Read idoma 1 USÁMUWƐ̄LU 3 Bible Online

1 USÁMUWƐ̄LU 3 - idoma bible

1 USÁMUWƐ̄LU 3

¹Usámūwɛ̄lu yɔ̄ ī yúklɔ́ lɛ Óndú ā ɛháajɛ kú Ɛ́lāyi. Eko ɔ́ɔmā, olɛhɔ̄ ō ŋmá ɛga Óndú ā bū okónu kú ācomɛ́ɛbɛ gē ŋá nɛ̄hi. Ɔdā nɛ̄ ācɛ ī má ŋmá ɛgiyí Óndú ā, í yɔ̄ eko ɔ́ɔmā ŋ́.

²Amáŋ, otú éyi, Ɛ́lāyi nɛ̄ eyī kú nū gbɔɔ́ ō pū ɛ́ɛ́ mā, nɛ̄ ó kē mɛ́ɛbɛ lɔhi gɛ ŋ́ mā, gwutá ɛga éyi yɔ̄ í gbɔlā.

³Usámūwɛ̄lu gwutá ipú Áklɔ̄kpīihɔ kú Óndú ā, ɛga nɛ̄ ikpati kú okónu ōce kú Óndú ā yɔ̄ ā, ɔlá kú agege kú Óndú ā í nyí eko ɔ́ɔmā ɛ́ɛ́ ŋ́.

⁴Anɔ́ɔ Óndú ā le igwú hī ɔ̄ kahíníī, “Usámūwɛ̄lu, Usámūwɛ̄lu,” anɔ́ɔ ó tá ohi kahíníī, “Ami yɔ̄ á”

⁵Ó lɛ inya kwu ga ɛgiyí Ɛ́lāyi gaá da ɔ́ kahíníī, “Ami yɔ̄ á, awɔ hī um igwú á nɛɛ?” Amáŋ Ɛ́lāyi tá ɔ̄ ohi kahíníī, “Ń hī uwɔ igwú nóó, nyɔ̄ gaá gwutá kpɔ́.” Anɔ́ɔ Usámūwɛ̄lu nyɔ̄ gaá gwutá kpɔ́ á.

⁶Óndú ā klla le igwú hī ɔ̄ igbɔhá kpɔ́ kahíníī, “Usámūwɛ̄lu.” Anɔ́ɔ Usámūwɛ̄lu klla cāŋjɛ le tá ɛgiyí Ɛ́lāyi klla da ɔ́ kahíníī, “Ami yɔ̄ á, awɔ kē hī um igwú á.” Amáŋ ó da ɔ́ kahíníī, “Ń hī uwɔ igwú ní, ɔyí um. Nyɔ̄ gaá gwutá.”

⁷Usámūwɛ̄lu í jé ɔkɔ kú Óndú ā ɛ́ɛ́ ŋ́, ohígbū ka ó ma iyīnū fú lɛ ɔ́ jééjē ɛ́ɛ́ ŋ́.

⁸Óndú ā klla le Usámūwɛ̄lu hīgwú igbo ɔ́mɛtá. Anɔ́ɔ ó klla cāŋjɛ kpɔ́ le yɛ tá ɛgiyí Ɛ́lāyi gaá da ɔ́ kahíníī, “Ami yɔ̄ á, awɔ kē hī um igwú á.” Anɔ́ɔ Ɛ́lāyi le jé ka, Óndú ā ɔ́ɔ yɔ̄ í hī ɔyí ā igwú á.

⁹Ohígbū ɔ́ɔmā, Ɛ́lāyi da Usámūwɛ̄lu kahíníī, “Nyɔ̄ gaá gwutá, ɔ́dāŋ́ ka ó lɛ uwɔ hīgwú igbɔhá, da ɔ́ kahíníī, “Óndú um, kɛlā lɛ ɔ̄cocɛ̄hɔ̄ kú uwɔ mɛ́ɛnɛ, ó gē jāhɔ̄ ɛɛ́.” Anɔ́ɔ Usámūwɛ̄lu nyɔ̄ gāá gwutá ɛga ōgwutá kú nū ā kpɔ́ á.

