Read idoma ƆDĀ NĒÉ MAFÚ LƐ UJƆ́ƆNI 8 Bible Online

ƆDĀ NĒÉ MAFÚ LƐ UJƆ́ƆNI 8 - idoma bible

ƆDĀ NĒÉ MAFÚ LƐ UJƆ́ƆNI 8

¹Eko nɛ̄ Ɔyí álá ā lɛ ɔja ɔ́mahāapa ā fō ŋmá ɔkpá ā, ajɛ yɔ̄ hímm, ugwū í tɔ́kɔ̄ ŋ́ ɔkpáncō ɔdā nōo lɛbɛ̄ɛka okɔ́ ɛpa kú áwa éyi ā.

²N má aálelékwū-ōtɛ̄hɔ̄ ahāapa nēe gē māháyi iyɔ̄bū Ɔwɔicō ā, anɔ́ɔ é lɛ opo ahāapa kpó lɛ uwá á.

³Alelékwū-ōtɛ̄hɔ̄ ɔhá nōo bī ocíbú ugóolu kú ɔtulalī abɔ̄, gaá hayi pī ede ā. É lɛ ɔtulalī fú lɛ ɔ́ láyí kóō fú tū ipú ɔkɔ nɛ̄ ācɛ ɔlɛ́ Ɔwɔicō gē gbā ā, cɛ́ɛ́ kóō kwú gwɛ́ɛya ɛyí ede kú ugóolu nōo kwu iyɔ̄bū akpa kú ɔcɛ́ ā.

⁴Anɔ́ɔ ódūdū kú ɔtulalī nōo yɔ̄ gē yɔɔlá ā le tíico mɛ́mla ɔkɔ nɛ̄ ācɔlɔ́ɔwɔicō gē gbā ā ŋmá abɔ̄ kú alelékwū-ōtɛ̄hɔ̄ nēe hayi iyɔ̄bū Ɔwɔicō ā á.

⁵Anɔ́ɔ alelékwū ōtɛ̄hɔ̄ ā kwú ocíbú ɔtulalī ā ú, lɛ ɔlá fú tū ɔ̄ ŋmá ɛyí ede ā, anɔ́ɔ ó kwú ɔ̄ ú tá wāajɛ gaá tá ipú ɛcɛ á. Akpáabana gbo klla gbo gblágádáá, ɔwɔ límanya maa, maa, maa, ajɛ klla jíliyē nɛ̄hi.

⁶Anɔ́ɔ aálelékwū-ōtɛ̄hɔ̄ ahāapa ā nēe bī aópo ahāapa ā le tútū kéē tá aópo ā á.

⁷Alelékwū-ōtɛ̄hɔ̄ kú aflɛ́yí ā le opo kú nū tá, anɔ́ɔ ɔwɔ owɛcɔ mɛ́mla ɔlá yɛce ɔ́, pīyatɔ̄há mɛ́mla oyī le yā klá ipú ɛcɛ á. Āyā éyi ŋmá okɔ̄ ɛga ɛtá kú ɛcɛ le yi tāajɛ. Odúúdú aɔ́cí mɛ́mla aácí mɛ́mla aɛ́pū nēe bá āyā éyi ŋmá okɔ̄ ɛga ɛtá kú ipú ɛcɛ ɔ́ɔmā le kpó yɔɔlá tāajɛ dúúdú.

⁸Alelékwū ōtɛ̄hɔ̄ ɔ́mpa ā lɛ opo kú nū tá. Anɔ́ɔ é lɛ odée nōo lɛbɛ̄ɛka ɛfu nɛ̄hi, nōo yɔ̄ ī yɔɔlá ā, tá wā í tá ipú ísu nɛ̄hi ā á.

⁹Éyi ŋmá ipú okɔ̄ ɛga ɛtá kú ísu ā kwú pīya oyī. Éyi ŋmá ipú okɔ̄ ɛga ɛtá kú aɔ́dā oyēeyī nēe bá ipú ísu ā le pɛ́ gekwú. Éyi ŋmá ipú ɛtá kú aúgbéényi le kpó yíífi.

¹⁰Alelékwū ōtɛ̄hɔ̄ ɔ́mɛtá ā lɛ opo kú nū tá. Anɔ́ɔ ínyílɔ́wɔ éyi nōo yɔ̄ ī cɔ̄ɔlá bɛ̄ɛka ɛmu ā le míya ŋmá ɔkpáncō wā í tá āyā éyi ŋmá ipú okɔ̄ ɛga ɛtá kú aísu mɛ́mla aŋ́jɔɔlɔ kú éŋkpɔ̄ āá.

¹¹Iyē kú ínyílɔ́wɔ ā lé ka ɛ́lɛ. Anɔ́ɔ āyā éyi ŋmá ipú okɔ̄ ɛga ɛtá kú éŋkpɔ̄ ā gbɔɔ́ ō hɔ́ɔnɔ á. Ācɛ alɛwa nēe gwá éŋkpɔ̄ ā le pɛ́ gekwú ohígbū kóō le hɔ́ɔnɔ.

¹²Alelékwū-ōtɛ̄hɔ̄ ɔ́mɛnɛ ā lɛ opo kú nū tá. Ɔdée le yá āyā éyi ŋmá ipú okɔ̄ ɛga ɛtá kú ɛnɔ, mɛ́mla ɔyā mɛ́mla aínyílɔ́ɔwɔ. Anɔ́ɔ āyā éyi ŋmá ipu okɔ̄ ɛga ɛtá kú ɔlá kú uwā í fíyáajɛ gɛ ŋ́ má. Ɔlá dúú í fíyáajɛ āyā éyi ŋmá ipú okɔ̄ ɛga ɛtá kú ɔlɛɛnɔ mɛ́mla otú ŋ́ dúú.

¹³N pīyeyī, anɔ́ɔ n pó ɔkɔ kú okpé nōo yɔ̄ ī wu fíyēē ɔkpáncō lɛ ɔkɔ cɛyí dɛ̄gba kahíníī, “Ācɛ nēe lā ipú ɛcɛ ā le jí ɛɛ́. É le jí ɛɛ́! É le jí ɛɛ́, eko nɛ̄ aálelékwū ōtɛ̄hɔ̄ ɛtá ɔhá ā le opo kú uwā tá.