Read idoma 1 USÁMUWƐ̄LU 15 Bible Online

1 USÁMUWƐ̄LU 15 - idoma bible

1 USÁMUWƐ̄LU 15

¹Ɛ̄cī éyi, Usámūwɛ̄lu da Usɔ́lu ka, Óndú ā ɔ́ɔ tū anúɔ ɛhɔ̄ gāá lɛ anɔ̄ tū ɔ̄ ɛyí kú ɔ̄ kwú pīya ɔcɛ́ kú ācɛ ɔlɛ́ nū, Ísrɛ̄lu á. Ó klla da ɔ́ eko ɔ́ɔmā kú ɔ̄ jāhɔ̄ lɛ ɛlā kú Óndú ā.

² Usámūwɛ̄lu da ɔ́ ka Óndú nɛ̄ ɔ́ lɔfú fíyɛ́ dúú ā ka anúɔ géē yá ācɛ kú Ámālɛ̄ki italā ohígbū ikpɛ́lā nēé yá tá ācɛ kú Ísrɛ̄lu eko nēé bá ī bɛ̄cɛ ŋmá Íjīpiti ā. Anɔ́ɔ ó da Usɔ́lu kahíníī,

³“Nyɔ̄ abālɔbányā ká ā gāá lɛ ācɛ kú Ámālɛ̄ki kpó yíífi dúúdú. Ɔdā dóódu nēé lɛ ā, lɛ uwá yíífi. Ā mā ɔdā dúúmā tá ŋ́. Kwu ācɛnyā kwu ācɛnyīlɔ, kwu ayípɛ̄ mɛ́mla aɛ́nɛ̄ é bī abɔ̄ gē gwá amɛ̄, kwu aɛ́na mɛ́mla álá, aíjakī mɛ́mla aínyankwūlūmī, lɛ uwá kpó ŋmó dúúdú káā lɛ uwá yíífi.”

⁴Anɔ́ɔ Usɔ́lu le odúúdú ācɛ ā hīgwú lɛ uwá gbaáluka Utélem. Aícɔ́ɔja ikpó ā wɛ, ulá ba ɛga ulá ce ulá ofɛnɛ (200,000), mɛ́mla ācɛ ulá ofu ce ulá ɛhɔ̄ (10,000) kú ācɛ Ujúda.

⁵Anɔ́ɔ Usɔ́lu ga igelī nɛ̄hi kú Ámālɛ̄ki gāá gbēyī ɔpɛ́ kú ɔtɔ̄kpá nɛ̄ ó le éŋkpɔ̄ ŋ́ mā ā.

⁶Usɔ́lu da ācɛ Ukéni kéē le bɛ̄cɛ ŋmá ipú ācɛ kú Ámālēki ohígbū nɛ̄ anúɔ géē kpó uwā yíífi mla uwá. Ó ka anúɔ í dɔɔ̄kā ō kpó uwā yíífi mla uwá ŋ́, ohígbū ka ɛ́ɛ gbonɛnɛ lɛ ācɛ kú Ísrɛ̄lu eko nēé bá ī bɛ̄cɛ ŋmá Íjīpiti ā. Anɔ́ɔ ācɛ Ukéni le kpó kwu bɛ̄cɛ ŋmá ipú ācɛ kú Ámālɛ̄ki á.

⁷Usɔ́lu le ɛfú kpó tá ācɛ kú Ámālɛ̄ki, klla le uwá yálé ŋmá Uhafíla jāā ga Ussɔ́ ɛnɔ̄ɔ̄cī kú Íjīpiti.

⁸Ó le Ágāgi, ɔcɛ́ kú Ámālɛ̄ki ā kwú oyēeyī. Ó bī ɔkpacaŋ́gelī le ācɛ ohile kpó ŋmó dúúdú.

