋmá eyī kú anú nōo cīīce ɛyí akpa kú ɔcɛ́ ā mɛ́mla ícɔ̄nū kú Ɔyí álá ā.

¹⁷Ohígbū ka ɛ̄cī nɛ̄hi kú ícɔ̄nū kú Ɔwɔicō mɛ́mla Ɔyí álá ā ga ɛɛ́, ɔ̄cɛ dúú í kē gáā hayi pīyēyī kwu ɔ́ glá ŋ́.