Read idoma 1 USÁMUWƐ̄LU 25 Bible Online

1 USÁMUWƐ̄LU 25 - idoma bible

1 USÁMUWƐ̄LU 25

¹Usámūwɛ̄lu gekwú, anɔ́ɔ odúúdú ācɛ kú Ísrɛ̄lu le jīla le ikwū kú nū yá tɔ̄há. Anɔ́ɔ é kwú ɔ̄ ú nyɔ̄ í nyi Uráma, ɔlɛ́ nū á. Igbīhi ɔdā nōo yá nyā, Udéfīdi nyɛ̄ɛ̄ le tá ígbíli nēé hī ka Upáran ā.

²Ɔ̄cɛ éyi yɔ̄, nōo ŋmá igēlī nɛ̄ŋcɛ́ kú Umáyɔn. Ó kē lɛ ajɛ nōo kē kwu igelī nɛ̄ŋcɛ́ nēé hī ka Ukámɛ̄lu ā ajaajɛ. Ɔ̄cɛ ā lɛ agbénú nɛ̄hi. Ó lɛ aálá ulá ahāapa ce ofu igwó (3,000) mɛ́mla aɛ́wū úlā ɛpa ce ofu igwó.

³Iyē kú ɔ̄cɛ a lé kā Unábalu, iyē kú ɔnyā nū lé ka Abígɛ̄lu. Ɔnyā nū ā kē jɔ̄ncɛ̄nyā klla lɔhi ō má eyī nɛ̄hi. Ó klla lɛ ohílīpú. Amáŋ ɔbá nū nōo ŋmá ipɔ́ɔma kú Ukálɛ̄bu ā í lɛ ohílīpú ŋ́. Ó klla lɔnɔ nɛ̄hi. Ɛ̄cī éyi, ó yɔ̄ í wá ɔnwū kú aálá kú nū igelī kú Ukámɛ̄lu.

⁴Anɔ́ɔ Udéfīdi le pó ipú ígbíli ā ka, Unábal ɔ́ɔ yɔ̄ í wā aálá kú nū ɔnwū.

⁵Anɔ́ɔ Udéfīdi le ācɛ igwó tɛ̄hɔ̄ fu ɔ́ ka é nyɔ̄ ga ɛgiyí Unábalu igelī nɛ̄ŋcɛ́ kú Ukámɛ̄lu. Anɔ́ɔ ó da uwá kéē bī iyē kú anúɔ lɛ ɔ́gbá tá ɔ̄.

⁶Kú ē da ɔ́ kahíníī, “Ɛbɔ́ kóō yɔ̄ mla awɔ. Ɛbɔ́ kóō yɔ̄ mla ācɛ ɔlɛ́ uwɔ. Ɛbɔ́ kóō yɔ̄ mɛ́mla ɔdā dóódu nāa lɛ ā.

⁷Alɔ pó ka a yɔ̄ í wá aálá kú uwɔ ɔnwū. Eko nɛ̄ ācogbāálá kú uwɔ̄ húmáyī klá mla alɔ ā, alɔ í yá uwá ɔdōbɔ̄bí dúúmā ŋ́, ɛ́ɛ́ nɛ̄ álá kú uwá dúúmā gē bī ŋ́.

⁸Da ācɛ ɔlɛ́ uwɔ ɔ̄kā káā má ɔ̄, é kē í ka gā uwɔ. Ohígbū ɔ́ɔmā, alɔ wā ɛ̄cī nāa yɔ̄ ī yá ucɛ ā, ményinyi alɔ ká ā lɛ ɔdā dúúmā nāa má glá ā je lɛ alɔ mla ɔyí uwɔ Udéfīdi.”

⁹Anɔ́ɔ ācɛ a bī iyē kú Udéfīdi lɛ ɛhɔ̄ ā cɛ̄ lɛ Unábalu á. É bá abɔ́ɔ bá ī gbēyī ohi kú nū.

¹⁰Anɔ́ɔ Unábalu tá ācocɛ̄hɔ̄ kú Udéfīdi ā ohi kahíníī, “Udéfīdi ii? Ɔnyɛ̄ wɛ Udéfīdi ā? Ń pó ɔdā dúú lɛyíkwu ɔ́ jéjēe ɛ́ɛ́ ŋ́. Ɔlɛ́ alɔ nyā le mū mla aɔ́fiyɛ nēe bá gē kwu ŋmá ɛgiyí óndú uwā ī yɛ abālɔbányā.

