Read idoma 1 USÁMUWƐ̄LU 19 Bible Online

1 USÁMUWƐ̄LU 19 - idoma bible

1 USÁMUWƐ̄LU 19

¹Usɔ́lu le da odúúdú ācocɛ̄hɔ̄ kú nū mɛ́mla Ujonátan, ɔyí nū ā kéē lɛ Udéfīdi ŋmó. Amáŋ Udéfīdi he Ujonátan ɔtū nɛ̄hi.

²Anɔ́ɔ Ujonátan le da Udéfīdi ka ádā anúɔ gē tíne kóō je ɔ́ ŋmó. Ohígbū ɔ́ɔmā ā, ó da ɔ́ ká ɔ̄ lɛ ɛlā kwu iyī nū ɔ̄cɔ̄ɔ̄cī kú ócí. Ó kóō lɛ kwu tayínū ɛga éyi kú ɔ̄ klá abɔ́ɔ.

³Ujonátan ka anúɔ géē nyɔ̄ í hayi pí ádā anúɔ ipácí ɛga nɛ̄ anú, Udéfīdi ɔ́ɔ tayínū ā. Ó ka anúɔ géē kɛlā lɛ ádā anúɔ ohígbū nū. Ɔ́dāŋ́ ka anúɔ lɛ ɔdā dúúmā jé ŋmá ɛgiyí nū kpɔ́ɔ, anúɔ géē yá kú ɔ̄ jé.

⁴Anɔ́ɔ Ujonátan nyɔ̄ í le cɛ̄tra Udéfīdi lɛ ádā nū kahíníī, “Ɔcɛ́ kóō híī bɔ̄bíipú tū ɔ̄cocɛ̄hɔ̄ kú nū Udéfīdi ŋ́, ohígbū ka, ó bɔ̄bíipú dúúmā tū uwɔ ŋ́. Úklɔ́ olɔhi nɛ̄ ó húmáyī yá mla uwɔ á.”

⁵Ujonátan klla kɛlā lɛ ádā nū gɔbū kpɔ́ kahíníī, “Ó le ɛyí cikwú eko nɛ́ ó ŋmó Ugolíyāti ā. Óndú ā cɛ̄ lɛ Ísrɛ̄lu le aólɛlā kú uwā yálé nɛ̄hi eko ɔ́ɔmā. A má ɔ̄, eko ɔ́ɔmā, a kē gwéeyē dúú. Ɔdíyá nāa gáā bɔ̄bíipú tū ɔ̄cɛ nɛ̄ ó yá uwɔ ɔdōbɔ̄bí dúúmā ŋ́, nāa kē gáā je Udéfīdi ŋmó tónú icííci ā?”

⁶Abɔ̄ Usɔ́lu le ɛlā kú Ujonátan pó ā, ó le ɛka gbo kahíníī, “N bī iyē kú Óndú nōo yɔ̄ piyóó ā lɛ gbɔɔkpá ka ń gáā ŋmó Udéfīdi gɛ ŋ́.”

⁷Anɔ́ɔ Ujonátan lɛ Udéfīdi hīīgwú lɛ ɛlā dóódu nēe bá nyā kpó ka lɛ ɔ́, klla lɛ ɔ́ bī wā iyɔ̄bū Usɔ́lu gāá yɔ̄ āyā nɛ̄ ó tɛtɛ ī cɛ̄ ɔcɛ́ ɛhɔ̄ ā.

⁸Eko nēé klla gbɔɔ́ ō kpɛ́fú mla ācɛ Ufilístiya igbɔhá ā, Udéfīdi le tá ɔgbɛ́fú gaá kpɛ́fú tá ācɛ Ufilístiya ā. Ó ŋmó ācɛ Ufilístiya alɛwa nɛ̄hi, anɔ́ɔ é le pɛ́ kwu ŋmá ɛgiyí Udéfīdi á.

⁹Ɛ̄cī éyi kpɔ́, alelékwū obɔ̄bí ŋmá ɛgiyí Óndú ā wā í klá Usɔ́lu, eko nɛ̄ ó cīce ɔlɛ́ nū, lɛ óbō wu abɔ̄, nɛ̄ Udéfīdi yɔ̄ í gwō ɛ̄ngwū lɛ ɔ́ ā.

¹⁰Usɔ́lu klla le óbō tá kā anúɔ lɛ Udéfīdi bū kwu ɔdɔ, amáŋ Udéfīdi le fō beé, anɔ́ɔ óbō ā gāá kwu ɔdɔ kli. Anɔ́ɔ Udéfīdi le plá wɛɛlɛ, kwú kwu á.

¹¹Otú kú ɛ̄cī ɔ́ɔmā, Usɔ́lu le ācogbāajɛ kpó tɛ̄hɔ̄ ga ɔlɛ́ Udéfīdi, kéē nyɔ̄ í gbō ɔ̄, cɛ́ɛ́ kéē géē lɛ ɔ́ ŋmó ɔ̄cɔ̄ɔ̄cī. Amáŋ ɔnyā kú Udéfīdi Umáyíka le da ɔbá nū ka ɔ́dāŋ ka ɔ́ kwu otú ɔ́ɔmā ŋ́, óócí, ɔ́ɔ géē je pīya okwū.

