Read idoma 1 USÁMUWƐ̄LU 22 Bible Online

1 USÁMUWƐ̄LU 22 - idoma bible

1 USÁMUWƐ̄LU 22

¹Udéfīdi kwú kwu ŋmá Ugáti abɔ́ɔ, le tá ipú ɔ̄gɔ̄ nōo kwu igelī nɛ̄hi kú Adulám ajaajɛ ā. Eko nɛ̄ ayínɛ́ nū mɛ́mla ācɛ ɔlɛ́ nū o hile le pó ka, ɔ́ɔ yɔ̄ ipú ɔ̄gɔ̄ abɔ́ɔ ā, é le pɛ́ wā í bá mla anú.

²Ācɛ dúúmā nēé gē pīyatū mɛ́mla ācɛ o bī ulé, mɛ́mla ācɛ nɛ̄ ɔtū í he uwá ŋ́ mā, le pɛ́ ga ɛgiyí Udéfīdi. Ācɛ nēe bá mla anú ā lɛbɛ̄ɛka ācɛ ulá (400) ā. Anɔ́ɔ ó kwú pīya otrɛ̄yí kú uwā.

³Udéfīdi nyɛ̄ɛ̄ ŋmá abɔ́ɔ ga Umísipa ipú ajɛ Umówābu, gaá da ɔcɛ́ kú Umówābu ka anúɔ gē gbɔ̄ɔkɔ lɛ ɔ́ kú ádā anúɔ mɛ́mla ɛ́nɛ́ anúɔ kéē wā í lā mla anú jāā gbéeko nɛ̄ anúɔ lɛ ɔdā nɛ̄ Ɔwɔicō gáā yá lɛ anúɔ ā má.

⁴Anɔ́ɔ Udéfīdi mā ɛ́nɛ́ nū mɛ́mla ádā nū tá Umówābu, anɔ́ɔ é bá abɔ́ɔ odúúdú eko nɛ̄ Udéfīdi yɔ̄ ī tayínū ipú ɔ̄gɔ̄ āá.

⁵Anɔ́ɔ ɔ̄comɛ́ɛbɛ nēé hi ka Ugádi ā wā í da Udéfīdi ka ɔ́ɔ klá ɛga nɛ̄ ó tayínū ā ŋ́, amáŋ kú ɔ̄ kwu ga ipú ajɛ kú Ujúda. Anɔ́ɔ Udéfīdi le kwu ga ipú ūpū kú Uhéreti á.

⁶Ɛ̄cī éyi, Usɔ́lu yɔ̄ Ugíbēyi, cīce ɔkwu ɔcí nēé hi ka Utámārīsiki, ɛyí ɛfu lɛ óbō kú nū bī abɔ̄, aígabɔ̄ kú nū háyi jila anú tá. Anɔ́ɔ é da ɔ́ ka, é le Udéfīdi mɛ́mla ācɛ ɔlɛ́ nū má ɛɛ́.

⁷Anɔ́ɔ ó da aígabɔ̄ kú nū ā ɔ̄kā kahíníī, “Aá jāhɔ̄, ācɛ kú Ubénjamīn, aá gbɛlá ka Udéfīdi géē je ajɛ mɛ́mla ɛhɔ̄ kú ɔcí ufáyin lɛ odúúdú aá, klla í je aá yá aótrɛ̄yí kú aícɔ́ɔja kú nū nɛɛ?

⁸Ɔdā ɔ́ɔmā yá ɛ́ɛ́ nɛ̄ aá gē yá ojuju tū um á nɛɛ? Ɔ̄cɛ dúúmā kú aá í da um ka ɔyí um ɔ́ɔ lɛ ujɔ̄ tū mla Udéfīdi ŋ́. Ɛlā kú um í kwú odúúmā kú aá iyē ŋ́, ɛ́ɛ́ nɛ̄ aá kōō ī ka gā um ka, Udéfīdi mɛ́mla éyi kú ācɛ ɔlɛ́ um ā, ɔ́ɔ yɔ̄ í tíne ɛga nɛ̄ ó géē lɛ um ŋmó ŋ́. Ɔyí um klla lɔfú tū ɔ̄ iyē kóō lɛ um ŋmó.”

⁹Udóyēgu háyi abɔ́ɔ mla aígabɔ̄ mɛ́mla aícɔ́ɔja kú Usɔ́lu. Anɔ́ɔ ó ka anúɔ má Udéfīdi eko nɛ̄ ó ga ɛgiyí Ahímɛ́lɛ̄ki, ɔyí kú Ahítūbu ipú ajɛ kú Unɔ́bu ā.

¹⁰Ó da Usɔ́lu, ɔcɛ́ kahíníī, “Ahímɛ́lɛ̄ki da Óndú ā ɔ̄kā ɔdā nɛ̄ Udéfīdi géē yá ā, anɔ́ɔ ó klla le ɔdōlé mla ɔkpacaŋ́gelī kú Ugolíyāti ɔ̄cɛ Ufilístiya ā, kpó lɛ Udéfīdi á.”

¹¹Anɔ́ɔ Usɔ́lu le ɛhɔ̄ tū fu Ahímɛ́lɛ̄ki, ɔ̄cogwɛ́ɛya ā, mɛ́mla odúúdú aɔ́máapú nū mɛ́mla ācɛ ɔlɛ́ nū nēe wɛ ācogwɛ́ɛyā, Unɔ́bu ā. Anɔ́ɔ é le pɛ́ wā ɛgiyí ɔcɛ́ á.

