Read idoma 1 USÁMUWƐ̄LU 20 Bible Online

1 USÁMUWƐ̄LU 20 - idoma bible

1 USÁMUWƐ̄LU 20

¹Anɔ́ɔ Udéfīdi kwú kwu ŋmá Unáyōtu kú Uráma gaá da Ujonátan ɔ̄kā ka ɔdí nɛ̄ anúɔ yá ā? Ɔwɛ nyá nɛ̄ anúɔ lɛpɔ̄bí kú ádā nū ā? Ɔbíipú nyá nɛ̄ anúɔ bī tū ádā nū, nɛ̄ ɔ́ gē tíne ká ɔ̄ ŋmó anúɔ ā?

²Anɔ́ɔ Ujonátan tá ɔ̄ ohi ka Ɔwɔicō ká ɔ̄ ŋmó ɔwɛ ɔdōbɔ̄bí, kú ɔ̄ kwú. Ɛ́ɛ́ kú ádā anúɔ ká ɔ̄ yá ɔdā dúúmā, kwu ɔdā nɛ̄hi mla ɔdā nɛ̄ŋcɛ́, ɔ́ɔ gē da anúɔ piíí. Ɔdíyá nɛ̄ ádā anúɔ ɔ́ɔ cíkā ō je ɔdā ɛ̄nyā tayínū ŋmá ɛgiyí anúɔ ā? Anɔ́ɔ Ujonátan ka ɔ́ɔ lɛ ā ŋ́.

³Amáŋ Udéfīdi tá ɔ̄ ohi kahíníī, “Ádā uwɔ jé ɛ́gɛ́nɛ̄ n he uwɔ ɔtū lɛ ā, anú yá ɛ́ɛ́ nōo ka ɛ̄nyā gā uwɔ ŋ́ má. Ohígbū ka ó jé ka ɔtū géē wú uwɔ nɛ̄hi. Ɔkwɛ̄yi n da uwɔ ka, ikpó ékpónú tá ɔtahɛ̄ ami mla ikwū abālɔbányā á.”

⁴Anɔ́ɔ Ujonátan da Udéfīdi ka, ɔdā dúúmā nɔ́ɔ ka ā, anúɔ géē yá ɔ̄ lɛ ɔ́.

⁵Udéfīdi tá ɔ̄ ohi kahíníī, “Óócí wɛ ucɛ kú ɔyā ɛ̄yīpɛ̄ á, n kē cíkā ó lé ɔdōlé mla ɔcɛ́. Ɔ́dāŋ́ ka ó he uwɔ ɔtū, n géē nyɔ̄ í tayínū ipácí jāā gbó ɔ̄nɔ̄ɔ̄nɛ̄ kú ɛ̄cīhɔ̄.

⁶Ɔ́dāŋ́ ka, ádā uwɔ í má um ɛgiyí ucɛ ā ŋ́, nōo gbɔɔ́ ō da ɔ̄kā um. Da ɔ́ ka, ami ɔ́ɔ mīyɛ ɛga ŋmá ɛgiyí anúɔ kú n̄ lɛ inya kwu ga Ubɛ́tilɛhɛm fíyaa, ɔnū-ɛya kú odúúdú ipɔ́ɔnū kú ɔlɛ́ ádā um.”

⁷Udéfīdi klla da Ujonátan kpɔ́ kahíníī, “Ɔ́dāŋ́ ka ó cɛ̄ ayíka ó gáā ŋmó um ŋ́, amáŋ ɔ́dāŋ́ ka ó kwú cɔ̄nū, le jé ka ó le tútū ō ŋmó um.

⁸Kócōō, lɛ ɔdā olɔhi nyā yá ga um, ká ā nyíla ɛka nɛ̄ ami mɛ́mla awɔ gbo ā ŋ́. Ɔ́dāŋ́ ka, n le yá bɔ̄bí, lɛ um ŋmó abɔ̄yī uwɔ. Ɔdíyá nāa gé bī um, gé lɛ ádā uwɔ kóō ŋmó um ā?”