¹²Anɔ́ɔ Umáyíka kwú Udéfīdi ú bū uwíndo kú inu kú ɔlɛ́ uwā wā ajɛ ɛcɛ, anɔ́ɔ Udéfīdi le kwu á.

¹³Umáyíka kwú ojibó éyi ú, kwú ɔ̄ ú gwutá agōdō, kwú upílo kú ɔnwū kú ɛwū ú ce ɔ́ ɛyí, lɛ īlī pīya klá anú.

¹⁴Eko nɛ̄ Usɔ́lu lɛ ācɛ tɛ̄hɔ̄ kéē kwú Udéfīdi ú wā ā, Umáyíka da uwá ka ɔ́ɔ gē doōcē.

¹⁵Anɔ́ɔ Usɔ́lu klla lɛ ācɛ ɔhá tɛ̄hɔ̄ kéē nyɔ̄ í lɛ Udéfīdi má cɛ́ɛ́ kéē lɛ ɔ́ bī gé lɛ anúɔ ɛyí agōdō ā, cɛ́ɛ́ kú anúɔ lɛ ɔ́ ŋmó ɔ̄cɔ̄ɔ̄cī.

¹⁶Eko nɛ̄ ācɛ nɛ̄ ó tɛ̄hɔ̄ ā gā ā, ojibó nēé má tá agōdō nēé le upílo kú ɔnwū ɛwū ce ɔ́ ɛyí, klla le īlī pīya klá anú iyē á.

¹⁷Usɔ́lu da Umáyíka kahíníī, “Ɔdíyá nāa pllā um lɛ ā, nāa cɛ̄ lɛ olɛlā kú um je kwu ā?” Anɔ́ɔ Umáyíka tá ɔ̄ ohi kahíníī, “Eko nɛ̄ ó gaá nyɔ̄ ā, ó ka anúɔ géē ŋmó um ɔ́dāŋ ka ń cɛ̄ lɛ ɔ́ nyɔ̄ ŋ́.”

¹⁸Anɔ́ɔ Udéfīdi le kwu ga ɛgiyí Usámūwɛ̄lu Uráma á. Ó le ɔdā dóódu nɛ̄ Usɔ́lu yá ɔ̄ ā kpó ka lɛ Usámūwɛ̄lu. Anɔ́ɔ anú mɛ́mla Usámūwɛ̄lu nyɔ̄ í lā Unáyōtu á.

¹⁹É gaá le da Usɔ́lu ka Udéfīdi ɔ́ɔ klá Unáyōtu ajɛ kú Uráma.

²⁰Anɔ́ɔ Usɔ́lu lɛ ācɛ ɔhá tɛ̄hɔ̄ kéē gāá lɛ Udéfīdi kwú wā. Eko nēé gā, nēé má ígwu kú ācomɛ́ɛbɛ bá ī mɛ́ɛbɛ, nɛ̄ Usámūwɛ̄lu kpó trɛ̄yí ā, alelékwū kú Ɔwɔicō wā í klá ācocɛ̄hɔ̄ kú Usɔ́lu ā, anɔ́ɔ é gbɔɔ́ ō mɛ́ɛbɛ dúú á.

²¹Eko nēé wā í lɛ ɛ̄nyā ka lɛ Usɔ́lu ā, ó le ígwu kú ācɛ ɔhá tɛ̄hɔ̄ nyɔ̄. É klla gbɔɔ́ ō mɛ́ɛbɛ dúú. Anɔ́ɔ Usɔ́lu klla le ígwu ɔmɛɛtá tɛ̄hɔ̄ nyɔ̄, é klla gbɔɔ́ ō mɛ́ɛbɛ dúú.

²²Anɔ́ɔ Usɔ́lu abɔ̄yī nū gā Uráma gaá háyi pī obuga éyi Uséku, anɔ́ɔ ó dɔɔ̄kā ka iní nɛ̄ Udéfīdi mɛ́mla Usámūwɛ̄lu ɛ́ɛ bá ā? Anɔ́ɔ ɔ̄cɛ éyi tá ɔ̄ ohi ka é bá Unayótu ajɛ kú Uráma.

²³Abɔ̄ ó gbɔɔ́ ō nyɔ̄ abɔ́ɔ ā, alelékwu kú Óndú ā wā í klá anú dúú, anɔ́ɔ ó gbɔɔ́ ō mɛ́ɛbɛ tɔ́ɔwɔɔwɛ jāā gbéeko nɛ̄ ó gaajɛ Unayótu kú Uráma.

²⁴ Ó lɛ īlī kú nū plá klla gbɔɔ́ ō mɛ́ɛbɛ ipéyī Usámūwɛ̄lu, anɔ́ɔ ó gwutá tá ohɛ́ɛwa nobínōbi, ɛ̄cī ɔ́ɔmā gbó oŋmɔ́ɔ̄cī nū. Ācɛ lɛ ɔ́ kpó akwukwú kahíníī, “Usɔ́lu wɛ ipú ācomɛ́ɛbɛ ā dúú nɛ?”