Read idoma 1 USÁMUWƐ̄LU 10 Bible Online

1 USÁMUWƐ̄LU 10 - idoma bible

1 USÁMUWƐ̄LU 10

¹Usámūwɛ̄lu kwú ɔjá kú anɔ̄ kú ɔ́līfu ú, anɔ́ɔ ó le ɔ́ pīya klá Usɔ́lu ɛyí, le ɔ́ kwú bɔ́tū, anɔ́ɔ ó da ɔ́ kahíníī, “Óndú ā lɛ anɔ̄ tū uwɔ ɛyí kú ā wɛ ɔ̄cɛ nōo í gbō ācɛ ɔlɛ́ nū, Ísrɛ̄lu. A géē gbō ācɛ ɔlɛ́ nū klla í gbō uwā ŋmá ɛgiyí odúúdú aólɛlā kú uwā. Ɛ̄nyā kē í wɛ ɔdā ōcābɔ̄ gā uwɔ ka, Óndú ā lɛ uwɔ fu kú ā gbō ācɛ ɔlɛ́ nū Ísrɛ̄lu.

²“Eko nāa nyɛ̄ɛ̄ ŋmá ɛgiyí um ícɛ nyā ā, a géē jīla ācɛ ɛpa ɔwɛ kwu únóji kú Urécɛ̄lu ajaajɛ ipú Usɛ́lūsa ipú ajɛ kú Ubénjamīn ā. É géē da uwɔ ka, aíjakī nāa yɔ̄ í dɔɔ̄kā ā, é le uwá pīyɛ̄ ɛɛ́, ka ádā uwɔ í lɛ ɛlá wu unwalu kú uwā ɛ́ɛ́ gɛ ŋ́, amáŋ ó yɔ̄ ī dɔɔ̄kā uwɔ eko dóódu, ka ‘iní nɛ̄ n géē pīyɛ̄ ɔyí um āa?’”

³A géē gbo ɔ́ ō nyɔ̄ ŋmá abɔ́ɔ jāā gbéeko nāa gā ɔkwu ɔcí elihɔ kú Utábɔ ā. Abɔ́ɔ ā, a géē jīla mla ācɛ ɛtá nēe bá ī nyɔ̄ gaá gwɛ́ɛya lɛ Ɔwɔicō Ubɛ́tɛlu. Éyi kú uwā géē bī ayí ɛwū ɛtá, ɔhá í bī igbō ɛtá, ɔhá ā í bī ejé omōōmu ɔjá kú ɔkpɛ́bɛ́.

⁴É géē hókónu tū uwɔ̄ klla í kpó igbō ɛpa gā uwɔ, nāa géē mīyɛ.

⁵Cɛ́ɛ́ a géē ga ɛyí ɛfu kú Ɔwɔicō ā ajɛ kú Ugíbēya, ɛga nɛ̄ aáklɔ̄kpe kú ɛfú kú ācɛ Ufílīstiya yɔ̄ ā. Okónɔɔwɛ kú igelī nɛ̄ŋcɛ́ ā, a géē má ígwu kú ācomɛ́ɛbɛ bā í wā ajɛ ŋmá icō ɛfu, ɛgiyí ede ā. É géē bá ī gwííjē, gē gwō ɛ̄ngwū, uba mɛ́mla ɔkpānā, é klla í bá ī tá ɛ́mula. É géē bá ī jīījē klla bá ī dɛ̄gba klla í bá ī mɛ́ɛbɛ dúú.

⁶Cɛ́ɛ́ igbeékpónú, alelékwū kú Óndú ā géē je uwɔ, a í gbɔɔ́ ō jīījē mla uwá klla í gbɔɔ́ ō mɛ́ɛbɛ mla uwá. A í je pīya ɔ̄cɛ ɛyɛ́ɛ́yí.

⁷Eko nɛ̄ ɛ̄nyā le yá, yá ɔdā dóódu nɛ̄ Óndú ā géē da uwɔ ka ā yá ā.”

