Read idoma 1 USÁMUWƐ̄LU 23 Bible Online

1 USÁMUWƐ̄LU 23 - idoma bible

1 USÁMUWƐ̄LU 23

¹É le ka lɛ Udéfīdi ka ācɛ Ufilístiya ɛ́ɛ bá ī kpɛ́fú tá ācɛ kú Ukéyīla, é klla da ɔ́ ka ɛ́ɛ bá ī kpó īkpɔ̄dɛ̄hɔ̄ kú uwā nēé cē bōōbū ā uwī.

²Anɔ́ɔ Udéfīdi le ɔ̄kā da Óndú ā ka anúɔ nyɔ̄ gaá kpɛ́fú tá ācɛ Ufilístiya ā nɛɛ? Anɔ́ɔ Óndú ā tá ɔ̄ ohi ka ɔ́ɔ nyɔ̄ í kpɛ́fú tá uwā kú ɔ̄ lɛ ācɛ kú Ukéyīla nyatá.

³Amáŋ aícɔ́ɔja kú Udéfīdi da ɔ́ ka aá bá yɔ̄ ī yúufi kú ācɛ Ujúda ɛ́ɛ́ má, ó lɛ ā, aá klla í nyɔ̄ í kpɛ́fú tá aícɔ́ɔja kú Ufilístiya, cɛ́ɛ́ kú aá lɛ Ukéyīla hɛ́tá āā?

⁴Anɔ́ɔ Udéfīdi klla le ɔ̄kā da Óndú ā igbɔhá, anɔ́ɔ Óndú da ɔ́ ká ɔ̄ nyɔ̄ Ukéyīla, gaá kpɛ́fú tá Ufilístiya, ka anúɔ géē yá kéē lɛ uwá yálé.

⁵Anɔ́ɔ Udéfīdi mɛ́mla ācɛ ɔlɛ́ nū le tá Ukéyīla nyɔ̄ gaá le ɛfú kpó tá ācɛ kú Ufilístiya á. Udéfīdi le uwá kpó ŋmó dúúdú ŋmá ajɛ klla le aɔ́dāajɛ kú uwā kpó. Anɔ́ɔ Udéfīdi le ācɛ kú Ukéyīla hɛ́tá á.

⁶Eko nɛ̄ Abíyāta, ɔyí kú Ahímɛ́lɛ̄ki kwu wā ɛgiyí Udéfīdi Ukéyīla ā, ó le īlī nēé gē lɛ klá ikpáti ɛka kú Óndú ā kpó wā mla anú.

⁷É gaá le ka lɛ Usɔ́lu ka, Udéfīdi ɔ́ɔ klá Ukéyīla. Anɔ́ɔ ó kahíníī, “Ɛhɛ́ɛ, Ɔwɔicō le ɔ́ kwú gā um ɛɛ́, ohígbū ka ó kwú iyī nū ú tá ipú egbudu o ŋmá lɛ ō ga ipú igelī nɛ̄ŋcɛ́ nōo lɛ odūngwɔ̄wɛ mla ogbló ō lɛ gwū ɔ̄.”

⁸Anɔ́ɔ Usɔ́lu lɛ aícɔ́ɔja kú nū hīīgwú kéē nyɔ̄ í lɛ íbɔm cē tū Udéfīdi mɛ́mla aícɔ́ɔja kú nū ipú igelī nɛ̄ŋcɛ́ kú Ukéyīla.

⁹Akpá gaá le fīyɛ̄ Udéfīdi ahɔ̄ lɛyíkwu ɛ́gɛ́nɛ̄ Usɔ́lu yɔ̄ í tútū kóō wā gāá kpɛ́fú tá ɔ̄ ā. Anɔ́ɔ Udéfīdi da Abíyāta kú ɔ̄ lɛ īlī ō klá ikpati okónu ōce kú Óndú ā kpó wā.

¹⁰Anɔ́ɔ Udéfīdi le ɔkɔ gbā ka awɔ Óndú, Ɔwɔicō kú Ísrɛ̄lu, anúɔ le pó ka Usɔ́lu ɔ́ɔ yɔ̄ í yá ojuju ká ɔ̄ wā ɛga nɛ̄ anúɔ yɔ̄ ā, gāá kpó ācɛ kú Ukéyīla ŋmó ohígbū anúɔ.

