Read idoma 1 USÁMUWƐ̄LU 11 Bible Online

1 USÁMUWƐ̄LU 11 - idoma bible

1 USÁMUWƐ̄LU 11

¹Ó lɛbɛ̄ɛka ɔyā éyi ā, anɔ́ɔ Unáhāsi, ɔcɛ́ kú Ámɔn le tá Ujábesi, ipú ajɛ kú Ugílɛ̄di gāá mīyɛ ajɛ kú uwā. Anɔ́ɔ odúúdú ācɛ kú Ujábesi da Unáhāsi ka ɔ̄ lɛ ɛbɔ́ yá mla aá, ka aá í gbā ɔ̄ ɛ̄gbā.

²Amáŋ Unáhāsi, ɔcɛ́ kú Ámɔn ā da uwá ka anúɔ géē yá ɛbɔ́ mla uwá ɔwɛ ékpónú. Ɛ́ɛ cɛ̄ kú anúɔ lɛ uwá īkpēyī kú abɔ̄lɔ́ná kú odúúdú uwā kpó ŋmúla, cɛ́ɛ́ ká anúɔ lɛ uwēyī je lɛ odúúdú ācɛ kú Ísrɛ̄lu.

³Anyākwɔ́cɛ kú Ujábesi tá ɔ̄ ohi ka ɔ́ lɛ ɛ̄cī ahāapa je lɛ aá, ká aá lɛ ɛhɔ̄ tū ga odúúdú ajɛ kú Ísrɛ̄lu, ɔ́dāŋ́ ka, ɔ̄cɛ dúúmā í yɔ̄ nōo gē tá aá abɔ̄, hɛ́ aá tá ŋ́, cɛ́ɛ́ aá kwú īyī aá ú kpó gaá lɛ ɔ́, cɛ́ɛ́ kú ɔ̄ lɛ aá īkpēyī kú abɔ̄lɔ́ná ā kpó ŋmúla.

⁴Eko nɛ̄ ɔlɛɛhɔ̄ kú uwā gā Ugíbēya, ɛga nɛ̄ Usɔ́lu lā ā, é lɛ ɛlā nyā ka lɛ odúúdú ācɛ, eko nɛ̄ odúúdú ācɛ ā le ɛlā ā pó ā, é gbɔɔ́ ō jikwū nɛ̄ɛ̄nɛ̄hi.

⁵Usɔ́lu tá igbīhi aɔ́bá ɛna kú nū yɔ̄ ī pīyɛyí ŋmá ɛhɔ̄ wā ɔlɛ́. Anɔ́ɔ é le ɔ̄kā kú ɔdá nōo yá ɛ́ɛ́ nɛ̄ odúúdú ācɛ bá ī jikwū ā kā ɔ̄. É le ɛhɔ̄ kú ācɛ Ujábesi ā cɛ̄ lɛ ɔ́ dúú.

⁶Eko nɛ̄ Usɔ́lu lɛ ɛhɔ̄ nyā pó a, Alelékwū kú Óndú ā wā í kwú ɔ̄ ú dúúdú. Anɔ́ɔ ó kwú cɔ̄nū nɛ̄hi á.

⁷Ó kwú aɔ́bá ɛna kú nū ā ú, le uwá kpó ŋmó, lɛ ɛbɛ́ kú uwā wā nyɛŋɛnyɛŋɛ, lɛ ɔ́ kpó tɛ̄ɛhɔ̄ fu odúúdú ācɛ kú Ísrɛ̄lu, ka ɔ̄cɛ dúúmā nɛ̄ ɔ́ wɛ̄ɛcɛ gaá yɛce Usɔ́lu mɛ́mla Usámūwɛ̄lu ga ɔgbɛ́fú ā ŋ́, ɛ́gɛ́nyā nēé géē yá aɔ́bá ɛna kú nū á. Ācɛ kú Ísrɛ̄lu gbɔɔ́ ō yúufi Óndú ā, anɔ́ɔ odúúdú uwā kwú pɛ́ wɛ̄ɛcɛ gaá le jīla tɔ̄ɔ̄há ɛga ékpónú.

