Read idoma 1 USÁMUWƐ̄LU 16 Bible Online

1 USÁMUWƐ̄LU 16 - idoma bible

1 USÁMUWƐ̄LU 16

¹Óndú ā da Usámūwɛ̄lu kahíníī, “Eko nyá nāa géē yá ɔtūnōbí kú Usɔ́lu gāá kwu ā? N tá ɔ̄ kóō wɛ ɔcɛ́ kú Ísrɛ̄lu ɛ́ɛ́ gɛ ŋ́. Amáŋ lɛ anɔ̄ kú ɔcí nēé hí ka ólīfu ā hɛ́ tū ipú odée, cɛ́ɛ́ káā ga Ubɛ́tilɛhɛ̄m, ɔlɛ́ kú ɔ̄cɛ éyi, nēé hī ka Ujése ā. N le ɔyí nū éyi fu kóō lɛ ɔcɛ́ kú Ísrɛ̄lu lé ɛɛ́.”

²Anɔ́ɔ Usámūwɛ̄lu ka abɔ̄ anúɔ géē yá ɔ́ɔmā lɛ ā Óndú? Ɔ́dāŋ́ ka Usɔ́lu ɔ́ɔ le pó, ɔ́ɔ géē je anúɔ ŋmó. Anɔ́ɔ Óndú ā tá ɔ̄ ohi kahíníī, “Kwu ɔyí omlede éyi ú bī nyɔ̄ mla īyī uwɔ, cɛ́ɛ́ káā da ɔ́ ka anúɔ gáā nyɔ̄ í gwɛ́ɛya lɛ Óndú ā.

³Lɛ Ujése hīgwú wā ɛga nāa gáā gwɛ́ɛya ā, n géē da uwɔ ɔdā nāa géē yá ā. Ɔ̄cɛ nɛ̄ n géē mafú gā uwɔ ā nāa géē lɛ anɔ̄ tū ɔ̄ ɛyí kóō wɛ ɔcɛ́ á.”

⁴Usámūwɛ̄lu le ɔdā nɛ̄ Ɔwɔicō da ɔ́ ā yá, anɔ́ɔ ó le yɛ tá Ubɛ́tilɛhɛ̄m á. Anyākwɔ́cɛ kú igelī nɛ̄hi ā wā í jīla anú ɔwɛ, bá yɔ̄ ī yúufi, gē fiyégbúlú. Anɔ́ɔ é da ɔ̄kā ka ɔ́ɔ wā ɛbɔ́ nɛɛ?

⁵Anɔ́ɔ ó da uwá ka anúɔ wā ɛbɔ́ nɛ̄. Ó klla da uwá ka anúɔ wā í gwɛ́ɛya lɛ Óndú ā. Ó ka é lɛ īyī uwā tū yēŋēē, cɛ́ɛ́ kéē le tīihɔ kéē wā ɔnū ɛya nāa anúɔ gáā gwó ā. Anɔ́ɔ ó lɛ Ujése mɛ́mla ayí nū nɔ̄nyīlɔ gwu yēŋēē klla lɛ uwá hīīgwú wā ɛga néē gáā gwɛ́ɛya ā.

⁶Eko nēé gā ā, Usámūwɛ̄lu leyīkwu Ɛlíyābu, anɔ́ɔ ó kahíníī, “Ɔkwɔ̄ɔ̄kwɛyí, ɔ̄cɛ nɛ̄ Óndú fu kéē lɛ anɔ̄ tū ɔ̄ ɛyí kú ō wɛ ɔcɛ́ ā háyi iyɔ̄bū um yɔ̄ á.”

⁷Amáŋ Óndú ā da ɔ́ kahíníī, “A híī ma eyīyɛ̄cɛ kú nū, ámāŋ ɔhi mɛ́mla ojoklóbīya kú nū ŋ́, ohígbū ka n tá kóō wɛ ɔcɛ́, ohígbū ka, ami Óndú ā í gē má ɔ̄cɛ ɛ́gɛ́nɛ̄ ɔlɛɛcɛ gē má ɔ̄ ā ŋ́. Olɛɛcɛ gē má eyīyɛ̄cɛ kú ɔ̄cɛ ōfōōfūnū, amáŋ ami, Óndú ā gē má ipú ɔtū kú ɔ̄cɛ.”

⁸Anɔ́ɔ Ujése le Abínādabu hīgwú wā í yɛ iyɔ̄bū Usámūwɛ̄lu, Usámūwɛ̄lu da ɔ́ ka, Óndú ā í fu ɛ̄nyā ɛ́ɛ́ ŋ́ kpɔ́.

⁹Ujése cɛ̄ lɛ Ussáma wā í yɛ, Usámūwɛ̄lu da ɔ́ kahíníī, “Óndú ā í fu ɛ̄nyā ŋ́ kpɔ́.”

¹⁰Anɔ́ɔ Ujése cɛ̄ lɛ ayí nū ahāapa ā gaá le pɛ́ yɛ iyɔ̄bū Usámūwɛ̄lu. Anɔ́ɔ Usámūwɛ̄lu da Ujése kahíníī, “Óndú ā í fu odúúmā kú aɛ́nɛ̄ e bá nyā ŋ.”

¹¹Ó klla da Ujése ɔ̄kā kahíníī, “Odúúdú ayí uwɔ nɔ̄nyīlɔ bá yɔ̄ mɛ́ɛ̄ á nɛɛ?” Anɔ́ɔ ó tá ɔ̄ ohi ka, ɔ́ɔ hile ɛnɛ̄ŋcɛ́ kú uwā éyi nɛ̄ ɔ́ɔ yɔ̄ í gbō álá ipácí ɛ́ɛ́. Anɔ́ɔ ó da Ujése ká ɔ̄ lɛ ɛhɔ̄ tū nyɔ̄ í lɛ ɔ́ hīīgwú wā. Ó ka aá í gáā cīce ŋ́, jāā gbéeko nɔ́ɔ ga.