¹¹Anɔ́ɔ ó le ɔ̄kā da Óndú, Ɔwɔicō ɔ́dāŋ ka ācɛ kú Ukéyīla géē lɛ abɔ̄ kwu anúɔ ɔkwu tɛ́ɛcɛ lɛ Usɔ́lu? Ka Usɔ́lu ɔ́ɔ géē wā ɔkwɛ̄yi ɛ́gɛ́nɛ̄ anúɔ pó ā nɛɛ? Ó klla ba Óndú, Ɔwɔicō kú Ísrɛ̄lu kú ɔ̄ lɛ ohi tá anúɔ. Anɔ́ɔ Óndú ā lɛ ohi tá ɔ̄ kahíníī, “Usɔ́lu géē wā ɔkwɛ̄yi.”

¹²Anɔ́ɔ ó klla da ɔ́ ɔ̄kā ka ācɛ kú Ukéyīla géē je anúɔ lɛ Usɔ́lu nɛɛ? Óndú ā tá ɔ̄ɔ ohi ka é géē je ɔ́ lɛ Usɔ́lu.

¹³Anɔ́ɔ Udéfīdi mɛ́mla ācɛ ɔlɛ́ nū nēe lɛbɛ̄ɛka ulá ce ofu igwó (600) ā le pɛ́ nyɛ̄ɛ̄ ŋmá Ukéyīla bōōbū. Eko nɛ̄ Usɔ́lu le pó ka Udéfīdi ɔ́ɔ le kwu ŋmá Ukéyīla ā, ó klla nyɔ̄ Ukéyīla ɛ́ɛ́ gɛ ŋ́.

¹⁴Udéfīdi gaá tayínū ipú ígbíli nōo kwu ɔlɛ́ kú ɛyí ɛfu nōo kwu Usífu ajaajɛ ā. Usɔ́lu yɔ̄ ī dɔɔ̄kā nū ɛ̄cī dóódu, amáŋ Óndú ā í je ɛga lɛ ɔ́ kwú ɔ̄, cɛ́ɛ́ kú ō je ɔ́ ŋmó ŋ́.

¹⁵Udéfīdi le jé péee ka Usɔ́lu ɔ́ɔ yɔ̄ í dɔɔ̄ka anúɔ kóō je anúɔ ŋmó. Udéfīdi má klá Uhóres ipú ígbíli nōo kwu Usífu ajaajɛ ā.

¹⁶Ujonátan le tá ɛgiyí nū abɔ́ɔ gāá lɛ ɔ́ ɔtū tū kwu ɔtū, klla da ɔ́ péee ka Ɔwɔicō ɔ́ɔ yɔ̄ ī gbō ɔ̄ á.

¹⁷Anɔ́ɔ ó da ɔ́ ká ɔ̄ yúufi ŋ́. Ádā abɔ̄yī anúɔ, Usɔ́lu, ɔ́ɔ gáā yá ɔ̄ ɔdā dúúmā glá ŋ́. Ó klla da ka anúɔ jé péee ka ɔ́ɔ géē je pīya ɔcɛ́ kú Ísrɛ̄lu, cɛ́ɛ́ anúɔ kē kpókónū ce ɔ́.

¹⁸ Uwá ɛpɛlɛ́ɛpa le okónu ce ipéyī Óndú ā. Udéfīdi má klá Uhóresi abɔ́ɔ, anɔ́ɔ Ujonátan kwúcē le tá ɔlɛ́ á.

¹⁹Ɛ̄cī éyi, ācɛ ōhī ŋmá Usífu gaá da Usɔ́lu Ugíbeya ka, Udéfīdi tayínū Uhóresi ɛyí ɛfu kú Uhákīla, ɛháajɛ kú ígbíli kú Ujɛ́ssīmɔn ā.

²⁰É da ɔ́ ka aá jé ɛgɛ́nɛ̄ anú, Ágábáidu ɔ́ɔ húmáyī tíne ká ɔ̄ lɛ ɔ́ kwú ā. Anɔ́ɔ é da ɔ́ kɔ́ ɔ̄ wā ajɛ kú ɔlɛ́ aá, cɛ́ɛ́ ká ɔ́ɔ lɛ Udéfīdi kwú piíí.

²¹Usɔ́lu da uwá ka Óndú ā kóō hɔ́hā ce uwá, ɛ́gɛ́nɛ̄ ɛ́ɛ gbonɛnɛ lɛ anúɔ klla kē ményinyi anúɔ lɛ ā.

