Read idoma 1 USÁMUWƐ̄LU 21 Bible Online

1 USÁMUWƐ̄LU 21 - idoma bible

1 USÁMUWƐ̄LU 21

¹Anɔ́ɔ Udéfīdi gā Unɔ́bu ɛgiyí Ahímɛ́lɛ̄ki, ɔ̄cogwɛ́ɛyá ā. Anɔ́ɔ Ahímɛ́lɛ̄ki wā í jīla Udéfīdi ɔwɛ yɔ̄ ī fīyēgbúlú, yɔ̄ ī da ɔ́ ɔ̄kā kahíníī, “Ɔdíyá nɛ̄ awɔ ōfōōfū uwɔ gē yɛ, nɛ̄ ɔ̄cɛ dúúmā í yɛ mla awɔ ŋ́ má ā?”

²Anɔ́ɔ Udéfīdi, tá ohi kahíníī, “Ɔcɛ́ tū um ɛhɔ̄, ó ka amíɔ̄ɔ̄ yá ka ɔ̄cɛ dúúmā ká ɔ̄ jé ɛhɔ̄ nɛ̄ anúɔ tū um ā ŋ́. Ɛ̄jīkwɛjī lɛ ācɛ ɔlɛ́ um ā, n le ɛga nɛ̄ alɔ géē jīla ā da uwá ɛɛ́.”

³Anɔ́ɔ Udéfīdi da ɔ́ ɔ̄kā ɔdā nɛ̄ ó lɛ ā. Ó da ɔ́ kóō je igbō ɛhɔ̄ lɛ anúɔ mɛ́mla ɔdā ɔhá dúúmā nɛ̄ ɔ́ lɛ ā.

⁴Anɔ́ɔ ɔ̄cogwɛ́ɛya ā tá Udéfīdi ohi ka, anúɔ í lɛ igbō ɔlamu dúúmā gwō igbō ōtīihɔ ā tá ŋ́. Ó ka ɔ́dāŋ́ ka ācɛ ɔlɛ́ nū í gwutá mla anyā ɛ̄cī ɔ́ɔmā ɛ́ɛ́ ŋ́ kéē lɔfú lé

⁵Anɔ́ɔ Udéfīdi tá ɔ̄ ohi kahíníī, “É gwutá mla ɔnyā nóó. É gē lɛ iyī uwā yá tīihɔ, ó kōō eko nēé gē ga iyāwu ɔlamu icííci, bɛlɛntɛɛ eko nyā nɛ̄ alɔ yɔ̄ ī ga iyāwu okwíyē ɛ́gɛ́nyā.”

⁶Anɔ́ɔ ɔ̄cogwɛ́ɛya ā kwú igbō ú lɛ ɔ́ ŋmá ɛyí ede á, ohígbū ka igbō nɛ̄ ó lɛ ā, wɛ ɛ̄nɛ̄ é gē je ŋmá ɛyí ede ā klla gē je ɛ̄yīpɛ̄ gwū ɔkwu nū bōōbū ā nɛ.

⁷Amáŋ Udóyēgu nōo wɛ otrɛ̄yí kú ācogbɛna kú Usɔ́lu, nōo ŋmá Ɛ́dɔm ā yɔ̄ abɔ́ɔ, ícíícɛ ɔ́ɔmā, ohígbū ka ó wā gaá yá uculo kú iyē ō gwu abɔ́ɔ.

⁸Udéfīdi klā da Ahímɛ́lɛ̄ki, ɔ̄cogwɛ́ɛya ā ɔ̄kā kahíníī, “Á lɛ óbō ámāŋ ka ɔkpacaŋgelī amānyā ŋ́ nɛɛ? Ohígbū ka abɔ̄ ɛhɔ̄ kú ɔcɛ́ ā lɛ cɔlɔ́ɔ́lá ā, ń bī iyɔ́fú dóódu ámāŋ ka ɔkpacaŋgelī kú um dúúmā ŋ́.”

⁹Anɔ́ɔ ɔ̄cogwɛ́ɛya ā tá ɔ̄ ohi kahíníī, “Ɔkpacaŋ́gelī kú Ugolíyāti, ɔ̄cɛ Ufilístiya nāa ŋmó ɔpɛ́ kú Ɛla ā tá amānyā. Ó wɛ oōgbō īlī bayi igbīhi ikpáti okónu ōce kú Óndú ā. Ɔkpacáŋ́gelī ɔhá dúúmā í yɔ̄ amānyā ɛ́ɛ́ gɛ ŋ́.” Anɔ́ɔ Udéfīdi da ɔ́ kahíníī, “Ɔkpacaŋ́gelī ɔhá dúú í klla fíyɛ́ ɔ́ɔmā ɛ́ɛ́ gɛ ŋ́, kwú gā um mɛ́ɛnɛ.”

¹⁰Anɔ́ɔ Udéfīdi nyɛ̄ɛ̄ ŋmá abɔ́ɔ, yɔ̄ ī kwu ŋmá ɛgiyí Usɔ́lu á. Anɔ́ɔ ó le kwu le tá ɛgiyí Ákisi, ɔcɛ́ kú Ugáti ā.

¹¹Anɔ́ɔ aígabɔ̄ kú ɔcɛ́, Ákisi ā da Ákisi ɔ̄kā kahíníī, “Ɛ̄nyā í wɛ Udéfīdi nɛ̄ ācɛnyā kú Ísrɛ̄lu gē gwííjē hī ɔ̄ ka, ‘Usɔ́lu ŋmó úluulā, amáŋ Udéfīdi ŋmó ācɛ úluulā ɛga igwó ā ŋ́ nɛɛ?’”

¹²Abɔ̄ Udéfīdi le ɛlā nyā pó ā, ó gbɔɔ́ ō yúufi Ákisi, ɔ́cɛ kú Ugáti ā nɛ̄hi.

¹³Anɔ́ɔ Udéfīdi kwú īyī nū ú pīya olíla mla ojɛɛ́lɛ́ ɛgiyí uwā á. Eko dúúmā nēé gā ɛgiyí nū. Ó gē yɔ̄ í tɔ́kpá tū ɔwɛ kú igá kú igelī nɛ̄hi ā. Ó klla yɔ̄ ī pɛ́ ágba klá ɔnwū agba kú nū wāajɛ klá.

¹⁴Cɛ́ɛ́ Ákisi gē da aígabɔ̄ kú nū ɔ̄kā kahíníī, “Aá má ɔ̄, ɔ̄cɛ ā wɛ ojɛɛ́lɛ́, ɔdíyá nɛ̄ aá bī ɔ̄ wā ɛgiyí um ā?

¹⁵Ń lɛ aójɛɛ́lɛ́ ce um bá ŋ́ nɛ̄ aá gē bī ɔ̄ wā ɛgiyí um kóō yá ucē kú ɛ́lɛ́ kú nū ā iyɔ̄bū um āā?”