Read idoma 1 USÁMUWƐ̄LU 17 Bible Online

1 USÁMUWƐ̄LU 17 - idoma bible

1 USÁMUWƐ̄LU 17

¹Ācɛ Ufilístiya le aícɔ́ɔja kú uwā túbá kéē nyɔ̄ í kpɛ́fú tá Ísrɛ̄lu. É le jīla Usɔ́ko, nōo wɛ igelī nɛ̄ŋcɛ́ éyi kú Ujúda ā. É le ádɛ́fú kú uwá kwu ɔtāhɛ̄ kú Usɔ́ko mɛ́mla Asɛ́ka ipú ajɛ kú Ɛfɛsi-Udamím.

²Usɔ́lu mɛ́mla ācɛ kú Ísrɛ̄lu kē lɛ jīla ɔpɛ́ kú Ɛlā. É gaá kwāajɛ ɛfú le ɔgba hɛ́ leyī pīya kwu ācɛ Ufilístiya.

³Ācɛ Ufilístiya bá āyā kú ɛfu éyi, ācɛ Ísrɛ̄lu kē bá āyā kú ɛfu ɔhá. Ɔpɛ́ tá ɔtāhɛ̄ ɛfu ɛplɛ́ɛpa ā.

⁴Ɔ̄cɛ éyi nēé hī iyē nū ka, Ugolíyati ā ŋmá igelī nɛ̄hi nēé hī ka Ugáti ā, le bɛ̄cɛ ŋmá aáklɔ̄kpɛ kú ɛfú kú Ufilístiya wā gē lɛ abɔ̄ gbo ācɛ kú Ísrɛ̄lu ɔtū eko dóódu. Ó klla gē cá uwā ɛcá ī je lé ícííci. Ó jɛ̄ licō fíyɛ́ ikpó ahāapa kú ɔ̄cɛ ɔlamu.

⁵Ó lɛ úwé kú oje udɔ nōo gbɛnú nɛ̄ɛ̄nɛ̄hi wiyē. Ó klla le ɔkpú kú oje udɔ kwu ɛyí.

⁶Ó le áblákpá kú oje wu ikpó, klla le óbō nɛ̄hi éyi cíla ɔkɔ.

⁷Óbō kú nū ā cɔkpɛ́nú bɛ̄ɛka ogbló kú ɔcí ō tíīlī ā. Oje kú īkpɛ̄yí óbō ā gbɛnú nɛ̄ɛ̄nɛ̄hi. Ícɔ́ɔ́ja éyi gē yɔ̄ iyɔ̄bū nū gē bī ɔkplɛ́fú kú nū á.

⁸Ugolíyāti háyi cɛ́ɛ́, ó gē dɛ̄gba tū odúúdú ācɛ kú Ísrɛ̄lu gē kahíníī, “Ɔdí nɛ̄ aá bá í yá abɔ́ɔ ā? Aá le kwāajɛ ɛfú klla le ɔgba ɛɛ́. N wɛ ɔ̄cɛ Ufilístiya, aá kē wɛ aɔ́fiyɛ kú Usɔ́lu. Aá lɛ ɔ̄cɛ éyi fu ŋmá ipú aá kóō wā í nuunu tá um.

⁹Ɔ́dāŋ́ koó lɛ um yálé klla lɛ um ŋmó, alɔ géē je pīya aɔ́fiyɛ kú aá, amáŋ, ɔ́dāŋ́ ka n lɛ ɔ́ yálé klla lɛ ɔ́ ŋmó, aá géē je pīya aɔ́fiyɛ kú alɔ.

¹⁰Abālɔbányā n gē lɛ abɔ̄ gbo aá ɔtū, aá lɛ ɔtū, aá lɛ ɔ̄cɛ éyi fu gā um kóō nuunu tá um.”

¹¹Eko nɛ̄ Usɔ́lu mla ācɛ ɔlɛ́ nū lɛ ɛ̄nyā pó ā, é gbɔ́ɔ ō yúufi nɛ̄hi.

