Read idoma 1 USÁMUWƐ̄LU 26 Bible Online

1 USÁMUWƐ̄LU 26 - idoma bible

1 USÁMUWƐ̄LU 26

¹Ɛ̄cī éyi, ācɛ ŋmá Usífu gā ɛgiyí Usɔ́lu, Ugíbēyi, anɔ́ɔ é da ɔ́ ka Udéfīdi ɔ́ɔ tayínū ɛyí ɛfu kú Uhakíla, okónógwu kú ígbíli kú Ujudéya.

²Ɔkwɔɔkwu ɔ́ɔmā, Usɔ́lu lɛ aícɔ́ɔja úlā ahāapa ce ofu igwó (3,000) tū ga ipú ígbíli kú Usífu, kéē gaá dɔɔ̄kā Udéfīdi.

³Usɔ́lu abɔ̄yīnū gáā klá pī okónu ɔwɛ nōo bū ɛyí ɛfú kú Uhakíla ā. Udéfīdi kē klá ígbíli ā kpɔ́. Eko nɛ̄ ó le jé ka Usɔ́lu ɔɔ́ gaá yɔ̄ ī tíne anúɔ ā,

⁴ó lɛ ācɛ tɛ̄hɔ̄ wɛɛlɛ kéē nyɔ̄ ga abɔ́ɔ, cɛ́ɛ́ kéē lɛ ajɛ ā jila lɔɔlɔhi ɔ́dāŋ́ ka Usɔ́lu yɔ̄ abɔ́ɔ ɔkwɛ̄yi.

⁵Anɔ́ɔ ó le yɛ bōōbū gāá lɛ ɛga nɛ̄ Usɔ́lu mɛ́mla Ábuna ɔyí kú Únɛ́ɛ otrɛ̄yí kú aícɔ́ɔja kú nū gē gbo piíí ā jé. É le Usɔ́lu má, kwú iyɔ̄lā ú gbo tá ipú áklɔ̄kpɛ kú nū. Ācɛ nēe gē gbō ɔ̄ ā gwutá jīla anú tá biílí.

⁶Anɔ́ɔ Udéfīdi da, Ahímɛ́lɛ̄ki, ɔ̄cɛ Uhɛ́ti ā, mɛ́mla Abíssāyi ɔyínɛ́ nɔ̄nyīlɔ kú Ujówābu, nɛ̄ ɛ́nɛ́ uwā wɛ Usɛrúya, ɔ̄kā ka, ɔ̄nyɛ kú uwā ɛpa nēe bá ā lɔfú ga aáklɔ̄kpɛ kú ɛfú kú Usɔ́lu mla anúɔ glá ā? Anɔ́ɔ Abíssāyi tá ɔ̄ ohi ka anúɔ géē nyɔ̄ mla anú.

⁷Otú ícíícɛ ɔ́ɔmā, Udéfīdi mɛ́mla Abíssāyi le tá aáklɔ̄kpɛ kú ɛfú kú Usɔ́lu, anɔ́ɔ ó le Usɔ́lu má abɔ̄ ó gwutá yɔ̄ ī gbiyɔ̄lā ɔtāhɛ̄ aáklɔ̄kpɛ kú ɛfú kú nū lɛ óbō kú nū kwaajɛ pī īkpɛ̄yí kú nū. Ábna mɛ́mla aícɔ́ɔja ohile gwutá jīla anú tá bā ī gbiyɔ̄lā dúú.

⁸Anɔ́ɔ Abíssāyi da Udéfīdi ka Ɔwɔicō kwú olɛlā kú anú nōo wɛ Udéfīdi ā ú tá ipu abɔ̄ kú nū otú ɔ́ɔmā ɛɛ́. Anɔ́ɔ ó ka anúɔ lɛ óbō kú nū abɔ̄yī nū ā gwū ɔ̄ bá ajɛ igbeékpónú. Ó ka anúɔ í gáā gwō ɔ̄ igbo ɛpa ŋ́.

