Read idoma 1 USÁMUWƐ̄LU 13 Bible Online

1 USÁMUWƐ̄LU 13 - idoma bible

1 USÁMUWƐ̄LU 13

¹Usɔ́lu wɛ iháyí ofu cigwó ɛ́ɛ́ nōo gbɔɔ́ ō gbō ācɛ kú Ísrɛ̄lu á. Ó wɛ ɔcɛ́ kú Ísrɛ̄lu iháyí ofɛpa ce ɛpa.

²Usɔ́lu lɛ ācɛ ulá ahāapa ce ofu igwó (3,000) kpó ŋmá ipú ācɛ kú Ísrɛ̄lu. Ulá ɛhɔ̄ (2,000) bá pī ɔ̄ Umíkmāsi ɔlɛ́ ɛyí ɛfu kú Ubɛ́tɛlu ā, ulá ɛpa ce ofu igwó (1,000) bá ɛgiyí Ujonátan Ugíbēyi ajɛ kú Ubénjamīn. Ó le ācɛ nēe hile ā cīgbīhi ga ɔlɛ́ uwā.

³Ujonátan le ígwu kú ācɛ Ufílīstiya nēe bá Ugéba ā kpó ŋmó, anɔ́ɔ odúúdú ācɛ Ufilístiya ohile ā le pó á. Anɔ́ɔ Usɔ́lu le ɛhɔ̄ tū gā ipú odúúdú ajɛ kú Ísrɛ̄lu, kéē lɛ opo kú ɛfú ō kpó tá, cɛ́ɛ́ kéē lɛ ācɛ Uhíburu kpó hīgwú wā í kpɛ́fú.

⁴É le ka lɛ odúúdú ācɛ kú Ísrɛ̄lu ka, Usɔ́lu ɔ́ɔ le otrɛ̄yí kú aícɔ́ɔja kú Ufílīstiya ā ŋmó, ācɛ kú Ufílīstiya ɛ́ɛ bá ī wɔ́tū nū ohígbū ɔ́ɔmā. Anɔ́ɔ odúúdú ācɛ ā cīgwú kú opo kú ɛfu nēé pó ā. É le pɛ́ wā ɛgiyí Usɔ́lu Ugígalu.

⁵Ācɛ Ufilístiya ā kē le jīla kéē gāá kpɛ́fú tá ācɛ kú Ísrɛ̄lu dúú. Úgbɔ́nya kú ɛfú kú uwā wɛ úlā ofu ɛtá ce igwɛ́ɛhɔ̄ (30,000), ācɛ o kpɛ́fú ɔnya kú uwá wɛ ulá igwɛ́ɛhɔ̄ (6,000), mɛ́mla aícɔ́ɔja alɛwa nɛ̄ ɛwa kú uwa lɛbɛ̄ɛka ɔjɛ kú okónu ísu ā. É le pɛ́ ga Umíkmāsi ɛnɔ̄ɔ̄cī kú Ubɛ́táfen gāá lɛ aāklɔ̄kpɛ kú ɛfú gwó kwu abɔ́ɔ.

⁶É gbɔɔ́ ō kpɛ́fú tá ācɛ kú Ísrɛ̄lu lɔfú lɔfú, klla gbɔɔ́ ō yá uwa ɛlā bɔ̄bí bɔ̄bí. Ācɛ kú Ísrɛ̄lu ōhī le kwu í tayínū ipú ɔ̄gɔ̄, aɔ́há le kwu í tayínū ɛplɛ́cɔ̄, ámāŋ ipú ɔ̄gɔ̄ kú obugā.

⁷Aóhī le behé ísu kú Ujɔ́dan ga ipú ajɛ kú Ugádi mɛ́mla Ugílɛ̄di. Eko nyā Usɔ́lu klá Ugígalu kpɔ́ ɛ́ɛ́. Ipú kú ācɛ nēe bá mla anú ā kwú gbogodo.

⁸Ó gbēyī Usámūwɛ̄lu ɛ̄cī ahāapa ɛ́gɛ́nɛ̄ Usámūwɛ̄lu da ɔ́ ka ɔ́ gbēyī ā, amáŋ ó wā ŋmá Ugígalu ŋ́ kpɔ́. Ācɛ gbɔɔ́ ō kwu hɛ Usɔ́lu tá,

⁹anɔ́ɔ ó da uwá kéē lɛ iyó ajɛ kú ɛya ō yɔlá dúúdú lɛ Óndú ā kpó gé lɛ anúɔ. Anɔ́ɔ ó le ɛya o yɔlá dúúdú ā gwó á.

¹⁰Abɔ̄ ó yɔ̄ gē yá mɛ bōōbū ā, Usámūwɛ̄lu gā ajɛ. Usɔ́lu le tɛ́ɛcɛ gaá jīla anú ɔwɛ,

¹¹amáŋ Usámūwɛ̄lu da ɔ́ ka ɔdí nɔ́ɔ yá ā? Usɔ́lu tá ɔ̄ ohi ka ācɛ ɛ́ɛ bá ī kwu gwū anúɔ tá, ó da ɔ́ ka ɔ́ kē wā eko nɔ́ɔ ka ka anúɔ gē wā ā ŋ́. Ofíyɛ́ dúú ā, ācɛ kú Ufílīstiya ɛ́ɛ bā gē túblá Umíkmāsi ajaajɛ.