⁹Amáŋ Usɔ́lu mla ācɛ a mā Ágāgi, mɛ́mla aálá, aɛ́na, mɛ́mla aómlede olɔhi tá oyēeyī, mɛ́mla aɔ́dā olɔhi ɔhá dóódu. Ó wɛ ɛjɛ̄ɛ̄jī aɔ́dā ā nɛ̄ ó kpó yíífi ā ŋ́. Aɔ́dā nēé lɔhi ŋ́ nēé klla kē tū ile ŋ́ má, nēé kpó yíífi á.

¹⁰Anɔ́ɔ Óndú ā da Usámūwɛ̄lu kahíníī,

¹¹“N hííjémā nɛ̄hi ɛ́gɛ́nɛ̄ n je Usɔ́lu lé ɔcɛ́ ā, ó bī ukɔ́ nɛ̄ n tū ɔ̄ ā yúklɔ́ ŋ́.” Usámūwɛ̄lu le cɔ̄nū nɛ̄hi, anɔ́ɔ ó le ikwū je klá Óndú ā otú gbó ɔ̄cī.

¹²Ɔ̄cɔ̄ɔ̄cī blibli kú oŋmɔ́ɔ̄cī nū, Usámūwɛ̄lu hápápá le bɛ̄cɛ gaá tíne ɛga nɛ̄ ó í má Usɔ́lu, ɔcɛ́ ā. Anɔ́ɔ é le da Usámūwɛ̄lu ka, Usɔ́lu ɔ́ɔ le tá igelī nɛ̄ŋcɛ́ nēé hī ka Ukámɛ̄lu, ɛga nōo gwó inu ō blatū lɛ īyī nū ā. É klla ka ɔ́ɔ le tá Ugílgalu ɛɛ́.

¹³Usámūwɛ̄lu le tá ɛgiyí Usɔ́lu abɔ́ɔ. Usɔ́lu le okónu hɛ́ tū ɔ̄ kahíníī, “Óndú ā ká o hɔ́hā ce uwɔ, n le odúúdú ukɔ́ nɛ̄ Óndú tū um ā bī yúklɔ́. N kē le ɔdā nɛ̄ ó ka ami ɔ́ɔ yá ā kpó yá ɛɛ́.”

¹⁴Anɔ́ɔ Usámūwɛ̄lu da ɔ́ ɔ̄kā kahíníī, “Ó lɛ ā, ɛgba kú aálá mɛ́mla ákú aɛ́na nɛ̄ n kē yɔ̄ ī pó nyā kē ŋmá iní nɛ?”

¹⁵Anɔ́ɔ Usɔ́lu tá ɔ̄ ohi kahíníī, “Aícɔ́ɔja kpó uwā wā ŋmá ajɛ kú ācɛ Ámālēki á. Aálá mɛ́mla aɛ́na nēe lɔhi fíyɛ́ dúú ā, nēé kpó wā kéē lɛ gwɛ́ɛya lɛ Óndú, Ɔwɔicō kú uwɔ á. Amáŋ, alɔ le aɔ́dā ohile ā kpó yíífi ŋmá ajɛ dúúdú.”

¹⁶Anɔ́ɔ Usámūwɛ̄lu da ɔ̄ kú ɔ̄ mā okónu, ka anúɔ géē da ɔ́, ɔdā nɛ̄ Óndú ā ka lɛ anúɔ otú ā. Anɔ́ɔ Usɔ́lu da ɔ́ ka ɔ̄ ka nyɔ̄ mɛ́ɛnɛ.

¹⁷Anɔ́ɔ Usámūwɛ̄lu da ɔ́ kahíníī, “Abɔ̄ a le nyɛ́ tū īyī uwɔ eyī nááná ā, ó wɛ awɔ wɛ otrɛ̄yí kú ācɛ Ísrɛ̄lu ā ŋ́ nɛɛ? Óndú ā le anɔ̄ tū uwɔ ɛyí kú ā wɛ ɔcɛ́ kú ācɛ Ísrɛ̄lu.