⁹Amáŋ Udéfīdi da ɔ́ ká ɔ̄ híí lɛ abɔ̄ kwu ɔ́ ɛ́ɛ́ nɔ́ɔ kōō ī kɛlā ō ŋmó ɔ̄ dɛ̄ɛ̄ ŋ́. Ó da ɔ́ ka, Óndú ā ɔ́ɔ géē yá ɔ̄cɛ dúúmā nōo lɛ abɔ̄ kwu ɔcɛ́ nɛ̄ ó fu ā italā.

¹⁰Ó klla ka ɔdā nōo yá ɛ́ɛ́ nɛ̄ Óndú ā yēeyī ā, anúɔ jé ka Óndú ā abɔ̄yī nū géē ŋmó Usɔ́lu, ámāŋ ɔ́ɔ kē í kwū ikwū ɔwɔ nū, ámāŋ é kē í ŋmó ɔ̄ ɔgbɛ́fú.

¹¹ Udéfīdi ka Ɔwɔicō kóō ŋmɔ́wɛ ɔdōbɔ̄bí kú anúɔ lɛ abɔ̄ kú anúɔ kwu ɔ̄cɛ nɛ̄ Óndú ā le fu kwú ɔ̄ ú pīya ɔcɛ́. Anɔ́ɔ ó da Abíssāyi ka áa kóō kwú óbō mla ɔjá kú éŋkpɔ̄ kú nū ú kpó kú aá nyɔ̄.

¹²Anɔ́ɔ Udéfīdi kwu óbō mɛ́mla ɔjá kú éŋkpɔ̄ nēe bá ɛga īkpɛ̄yí kú Usɔ́lu, ɔcɛ́ ā ajaajɛ ā ú kpó, anɔ́ɔ é nyɛ̄ɛ̄ á. Ɔ̄cɛ dúúmā í má uwā ŋ́, ɛ́ɛ́ nēé kōō ī jé ɔdā nōo yá ā ŋ́. Ɔ̄cɛ dúúmā kú uwā í kōō héyī ŋmá iyɔ̄lā ŋ́. Ohígbū ka Óndú ā le uwá ŋmíyɔ̄lā nɛ̄ɛ̄nɛ̄hi.

¹³Udéfīdi mɛ́mla Abíssāyi le bēhé ɔpɛ́ ā le tá āyā ɔhá kú ɛfu ā, gaá háyi ɛyí ɛfu ɔhá, ɛga nɛ̄ abɔ̄ í gáā kwu ɔ̄ glá ŋ́ mā.

¹⁴Anɔ́ɔ ó dɛ̄gba hī aícɔ́ɔja kú Usɔ́lu mɛ́mla Ábna igwú kahíníī, “Ábna, a pó ɔkɔ kú um mm?” Anɔ́ɔ Ábna ka ɔ̄nyɛ gē dɛ̄gba ī kpó aá héyī ŋmá iyɔ̄lā ā?

¹⁵Anɔ́ɔ Udéfīdi le ohi tá ɔ̄, klla le ɔ̄kā da ɔ́ ka, “Ábna, ó wɛ awɔ lɔfú fíyɛ́ dúú ipú aícɔ́ɔja kú Ísrɛ̄lu ā ŋ́ nɛɛ? Ó lɛ ā, ɔdíyá nā á gbō ɔkpáni uwɔ, ɔcɛ́ lɔhi glá ŋ́ mā ā? Ó gbojī ɛ́ɛ́ ŋ́, ɔ̄cɛ éyi le bēhé ga ádɛ́fú ā, gáā je ɔkpani uwɔ ŋmó.

¹⁶A má gwōnū ipú úklɔ́ kú uwɔ ɛɛ́, Ábna, é cíkā kéē lɛ uwɔ ŋmó, abɔ̄ á kē gbō ɔcɛ́, ɔkpáni uwɔ ɛyí glá gɛ ŋ́ mā. Má ɔ̄, iní nɛ̄ óbō kú ɔcɛ́ ā yɔ̄ ā? Iní nɛ̄ ɔjá nōo hayi pī īkpɛ̄yí kú nū ā yɔ̄ āa?”

¹⁷Usɔ́lu lɛ ɔkɔ kú Udéfīdi jé, anɔ́ɔ ó le ɔ̄kā da kahíníī, “Udéfīdi, ɔyí um, awɔ nɛɛ?” Anɔ́ɔ Udéfīdi tá ɔ̄ ohi ka anúɔ nɛ̄ Ágábáidu.