¹¹N gáā je igbō amáŋ éŋkpɔ̄, amáŋ ɛbɛ́ nɛ̄ um ŋmó kú ɔnwū álá ō wā kú um ā lɛ ācɛ nɛ̄ ń jé ɛga nēé ŋmá ā ŋ́ mā ŋ́.”

¹²Anɔ́ɔ ācocɛ̄hɔ̄ ā kwúcē gāá le ɛlā nɛ̄ Unábalu ka ā, ka lɛ Udéfīdi á.

¹³Anɔ́ɔ Udéfīdi da uwá kahíníī, “Aá lɛ ɔkpacaŋ́gelī kú aá kpó tūlé, cɛ́ɛ́ kú aá lɛ ɔ́ gbō bá ɛ́nyɔ́.” Anɔ́ɔ é le yá lɛ ā á. Udéfīdi kwú ɔkpacaŋ́gelī kú nū ú, bá ɛ́nyɔ́ dúú. Ó lɛ ācɛ ulá (400) kpó, anɔ́ɔ ó mā ofu igwó (200) ta bá ɔlɛ́ kéē leyīkwu iyó kú uwā.

¹⁴Anɔ́ɔ ācocɛ̄hɔ̄ éyi kú Unábalu da Abígɛ̄lu kahíníī, “A pó ō, Udéfīdi le ɛhɔ̄ tū ŋmá ipú ígbíli wā í lɛ okónu kú ɛbɔ́ hɛ́ tū ɔkpáni alɔ, amáŋ ó lɛ ɛcá tɛ̄hɔ̄ fu Udéfīdi.

¹⁵É kē ī yá olɔhi lɛ alɔ íbí ó. É gē je unwalu lɛ alɔ ŋ́, ɛ́ɛ́ nɛ̄ ɔdā dúúmā kú alɔ gē bī eko nɛ̄ alɔ bá ipácí mla uwá ā ŋ́.

¹⁶É gē gbō alɔ otú gbó ɔ̄cī, eko nɛ̄ alɔ bá pī uwā, bá ī gbō álá kú alɔ ā.”

¹⁷Ó klla da ɔnyā ā kóō gbɛlá kwu ɛlā nɛ̄ anúɔ da ɔ́ ā, kɔ́ɔ̄ klla gbɛlá kwu ɔdā nɔ́ɔ géē yá lɛyíkwu ɔ́ ā, ámāŋ, ɔ́ɔ géē bɔ̄bí lɛ aá mɛ́mla ɔkpani aá. Ó ka ɔ́ɔ lɛ īkpɛ̄yí olɔfú nɛ̄hi, ɔ́ɔ gáā jāhɔ̄ lɛ ɔ̄cɛ dúúmā ŋ́.

¹⁸Anɔ́ɔ Abígɛ̄lu páápá le igbō ofu igwó (200) yá fíya, anɔ́ɔ ó le ɔjá ɔkpɛ́bɛ́ kú ejé ɛpa, igbō ofu igwó ā, mla ɛbɛ́ kú aálá ɛhɔ̄ nēé le pá ɔlá ɛɛ́, mɛ́mla okoolo igwáahāpa kú āmplā, mla igbō ofu igwó (200) ocúkɔ́ɔ́ kú aíkpɔ̄cí Ufáyin nēé hī ka Uréyisin ā ofɛhɔ̄, īkpō kú Ufigi nēé le mabɔ́há ofɛhɔ̄, anɔ́ɔ ó kwú uwā ú kpó ce aíjakī á.

¹⁹Anɔ́ɔ ó da ācocɛ̄hɔ̄ kū nū ā kahíníī, “Aá gbɔbū gā um, ká n̄ tá aá igbīhi.” Amáŋ ó ka ɔdā dúúmā lɛ ɔbá nū ŋ́.

²⁰Abɔ̄ ó ce ijakī kú nū wā ɛga o foó bá ɛfu iyē ā, ó gaá le gbɛyí mla Udéfīdi mɛ́mla ācɛ ɔlɛ́ nū abɔ̄ é bá gē wā ɔwɛ ā.

²¹Udéfīdi yɔ̄ ī gbɛlá ipú ɔtū kú nū ka ɔdíyá nɛ̄ anúɔ kōō leyīkwu aálá ku ɔnyīlɔ ā ipú ígbíli abɔ́ɔ ā? Ɔdā dúúmā kú nū ɔ́ bī ŋ́. Ɔwɛ nɔ́ɔ lɛ cílá anúɔ ulé kú abɔ̄ nɛ̄ anúɔ tá ɔ̄ yɔ̄ á nɛɛ.