¹⁸Óndú ā le ɛhɔ̄ tū uwɔ kā nyɔ̄ káā gaá lɛ ācobɔ̄bíipú nēe bá abɔ́ɔ ɔ́ɔmā kpó yíífi. Ó da uwɔ ka ā nuunu tá ācɛ kú Ámālēki, jāā gbéeko nāa lɛ uwá kpó ŋmó dúúdú.

¹⁹Ɔdíyá nɛ̄ á lɛyítáajɛ lɛ ukɔ́ nɛ̄ Óndú ā tū uwɔ ā ŋ́ māa? Ɔdíyá ɛ́ɛ́ nāa kōō kpó aɔ́dā nēe bá ā ŋmá ɔgbɛ́fú wā ɔlɛ́ dɛ̄ɛ̄, ɛ́ɛ́ kó ō je pīya atufú nāa jégēdē yá Ɔwɔicō āa?”

²⁰Usɔ́lu tá ɔ̄ ohi ka amáŋ anúɔ le odúúdú ukɔ́ nɛ̄ Óndú ɔ́ɔ tū anúɔ ā bī yúklɔ́ kpɛ́mm, anúɔ kōō le ɔcɛ́ kú Ámālēki, Ágāgi kwú oyēeyī wā, klla le ācɛ Ámālēki ohile ā kpó yíífi dúúdú.

²¹Ó ka amáŋ ācɛ Ísrɛ̄lu ɛ́ɛ le aɛ́na, aálá mɛ́mla aɔ́da nēe lɔhi nɛ̄ ɛ́ cíkā ō kpó yíífi ŋ́ mā kpó ŋmá ɔgbɛ́fú wā ɔlɛ́, cɛ́ɛ́ kéē bī lɛ gwɛ́ɛya lɛ Óndú, Ɔwɔicō kú anú nōo wɛ Usámūwɛ̄lu, ajɛ kú Ugíligalu.

²²Anɔ́ɔ Usámūwɛ̄lu da ɔ́ kahíníī, “Ɛ̄nyá he Óndú ɔtū fíyɛ́ ā, ɛyí ō táajɛ kɛ̄ɛ̄ ka aɛ́ya ō gwó mɛ́mla ɛ̄gbā ō gbā ɔ̄? Ó wɛ aɛ́ya kú álá nōo lɔhi fíyɛ́ dúú ō gwó lɛ ɔ́ mɛ́mla ɛ̄gbā ō gbā ɔ̄, ce ɔ́ ɛgbá ā ŋ́, amáŋ ɛyí ō táajɛ lɛ ɔ́ he ɔ́ ɔtú á. O lɛyítáajɛ lɛ ɛlā kú Óndú lɔhi fíyɛ́ ijē kú omlede ō je gwɛ́ɛya lɛ ɔ́ á.

²³Ikpɛ́yí olɔfú ō yá tá Ɔwɔicō lɛbɛ̄ɛka ínoōbīya kú ɔhɛ ō yá ā, Ɔbɔ́ɔ̄cɛ ō yá lɛbɛ̄ɛka íne obīya kú ɛ̄cī ō pā ā. Ɛ́gɛ́nɛ̄ a tá ɛlā kú Óndú ā ɛɛ́ mā, anú abɔ̄yī nū kē tá uwɔ káā wɛ ɔcɛ́ ɛ́ɛ́ gɛ ŋ́ dúú.”

²⁴Anɔ́ɔ Usɔ́lu da Usámūwɛ̄lu kahíníī, “N le íne bīya ɛɛ́. Ohígbū ka n lɛ íne kú Óndú ā bīya ń klla kē le ukɔ́ nāa tū um ā yúklɔ́ ŋ́. Ohígbū ka n le ufi ācɛ ā yá klla le ɔkɔ kú uwā pó.

²⁵N gē gbɔ̄ɔkɔ gā uwɔ, kwú ínoōbīya kú um ā ú yá um ɛhi, kú ā kwúcē wā mla um, cɛ́ɛ́ ká n̄ gaá lɛ ɛ̄gbā gbā Óndú ā.”