²²Anɔ́ɔ ó da uwá kéē nyɔ̄ bōōbū kéē lɛ ɔ́ má, cɛ́ɛ́ kéē lɛ ɛga nɛ̄ ó yɔ̄ piíí ā jé. Ó da uwá ka é klla lɛ ācɛ nēe má ɔ̄ īkpēyī abɔ̄yī uwā abɔ́ɔ piíí ā jé, ohígbū ka anúɔ pó ka Udéfīdi ɔ́ɔ lɛ ula nɛ̄hi.

²³Usɔ́lu, ɔcɛ́ da uwá kéē lɛ ɔkwu kú ɛga nɛ̄ Udéfīdi ɔ́ɔ gē tayínū piíī ā bu, cɛ́ɛ́ kéē wā í lɛ ohi nū kpó gé lɛ anúɔ. Cɛ́ɛ́ ká anúɔ géē nyɔ̄ mla uwá. Ɔ́dāŋ́ ka ó klá abɔ́ɔ kpɔ́, anúɔ géē je ɔ́ ca tāajɛ, ɔ́dāŋ́ ka ɔ́ɔ kōō wɛ o tíne nū ipú odúúdú Ujudēya náaná, anúɔ le tútū kú anúɔ tíne nū.

²⁴Anɔ́ɔ ācɛ ā nyɛ̄ɛ̄ ŋmá ɛgiyí Usɔ́lu, ɔcɛ́, le tá ajɛ ɔlɛ́ uwā gbɔbū lɛ oō wā kú Usɔ́lu, ɔcɛ́ ā. Udéfīdi mɛ́mla ācɛ ɔlɛ́ nū bá ígbíli kú Umáyɔn, ɔpɛ́ kú ɛháajɛ kú ígbíli kú Ujudéya ā, ɛga nɛ̄ ɔ̄cɛ dúúmā í yɔ̄ ŋ́ mā ā.

²⁵Usɔ́lu mɛ́mla ācɛ ɔlɛ́ nū gbɔɔ́ ō dɔɔ̄kā Udéfīdi. Amáŋ akpá klla gaá le fīyɛ̄ Udéfīdi ahɔ̄ kpɔ́, anɔ́ɔ ó le pó ka Usɔ́lu ɔ́ɔ yɔ̄ ī wā, anɔ́ɔ ó le kwu ga ɛyí ápátɛ́cɔ̄ kú ígbíli kú Umáyɔn ā, anɔ́ɔ ó gaá klá abɔ́ɔ á. Eko nɛ̄ Usɔ́lu le ɛ̄nyā pó ā, ó gbɔɔ́ ō tíne Udéfīdi kpɔ́.

²⁶Usɔ́lu mɛ́mla ācɛ ɔlɛ́ nū bá āyā éyi kú ɛfú ā, Udéfīdi mɛ́mla ācɛ ɔlɛ́ nū kē bá āyā ɔhá kú ɛfú ā. Ɛfu ā kē lɛ uwá kɔ̄ hīyī uwā tá. Udéfīdi mɛ́mla ācɛ ɔlɛ́ nū bā yɔ̄ ī hágágā kéē le kwu ŋmá ɛgiyí Usɔ́lu mɛ́mla ācɛ ɔlɛ́ nū, nēe kwu uwá ajaajɛ, klla gáā kwú uwā ɛɛ́ mā.

²⁷Eko nɛ̄ Usɔ́lu le bá lɛ Udéfīdi ajaajɛ ā, ɔlɛɛhɔ̄ ŋmá ɔlɛ́ gē lɛ Usɔ́lu ka ɔ́ɔ kwúcē wā ɔlɛ́ páápá, ācɛ Ufilístiya lɛ ɔfú kpó wā í gwō ɔlɛ́ aá ɛɛ́.

²⁸Anɔ́ɔ Usɔ́lu kwúcē ŋmó oōnū Udéfīdi inya á. Anɔ́ɔ ó le yɛ nyɔ̄ kóō kpɛ́fú tá ācɛ Ufilístiya á. Má ɔdā nōo yá ɛɛ́ nēé gē hī abɔ́ɔ ka, Ápátɛ́cɔ̄ ɛga nɛ́ é kwu ŋmá ā yɔ̄ á.

²⁹Anɔ́ɔ Udéfīdi nyɛ̄ɛ̄ ŋmá abɔ́ɔ gā Éngēdi gāá lā abɔ́ɔ á.