Read idoma 1 USÁMUWƐ̄LU 24 Bible Online

1 USÁMUWƐ̄LU 24 - idoma bible

1 USÁMUWƐ̄LU 24

¹Eko nɛ̄ Usɔ́lu pīyɛyí ŋmá ɔgbɛ́fú ɛga nɛ̄ ó nyɔ̄ í kpɛ́fú tá ācɛ Ufilístiya ā, anɔ́ɔ é le da ɔ́ ka, Udéfīdi ɔ́ klá ígbíli kú Éngēdi.

²Usɔ́lu le aícɔ́ɔja kú ɔlɛ́ nū nēe jé ō kpɛ́fú fíyɛ́ dúú ajɛ kú Ísrɛ̄lu ā kpó, anɔ́ɔ gbɔɔ́ ō tíne Udéfīdi mɛ́mla ācɛ ɔlɛ́ nū nēe bá ābɔ̄ ɛnɔ̄ɔ̄cī kú ipú ɛcɔ̄ nēé hī ka ‘Ɛwū kú ipácí’ ā.

³Usɔ́lu ga ɛgiyí ɔ̄gɔ̄ kú álá éyi, anɔ́ɔ ó le yɛ tá ipū nū gaá mlɛ́nyɔ́ á. Udéfīdi mɛ́mla ācɛ ɔlɛ́ nū kē bá eyīpíípú kú ɔ̄gɔ̄ ɛcɔ̄ ékpónú ɔ́ɔmā piíí ā.

⁴Anɔ́ɔ ācɛ ɔlɛ́ Udéfīdi da ɔ́ kahíníī, “Ɛ̄nyā wɛ ɛ̄cī nɛ̄ Óndú ā da uwɔ ka, ‘Má ɔ́, n géē je olɛlā kú uwɔ tá ipú abɔ̄ kú uwɔ, cɛ́ɛ́ káā yá ɔdā dúúmā nōo he uwɔ ɔtū ā mla anú á.” Anɔ́ɔ Udéfīdi cāŋjɛ yɛ̄ɛ̄ gaá lɛ okónōgwu kú ikpó kú awulú kú Usɔ́lu hɛ́ á.

⁵Ɔtū kú Udéfīdi gbɔɔ́ ō ŋmó ɔ̄ ɛpɔ̄bí abɔ̄ ó le okónōgwu ikpó kú awulú kú ɔcɛ́ hɛ́ ā.

⁶Anɔ́ɔ ó da ācɛ ɔlɛ́ nū ā kahíníī, “Ɔwɔicō kóō ŋmó ɔwɛ ɔdōōbɔ̄bí, ká n̄ lɛ abɔ̄ kú um kwu ɔ̄cɛ nɛ̄ Ɔwɔicō le anɔ̄ tū ɔ̄ ɛyí. Ó wɛ ɔ̄cɛ nɛ̄ Ɔwɔicō fu nɛɛ n.”

⁷Anɔ́ɔ ɛlā kú Udéfīdi nyā í cɛ̄ lɛ ācɛ ɔlɛ́ nū lɛ abɔ̄ kwu Usɔ́lu ɛ́ɛ́ gɛ ŋ má. Anɔ́ɔ Usɔ́lu cāŋjɛ ɔ̄cɔ̄ɔcī nyɛ̄ɛ̄ ŋmá abɔ́ɔ gbɔɔ́ ō nyɔ̄ á.

⁸Igbīhi nɛ̄ Usɔ́lu nyɛ̄ɛ̄ ā, Udéfīdi abɔ̄yī nū klla le bɛ̄cɛ ŋmá ɔgɔ ā, anɔ́ɔ ó gbɔɔ́ ō hī Usɔ́lu igwú kahíníī, “Óndú um.” Eko nɛ̄ Usɔ́lu pīyeyī le ɔ́ má ā, Udéfīdi túkpɛɛ́ le okónu kú ojīlīmā hɛ́ tū ɔ̄.

⁹Udéfīdi da Usɔ́lu, ɔcɛ́ ɔ̄kā ka ɔdíyá nɔ́ɔ gē jāhɔ̄ lɛ ɛlā kú ācɛ nēe ka anúɔ Udéfīdi ɔ́ɔ tíne ō ŋmó ɔ̄ ā?

¹⁰Ó da ɔ́ ícíícɛ ɔ́ɔmā kóō má ɔ̄ abɔ̄yīnū ka Óndú ɔ́ɔ kwú ɔ̄ ú wā í wu anúɔ abɔ̄ wɛɛlɛ ipú ɔ̄gɔ̄ ā. Ó ka ācɛ ɔlɛ́ anúɔ ōhī da anúɔ ka anúɔ lɛ ɔ́ ŋmó, amáŋ anúɔ tá ka anúɔ ɔ́ɔ gáā lɛ abɔ̄ kwu ɔ̄cɛ nɔ́ɔ wɛ ɔkpani anúɔ ā ŋ́. Ohígbū ka ɔ́ɔ wɛ ɔcɛ́ nɛ̄ Óndú ā le anɔ̄ tū ɔ̄ ɛyí.