¹²Ujése le ɛhɔ̄ tū í lɛ ɔ́ bī wā. Ó joklóbīya klla wɛ ɔyípɛ̄, eyī kú nū kwu mlémlé. Anɔ́ɔ Óndú ā da Usámūwɛ̄lu kahíníī, “Anú wɛ ɔ̄cɛ ā á, cāŋjɛ ká ā lɛ anɔ̄ tū ɔ̄ ɛyí.”

¹³Usámūwɛ̄lu kwú anɔ̄ ú le tū Udéfīdi ɛyí ipéyī ayínɛ́ nū. Anɔ́ɔ alelékwū kú Óndú ā wā í klá Udéfīdi nɛ̄ɛ̄nɛ̄hi, ŋmá ɛ̄cī ɔ́ɔmā gɔbū á. Anɔ́ɔ Usámūwɛ̄lu nyɛ̄ɛ̄ le tá Uráma á.

¹⁴Alelékwū kú Óndú ā nyɛ̄ɛ̄ ŋmá ɛgiyí Usɔ́lu, anɔ́ɔ alelékwū obɔ̄bí ŋmá ɛgiyí Óndú ā, wā í yɔ̄ ī yá ɔ̄ italā á.

¹⁵Ācocɛ̄hɔ̄ kū Usɔ́lu da ɔ́ ka, aá jé ka alelékwū obɔ̄bí ɔ́ɔ ŋmá ɛgiyí Óndú ā wā í yá ɔ̄ italā á.

¹⁶É da ɔcɛ́ kóō lɛ ɔ́da je lɛ aá, ká aá tíne ɔ̄cɛ nōo jé ɔ̄ gwō ɛ̄ngwū, cɛ́ɛ́ eko nɛ̄ alelékwū obɔ̄bí ā, wā í yɔ̄ ī je unwalu lɛ ɔ́ nɛɛ, cɛ́ɛ́ kú ɔ̄cɛ ɔ́ɔmā kóō bēē gwííjē lɛ ɔ́, cɛ́ɛ́ kú eyī kóō gbo ɔ́ gɔɔ, cɛ́ɛ́ ɔ́ɔ klla kwú lɔfú iyē.

¹⁷Anɔ́ɔ Usɔ́lu da uwá kéē nyɔ̄ í tíne ɔ̄cɛ nōo jé ō gwō ɛ̄ngwū lɔɔlɔhi ā, cɛ́ɛ́ kéē lɛ ɔ́ bī gé lɛ anúɔ.

¹⁸Anɔ́ɔ éyi kú ācocɛ̄hɔ̄ kú nū ka, Ujése kú Ubɛ́tilɛhɛ̄m ā ɔ́ɔ lɛ ɔyí éyi nōo jé ō gwō ɔdā ō gwííjē nɛ̄hi. Ó ka ɔ́ɔ lɔtū klla jōklóbīya. Ó ka ɔ́ɔ klla wɛ ícɔ́ɔ́ja olɔhi nōo lɔtū nɛ̄hi. Ó ka ɔ́ɔ jé ɔwɛ ɛlā ō ka nɛ̄hi, Óndú, ɔ́ɔ klla yɔ̄ mla anú.

¹⁹Anɔ́ɔ Usɔ́lu lɛ ɛhɔ̄ tū fu Ujése kahíníī, “Lɛ ɔyí uwɔ, Udéfīdi, ɛ̄nɛ̄ o gē gbō álá ā, tɛ̄hɔ̄ gé um.”

²⁰Anɔ́ɔ Ujése kwú Udéfīdi ú tɛ̄hɔ̄ gé lɛ Usɔ́lu mla ɛwū éyi, mɛ́mla ijakī nōo bī igbō omōōmu odée, mɛ́mla ɔjá ɔkpɛ́bɛ́ nɛ̄ ejé wɛ omōōmu nū.

²¹Udéfīdi gā ɛgiyí Usɔ́lu, anɔ́ɔ ó gbɔɔ́ ō yúklɔ́ lɛ ɔ́ á. Ó he Usɔ́lu ɔtū nɛ̄hi, anɔ́ɔ Usɔ́lu kwú ɔ̄ ú yá ɔ̄cɛ o bī iyɔ́fú kú nū á.

²²Usɔ́lu le ɛhɔ̄ tū fu Ujése ka, Udéfīdi ɔ́ɔ he anúɔ ɔtū, kú ɔ̄ yɔ̄ mla anúɔ, cɛ́ɛ́ kú ɔ̄ yúklɔ́ lɛ anúɔ.

²³O ŋmá eko ɔ́ɔmā gɔbū ā, eko dúúmā nɛ̄ alelékwū obɔ̄bí ā wā í klá Usɔ́lu nɛɛ, Udéfīdi kwú ɛ̄ngwū kú nū ú, cɛ́ɛ́ ó gbɔɔ́ ō gwō ɔ̄ lɛ Usɔ́lu, cɛ́ɛ́ alelékwū obɔ̄bí ā kē nyɛ̄ɛ̄ hɛ̄ ɔ̄ tá, cɛ́ɛ́ iyē kē kwu lɔfú lɛ ɔ́, cɛ́ɛ́ ó klla kwu pīya ɔ̄cɛ ɔlamu igbɔhá kpɔ́.