⁹Ujonátan tá ohi kahíníī, “A gbɛlá ɛ́gɔ́ɔmā ŋ́. Ɔ́dāŋ́ ka n le jé péee ka, ádā um gáā yá uwɔ odée nɛɛ, ń géē yɛ í le da uwɔ ɛɛ́.”

¹⁰Anɔ́ɔ Udéfīdi da ɔ́ ɔ̄kā ka ɔ̄nyɛ ɔ́ɔ géē yá ká anúɔ jé ɔ́dāŋ́ ka ádā nū lɛ ohi kú ícɔ̄nū tá ɔ̄ ā?

¹¹Anɔ́ɔ Ujonátan da Udéfīdi ká ɔ̄ wā kú aá ga ipácí. Anɔ́ɔ uwá ɛpɛlɛ́ɛpa le tá ipácí á.

¹²Anɔ́ɔ Ujonátan da Udéfīdi ipácí abɔ́ɔ ka Óndú, Ɔwɔicō kú Ísrɛ̄lu kóō wɛ ijáalí kú aá abɔ́ɔ. Ɔ́dāŋ́ ka anúɔ lɛ ɔ̄kā kú ɛlā kú nū ā da ádā anúɔ óócí ámāŋ ɛ̄cīhɔ̄, nɛ̄ ɔ́ kɛlā olɔhi lɛyíkwu ɔ́ ŋ́, anúɔ géē tɛhɔ̄ fu ɔ́.

¹³Ujonátan klla da Udéfīdi ka, ɔ́dāŋ́ ka ádā anúɔ ɔ́ɔ tíne ō ŋmó ɔ̄ kpɔ́, Óndú ā kóō lɛ anúɔ ŋmó ɔ́dāŋ ka anúɔ í cɛ̄ lɛ ɔ́ jé, cɛ̄ɛ̄ kó ō le kwu ŋ́. Anɔ́ɔ ó da Udéfīdi ka Óndú ā kóō yɔ̄ mla anú ɛ́gɛ́nɛ̄ ó tɛtɛ yɔ̄ mla ádā anúɔ ā.

¹⁴Ujonátan da Udéfīdi kahíníī, “Ɔ́dāŋ́ ka, n yēeyī kpɔ́, lɛ ɛdɔ ihɔtū okpaakpa kú Óndú nyā mafú gā um, cɛ́ɛ́ kú n̄ híī kwú ŋ́.

¹⁵Ɔ́dāŋ́ ka ikwū lɛ um ŋmó, nɛ̄ Óndú ā lɛ aólɛlā kú awɔ, Udéfīdi kpó yíífi kwɛyí, ā híī mlanyī ó yá olɔhi nyā lɛ ācɛ ipɔ́ɔnū kú um ŋ́.”

¹⁶Ujonátan klla yɔ̄ ī kɛla gɔbū kpɔ́ kahíníī, “Ā je iyē kú ami, Ujonátan hɛ́ ŋmá ipú inu kú awɔ, Udéfīdi ŋ́, Óndú ā kóō gwō aólɛlā kú uwɔ ɔ́ci.”

¹⁷Anɔ́ɔ Ujonátan cɛ̄ lɛ Udéfīdi le ɛka gwá kéē yíihɔtū tá iyī uwā, ohígbū ka anú Ujonátan abɔ̄yī nū yíihɔtū tá Udéfīdi ŋmá ɔtú kú nū péee.

¹⁸Anɔ́ɔ Ujonátan klla da ɔ́ kahíníī, “Óócí wɛ ɛ̄cī ucɛ kú ɔyā ɛ̄yīpɛ̄ á, ɛga kú uwɔ géē táncā ɛyí utéblu kú ɔlɛ́ ádā um

¹⁹Ɛ̄cī ɔ́mɛɛtá ā, ɛga kú uwɔ klla í tá fíyɛ́, nyɔ̄ gaá tayínū ɛga nāa tayínū eko nɛ̄ ɛlā nyā gbɔɔ́ ā. Nyɔ̄ gāá klá pí ɛcɔ̄ nēé tīkwū bá ā.

²⁰N géē tá ɔyí ɛtá wā abɔ́ɔ bɛ̄ɛka ɔdā nɛ̄, n yɔ̄ ī tá ɔyí lɛ odée ā.