²⁶Usámūwɛ̄lu tá Usɔ́lu ohi kahíníī, “Ń gáā kwúcē igbīhi mla awɔ ŋ́, ohígbū ka abɔ̄ a tá ɛlā kú Óndú ā ɛɛ́ mā, Óndú ā kē tá ka awɔ ɔ́ wɛ ɔcɛ́ kú Ísrɛ̄lu ɛ́ɛ́ gɛ ŋ́ dúú.”

²⁷Abɔ́ɔ Usámūwɛ̄lu le pīyeyī gáā nyɔ̄ ā, Usɔ́lu bī okónōgwu kú awulú kú nū, anɔ́ɔ ó kwú híla tū ɔ̄ abɔ̄ á.

²⁸Anɔ́ɔ Usámūwɛ̄lu da Usɔ́lu kahíníī, “Óndú ā lɛ ajɔ̄ɔ̄cɛ́ ā híla ŋmá abɔ̄ kú uwɔ ícɛ klla kwú ɔ̄ ú lɛ ɔ̄cɛ nōo lɔhi fíyɛ́ uwɔ ɛɛ́.

²⁹Ɔwɔicō, ɛgahi kú Ísrɛ̄lu í gē kɛ̄mgbɛ̄ ɛ́ɛ́ nɛ̄ ó gē pīya ɔtū kú nū abɔ̄ ŋ́, ohígbū ka, ó wɛ ɔlɛɛcɛ ɛ́ɛ́ nɛ̄ ó gē kɛ̄mgbɛ̄ klla ī pīya ɔtū kú nū abɔ̄ ŋ́.”

³⁰Anɔ́ɔ Usɔ́lu klla kahíníī, “N le íne bīya, amáŋ lɛ ojīlīmā ce um iyɔ̄bū kú anyākwɔ́cɛ mɛ́mla odúúdú ācɛ kú Ísrɛ̄lu, kócōō, lɛ cīgbīhi mla um, cɛ́ɛ́ kú n̄ gaá lɛ ɛ̄gbā gbā Óndú, Ɔwɔicō kú uwɔ.”

³¹Anɔ́ɔ Usámūwɛ̄lu le cīgbīhi mla anú ga Ugíligalu á. Anɔ́ɔ Usɔ́lu le ɛ̄gbā gbā Ɔwɔicō á.

³²Anɔ́ɔ Usámūwɛ̄lu kóō lɛ Ágāgi ɔcɛ́ kú Ámālēki ā bī wā ɛgiyí anúɔ, anɔ́ɔ ó le Ágāgi bī ga ɛgiyí Usámūwɛ̄lu á. Ágāgi le ɛhɛ kwu ayīnu yɔ̄ ī gbɛlá ka ɔnɔ kú ikwū ā lɛ gla ɛɛ́.

³³Anɔ́ɔ Usámūwɛ̄lu da ɔ́ kahíníī, “Ɛ́gɛ́nɛ̄ ɔkpacaŋ́gelī kú uwɔ kwú aɛ́nɛ́ alɛwa í pīya ɔdɔma ā, ɛ́gɔ́ɔmā nɛ̄ ɛ́nɛ́ uwɔ géē je pīya ɔdɔma lɛ dúú á.” Anɔ́ɔ Usámūwɛ̄lu le Ágāgi ŋmó, le ɔ́ hɛ́ kpɛɛ́kpɛɛ́ ipéyī Óndú ā Ugíligalu á.

³⁴Usámūwɛ̄lu le yɛ tá Uráma, Usɔ́lu kē le yɛ tá ɔlɛ́ nū Ugíbēyi á.

³⁵Usámūwɛ̄lu í klla má Usɔ́lu igbɔhá ɛ́ɛ́ gɛ ŋ́ jāā gbéeko nɛ̄ Usɔ́lu kwú, amáŋ Usámūwɛ̄lu yá ɔtūnōbí ohígbū Usɔ́lu. Anɔ́ɔ Óndú ā lɛ íjémā kú Usɔ́lu nɛ̄ ó je lɛ́ ɔcɛ́ kú Ísrɛ̄lu ā hī.