Read idoma 1 USÁMUWƐ̄LU 14 Bible Online

1 USÁMUWƐ̄LU 14 - idoma bible

1 USÁMUWƐ̄LU 14

¹Ɛ̄cī éyi Ujonátan da oklóbīya nōo gē bī iyɔ́fú kú nū ā ka aá le beé ga ádɛ́fú kú ācɛ Ufilístiya. Amáŋ, Ujonátan í ka lɛ ádā nū Usɔ́lu ŋ́.

²Eko ɔ́ɔmā, Usɔ́lu le ádɛ́fú kú nū kwu ɔkwu ɔcí kú Upomégranēeti ipú ajɛ kú Umígrɔn nɛ̄ ó lɛ igbó lɛ Ugíbēyi ŋ́ mā. Ācɛ nēe bá pī ɔ̄, abɔ́ɔ ā wɛ ulá ce ofu igwó (600).

³Ɔ̄cogwɛ́ɛya nōo gē bī ikpáti ɛka kú Ɔwɔicō eko ɔ́ɔmā wɛ, Ahíja, ɔyí kú Íkābɔdu, ɔyínɛ́ kú Ahítūbu, nōo wɛ ɔyí kú Ufínīhasi ɔyí kú ɔyí kú Ɛ́lāyi, ɔ̄cogwɛ́ɛya kú Óndú ā Ussílo ā. Ācɛ í jé ka Ujonátan ɔ́ɔ nyɛ̄ɛ̄ ɛɛ́ ŋ́.

⁴É le ápátɛ́cɔ̄ ɛpa nɛ̄hi kpó lɛ ɔwɛ kú Umíkmāsi nɛ̄ Ujonátan géē bū ɛ́ɛ́ kóō ga ádɛ́fú kú Ufilístiya ā ŋmó. Éyi kú ɛcɔ̄ ā lé ka, Ubósesi, ɔhá lé ka Usínē.

⁵Éyi kú ɛcɔ̄ ā tá ɛhícō kú ɔwɛ opíbá ā leyīkwu Umíkmāsi, ɔhá ā tá ɛháajɛ leyīkwu Ugéba.

⁶Ujonátan da ɔyípóklóbīya kú ɔlɛ́ nū ā ka aá lɛ beé ga ádɛ́fú kú ācɛ Ufilístiya, ācopɛ̄cí nēe bá ā. Eko ōhī Óndú ā ɔ́ɔ lɔfú tá aá abɔ̄ glá, ɔ́dāŋ́ ka, ɔ́ɔ lɛ abɔ̄ tá aá, ɔ́ɔ kē í cɛ̄ lɛ aá yá ācɛ ā lé piíí, ɛ́gɛ́ dúú nɛ̄ aá nyɛ́ lɛ.

⁷Ɔyípóklóbīya ā tá ɔ̄ ohi ka ɔdā dúúmā nɔ́ɔ tíne ō yá, anúɔ yɔ̄ mɛ́mla anú.

⁸Anɔ́ɔ Ujonátan ka ɔ́ɔ lɔhi, káā le bēé nyɔ̄ cɛ́ɛ́ kú ācɛ Ufilístiya ā kéē lɛ aá má.

⁹Ó da ɔ́ ka ɔ́dāŋ́ nɛ̄ ācɛ Ufilístiya ā da ɔ́ kóō gbēyī ɛ́ɛ́, kéē wā í tá aá nɛɛ, ɛ́ɛ géē bá ɛga nɛ́ɛ bá ā.

¹⁰Amáŋ ɔ́dāŋ́ ka, ɛ́ɛ kē da aá ka, aá kóō wā ipú aá, nɛɛ, aá géē nyɔ̄, ohígbū ka ɔ́ɔmā géē cābɔ̄ lɛ aá ka Óndú ā cɛ̄ lɛ aá géē yá uwā lé.

¹¹Anɔ́ɔ é cɛ̄ lɛ ācɛ Ufilístiya lɛ uwá má á, anɔ́ɔ ācɛ Ufilístiya ā da uwá kéē má ācɛ ōhī kú Uhíburu ā gbɔɔ́ ō bɛ̄cɛ ŋmá ipú ɔ̄gɔ̄ nɛ́ɛ húmáyī tayínū ā ɛɛ́.

¹²É le Ujonátan mɛ́mla ɔyípóklóbīya ā hīgwú kéē wā icō abɔ́ɔ, ka aá lɛ odée nɛ̄ aá géē da uwá. Anɔ́ɔ Ujonátan da ɔyípóklóbīya ā kú ɔ̄ yɛce anúɔ. Ka Óndú ā ɔ́ɔ cɛ̄ lɛ Ísrɛ̄lu lɛ uwá yálé ɛɛ́.”