¹²Udéfīdi wɛ ɔyí kú Ujése, nōo wɛ ɔ̄cɛ kú Ɛ́frāti, nōo ŋmá Ubɛ́tilɛhɛ̄m ipɔ́ɔma kú Ujúda ā. Ujése ma ayínɔ̄nyīlɔ ahātá. Eko nɛ̄ Usɔ́lu lé ɔcɛ́ ā, Ujése kwú híla nɛ̄hi ɛɛ́.

¹³Ayínɔ̄nyīlɔ̄ kú Ujése nēe wɛ anyākwɔ́cɛ fíyɛ́ dúú ā le pɛ́ gá ɔgbɛ́fú mla Usɔ́lu, ɔcɛ́ ā. Ɔ́kplá kú nū ā lé ka Ɛlíyābu, ɛ̄nɛ̄ o gbo ce ɔ́ nōo kē wɛ edegbánya ā, wɛ Abínādabu, ɔ́mɛɛtá nōo kē wɛ ɔkpáacú ā, wɛ Ussáma.

¹⁴Udéfīdi wɛ ɛnɛ̄ŋcɛ́ kú uwā á. Anyākwɔ́cɛ fíyɛ́ dúú ɛtá ā, bá mla Usɔ́lu.

¹⁵Udéfīdi gē nyɛ̄ɛ̄ ŋmá ɔlɛ́ Usɔ́lu, ɔcɛ́ ā, gē ga Ubɛ́tilɛhɛ̄m o ŋmá eko ga eko gē nyɔ̄ ī leyīkwu aálá kú ádā nū.

¹⁶Ɛ̄cī ofɛpa, kwu otú kwu ɛnɔ, Ugolíyāti gē wā í cá Ísrɛ̄lu ɛcá.

¹⁷Ɛ̄cī éyi, Ujése da Udéfīdi ká ɔ̄ mīyɛ okoolo igwó kú āmplā mɛ́mla igbō igwó nyā kɔ́ ɔ̄ le bī gé lɛ ayínɛ́ nū ɔgbɛ́fú fíyaa.

¹⁸Ó da ɔ́ ká ɔ̄ mīyɛ ígbó igwó kú umáyisānū[3]gē lɛ otrɛ̄yí kú aícɔ́ɔja kú uwā. Ó klla da ɔ́ kú ɔ̄ má ɛ́gɛ́nɛ̄ é bá lɛ ā, cɛ́ɛ́ kú ɔ̄ lɛ ohi kpó gé lɛ anúɔ.

¹⁹Ádā nū klla yɔ̄ ī kɛlā lɛ kpɔ́ kahíníī, “Usɔ́lu mɛ́mla ayínɛ́ uwɔ bá ɔpɛ́ kú Ɛlā, bá ī nuunu tá ācɛ kú Ufilístiya.

²⁰Anɔ́ɔ Udéfīdi cāŋjɛ ɔ̄cɔ̄ɔ̄cī, mā aálá ā tá mla ɔ̄cɛ éyi kóō leyīkwu uwá gbēyī nū. Anɔ́ɔ ó kwú iyó ā ú le yɛ tá ɛga nɛ̄ ádā nū, Ujése tū ɔ̄ ɛhɔ̄ nyɔ̄ ā. Udéfīdi gā aáklɔ̄kpɛ kú ɛfú ā eko nēé bá gē hɔ́ɔgba kéē kpɛ́fú ā, é kē bá ī dɛ̄gbōgwú kwaáá kwaáá.

²¹Aícɔ́ɔja kú Ísrɛ̄lu mɛ́mla aícɔ́ɔja kú Ufilístiya lɛ ɔgba ɛfú hɛ́ le eyī pīya kwu iyī uwā.

²²Anɔ́ɔ Udéfīdi mā iyó kū nū, nɛ̄ ó bī ā tá, ɛgiyí ɔ̄cɛ nōo gē leyīkwu ɛkpa kú ɔdōlé ā, anɔ́ɔ ó le inya kwu ga ɔgbɛ́fú nyɔ̄ í hókónu tū ayínɛ́ nū á.