¹²Anɔ́ɔ Usɔ́lu da Ahímɛ́lɛ̄ki ká ɔ̄ jāhɔ̄, anɔ́ɔ ó tá ɔ̄ ohi ká, ɔ́ɔ kɛlā nyɔ̄ mɛ́ɛnɛ ɔkpani.

¹³Anɔ́ɔ Usɔ́lu da ɔ́ ɔ̄kā ka ɔdíyá nɛ̄ anú mɛ́mla Udéfīdi tū ujɔ̄ tū anúɔ ā mɛ́ɛ̄? Ɔdíyá nɔ́ɔ je ɔdōlé mɛ́mla ɔkpacaŋ́gelī lɛ ɔ́ ā? Ɔdíya nɔ́ɔ da Ɔwɔicō ɔ̄kā lɛ ɔ́ āa? Anɔ́ɔ ó da ɔ́ ka o ŋmá eko ɔ́ɔmā Udéfīdi ɔ́ɔ kwú pīya lɛyíkwu anɔ́ɔ klla gē dɔɔ̄kā ɛga nɔ́ɔ géē je anúɔ ŋmó ā ɛɛ́.

¹⁴Ahímɛ́lɛ̄ki tá ɔ̄ ohi kahíníī, Udéfīdi ɔ́ɔ lɛyítaajɛ lɛ ɔ́ fíyɛ́ aótrɛ̄yí kú aícɔ́ɔja kú nū ohile á. Ó klla da ɔ́ ka Udéfīdi ɔ́ɔ klla wɛ ohilí nū nɔ̄nyīlɔ. Anú ɔ́ɔ klla wɛ otrɛ̄yí kú aícɔ́ɔja nēe gē gbō ɔ̄ á. Ka ɛjɛ̄ɛ̄jī aígabɔ̄ kú ɔcɛ́ kpɛ́mm ā gē lɛ ojīlīmā ce ɔ́ nɛ̄hi.

¹⁵Ahímɛ́lɛ̄ki ka anúɔ kɛlā lɛ Ɔwɔicō ohígbū nū gbóó, amáŋ ɔ́ɔmā ɔ́ɔ wɛ aflɛ́yí ŋ́. Ó da Ágábáidu, ɔcɛ́ ka ɔ́ɔ híī kpó ɛlā ce anúɔ ámāŋ ka ɔ̄cɛ ɔhá dúúdú kú ipɔ́ɔnū kú anúɔ lɛyíkwu ujɔ̄ ō tū tū ɔ̄ ŋ́. Ó ka anúɔ í jé ɔdā dúúmā lɛyíkwu ɔ́ɔmā ŋ́.

¹⁶Usɔ́lu tá ɔ̄ ohi ka anú, Ahímɛ́lɛ̄ki mɛ́mla ācɛ ɔlɛ́ nū dúúdú, ɛ́ɛ géē pɛ́ kwú.

¹⁷Anɔ́ɔ ó da éyi kú ācɛ nēe gē gbō ɔ̄, nōo kē háyi pī ɔ̄ ā kóō lɛ ɔ̄cogwɛ́ɛya kú Óndú ā ŋmó. Ka anú mɛ́mla Udéfīdi, ɛ́ɛ le ujɔ̄ tū tū anúɔ, ɔ́ɔ klla cɛ̄ le Udéfīdi le kwu. Amáŋ ɔ̄cɛ ō gbō ɔ̄ ā tá kóō bī abɔ̄ kú nū lɛ ŋmó ɔ̄cogwɛ́ɛya kú Óndú ā.

¹⁸Anɔ́ɔ Usɔ́lu da Udóyēgu ka ɔ̄ lɛ uwá kpó ŋmó. Anɔ́ɔ Udóyēgu le uwá kpó ŋmó dúúdú á. Ɛ̄cī ɔ́ɔmā ā, ó ŋmó ācogwɛ́ɛya kú Óndú ā nēe gē bī ikpati okónu ōce kú Óndú ā glá ā ofɛnɛ.

¹⁹Usɔ́lu, ɔcɛ́ klla le odúúdú ācɛ kú Unɔ́bu, igelī nɛ̄hi kú ācogwɛ́ɛya ā kpó ŋmó. Kwu ācɛnyā mɛ́mla ācɛnyīlɔ, kwu ayípɛ̄nɛ̄ŋcɛ́ mɛ́mla ayí olugwulugwu, kwu aɛ́na, aíjakī, mla aálá dúú.

²⁰Amáŋ Abíyāta, éyi kú ayí kú Ahímɛ́lɛ̄ki ā le kwu ga ɛgiyí Udéfīdi.

²¹Ó le ka lɛ Udéfīdi ɛ́gɛ́nɛ̄ Usɔ́lu je ācogwɛ́ɛya kú Óndú ā kpó ŋmó lɛ ā.

²²Anɔ́ɔ Udéfīdi da ɔ́ ka eko nɛ̄ anúɔ má Udóyēgu ɛ̄cī ɔ́ɔmā, anúɔ jé ka ɔ́ɔ géē ka lɛ Usɔ́lu piíí. Udéfīdi ka anúɔ yá ɛ́ɛ́ nɛ̄ odúúdú ācɛ ɔlɛ́ nū, pɛ́ kwú á.

²³Anɔ́ɔ ó da ɔ́ ká ɔ̄ klá mla anúɔ mɛ́ɛnɛ. Ó klla da ɔ́ ká ɔ̄ híī yúufi ŋ́, ka Usɔ́lu ɔ́ɔ dɔɔ̄kā ká ɔ̄ je anúɔ mla anú kpó ŋmó, amáŋ abɔ̄ dúúmā ɔ́ɔ gáā kwu ɔ́ ɛgiyí anúɔ glá ŋ́.