¹³Anɔ́ɔ Ujonátan lɛ abɔ̄ mɛ́mla okwúukwu kwu ajɛ le icō kú ápátɛ́cɔ̄ nēé bī le ŋmó ɔwɛ ā tū, ɔyípóklóbīya ā kē yɛce ɔ́. Ujonátan gē nuunu tá ācɛ Ufilístiya gē hɛ́ uwā fīyāajɛ, cɛ́ɛ́ ɔyípóklóbīya ā gbɔɔ́ ō ŋmó uwā.

¹⁴Ɔgbɛ́fú kú aflɛ́yí ɔ́ɔmā, Ujonátan mla ɔyípóklóbīya ā ŋmó ācɛ ofu.

¹⁵Odúúdú ācɛ ohile kú Ufilístiya ā gbɔɔ́ ō yúufi nɛ̄hi. Kwu ācɛ nɛ̄ gē kpɛ́fú ɔnya mɛ́mla aícɔ́ɔja ɔlamu kú uwā ā, gbo ɔɔ́ ō fīyégblú ipú ufi. Ajɛ gbɔɔ́ ō jíliyē, ipú kwú gbogodo lɛ uwá.

¹⁶Ācɛ ɔlɛ́ Usɔ́lu nēe bá í gbāājɛ Ugíbēyi, ipú ajɛ kú Ubénjamīn ā, má ācɛ kú Ufilístiya le gbájí, anɔ́ɔ é bá ī kwinya ga amu ga anú.

¹⁷Anɔ́ɔ Usɔ́lu da ācɛ ɔlɛ́ nū kéē lɛ ācɛ gbaáluka, cɛ́ɛ́ kú aá jé ācɛ nēe géē héyībí ŋmá ipú uwā a. É le ācɛ ā gbaáluka, anɔ́ɔ é má ka, Ujonátan mɛ́mla ɔ̄cɛ ō bī iyɔ́fú kú nū ā í bá ipú uwā ŋ́ má.

¹⁸Usɔ́lu da Ahíja, ɔ̄cogwɛ́ɛya ā ká ɔ̄ lɛ ɔdā nēé ī bī lɛ jé ɔtū kú Óndú ā bī wā ohígbū ka ɛ̄cī ɔ́ɔmā Ahíja bī ɔdā nēé ī bī lɛ jé ɔtū kú Óndú ā ɛga nɛ̄ ācɛ kú Ísrɛ̄lu bá ā.

¹⁹Abɔ́ɔ Usɔ́lu yɔ̄ í kɛlā lɛ ɔ̄cɛ ogwɛ́ɛyá ā kpɔ́ ɛ́ɛ́ mā, unwalu kú ádɛ́fú kú Ufilístiya yɔ̄ í nyīla tōōtɔ̄ɔ̄ ɔ̄. Anɔ́ɔ Usɔ́lu da ɔ́ ka ɛga í yɔ̄ nɛ̄ aá gē da Ɔwɔicō ɔ̄kā gɛ ŋ́ nɛɛ?

²⁰Anɔ́ɔ anú mɛ́mla aícɔ́ɔja kú nū le tá ɔgbɛ́fú ɛgiyí ācɛ Ufilístiya, ɛga nēé bá ī kpɛ́fú tá īyī uwā klla bá í ŋmó īyī uwā ā.

²¹Ācɛ Uhíburu ōhī nēe tɛtɛ yɛ āyā kú Ufilístiya ā kwú eyī í pīya gaá kwú pīya tɔ̄ɔ̄há mla Usɔ́lu mɛ́mla Ujonátan,

²²Aɔ́há nēe húmáyī tayínū ipú ɛfu kú Ɛ́frēm ā, le pó ka ācɛ Ufilístiya ɛ́ɛ bá ī kwinya ācɛ Ísrɛ̄lu, é klla kwú pɛ́ wɛ̄ɛcɛ kwú pīya tɔ̄ɔ̄há mla Usɔ́lu mɛ́mla Ujonátan. Anɔ́ɔ é gbɔɔ́ ō ŋmó ācɛ kú Ufilístiya á.

²³É ŋmó ācɛ Ufilístiya jāā ga ɛháajɛ kú Ubɛ́tāfen. Óndú ā lɛ ācɛ kú Ísrɛ̄lu hɛ́tá ɛ̄cī ɔ́ɔmā.