²³Abɔ̄ Udéfīdi yɔ̄ í kɛlā mla ayínɛ́ nū ā, Ugolíyāti kú Ugáti kwú bɛ̄cɛ, wā í cá ɛcá ɛdɔ ékpónú nɛ̄ ó tɛtɛ gē cá ā, anɔ́ɔ Udéfīdi lɛ ɔkɔ kú nū pó á.

²⁴Eko nɛ̄ Ísrɛ̄lu le Ugolíyāti má ā, odúúdú uwā le pɛ́kwu ŋmá ɛgiyí nū, ohígbū ka é gē yúufi nū nɛ̄hi.

²⁵Ācɛ kú Ísrɛ̄lu gē da ɔ́mpa uwā kahíníī, “A má ɔ̄cɛ nōo wɛ̄ɛcɛ ɔ́ɔmā ā? Ó wā gāa cá Ísrɛ̄lu ɛcá nɛ̄ n. Ɔcɛ́ kú ɔlɛ́ alɔ cokónū ká anúɔ í je agbénú nɛ̄hi, mɛ́mla adá kú anúɔ lɛ ɔ̄cɛ dúúmā nōo lɛ ɔ́ ŋmó glá kóō kwú pīya ɔnyā nū. Ācɛ ɔlɛ́ ádā kú ɔ̄cɛ ɔ́ɔmā í gáā gbā ije ɔlɛ́ ɛ́ɛ́ gɛ ŋ́.”

²⁶Anɔ́ɔ Udéfīdi da ɔ̄cɛ nōo hayi pī ɔ̄ ā ɔ̄kā kahíníī, “Ɔdí nēé géē yá lɛ ɔ̄cɛ nɛ̄ ó lɛ ɔ̄cɛ ā ŋmó, nōo kwú uwēyī nyā ú ŋmá Ísrɛ̄lu ɛyí ā? Ohígbū ka, ɔnyɛ̄ wɛ ɔ̄cɛ Ufilístiya, o lufíyé nyā ɛ́ɛ́, nɛ̄ ó gē ca aícɔ́ɔja kú Ɔwɔicō nōo yēeyī ā ɛcá ā?”

²⁷Anɔ́ɔ é le ohi ékpónú ɔ́ɔmā tá ɔ̄ á. Ɔdā nēé géē yá lɛ ɔ̄cɛ dúúmā nōo géē ŋmó ɔ̄ ā yɔ̄ á.

²⁸Ɛlíyābu ɔ́kplá kú nū ā le pó abɔ́ɔ ó yɔ̄ í kɛlā mla ācɛ ā, anɔ́ɔ Ɛlíyābu le cɔ̄nū mla Udéfīdi nɛ̄hi, anɔ́ɔ ó da ɔ́ ɔ̄kā ka ɔdíyá nɔ́ɔ wā abɔ́ɔ ā? Ɔ̄nyɛ nɔ́ɔ habɔ̄ aálá o hile lígíi ɔ́ɔmā tá lɛ ɔ́ ipácí ɛ́ɛ́, nɔ́ɔ gē wā amanyā ā? Ó klla da ɔ́ ka anúɔ jé ikpɔ́tū kú nū mla ɔdā ō je cɛyí kú nū, ohígbū ka ɔ́ɔ wā abɔ́ɔ gaá má ɛfú nēé yɔ̄ ī kpó ā nɛɛ.

²⁹Anɔ́ɔ Udéfīdi da ɔ́ ɔ̄kā ka ɔdí nɛ̄ anúɔ yá mɛ́ɛ̄? Ó ka anúɔ í kōō lɔfú dɔɔ̄kā áncā ŋ́ dúú?