²¹N gē tū ɔyípɛ éyi ɛhɔ̄ kóō gāá lɛ ɔyí ā kpó wā. Ɔ́dāŋ́ ka n da ɔyípɛ̄ ā ka, ‘Ɔyí ā kwu ajaajɛ abɔ́ɔ á, lɛ uwá kpó wā,’ ayíka a wā ɔlɛ́, unwalu dúúmā í yɔ̄ ŋ́.

²²Ɔ́dāŋ́ ka, n da ɔyípɛ ā ka, ‘Nyɔ̄ ánáánūmā abɔ́ɔ, nyɔ̄ í lɛ ɔyí ā kpó wā, ‘ayíka kwu nyōōnyɔ̄, Óndú ā lɛ uwɔ nū nyɔ̄ ɛɛ́.

²³Amáŋ, ɛlā nɛ̄ ami mɛ́mla awɔ ka ā, mɛ́mla okónu nɛ̄ alɔ ce ā, Óndú ā wɛ ijáalí kú ami mɛ́mla awɔ á.”

²⁴Anɔ́ɔ Udéfīdi nyɔ̄ í tayínū ipácí á. Eko nɛ̄ ɔyā ɛ̄yīpɛ̄ gā ā, ɔcɛ́ má cīce kóō lé ucɛ kú nū.

²⁵Ɔcɛ́ má cīce ɛga nɛ̄ ó tɛtɛ gē cīce lɛ igbīhi pī ɔdɔ ā. Ujonátan cīce lɛ eyī pīya kwu ɔ́, Ábna cīce áklō éyi kú nū, anɔ́ɔ áklō ɔhá nōo wɛ ɛga nɛ̄ Udéfīdi gē cīce ā má tá áncā.

²⁶Amáŋ, Usɔ́lu í ka ɔdā dúúmā ɛ̄cī ɔ́ɔmā ŋ́, ohígbū ka ó gbɛlá ka “Odée ɔ́ɔ le yá ɔ̄, nɔ́ɔ le yēŋēē ɛ̄cī ɔ́ɔmā ŋ́ má, ɔdɔɔmā yá nɔ́ɔ wā í lé ɔdōlé ŋ́ má.”

²⁷Amáŋ ɛ̄cī ɔ́mpa kú ucɛ ā, ɛga kú Udéfīdi tá áncā kpɔ́. Anɔ́ɔ Usɔ́lu da Ujonátan ɔ̄kā kahíníī, “Ɔdíyá nɛ̄ ɔyí kú Ujése ā í wā í lé ɔdōlé kú ucɛ ā ŋ́ mā ā?”

²⁸Anɔ́ɔ Ujonátan da Usɔ́lu kahíníī, “Udéfīdi gbɔ̄ɔkɔ tá um, klla mīyɛ ɛga le tá Ubɛ́tilɛhɛ̄m.

²⁹Ohígbū ka, ó ka ‘Ipɔ́ɔ́nū kú ɔlɛ́ ádā um gáā gwɛ́ɛya ipú igelī nɛ̄hi ā, ayínɛ́ um o hile ā ka ami ɔ́ɔ gā.’ Anɔ́ɔ ó ba um ka ami ɔ́ɔ lɛ ɛga je lɛ anúɔ ká anúɔ gáā lɛ ayínɛ́ anúɔ má. Ɔdā nōo yá ɛ́ɛ́ nɛ̄ ó wā í lé ɔdōlé mla ɔcɛ́ ŋ́ mā yɔ̄ abɔ́ɔ á.”

³⁰Usɔ́lu kwú cɔ̄nū lɛyíkwu Ujonátan. Anɔ́ɔ ó da ɔ́ kahíníī, “Awɔ ɔyí kú akwuna, mla ɔnyā ɔdāhá, mla ɔnyā obɔ̄bí. Ń jé ka a kwú yɛce Udéfīdi ɔyí kú Ujése ā, a klla lɛ uwēyī je lɛ iyī uwɔ mla ɛ́nɛ́ ɔ́ɔmā ɛɛ́.