¹⁰Óndú ā wā gaá háyi abɔ́ɔ gbɔɔ́ ō hī ɔ̄ igwú ɛ́gɛ́nɛ̄ ó tɛtɛ gē hī ɔ̄ igwú ā kahíníī, “Usámūwɛ̄lu, Usámūwɛ̄lu.” Anɔ́ɔ Usámūwɛ̄lu tá ohi kahíníī, “Kɛlā mɛ́ɛnɛ, ohígbū ka ɔ̄cocɛ̄hɔ̄ kú uwɔ gē jāhɔ̄ ɛɛ́.”

¹¹Anɔ́ɔ Óndú ā da Usámūwɛ̄lu kahíníī, “N gáā yá odée ipú ajɛ kú Ísrɛ̄lu nōo géē hɛ́ odúúdú ācɛ nēe í pó ā ohí nɛ̄hi.

¹²Ícíícɛ ɔ́ɔmā, n géē yá ɔdā dóódu nɛ̄ n ka lɛyíkwu ipɔ́ɔnū kú Ɛ́lāyi ā jīla, ŋmá aflɛ́yí ga ámōmɛ kú nū.

¹³N tɛtɛ da ɔ́ ka, n géē yá ipíinu kú ɔlɛ́ nū italā piyóó, ohígbū ka ayí nū le um iyē bīya. Ɛ́lāyi kē jé, amáŋ ó kē cɔ̄nū dɛ̄gba tū uwā ŋ́.

¹⁴Ohígbū ɛ̄nyā ā, n kwú ɔkpá ú ce īyī um ɛɛ́, ka ó lɛ ɛdɔ ɛya dúúmā nɛ̄ ipɔ́ɔnū kú ɔlɛ́ Ɛ́lāyi í gwó gā um ámāŋ ka ɛ̄gbā dúúmā nēé í gbā um, nōo lɔfú ci um ō yá uwā italā ŋ́.”

¹⁵Usámūwɛ̄lu má gwutá gbɔ́ɔ̄cī. Ó cāŋjɛ ɔ̄cɔ̄ɔ̄cí, le ɔwɛ kú Áklɔ̄kpīihɔ kú Óndú ā nwūla. Ó yɔ̄ ī yúufi ō ka ɛbɛ nɛ̄ ó má ā lɛ Ɛ́lāyi.

¹⁶Amáŋ, Ɛ́lāyi, le Usámūwɛ̄lu hīgwú, anɔ́ɔ ó da ɔ́ ka anúɔ yɔ̄ á.

¹⁷Ɛ́lāyi da ɔ́ kahíníī, “Ɔdí nɛ̄ Óndú ā da uwɔ ā? Ā je ɔdā dúúmā kú nū tayínū ŋmá ɛgiyī um ŋ́. Óndú ā géē yá uwɔ italā nɛ̄hi ɔ́dāŋ́ ka á ka odúúdú ɔdā nɛ̄ ó da uwɔ ā gā um ŋ́.”

¹⁸Anɔ́ɔ Usámūwɛ̄lu lɛ odúúdú ɛlā nɛ̄ Óndú ā ka lɛ ɔ́ kpɛ́mm ā kpó ka lɛ Ɛ́lāyi á. Ó je ɔdā dúúmā tayínū ŋmá ɛgiyí nū ŋ́. Anɔ́ɔ Ɛ́lāyi tóohi kahíníī, “Anú wɛ Óndú á, kóō yá ɔda dúúmā nōo lɔhi tū ɔ̄ ā mɛ́ɛnɛ.”

¹⁹Abɔ̄ Usámūwɛ̄lu yɔ̄ ī jɛ̄ ā, Óndú ā yɔ̄ mla anú. Ó klla le yá kú ɛlā dóódu nɛ̄ Usámūwɛ̄lu ka ā, kóō le yá jīla.

²⁰Anɔ́ɔ odúúdú ācɛ kú Ísrɛ̄lu, oŋmɛ́yí kú éwo kú uwā éyi ga ɔhá, le jé ka Usámūwɛ̄lu ɔ́ɔ wɛ ɔ̄comɛ́ɛbɛ á.

²¹Óndú ā yɔ̄ ī ma iyī nū fú Ussílo kpɔ́, ó klla kē yɔ̄ ī kɛlā lɛ Usámūwɛ̄lu ā kpɔ́, ɛga nɛ̄ ó má ɔ̄ klla kɛlā lɛ ɔ́ ā. Eko dúú nɛ̄ Usámūwɛ̄lu le ɛlā ka, ācɛ kú Ísrɛ̄lu kē ī pó.