⁸“A géē nyɔ̄ ga Ugíligalu gbēyī um. Abɔ́ɔ nɛ̄ n gáā má uwɔ á, cɛ́ɛ́ n lɛ ɛya o yɔlá dúúdú mɛ́mla ɛya kú olétɔ̄há ā gwó abɔ́ɔ. A géē gbēyī um abɔ́ɔ ɛ̄cī ahāapa, jāā gbéeko nɛ̄ n wā í lɛ ɔdā nāa í yá ā da uwɔ.”

⁹Eko nɛ̄ Usɔ́lu pīyeyī kóō nyɛ̄ɛ̄ ŋmá ɛgiyí Usámūwɛ̄lu ā, Ɔwɔicō lɛ ɔtū ɛ̄yīpɛ̄ je lɛ Usɔ́lu, odúúdú ɔdā ōcābɔ̄ nɛ̄ Usámūwɛ̄lu je lɛ ɔ́ ā, le kpó yá jīla ícíícɛ ɔ́ɔmā.

¹⁰Eko nɛ̄ Usɔ́lu mɛ́mla ɔ̄cocɛ̄hɔ̄ kú nū ga Ugíbēyi ā, ígwu kú ācomɛ́ɛbɛ gaá jīla anú ɔwɛ. Anɔ́ɔ igbeékpónú, alelékwū kú Óndú ā kwú ɔ́ ú, anɔ́ɔ, ó gbɔɔ́ ō mɛ́ɛbɛ mla uwá klla gbɔɔ́ ō jīījē mla uwá á.

¹¹Eko nɛ̄ ācɛ nēe tɛtɛ jé ɔ̄ le ɔ́ má abɔ̄ ó yɔ̄ í yá ɛ̄nyā ā, é da īyī uwā ɔ̄kā kahíníī, “Ɔdí yá ɔyí kú Ukíssi yɔ̄ ā? Usɔ́lu wɛ ipú ācomɛ́ɛbɛ ā dúú nɛɛ?”

¹²Ɔ̄cɛ éyi nōo lā abɔ́ɔ ā da uwá ɔ̄kā ka, ācomɛ́ɛbɛ ohile ā bɛ́ɛ? Ɔ̄nyɛ nɛ̄ aá gbɛlá ka ádā uwā wɛ ā?” Ɛ̄nyā wɛ ɔkwu akwukwú nēé gē kpó kahíníī, “Usɔ́lu kwú pīya ɔ̄comɛ́ɛbɛ dúú nɛɛ?” Aá.

¹³Eko nɛ̄ Usɔ́lu le ɛbɛ má kwɛyí, klla le ijē jē mɛ ā, ó le tá ɛyí ede kú ɛyí ɛfu ā.

¹⁴Ɔmáapu ádā kú Usɔ́lu lɛ ɔ́ má mla ɔ̄cocɛ̄hɔ̄ kú nū ā, anɔ́ɔ ó da uwá ɔ̄kā ka iní nɛ́ɛ nyɔ̄ ā? Anɔ́ɔ Usɔ́lu tá ɔ̄ ohi ka aá bá gē dɔɔ̄kā aíjakī ā, abɔ́ɔ aá í má uwā ŋ́ mā, aá le yɛ gāá má Usámūwɛ̄lu.

¹⁵Anɔ́ɔ ɔmáapu ádā nū ā da ɔ́ ɔ̄kā kpɔ́ ka ɔdí nɔ́ɔ da uwá ā?

¹⁶Ó tá ɔ̄ ohi ka ɔ́ɔ da aá ka ɛ́ɛ le aíjakī ā pīyɛ̄ ɛɛ́, amáŋ Usɔ́lu í da ɔmáapu ádā nū ɔdā nɛ̄ Usámūwɛ̄lu da ɔ́ lɛyíkwu ɔcɛ́ ō lé kú nū ā ŋ́.

¹⁷Usámūwɛ̄lu lɛ ācɛ ā kpó hīgwú wā í le jīla iyɔ̄bū Óndú ā Umísipa.

¹⁸Anɔ́ɔ ó da uwá kahíníī, Óndú, Ɔwɔicō kú Ísrɛ̄lu ka anúɔ kpó uwā wɛ̄ɛcɛ ŋmá Íjīpiti á, ó ka anúɔ klla hɛ́ uwá tá ŋmá abɔ̄ ācɛ Íjīpiti mɛ́mla ācɛ ɔhá dóódu nēe bá gē pīya uwá tū ā.

