Read idoma URÚTU 1 Bible Online

URÚTU 1 - idoma bible

URÚTU 1

¹Ipú ɛ̄cī gbɔbū ɛ́ɛ́ ka Ísrɛ̄lu kóō géē lɛ ɔcɛ́ ōgbāajɛ ā, Ɔkpɛtā gbɔɔ́ ō ŋmó ajɛ kú Ísrɛ̄lu nɛ̄hi. Anɔ́ɔ ɔ̄cɛ éyi ŋmá Ubɛ́tilɛhɛ̄m kú Ujúda kwú ɔnyā nū mɛ́mla ayí nū nɔ̄nyīlɔ ɛpa ú le pɛ́ gaá lā Umówābu.

²Iyē kú ɔ̄cɛnyīlɔ ā lé ka, Ɛlímɛ́lɛ̄ki, iyē kú ɔnyā nū lé ka Unayómi, iyē kú ayí uwā nɔ̄nyīlɔ ɛpa ā lé ka, Umálɔn mɛ́mla Ucílīyɔn. É ŋmá ipɔ́ɔma kú Ɛ́frāti. Eko nēé lā Umówābu yɛɛ ā,

³Ɛlímɛ́lɛ̄ki gekwú, gaá hile Unaómi mɛ́mla ayí nū nɔ̄nyīlɔ ɛpa ā ōfōōfū uwā.

⁴Ayí kú Unaómi ā le áncɛ́nyā kú Umówābu ɛpa lɛ ɔnyā. Éyi kú anyā ā lé ka Ɔpa, iyē kú ɔhá ā kē wɛ Urútu. Igbīhi nēé lā Umówābu bɛ̄ɛka iháyí igwó ā,

⁵Umálɔn mɛ́mla Ucílīyɔn le pɛ́ gekwú. Anɔ́ɔ ó gaá hile Unaómi ōfōōfūnū á. Ɔbá nū mɛ́mla ayí nū nɔ̄nyīlɔ ɛpɛlɛ́ɛpa ā le pɛ́ gekwú hɛ̄ ɔ̄ tá.

⁶Eko nēé lā Umówābu kpɔ́ ā, Unaómi le pó ka Óndú ā ɔ́ɔ le ɔhā hɛ́ ce ācɛ ɔlɛ́ anúɔ, o ŋmá lɛ īkpɔ̄dɛ̄hɔ̄ kú uwā nōo yá nɛ̄hi nēé klla cē ɔdɛ̄hɔ̄ nɛ̄hi ā. Anɔ́ɔ ó le tútū ō nyɛ̄ɛ̄ ŋmá Umówābu mla anyā ayí nū ā.

⁷Unaómi mɛ́mla anyā ayí nū ā gbɔɔ́ ō nyɔ̄ ga ajɛ kú Ujúda tɔ̄há.

⁸Amáŋ, abɔ̄ é gā ɔwɛ ā, Unaómi da uwá kéē le pɛ́ cīgbīhi ga ɔlɛ́ uwā, kéē gáā bá mla ɛ́nɛ́ uwā. Ó da uwá ká Óndú ā kóō yá olɔhi lɛ uwá, ɛ́gɛ́nɛ̄ ɔ́ɔ yá lɛ anúɔ mɛ́mla ācɛ ɔlɛ́ anúɔ nēe le pɛ́ gekwú ɛɛ́ mā.

⁹Ó klla da uwá kú Óndú ā kóō lɛ ɔ́ yá tɔ́ɔtɛ́ lɛ uwá cɛ́ɛ́ kéē lɛ ɔbá ɔhá lɛ, cɛ́ɛ́ kéē lɛ ɔlɛ́ lɛ. Anɔ́ɔ Unaómi lɛ ɔtū má uwá ɔtū, le úŋmóō tá uwā. Amáŋ, é gbɔɔ́ ō jikwū nɛ̄hi,

¹⁰anɔ́ɔ é da Unaómi ka ehée, aá géē pɛ́ nyɔ̄ mla anú ga ɛgiyí ācɛ ɔlɛ́ nū.

¹¹Unaómi tá uwá ohi kéē le cīgbīhi, ayí anúɔ. Ó da uwá ka ɔdíyá nɛ́ɛ tíne ō wā mla anúɔ ā? Ó ka anúɔ lɔfú ma ayí nɔ̄nyīlɔ, nēe géē wɛ ɔbá uwá glá ɛ́ɛ́ nɛɛ?

¹²Anɔ́ɔ ó da uwá kéē lɛ cīgbīhi ga ɔlɛ́ uwā, ka anúɔ ɔ́ɔ le hīla fíyɛ́ ō lɛ ɔbá ɔhá ɛɛ́. Ó klla da uwá ka ɔ́dāŋ ka anúɔ kōō lɛ ɔbá lɛ otú ɔ́ɔmā, ká anúɔ kōō yīipú lɛ ayí nɔ̄nyīlɔ ma,

¹³ó ka ɛ́ɛ géē gbēyī, kéē le jɛ̄, ɛ́ɛ́ kéē géē wɛ ɔbá uwā glá ā? Ó da uwá ka ɛ́ɛ géē tá aɔ́bá ɔhá ō lɛ nɛɛ, ayí anúɔ? Ó da uwá ka ɛ́ɛ gáā tá ŋ́. Unaómi ka Óndú ā ɔ́ɔ lɛ igbīhi cēkwu anúɔ ɛɛ́. Ó ka ɔ́ɔ kwú anúɔ iyē lɛ uwá nɛ̄hi.