²⁴Ɛ̄jɛ̄ le jɛ̄ ācɛ kú Ísrɛ̄lu, ɛmiyɛ klla yɔ̄ ī ŋmó uwā ɛ̄cī ɔ́ɔmā, ohígbū ka, Usɔ́lu lɛ ɔkpá ce uwá ka ɔ̄cɛ dúúmā kú uwā kóō lɛ okónu bá ɔdōlé dúúmā ŋ́ jāā gbó ɔ̄nɔ̄ɔ̄nɛ̄, jāā gbéeko nɛ̄ anúɔ lɛ ɔ́ci gwō aólɛlā kú anúɔ. Ohígbū ɛ̄nyā, ɔ̄cɛ dúúmā í lé ɔdōlé ɛ̄cī ɔ́ɔmā ŋ́ dúúdú.

²⁵É kpɛ́fú ga ipú ūpū nɛ̄hi, nɛ̄ ɛnwú le tū tū ɔcí ɛbɛɛbɛ ā.

²⁶Ɔ̄cɛ dúúmā í lɛ ɔtū lé ɛnwú nōo ma tū ɔcí nɛ̄hi nyā glá ŋ́, ohígbū ka é yɔ̄ gē yúufi ɛka nɛ̄ Usɔ́lu gbo tū uwā ā.

²⁷Amáŋ Ujonátan í pó ka ádā anúɔ ɔ́ɔ lɛ ɛka gbo tū ācɛ ā ká ɛ́ɛ lé ɔdōlé ŋ́, anɔ́ɔ ó nā ɔcí nɛ̄ ó bī ā daa le ɔ́ wu ɛnwú ā, kwú ɔ̄ ú tá okónu, anɔ́ɔ eyī gbo ɔ́ gɔɔ á.

²⁸Anɔ́ɔ éyi kú ācɛ ā da ɔ́ ka ɛ̄jɛ̄ le jɛ́ odúúdú aá, ɛmiyɛ ɔ́ɔ klla yɔ̄ ī ŋmó aá ɛɛ́, amáŋ ádā nū ɔ́ɔ le ɛka gbo tū aá, kahíníī, “Okónu ō tá kóō yɔ̄ lɛ ɔ̄cɛ dóódu nōo lɛ ɔdōlé wu okónu ícɛ.”

²⁹Anɔ́ɔ Ujonátan ka ɔdōbɔ̄bí nyá nɛ̄ ádā anúɔ yá ācɛ ɔlɛ́ aá yɔ̄ á. Ó ka é má abɔ̄ eyī ɔ́ɔ gbo anúɔ gɔɔ, abɔ̄ anúɔ lɛ ɛnwú lé ā ŋ́ nɛɛ? Ó ka anúɔ klla le lɔfú fíyɛ́.

³⁰Ujonátan ka ɛ́gɛ́nyā nɔ́ɔ géē lɔhi fíyɛ́ ícíícɛ ɔ́ɔmā, ɔ́dāŋ ka ācɛ ā lɛ ɔdōlé nɛ́ɛ kpó, eko nēé yá ācɛ Ufilístiya lé ā lé āa. Ó ka é géē yɛ í lɛ ɔfú lɛ kéē lɛ ācɛ Ufilístiya ŋmó fíyɛ́ ɛ́gɛ́nɛ̄ é ŋmó ā ŋ́ nɛɛ?

³¹Ɛ̄cī ɔ́ɔmā, ācɛ Ísrɛ̄lu le ācɛ Ufilístiya yálé. É gbo ɛfú ō kpó ŋmá Umíkmāsi jāā ga Áíjālɔn. Eko nya, ɛ̄jɛ̄ le jɛ̄ uwā nɛ̄hi, ɛmiyɛ klla yɔ̄ ī ŋmó uwā.

³²Anɔ́ɔ, é le inya kwu lɛyíkwu ɔdā nēé kpó ŋmá ɔgbɛ́fú ā. É kwú álá mɛ́mla ɛna ú le uwá kpó ŋmó ɔkwɔɔkwu ɔ́ɔmā, anɔ́ɔ é gbɔɔ́ ō lé ɛbɛ́ nɛ̄ oyī yɔ̄ anú kpɔ́ ɛɛ́ mā a.

³³ É le ka lɛ Usɔ́lu kɔ́ ɔ̄ má ɔ̄ ɛ́, ācɛ ā gbɔɔ́ ō bīya íne kú Óndú ā ɛɛ́, o ŋmá lɛ o lé ɛbɛ́ nɛ̄ oyī yɔ̄ anú kpɔ́ ɛ́ɛ́ mā. Anɔ́ɔ Usɔ́lu lɛ ɛgba dɛ̄ ka é wɛ ācɛ o já ɔ̄cɛ kwu ɔwɛ, kéē lɛ ɛcɔ̄ nɛ̄hi míya gé lɛ anúɔ abɔ́ɔ.