³⁰Udéfīdi nyɛ̄ɛ̄ ŋmá ɛgiyí nū gaá le ɛdɔ ɔ̄kā ékpónú ɔ́ɔmā da kpɔ́, anɔ́ɔ é lɛ ohi ékpónú ɔ́ɔmā tá ɔ̄ kpɔ́ á.

³¹Eko nēé lɛ ɛlā kú Udéfīdi pó ā, é le ka lɛ Usɔ́lu, anɔ́ɔ ó lɛ ɛhɔ̄ tū fu Udéfīdi á.

³²Anɔ́ɔ Udéfīdi da Usɔ́lu kahíníī, “Ɔtū kú ɔ̄cɛ dúúmā kóō gbenyi ŋ́, n géē nyɔ̄ í nuunu tá ɔ̄cɛ Ufilístiya ɔ́ɔmā.”

³³Anɔ́ɔ Usɔ́lu da ɔ́ kahíníī, “Á gáā lɔfú nuunu mla ɔ̄cɛ ɔ́ɔmā glá ŋ́, ohígbū ka a wɛ ɔyípɛ̄, amáŋ anú ā wɛ ɔ̄cɛ kú ɛfú ŋmá ɔyípɛ̄ kú nū jāā kwu ícɛ.”

³⁴Amáŋ Udéfīdi da Usɔ́lu ka anúɔ nɔ́ɔ wɛ ɔ̄cocɛ̄hɔ̄ kú nū ā kē le unu nu mla ágábá mɛ́mla aɔ́gwú eko nɛ̄ anúɔ gē gbāálá kú ádā anúɔ ā dúú ɛɛ́.

³⁵Ó ka anúɔ gē nū uwā jāā gbéeko nɛ̄ anúɔ le uwá ŋmó klla mīyɛ álá kú anúɔ ŋmá okónu kú uwā. Ó klla da ɔcɛ́ ka eko nɛ̄ odúúmā kú aɛ́bɛ́ obɔ̄bí ā kwú eyī í pīya kwu anúɔ nɛɛ, anúɔ gē lɛ abɔ̄ bī uwā īkpɔ̄kɔ gē je uwá ŋmó.

³⁶Ó ka anúɔ nōo wɛ ɔ̄cocɛ̄hɔ̄ kú nū ā ŋmó aágábá mɛ́mla aɛ́bɛ́ obɔ̄bí dúú ɛɛ́, ó ka anúɔ kē í yá ɔdā ékpónú ɔ́ɔmā tá opɛ̄ɛcí kú Ufilístiya nōo cá aícɔ́ɔja kú Ɔwɔicō, nōo yēeyī ā ɛcá ā.

³⁷Anɔ́ɔ Udéfīdi kahíníī, “Óndú nōo hɛ́ um tá ŋmá ūkwū kú ágábá mɛ́mla ūkwū kú ɔgwú ā, géē hɛ́ um tá ŋmá abɔ̄ kú ɔ̄cɛ Ufilístiya, olufíyé nyā a.” Anɔ́ɔ Usɔ́lu da ɔ́ kóō nyɔ̄, Óndú ā kóō yɔ mla anú.

³⁸Anɔ́ɔ Usɔ́lu kwu ɔkplɛ́fú oje kú ɛfú kú nū ú kpó wu Udéfīdi iyē. Ó kwú ɔkpú kú oje udɔ ú klá anú ɛyí, kwú úwé oje ú klá anú iyē.

³⁹Udéfīdi kwu ɔkpacaŋgelī kú Usɔ́lu ú playi úwé kú oje ā, anɔ́ɔ ó cēyītīkwū kóō fu ikpó, anɔ́ɔ ó fu ikpó glá gɛ ŋ́ má, ohígbū ka iyē nū í jé úwé oje ō lɛ wiyē ŋ́. Anɔ́ɔ ó le ɔ́ kpó plla á.