¹¹Anɔ́ɔ Udéfīdi da ɔ́ ká ɔ̄ má ɔ̄, ádā anúɔ, ka okónōgwu kú awulú kú nū nɛ̄ anúɔ bī abɔ̄ á. Ó klla da ɔ̄kā ka ɔdí ɔ́ɔ yá nɛ̄ anúɔ le okónōgwu kú awulú kú nū hɛ́ ōfōōfū nū nɛ̄ anúɔ í je ɔ́ ŋmó ŋ́ mā ā? Ka ɔ́ɔmā cíkā ō le mafú lɛ ɔ́ péee ka anúɔ í tútū ō bɛ́yíkwu ɔ́ ámāŋ ka o tíne ō yá ɔ̄ ɔdā dúúmā ŋ́. Amáŋ anú ā yɔ̄ í tɔ́ɔtɛ́ kú anúɔ, cɛ́ɛ́ kóō lɛ anúɔ ŋmó, nááná nɛ̄ anúɔ í yá ɔ̄ ɔdā dúúmā ŋ́ mā.

¹²Udéfīdi klla da ɔ́ kahíníī, “Óndú ā kóō kɛpɔ̄ kú um mɛ́mla awɔ. Óndú ā géē gwū uwɔ ɔ́ci gā um á. Amáŋ abɔ̄ kú um í gáā kwu uwɔ ŋ́.”

¹³Udéfīdi da Usɔ́lu, ɔcɛ́ ā kahíníī, “A kē jé ɛlā nɛ̄ ācɛ gē ka íkée ka, ‘Ācɛ obɔ̄bí ōfōōfūnū gē yá ɔdōbɔ̄bí á.’

¹⁴ Aá má ɔdā nɛ̄ ɔcɛ́ kú Ísrɛ̄lu yɔ̄ ī tíne kóō ŋmó ā. Aá má ɔdā nɛ̄ ó yɔ̄ ī nīinya ā. Okwū ewō icííci, iju icííci.”

¹⁵Udéfīdi kɛlā lɛ Usɔ́lu, ɔcɛ́ ā gɔbū kpɔ́ kahíníī, “N gē gbɔ̄ɔkɔ cɛ́ɛ́ kú Óndú ā kóō lɛ ɛpɔ̄ ká ami mɛ́mla awɔ̄ hɛ́, cɛ́ɛ́ kóō lɛ ɛpɔ̄bí ŋmó ɔ̄cɛ nōo lɛ́pɔ̄bí ā, cɛ́ɛ́ kóō lɛ n nyatá ŋmá abɔ̄ kú uwɔ.”

¹⁶Eko nɛ̄ Udéfīdi lɛ ɛlā nyā ka lɛ Usɔ́lu kwɛyí ā, Usɔ́lu da ɔ̄kā kahíníī, “Ɔkɔ kú uwɔ yɔ̄ abɔ́ɔ á nɛɛ Udéfīdi, ɔyí um?” Anɔ́ɔ Usɔ́lu je ɔkɔ gicō le ikwū je nɛ̄hi á.

¹⁷Anɔ́ɔ ó da Udéfīdi kahíníī, “Ákú uwɔ le kpaakpa fíyɛ́ ákú um á, ohígbū ka a bī olɔhi le cíla um ulé, amáŋ n kē bī obɔ̄bí gē lɛ cíla awɔ ulé.

¹⁸Ícɛ nyā a le ɛ́gɛ́nɛ̄ a wɛ ɔ̄cɛ olɔhi ā mafú gā um ɛɛ́. Ohígbū ka a tá ō je um ŋmó, nááná nɛ̄ Óndú ā kē kwú um ú tá ipú abɔ̄ kú uwɔ ā.”

¹⁹Usɔ́lu, ɔcɛ́ yɔ̄ ī kɛlā gɔbū kpɔ́ kahíníī, “Ɔ́dāŋ́ ka, ɔ̄cɛ lɛ olɛlā kú nū má, ó géē má ɔ̄ tá nyɔ̄ icííci nɛɛ? Óndú ā kóō bī olɔhi le cíla awɔ ulé, ohígbū ɔdā nāa yá gā um ícɛ nyā.

²⁰Abālɔbányā, n le jé ka awɔ gáā wɛ ɔ́cɛ kú Ísrɛ̄lu á. Óndú ā í cɛ̄ lɛ ajɔ̄ɔ̄cɛ́ kú Ísrɛ̄lu háyi abɔ̄ kú uwɔ.

²¹Lɛ ɛka gbo gā um ícɛ, ka anúɔ í gáā je ipɔ́ɔma kú um, nōo ce um igbīhi ā kpó ŋmó ŋ́, cɛ́ɛ́ kéē híī je iyē kú um mlanyī ŋmá ajɛ kú Ísrɛ̄lu dúúdú ŋ́.”

²²Anɔ́ɔ Udéfīdi le ɛka gbo, klla le okónu ce lɛ Usɔ́lu á. Anɔ́ɔ Usɔ́lu mɛ́mla ācɛ ɔlɛ́ nū kwúcē ga ɔlɛ́ á. Amáŋ Udéfīdi mɛ́mla ācɛ ɔlɛ́ nū le pɛ́ ga ɛga ō tayínū kú uwā.