⁸Eko nēé le jīla tɔ̄ɔ̄há Ubésēki ā, ācɛ nēe ŋmá Ísrɛ̄lu wā ā wɛ, úlā ɛpa ce ofu igwó bá ɛga ofu igwɛ́ɛhɔ̄ (300,000), aá ɛ̄nɛ̄ o ŋmá Ujúda ā wɛ ulá ɛpa ce ofigwó bá ɛga ofu ce igwó (30,000).

⁹Anɔ́ɔ é da ācɛ nēé tɛ̄ɛhɔ̄ ŋmá Ujábes wā a ká ɛ̄ nyɔ̄ gāá da ācɛ ɔlɛ́ uwā ka, gbɔbū kú ɛnɔ kóō wɛ̄ɛyí oŋmɔ́ɔcī nū ā, ɛ́ɛ géē hɛ́ uwā tá. Eko nɛ̄ ācɛ kú Ujábes mīyɛ ɔlɛɛhɔ̄ nyā, é gwéeyē nɛ̄hi.

¹⁰Anɔ́ɔ uwá da, Unáhāsi ka, Óócí, aá géē cɔ̄nyā lɛ ɔ́, cɛ́ɛ́ kú ɔ̄ yá aá ɔdā dóódu nōo he ɔ́ ɔtū.

¹¹O ŋmɔ́ɔ̄cī nū, ɔ̄cɔ̄ɔ̄cī ā, Usɔ́lu le ācɛ ɔlɛ́ nū ā kpó kɔ̄ ígwu ɛtá, ofúlɔ̄cī ā é le pɛ́ ga ádɛ́fú kú aólɛlā kú uwá gbɔɔ́ ō ŋmó ācɛ Ámɔn. Gbɔbū kú ɛnɔ kóō wɛ̄ɛyí ā, é lɛ ācɛ Ámɔn kpó ŋmó, lɛ uwá pahīla, nɛ̄ iwili kú ācɛ Ámɔn nēe hile ā í gbo ɛpa nēé gē bá tɔ̄ɔ̄há glá gɛ ŋ́. Ɔnyɔɔnyɛ kú uwā yɔ̄ gē kwinya ga amu ga anū.

¹²Anɔ́ɔ ācɛ kú Ísrɛ̄lu da Usámūwɛ̄lu ka íni nɛ̄ ācɛ nēe ka ka Usɔ́lu ɔ́ɔ́ gáā wɛ ɔcɛ́ kú aá glá ŋ́ mā bá āa? É da ɔ́ ká ɔ̄ kwú uwā ú kpó lɛ aá kú aá lɛ uwá kpó ŋmó.

¹³Amáŋ, Usɔ́lu tá uwā ohi ka é gáā ŋmó ɔ̄cɛ dúúmā ŋ́, ohígbū ka, ícíícɛ ɔ́ɔmā wɛ ɛ̄cī nɛ̄ Óndú ā hɛ́ Ísrɛ̄lu tá á.

¹⁴Anɔ́ɔ Usámūwɛ̄lu da uwá ka aá ga Ugílgalu igbɔhá kpɔ́ ɛ́ɛ́, kú aá klla kwú Usɔ́lu ú ce ɔcɛ́ kú aá igbɔhá kpɔ́.

¹⁵É le pɛ́ ga Ugílgalu, anɔ́ɔ é klla kwú Usɔ́lu ú ce ɔcɛ́ kú uwā abɔ́ɔ, iyɔ̄bū Óndú ā ɛga otīīhɔ ā á. É le ɛya kú ɛbɔ́ gwo abɔ́ɔ, anɔ́ɔ Usɔ́lu mla ācɛ ā gwéeyē nɛ̄hi ipéyī Ondú ā abɔ́ɔ á.