⁴⁰Anɔ́ɔ ó kwú ɔcí o kwu ajɛ kú nū ú wu abɔ̄, le ɛcɔ̄ ŋlóŋló ɛhɔ̄ yá ŋmá ɔtū ɔkpá, ó kwú kpó tū ipú ɛkpa kú ɔ̄cogbāálá kú nū ā. Anɔ́ɔ ó kwu ítū kú nū ú wu abɔ̄ á. Anɔ́ɔ ó le túbla ɔ̄cɛ Ufilístiya ā ajaajɛ á.

⁴¹Ugolíyāti le bɛ̄cɛ yɛ lɛyíkwu Udéfīdi, mla ɔ̄cɛ ó bī iyɛ́fú kú nū ā tá iyɔ̄bū nū.

⁴²Eko nɛ̄ ó le Udéfīdi má ā, ó lɛ ɔ́jiji tēyī nɛ̄hi, ohígbū ka ó má ka ó wɛ ɔyípɛ̄nɛ̄ncɛ́, ó klla joklóbīya ō má eyī.

⁴³Ɔ̄cɛ Ufilístiya ā da Udéfīdi ka, “N wɛ ewō nɛɛ, nāa lɛ ɔcí wu abɔ̄ lɛyíkwu um ā?” Anɔ́ɔ ó bī iyē kú ɔwɔ kú nū lɛ okónu tá lɛ Udéfīdi á.

⁴⁴Ó klla da Udéfīdi kahíníī, “Wā ká n̄ kwú ɛbɛ́ kú uwɔ ú lɛ aígbáanɔ kú ɔkpáncō mɛ́mla aɛ́bɛ́ kú ipácí kéē lé.”

⁴⁵Anɔ́ɔ, Udéfīdi da Ugolíyāti kahíníī, “A wā ɛgiyí um mla ɔkpacaŋgelī, óbō mɛ́mla ɔ́kpa, amáŋ n bī iyē kú Óndú nōo lɔfú fíyɛ́ dúú ā wā ɛgiyí uwɔ. Anú wɛ Ɔwɔicō kú aícɔ́ɔja kú Ísrɛ̄lu nāa gē lɛ abɔ̄ gbo ɔ́ ɔtū, klla í cá ɔ̄ ɛcá á.

⁴⁶Ícɛ nyā Ɔwɔicō géē je uwɔ tá ipú abɔ̄ kú um, n géē ŋmó uwɔ fīyɛ̄ ajɛ klla í je uwɔ īkpɛ̄yí hɛ́, cɛ́ɛ́ n géē je okwū kú uwɔ, ɔ̄cɛ olɔfú kú ācɛ Ufilístiya ā lɛ aígbáanɔ kú ɔkpáncō mɛ́mla aɛ́bɛ́ kú ipácí ícɛ. Cɛ́ɛ́ odúúdú ɛcɛ géē jé ka Ɔwɔicō ɔ́ɔ yɔ̄ Ísrɛ̄lu.

⁴⁷Cɛ́ɛ́ kú ójila nēe bá nyā kéē le jé ka, ó wɛ ɔkpacaŋgelī, óbō mɛ́mla ɔ́kpa nɛ̄ Óndú ā gē bī le hɛ́ ɔ̄cɛ tá ā ŋ́. Ohígbū ka ɛfú ō kpó wɛ ákú Óndú ā nɛ, ó kē í je uwɔ tá ipú abɔ̄ kú alɔ ícɛ.”

⁴⁸Ugolíyāti cāŋjɛ lɛyíkwu Udéfīdi, anɔ́ɔ Udéfīdi gbɔɔ́ ō kwinya lɛyíkwu ɔ́, cɛ́ɛ́ kōó nyɔ̄ í jīla mla anú.

⁴⁹Anɔ́ɔ Udéfīdi kwú ɛcɔ̄ ú ŋmá ipú ɛkpa kú nū, kwu ɔ̄ ú wu ítū kú nū, anɔ́ɔ ó le ítū ā tá lɛ ɔ́ á. Ɛcɔ̄ nōo ŋmá ipú ítū ā gaá le tá ipú Ugolíyāti údɔ̄bū plí, gebí tá ɔ̄ īkpɛ̄yí. Anɔ́ɔ Ugolíyāti má gwōnū wā ajɛ bɛ̄ɛka ígbɛ́fú nɛ̄hi ā, lɛ eyī pīya klá ajɛ.