³¹Á jé ka ɔ́dāŋ́ ka Udéfīdi yēeyī, á gáā wɛ ɔcɛ́ Ísrɛ̄lu gbóógbóō ŋ́ nɛɛ? Nyɔ̄ kú ā gaá lɛ ɔɔ́ bī gé um, ó géē kwú piíí.”

³²Ujonátan da ádā nū ɔ̄kā kahíníī, “Ɔdíyá nɛ̄ ó géē kwú ā? Ɔdí nɛ́ ó yá ā?”

³³Anɔ́ɔ Usɔ́lu kwú óbō kú nū ú le tá lɛ Ujonátan, anɔ́ɔ Ujonátan le jé ka ádā anúɔ ɔ́ɔ le tútū ō ŋmó Udéfīdi.

³⁴Anɔ́ɔ Ujonátan le cɔ̄nū nɛ̄hi ŋmá ɛyí utéblu ā. Ó klla lé ɔdōlé ɛ̄cī ɔ́mpa kú ucɛ ā ɛ́ɛ́ gɛ ŋ́. Ɔtū le bīya lɛ ɔ́, ohígbū ka ádā nū lɛ uwēyī je lɛ ɔ́.

³⁵Ɔ̄cɔ̄ɔ̄cī ā, Ujonátan le tá ipácí mla ɔyípɛ̄ éyi ɛ́gɛ́nɛ̄ ó cokónu mla Udéfīdi lɛ ā.

³⁶Anɔ́ɔ ó da ɔyípɛ ā kahíníī, “Nyɔ̄ gaá tíne ɔyī nɛ̄ um tá ā.” Abɔ̄ ɔyí ā yɔ̄ ī nyɔ̄ ā, ó le ɔyī tá gla anú ɛyí.

³⁷Abɔ̄ ɔyípɛ ā ga ɛga nɛ̄ Ujonátan tá ɔyí ā nyɔ̄ ā, Ujonátan da ɔ́ kahíníī, “Ɔyī ā tá ánáánūmā iyɔ̄bū uwɔ.”

³⁸Anɔ́ɔ Ujonátan da ɔyípɛ ā kahíníī, “Kwú wā fíyaa, ā gbojī nóó.” Anɔ́ɔ ɔyípɛ̄ ā le ɔyī ā kpó jāā wā kwú uwā ú kpó gé lɛ Ujonátan á.

³⁹Amáŋ ɔyípɛ ā í jé ɔdā dúúmā nōo yɔ̄ í yá ā ŋ́. Ujonátan mɛ́mla Udéfīdi ōfōōfū uwā jé ɔdā nōo yɔ̄ í yá ā á.

⁴⁰Anɔ́ɔ Ujonátan kwu ɔtá mla ɔyī ā ú kpó lɛ ɔyípɛ̄ ā kóō le kpó ga ɔlɛ́ á.

⁴¹Abɔ̄ ɔyípɛ̄ ā le yɛ bōōbū ā, Udéfīdi le bɛ̄cɛ ŋmá ipú ɛcɔ̄ nēé tīkwū bá ā, anɔ́ɔ ó lɛ eyī pīya klla ajɛ iyɔ̄bū Ujonátan, le ɛyí gbo ajɛ igbo ɛtá. É le iyī uwā kwú bá ɔtū, klla le ikwū je klá iyī uwā jāā gbéeko nɛ̄ ɔtū hɛ́ Udéfīdi cáá.

⁴²Anɔ́ɔ Ujonátan da Udéfīdi kahíníī, “Nyɔ̄ ɛbɔ́. Ɛ́gɛ́nɛ̄ alɔ le ɛka gwá klla le okónu ce iyē kú Óndú ā ɛɛ́ mā, nɛ̄ alɔ klla kē lɛ Óndú ā hī ijáalí kú alɔ ā. Óndú ā géē yɔ̄ ɔtāhɛ̄ kú ipɔ́ɔma kú um mɛ́mla ákú uwɔ piyóó ipú ɛcɛ nyā.” Anɔ́ɔ Udéfīdi cāŋjɛ nyɛ̄ɛ̄ ŋmá abɔ́ɔ á, Ujonátan kē kwúcē wā ɔlɛ́.