²²Udéfīdi ka Ɔwɔicō kóō lɛ anúɔ ŋmó, ɔ́dāŋ ka anúɔ í kpó odúúdú uwā ŋmó ɛ́ɛ́ kú eyī kóō nyā ŋ́.

²³Eko nɛ̄ Abígɛ̄lu lɛ Udéfīdi má ā, ó kwú hīla tá ŋmá ɛyí ijakī kú nū gaá lɛ eyī pīya klá ajɛ iyɔ̄bū nū.

²⁴Anɔ́ɔ ó da ɔ́ kahíníī, “Ɔkpáni um, jāhɔ̄ gā um. Ami nāa géē ŋmɛ́pɔ̄bí á.

²⁵Kóocōō, a híī pó ɛlā kú Unábalu ɛ́ɛ́ nāa gē lɛ ɛlá wu ucē íla mɛ́mla ɛdɔ kú ɔ̄cɛ icííci nɛ̄ ó wɛ ɔ́ɔmā ŋ́. Ó wɛ olíla ɛ́gɛ́nɛ̄ ɛyí kú iyē nū lɛ ā nɛ̄ n. Ń yɔ̄ abɔ́ɔ eko nɛ̄ ācōcɛ̄hɔ̄ kú uwɔ wā ā nóó.

²⁶Óndú, Ɔwɔicō í cɛ̄ gā uwɔ gwō aólɛlā kú uwɔ ɔ́ci, kú ā kpó uwā ŋmó ŋ́ yɔ̄ á. N bī iyē kú Ɔwɔicō nōo yēeyī ā lɛ okónu ce gā uwɔ, ka Óndú ā géē yá Unábalu italā bɛ̄ɛka odúúdú aólɛlā kú uwɔ nēe gē tíne kéē je uwɔ ŋmó ā.

²⁷Ɔkpáni, kóocōō, mīyɛ ɛhi nɛ̄ n bī wā nyā, ká ā le je lɛ ācɛ ɔlɛ́ uwɔ.

²⁸Kwú ɔdōbɔ̄bí dóódu nɛ̄ n yá ā í yá um ɛhi, ɔkpáni. Óndú ā géē je uwɔ pīya ɔcɛ́, mla ipɔ́ɔma kú uwɔ dúúmā, ohígbū ka ɛfú kú Óndú ā nāa yɔ̄ í kpó yɔ̄ á. N gē gbɔ̄ɔkɔ ka eko nāa gáā yēeyī gaá kwu ā, á gáā yá ɔdōbɔ̄bí dúúmā ŋ́.

²⁹Ɔ́dāŋ ka, ɔ̄cɛ dúúmā tíne ó nuunu tá uwɔ kóō lɛ uwɔ ŋmó, Óndú, Ɔwɔicō kú uwɔ í gbō uwɔ ɛ́gɛ́nɛ̄ ɔ̄cɛ gē gbō ije kú nū ā. Óndú ā í kpó aólɛlā kú uwɔ tá bónū ɛ́gɛ́nɛ̄ ítū gē tá ɛcɔ̄ tónū ā.

³⁰Eko nɛ̄ Óndú ā lɛ ɔdā olɔhi dóódu nɛ̄ ó cokónu nū gā uwɔ ā, yá gā uwɔ, nɛ̄ ó kwú uwɔ ú pīya ɔcɛ́ kú Ísrɛ̄lu,

³¹eko ɔ́ɔmā, á gáā hīíjémā ka anúɔ ŋmó ɔ̄cɛ icííci ɛ́ɛ́ gɛ ŋ́, ámāŋ ka lɛ ɔ́ci kú iyī uwɔ gwō ŋ́. Eko nɛ̄ Óndú ā lɛ ɔhā hɛ́ ce uwɔ, blakwu um.”

³²Anɔ́ɔ Udéfīdi da ɔ́ kahíníī, “N cɛ̄tra Óndú, Ɔwɔicō kú Ísrɛ̄lu nōo tū uwɔ ɛhɔ̄ wā í jīla um ɔwɛ ā.

³³N tá Ɔwɔicō ahínyá ká ohílīpú olɔhi nāa lɛ ā mɛ́mla ɔdā nāa yá ícɛ nyā, nāa lɛ um ɔ̄cɛ ō ŋmó mla ɔ́ci ō gwō ci ā.