¹⁸Anɔ́ɔ ó klla da ɔ́ kahíníī, “Ɔkpáni, ɔdíyá nāa klla yɔ̄ ī nū ɔ̄cocɛ̄hɔ̄ kú uwɔ kpɔ́ ɛ́ɛ́ mā ā? Ɔdí nɛ̄ um yá uwɔ ā? Ɔdōobɔ̄bí nyá nɛ̄ um yá ā?

¹⁹Jāhɔ̄ gā um, ɔkpáni, ɔ́dāŋ́ ka, Óndú ā pīya awɔ eyī kwu um á nɛɛ, ɛya ō gwó lɛ ɔ́ lɔfú cɛ̄ lɛ ɔ́ pīya ɔtū kú nū abɔ̄, amáŋ ɔ́dāŋ ka ó kē wɛ ācɛ ōhī nɛɛ, Óndú ā kóō lɛ okónu tá lɛ uwá. Ohígbū kēé le um nū ŋmá ajɛ kú Óndú ā, ga aje nɛ̄ aɔ́wɔ nōo yɔ̄ nɛ̄ n gbɛ̄ɛ̄gbā glá ā, wɛ ákú aéwɔhá ōfōōfū nū.

²⁰Ā cɛ̄ lɛ uwá lɛ um ŋmó tá ajɛ éwɔhá, ɛga nōo ligbō ŋmá ɛgiyí Óndú ā ŋ́. Ɔdíyá nɛ̄ ɔcɛ́ kú Ísrɛ̄lu dúúdú gáā wā í ŋmó ami nɛ̄ ó wɛ ɔdá dúúmā ŋ́ bɛ̄ɛka iju ā? Ɔdíyá nɛ̄ ó gē tɔ́ɔ́tɛ́ kóō lɛ um ŋmó bɛ̄ɛka ɔdā nɛ̄ n wɛ aígbáanɔ kú ipácí ā?”

²¹Usɔ́lu tá ɔ̄ ohi kahíníī, “Ɔdōbɔ̄bí nɛ̄ n yá á. Kwúcē igbīhi, Udéfīdi, ɔyí um. N gáā dɔɔ̄kā ō ŋmó uwɔ ɛ́ɛ́ gɛ ŋ́. Ohígbū ka a tá ka anúɔ í ŋmó um otú mā kpɔ́. N húmáyī wɛ olíla. Ɔdōbɔ̄bí nɛ̄hi nɛ̄ n yá á.”

²²Udéfīdi tá ɔ̄ ohi kahíníī, “Óbō kú uwɔ yɔ̄ á. Lɛ ɔ̄cɛ ɔlɛ́ uwɔ éyi tɛ̄hɔ̄, kóō wā í lɛ uwá kpó gé lɛ uwɔ.

²³Óndú ā gē cíla ācɛ okpaakpa mɛ́mla ācɛ o lɛ́pɔ̄hi ulé á. Ícɛ ā, ó kwú uwɔ ú tá ipú abɔ̄ kú um, amáŋ, ń ŋmó awɔ, nēé le anɔ̄ tū uwɔ̄ ɛyí, je uwɔ pīya ɔcɛ́ ā ŋ́.

²⁴Ɛ́gɛ́nɛ̄ n nya oyeēyī kú uwɔ tá ícɛ nyā, ká Óndú ā kóō lɛ ákú um nyatá, ɔwɛ ékpónú ɔ́ɔmā dúú. Kóō klla lɛ um hɛ́tá ŋmá ipú unwalu mɛ́mla ákanya dóódu.”

²⁵Usɔ́lu da Udéfīdi kahíníī, “Óndú ā kóō hɔ́hā ce uwɔ, ɔyí um. Ó géē lɔhi gā uwɔ ipú ɔdā dóódu nāa gē yá ā.” Udéfīdi nyɛ̄ɛ̄ le yɛ kú nū, anɔ́ɔ Usɔ́lu kē kwúcē le tá ɔlɛ́ á.