¹⁴Anɔ́ɔ é gbɔɔ́ ō jikwū nɛ̄hi kpɔ́ á. ɔ́rpa lɛ ɔtū má ɛ́nɛ́ ɔbá nū ɔtū, lɛ ɔ́ tá úŋmóō. Amáŋ, Urútu í cē nyɛ̄ɛ̄ hɛ̄ ɛ́nɛ́ ɔbá nū tá ŋ́.

¹⁵Anɔ́ɔ Unaómi da Urútu ka ɔnyā kú ɔyínɛ́ ɔbá nū ɔ́ɔ le cīgbīhi ga ɛgiyí ācɛ ɔlɛ́ nū mɛ́mla Ɔwɔicō kú nū ɛɛ́. Ó lɛ ā, ɔ́ɔ le cīgbīhi ga ɔlɛ́ mla anú dúú.

¹⁶Amáŋ, Urútu tá ɔ̄ ohi da ɔ́ ka, ɔ́ɔ híī da anúɔ kā anúɔ nyɛ̄ɛ̄ gwū ɔ̄ tá ŋ́. Ó ka ɔ́ɔ cɛ̄ ká anúɔ nyɔ̄ mla anú. Urútu da ɔ́ ka ɛga dúúmá nɔ́ɔ géē nyɔ̄ ā, abɔ́ɔ nɛ̄ anúɔ géē nyɔ̄ dúú á. Ɛga dúúmā nɔ́ɔ géē lā ā, abɔ́ɔ nɛ̄ anúɔ géē lā dúú á. Ācɛ ɔlɛ́ nū ɛ́ɛ géē wɛ ācɛ ɔlɛ́ anúɔ á. Ɔwɔicō kú nū ɔ́ɔ kē í wɛ Ɔwɔicō kú anúɔ dúú á.

¹⁷Urútu klla da ɔ́ ka ɛga nɔ́ɔ géē kwú ā, abɔ́ɔ nɛ̄ anúɔ géē kwú dúú ā. Ɛga nēé géē nyi ɔ́ ā, abɔ́ɔ nēé géē nyi anúɔ dúú á. Anɔ́ɔ ó da ɔ́ ka Óndú ā kóō yá anúɔ italā fíyɛ́ ɔ́dāŋ́ ka ɔdā ɔhá fíyɛ́ ikwū ɔ́ɔ lɛ anúɔ kɔ̄ hī ɔ̄ tá.

¹⁸Eko nɛ̄ Unaómi má ka Urútu ɔ́ɔ lɛ abɔ̄ kwu ɔtū kóō nyɔ̄ mla anúɔ piíí ā, ó klla ka dúúmā ɔhá gɛ ŋ́.

¹⁹É gbɔɔ́ ō nyɔ̄ jāā gbéeko nēé gā Ubɛ́tilɛhɛm. Eko nēé gā ajɛ ā, odúúdú ācɛ kú igelī nɛ̄ŋcɛ́ ā gbɔɔ́ ō gwéeyē ohígbū ō wā kú uwā ā. Anɔ́ɔ ācɛnyā kú igelī nɛ̄ŋcɛ́ ā dɔɔ̄kā ka Unaómi ɔ́ɔ yɔ̄ ɔkwɛ̄yi áā?

²⁰Unaómi tá uwā ohi kéē híī hī anúɔ ka Unaómi gɛ ŋ́, amáŋ ɛ́ɛ hī anúɔ ka Umára[1] Ohígbū ka Ɔwɔicō nōo lɔfú fíyɛ́ kpɛ́mm ā le ɔdā ohɔ́nɔ nɛ̄hi yá anúɔ ɛɛ́.

²¹Unaómi da uwá ka eko nɛ̄ anúɔ ŋmá amānyā ā, anúɔ wɛ omōōmu, amáŋ Óndú ā ɔ́ɔ lɛ anúɔ cīgbīhi wā ɔlɛ́ abɔ̄ áncā. Ó ka ɔdíyá nēé gē hī anúɔ ka Unaómi kpɔ́ ɛ́ɛ́ mā, eko nɛ̄ Óndú ā ɔ́ɔ le anúɔ ŋmɛ́pɔ̄bí klla le unwalu bī wā í klá anú ā?

²²Ɔwɛ ɛ́gɛ́nyā nɛ̄ Unaómi mɛ́mla Urútu, ɔncɛ̄nyā kú Umówābu, ɔnyā ɔyí nū ā piyɛyí wā Ubɛ́tilɛhɛm lɛ á. É wā Ubɛ́tilɛhɛm eko nɛ̄ ācɛ gbɔɔ́ ō cē īkpɔ̄dɛhɔ̄ icō ā.