¹⁹Ó ka Óndú ā ɔ́ɔ klla kahíníī, ‘Ami wɛ Ɔwɔicō kú aá, nōo hɛ́ aá tá ŋmá ipú ákanya mɛ́mla unwalu kú aá dóódu á. Amáŋ, ícɛ nyā aá tá um ɛɛ́. Aá klla da um ka ami ɔ́ɔ lɛ ɔcɛ́ je lɛ aá. Ó lɔhi íbí, aá lɛ īyī aá túbá ipɔ́ɔma dóódu ipéyī Óndú ā.’”

²⁰Anɔ́ɔ Usámūwɛ̄lu cɛ̄ lɛ ipɔ́ɔma éyééye gbɔɔ́ ō wā iyɔ̄bú Óndú á, anɔ́ɔ Óndú ā kwú ipɔ́ɔma kú Ubénjamīn ú á.

²¹Anɔ́ɔ Usámūwɛ̄lu cɛ̄ lɛ ācɛ ipɔ́ɔnū kú ipɔ́ɔma kú Ubénjamīn dóódu kéē wā í yɛ iyɔ̄bū Óndú ā éyééye. Anɔ́ɔ Óndú ā kwú ipíinu kú Umátiri ú á. Anɔ́ɔ ɔ̄cɛ éyééye kú ipíinu kú Umátiri ā kéē wā í yɛ iyɔ̄bū Óndú ā. Anɔ́ɔ Óndú ā kwú Usɔ́lu, ɔyí kú Ukíssi ú á. É tíne nū, amáŋ é má ɔ̄ ŋ́.

²²É le ɔkɔ gbā le ɔ̄kā da Óndú ā kahíníī, “Ɔ̄cɛ ɔhá hile ɛ́ɛ́ nɛɛ?” Anɔ́ɔ Óndú ā tá uwā ohi ka, Usɔ́lu ɔ́ɔ yɔ̄ abɔ̄, kwú īyī nū ú tayínū ipú inu kú ɔdōlé nēé gwó bá abɔ́ɔ ā.

²³É le inya kwu gaá le Usɔ́lu bī wɛ̄ɛcɛ gé lɛ ācɛ ā, anɔ́ɔ é má ka anú ɔ́ɔ jɛ̄ fíyɛ́ odúúdú ācɛ nēe jīla abɔ́ɔ á.

²⁴Anɔ́ɔ Usámūwɛ̄lu da ācɛ ā kahíníī, “Ɛ̄nyā wɛ ɔ̄cɛ nɛ̄ Óndú ā fu á, ɔ̄cɛ ɔhá dúúmā í klla yɔ̄ ipú alɔ bɛ̄ɛka anú ā ɛ́ɛ́ gɛ ŋ́.” Anɔ́ɔ ācɛ ā dɛ̄gba kahíníī, “Ɔcɛ́ kóō yēeyī piyóó.”

²⁵Usámūwɛ̄lu le ka lɛ uwá ɔdā nēe wɛ ígbe kú ɔcɛ́ mɛ́mla úklɔ́ kú ɔcɛ́ ā. Anɔ́ɔ ó lɛ ɔ́ tá tū ɔkpá klla kwú ɔkpá ā ú tá Áklɔ̄kpīihɔ kú Óndú á. Anɔ́ɔ ó le ɔnyɔɔnyɛ nū ga ɔlɛ́ nū á.

²⁶Usɔ́lu kwúcē ga ɔlɛ́ nū, Ugíbēya. Ācɛ olɔfú nɛ̄hi nɛ̄ Ɔwɔicō lɛ abɔ̄ kwu uwá ɔtū ā le yɛ mla anú.

²⁷Amáŋ ācɛ icííci ā tóohī kahíníī, “Ɔdā olɔhi nyā nɛ̄ ɔ̄cɛ ā lɔfú yá lɛ alɔ glá ā?” É leyī gwū ɔ́ bónū, anɔ́ɔ é bī ɛhi dúúmā gē lɛ ɔ́ ŋ́ má.