³⁴Anɔ́ɔ ó klla da uwá kɛ́ɛ̄ nyɔ̄ ga ipú ācɛ ā kɛ́ɛ̄ da uwá kɛ́ɛ̄ lɛ álá mɛ́mla ɛna kú uwá kpó wā. Ó ka ɛ́ɛ géē ŋmó uwā klla í lé ɛbɛ́ kú uwā ɛgiyí anúɔ abɔ́ɔ. Ó kéē híí bīya íne kú Óndú ā o ŋmá lɛ o lé ɛbɛ́ nɛ̄ oyī yɔ̄ anú ŋ́. Ɔtú ɔ́ɔmā, odúúdú uwá le ɛna mɛ́mla álá kú uwā kpó wā í ŋmó abɔ́ɔ.

³⁵Usɔ́lu le ede gwó lɛ Óndú ā abɔ́ɔ, anú wɛ ede kú aflɛ́yí nɛ̄ Usɔ́lu gwó á.

³⁶Usɔ́lu da ācɛ ɔlɛ́ nū kéē nyɔ̄ gaá kpɛ́fú tá ācɛ Ufilístiya otú, cɛ́ɛ́ kú aá ŋmó uwá jāā gbɔ́ɔ̄cī, cɛ́ɛ́ ka aá lɛ odúúdú uwā kpó ŋmó ŋmáajɛ. Anɔ́ɔ é tá ɔ́ ohi ka ɔdā dúú nɔ́ɔ gbɛlá ka ɔ́ lɔhi ā ká ɔ̄ yá mɛ́ɛnɛ. Amáŋ ɔ̄cogwɛ́ɛyá ā, ka aá lɛ ɔ̄kā da Ɔwɔicō ɛ́ɛ́.

³⁷Anɔ́ɔ Usɔ́lu le ɔ̄kā da Ɔwɔicō ka anúɔ gāá kpɛ́fú tá ācɛ Ufilístiya kpɔ́ ɛ́ɛ́ nɛɛ? Ó ka ɔ́ɔ géē cɛ̄ lɛ anúɔ yá uwā lé nɛɛ? Amáŋ Ɔwɔicō í tá ɔ̄ ohi ɛ̄cī ɔ́ɔmā ŋ́.

³⁸Anɔ́ɔ Usɔ́lu da anyākwɔ́cɛ kú Ísrɛ̄lu ā kéē wā kú aá lɛ ɔkwu íne kú Óndú ā nēé bīya ícíícɛ ɔ́ɔmā bu.

³⁹Usɔ́lu ka anúɔ gē cokónu ŋmá lɛ iyē kú Ɔwɔicō nɛ̄ ɔ́ yēeyī, nōo kē cɛ̄ lɛ Ísrɛ̄lu yá aólɛlā kú uwā lé ā. Ka ɔ̄cɛ dúúmā nɔ́ɔ géē lɛ́pɔ̄bí kú ínoōbīya ā, ɔ́ɔ géē kwú. Ó ka ɔ́dāŋ ɔ́ɔ kóō wɛ ɔyí anúɔ, Ujonátan nááná. Amáŋ ɔ̄cɛ dúúmā í tá ɔɔ̄ ohi ŋ́.

⁴⁰Anɔ́ɔ Usɔ́lu da uwá ka odúúdú uwā kéē háyí ɛga nēé háyi ā, anɔ́ɔ ó ka anúɔ mɛ́mla Ujonátan kóō háyi ɛga ɔhá. É tá ɔ̄ ohi ká ɔ̄ yá ɔdā dúúmā nɔ́ɔ má ka ɔ́ɔ lɔhi ā.

⁴¹Usɔ́lu da Óndú ā kahíníī, “Óndú, Ɔwɔicō kū Ísrɛ̄lu, ɔdíyá nɛ̄ á tá um ohi ícɛ ŋ́ mā a? Óndú ā, Ɔwɔicō kú Ísrɛ̄lu, lɛ ohi tá um ŋmá ɛcɔ̄ ō tīihɔ nyā. Ɔ́dāŋ ka ami ámāŋ ka Ujonátan lɛ́pɔ̄bí á nɛɛ, lɛ ohi tá um bū Úrim, amáŋ ɔ́dāŋ ka ācɛ ɔhá kú Ísrɛ̄lu o hile ā lɛ́pɔ̄bí á nɛ̄ɛ, lɛ ohi tá um bū Utúmmim.” Anɔ́ɔ ohi nɛ̄ Óndú ā tá ā, lɛ Ujonátan mɛ́mla Usɔ́lu kwú á. Ācɛ kú Ísrɛ̄lu o hile ā lɛ ɛpɔ̄hi lé.