⁵⁰Anɔ́ɔ Udéfīdi bī ítū mla ɛcɔ̄ lɛ Ugolíyāti yálé klla le ɔ́ ŋmó á. Udéfīdi í bī ɛ̄wā dúúmā abɔ̄ ŋ́.

⁵¹Anɔ́ɔ ó le inya kwu gaá le agada yá tū Ugolíyāti, le ɔkpacaŋgelī kú Ugolíyāti pi ŋmá ɔ̄ apɛ́, lɛ ɔ́ ŋmó klla bī ɔkpacaŋgelī kú nū ɔ́ɔmā piíí ā, le ɔ́ īkpɛ̄yí hɛ́. Eko nɛ̄ ācɛ Ufilístiya má ka ogbēnjūwā, olɔfú kú uwā ā, ɔ́ɔ gekwú ɛɛ́ mā, é le inya kwu le pɛ́ ga ɔlɛ́ uwā.

⁵²Anɔ́ɔ ācɛ Ísrɛ̄lu mɛ́mla ācɛ kú Ujúda cāŋjɛ mla ɛgba, gbɔɔ́ ō nū ācɛ Ufilístiya inya jāā ga Ugáti mɛ́mla okónu igá kú Ɛ́krɔn ā. Ācɛ Ufilístiya nēé yágbe ā bá ajɛ ɔwɔɔwɛ nōo yɛ ga Ussarem jāā ga Ugáti mɛ́mla Ɛ́krɔn.

⁵³Ācɛ kú Ísrɛ̄lu pīyɛyí ŋmá o nū ācɛ kú Ufilístiya ā ínya, anɔ́ɔ é gaá le aáklɔ̄kpɛ kú ɛfú kú Ufilístiya wúla tāajɛ, klla kwu iyó kú uwā kpó wu.

⁵⁴Anɔ́ɔ Udéfīdi kwu īkpɛ̄yí kú Ugolíyāti ā ú bī wā Ujerúsālɛm. Amáŋ, o kwú iyɔ́fú kú Ugolíyāti ā ú kpó bá ipú inu kú ɔlɛ́ nū.

⁵⁵Eko nɛ̄ Usɔ́lu má Udéfīdi abɔ́ɔ ó yɔ̄ í nyɔ̄ í nuunu tá Ugolíyāti ā, ó da Ábna otrɛ̄yí kú aícɔ́ɔja kú nū ɔ̄kā kahíníī, “Ábna, ɔyí kú ɔnyɛ nɛ̄ ɔyípɛ̄ nyā wɛ ā?” Ábna da ɔ́ ka ɔcɛ́ kóō yēeyī piyóó, ka anúɔ í jé ɔyí kú ɔ̄cɛ nɔ́ɔ wɛ ā ŋ́.

⁵⁶Anɔ́ɔ ɔcɛ́ ā klla da ɔ́ kahíníī, “Lɛ ɔ̄kā da, ɔ̄cɛ nɛ̄ ɔyí nyā wɛ ɔyí nū ā.”

⁵⁷Eko nɛ̄ Udéfīdi pīyɛyī ŋmá ɛga nɛ̄ ó ŋmó Ugolíyāti ā, Ábna le ɔ̄ bī gé lɛ Usɔ́lu, ó lɛ īkpɛ̄yí kú Ugolíyāti ce abɔ̄ gɔɔlii.

⁵⁸Usɔ́lu da ɔ́ ɔ̄kā kahíníī, “Ɔyí kú ɔnyɛ nāa wɛ ā?” Anɔ́ɔ ó tá ɔ̄ ohi ka anúɔ wɛ ɔyí kú ɔ̄cocɛ̄hɔ̄ kú nū Ujése, ɔ̄cɛ Ubɛ́tilɛhɛm ā.