³⁴Óndú ā lɛ um abɔ̄ ō le kwu aá ci ɛɛ́. Amáŋ, ɛlā ɔkwɔ̄ɔ̄kwɛ̄yi, ɔ́dāŋ ka á wā fíyaa gāá jīla um ɔwɛ ŋ́ nɛɛ, odúúdú ācɛ ɔlɛ́ Unábalu géē yɛ í le pīya aókwū ɛ́ɛ́, kú eyī kú óócí kóō nyā.”

³⁵Anɔ́ɔ Udéfīdi mīyɛ ɛhi nɛ̄ ó bī gē lɛ ɔ́ ā, anɔ́ɔ ó da ɔ́ ká ɔ̄ nyɔ̄ ɔlɛ́ mɛ́ɛnɛ, ɔ́ɔ híī ŋmúleyīkwū ŋ́, ohígbū ka ɔdā dúúmā nɔ́ɔ ka ā, anúɔ géē yá ɔ̄.

³⁶Anɔ́ɔ Abígɛ̄lu kwúcē ga ɔlɛ́ nyɔ̄ í tá Unábalu, nōo yɔ̄ ī yá ɛdɔ kú ucɛ nɛ̄ ɔcɛ́ gē yá glá ā. Ó lɛ ejé gwá mu eyī, anɔ́ɔ Abígɛ̄lu í ka ɔdā dúúmā lɛ ɔ́ ŋ́, jāā gbó oŋmá ɔ̄cī nū á.

³⁷Eko nɛ̄ ejé kwú cá ŋmá ɔɔ́ eyī ā, anɔ́ɔ ó le ɔdā dóódu nōo yá kpɛ́mm ā kpó ka lɛ ɔ́ á. Anɔ́ɔ ɔtū kú nū kwú wu gicō bōōbū, anɔ́ɔ oŋmɛ́ɛŋmɛ́ɛ le ɔ́ kwú, anɔ́ɔ abɔ̄ mɛ́mla ikpó kú nū kwú kpó ŋmó á.

³⁸Ɛ̄cī ɔ́migwó kú nū ā, Óndú ā mīyɛ owu kú nū, anɔ́ɔ ó gekwú á.

³⁹Eko nɛ̄ Udéfīdi le pó ka Unábalu ɔ́ɔ gekwú ā, ó ka anúɔ wóofu iyē kú Óndú ā, ohígbū ka ɔ́ɔ lɛ ɔ́ci gwō Unábalu kú ɛcá nɛ̄ ɔ́ cá anúɔ ā. Ó ka Óndú ā, ɔ́ɔ klla lɛ anúɔ gbō ŋmá ɔdōbɔ̄bí ō yá ɛɛ́.” Anɔ́ɔ Udéfīdi le ɛhɔ̄ tū nyɔ̄ í le ɔ̄kā Abígɛ̄lu ō lɛ da á.

⁴⁰Ācocɛ̄hɔ̄ kú Udéfīdi le tá ɛgiyí Abígɛ̄lu Ukámɛ̄lu, gāá le da ɔ́ ka Udéfīdi ɔ́ɔ tū aá ɛhɔ̄ fu ɔ́ ká aá kóō kwú ɔ̄ ú wā, cɛ́ɛ́ ká ɔ̄ kwú pīya ɔnyā nū.

⁴¹Anɔ́ɔ Abígɛ̄lu túkpɛɛ́ kahíníī, “N wɛ ɔ̄cocɛ̄hɔ̄ kú nū nɛ, n le tútū ká n̄ nyɔ̄ í na ikpó kú ācocɛ̄hɔ̄ kú nū.”

⁴²Anɔ́ɔ ó cāŋjɛ fíyaa le icō ijakī kú nū tū. Anú mɛ́mla ācocɛ̄hɔ̄ nɔ̄nyā kú ɔlɛ́ nū ɛhɔ̄, anɔ́ɔ ó le yɛ mla ācocɛ̄hɔ̄ kú Udéfīdi ā, gāá kwu pīya ɔnyā kú Udéfīdi á.

⁴³Udéfīdi tɛtɛ le Ahínōwam nōo ŋmá Ujesirílu lɛ gbɔbū. Abígɛ̄lu klla kē kwú pīya ɔnyā nū ɔ́mpa.

⁴⁴Eko nyā Usɔ́lu kwu Umáyíka nōo wɛ ɔnyā aflɛ́yí kú Udéfīdi ā ú lɛ Upáliti, ɔyí kú Uláyissi, nōo ŋmá ɔlɛ́ nēé hī ka Ugálínfa ā.