⁴²Anɔ́ɔ Usɔ́lu kahíníī, “Lɛ ohi tá ami mɛ́mla Ujonátan.” Anɔ́ɔ ūlī le Ujonátan kwú á.

⁴³Anɔ́ɔ Usɔ́lu lɛ ɔ̄kā ɔdā nɛ̄ Ujonátan yá ā da ɔ́ á. Anɔ́ɔ Ujonátan tá ɔ̄ ohi ka anúɔ lé enyi ɛnwú lígíii, ka anúɔ yɔ̄ á, ka anúɔ cɛ̄ ka anúɔ géē kwú.

⁴⁴Anɔ́ɔ Usɔ́lu da ɔ́ ka Ɔwɔicō kóō lɛ anúɔ abɔ̄yī anúɔ ŋmó ɔ́dāŋ ka anúɔ í ŋmó Ujonátan ŋ́.

⁴⁵Amáŋ, ācɛ kú Ísrɛ̄lu ohile ā da Usɔ́lu ka cɛ́ɛ́ kú ɔ̄ lɛ Ujonátan nɔ́ɔ cɛ̄ lɛ Ísrɛ̄lu yá aólɛlā kú uwā lé ícíícɛ ɔ́ɔmā ā ŋmó kɛ̄ɛ? Anɔ́ɔ é kahíníī, “Ehée, alɔ cokónu ŋmá lɛ iyē kú Óndú ā nōo yēeyī ā ka, īnyīlɛyí ékpónú kú nū í gáā bí ŋmá ɛyí kú nū ŋ́. Ɔdā nɛ̄ ó yá lɛ alɔ ícɛ nyā, Ɔwɔicō tá ɔ̄ abɔ̄ ɛ́ɛ́ nɛ̄ ó yá ɔ̄ á.” Anɔ́ɔ ācɛ ā lɛ Ujonátan hɛ́tá, anɔ́ɔ é je ɔ́ ŋmó gɛ ŋ́ má.

⁴⁶Igbīhi ɛ̄nyā ā, Usɔ́lu í klla nū ācɛ kú Ufilístiya inya ɛ́ɛ́ gɛ ŋ́. Anɔ́ɔ é kwúcē ga ɔlɛ́ uwā á.

⁴⁷Igbīhi nɛ̄ Usɔ́lu le ɔcɛ́ kú Ísrɛ̄lu lé ā, ó kpɛ́fú tá aólɛlā kú Ísrɛ̄lu ɛga dóódu. Ācɛ kú Umówābu, Ámmɔn, mɛ́mla Ɛ́dɔm. Aɔ́cɛ́ kú Usóba mɛ́mla Ufilístiya. Ɛga dóódu nɛ̄ ó kpɛ́fú ā, ó le yálé.

⁴⁸Ó kpɛ́fú yá aéwo alɛwa lé nɛ̄hi, ó klla lɛ ācɛ kú Ámālɛ̄ki yálé dúú. Ó lɛ ācɛ kú Ísrɛ̄lu nyatá ŋmá abɔ̄ kú ācɛ nēe gē kpɛ́fú wā í gwū uwā.

⁴⁹Ayí kú Usɔ́lu wɛ, Ujonátan, Íssīfi, mɛ́mla Umálíkīsuwa. Adá kú nū ā lé ka, Umérabu, Ɔyí nū nɛ̄ŋcɛ́ nɔ̄nyā ā lé ka, Umíkalu.

⁵⁰Ɔnyā nū lé ka, Ahínōwam, adá kú Ahímāas. Otrɛ̄yí kú aícɔ́ɔja kú nū wɛ Ábna, ɔyí kú Únɛ́ɛ́, ɔmáapu ádā nū.

⁵¹Ádā kú Usɔ́lu Ukíssi mɛ́mla Únɛ́ɛ ádā kú Ábna ā wɛ ayí kú Abīyelu.

⁵²Jāā kwu eko ikwū kú Usɔ́lu ā, Usɔ́lu, kpɛ́fú tá ācɛ Ufilístiya lɔfú lɔfú. Ɔ̄cɛ dúúmā nɛ̄ Usɔ́lu le má ka ɔ́ɔ lɔfú klla lɔtū, ó kwú ɔ̄ ú tá ipú aícɔ́ɔja kú nū.