¹²Anɔ́ɔ anúɔ gbɛlá ka, ācɛ kú Ufílīstiya géē wā í kpɛ́fú tá anúɔ Ugígalu ɛga nɛ̄ anúɔ klá ā. Ó klla ka anúɔ í kē póofu Óndú ā ɛ́ɛ́ ŋ́, anɔ́ɔ anúɔ gbɛlá ka, anúɔ géē lɛ ɛya ā gwó á.

¹³Usámūwɛ̄lu tá ɔ̄ ohi kahíníī, “Ucē kú olíla nāa yá abɔ́ɔ á. Á lɛyítáajɛ lɛ íne nɛ̄ Óndú, Ɔwɔicō kú uwɔ je ga uwɔ ā ŋ́. Ɔ́dáŋ ka, a lɛyítáajɛ lɛ ɔ́ nɛɛ, ó géē yɛ̄ í cɛ̄ gā awɔ mɛ́mla ipɔ́ɔma kú uwɔ ā í géē wɛ ɔcɛ́ kú ācɛ Ísrɛ̄lu piyóó.

¹⁴ Amáŋ abālɔbányā, ɔcɛ́ kú uwɔ í gáā gɔbū piyóó ɛ́ɛ́ gɛ ŋ́. Ohígbū ka, a tá kóō lɛyítáajɛ lɛ Óndú, Ɔwɔicō. Ó géē tíne ɛdɔ ɔ̄cɛ nōó dɔɔ̄kā ā, cɛ́ɛ́ kóō kwú ɔ̄ ú ce ɔcɛ́ kú ācɛ ɔlɛ́ nū Ísrɛ̄lu.”

¹⁵Anɔ́ɔ Usámūwɛ̄lu nyɛ̄ɛ̄ ŋmá Ugígalu le tá ɛga nōo he ɔ́ ɔtū á. Ācɛ nēe hile ā le pɛ́ yɛce Usɔ́lu abɔ́ɔ ó yɔ̄ ī nyɔ̄ ga ɛgiyí aícɔ́ɔja kú nū ā. É le yɛ ŋmá Ugígalu ga Ugíbēyi ipú ajɛ kú Ubénjamīn. Usɔ́lu lɛ aícɔ́ɔja kú nū kpó jila, é lɛbɛ̄ɛka úlā ce ofu igwó (600) ā.

¹⁶Usɔ́lu mɛ́mla ɔyí nū Ujonátan mɛ́mla ācɛ ɔlɛ́ nū lɛ aáklɔ̄kpɛ kú ɛfú kú uwá kwu Ugéba, ipú ajɛ kú Ubénjamīn. Aáklɔ̄kpɛ kú ɛfú kú ācɛ Ufílīstiya kwu Umíkmāsi.

¹⁷Ācɛ Ufílīstiya le ɔgba hɛ́ ɔ́kíkā ɛtá kéē kpɛ́fú. Ígwu éyi yɛ lɛyíkwu Ofára ipú ajɛ kú Ussúwalu.

¹⁸Ígwu ɔhá yɛ lɛyíkwu Ubɛ́ti Uhórɔn, ígwu ɔ́mɛɛtá ā yɛ lɛyíkwu ɛjī nōo pīyeyī kwu ɔpɛ́ kú Usebáyim mɛ́mla ígbíli ā.

¹⁹Eko nyā ā, ɔ̄conɔwá dúúmā í yɔ̄ Ísrɛ̄lu ŋ́, ohígbū ka ācɛ Ufílīstiya í cɛ̄ lɛ ācɛ Uhíburu nwū ɛ́gɛ́nɛ̄ é gē na ɔkpacaŋ́gelī amáŋ ka óbō ŋ́.

²⁰Ācɛ kú Ísrɛ̄lu gē ga ajɛ kú Ufílīstiya gāá na ɛnū mɛ́mla o tū ɔ̄ ulé. Abɔ́ɔ nēé gē nyɔ̄ ī yá āgā mɛ́mla ɛ̄wā klla gē nyɔ̄ ī tū uwā ulé dúú á.

²¹É gē hɛ́ uwá égō éyi, ɛ́ɛ́ kē tū āgā mɛ́mla ussɔ́bɛ̄lu ulé, égō ɛpa ɛ́ɛ́ kéē tū ɛnū mɛ́mla aɔ́dā ō bī hɛ́hɔ̄ kú uwā ulé.

²²Abɔ̄ nɛ̄ ó le lɛ ā, ɛ̄cī nēé gáā kpɛ́fú ɔ́ɔmā, aícɔ́ɔja kú Ísrɛ̄lu dúúmā í lɛ ɔkpaccŋgelī, óbō ámāŋ ka iyɔ́fú ɛdɔ ɔhá dúúmā ŋ́, ayíka Usɔ́lu mɛ́mla ɔyí nū Ujonátan ōfōōfū uwā nɛ.

²³Ācɛ Ufílīstiya lɛ ígwu kú aícɔ́ɔja tɛ̄hɔ̄ kú é nyɔ̄ gaá gbō ɔwɛ nōo yɛ ga, Umíkmāsi ā.