Read igala 1 Iko Iko E̩wñ 12 Bible Online

1 Iko Iko E̩wñ 12 - igala bible

1 Iko Iko E̩wñ 12

¹Oñ abo-i chʼabo ku ma wʼugbo Defid, Ziklag, abu kʼi fʼo̩la-wñ dahi tʼo̩mo̩ todu So̩l, o̩ma Kish; ma la jʼef amagbiti-wñ, ku ma gbutu-wñ ef ogu le̩.

²Amato̩fa ma che, ma la neke nʼo̩wo̩ awo̩to̩ kpʼawohi gwʼunata, kpʼo̩fa eta kpo̩fo̩. Ma chʼabo Be̩njamin, amefu So̩l.

³Oji-ma chʼAhieze̩r, tak i che Joash, ma chʼamo̩ma She̩maa, e̩ne̩ Gibea, kpai Jizie̩l kpai Pile̩t amo̩ma Azmefe̩t, kpai Be̩reka kpai Jihiu, e̩ne̩ Anato̩t,

⁴kpai Ismaya, e̩ne̩ Gibe̩o̩n, kʼi chʼagbiti ef abo o̩gue̩gwa le̩, kʼa bo ogue̩gwa le̩ jʼef o̩wo̩-wñ, kpai Je̩re̩-maya kpai Jahezie̩l kpai Johanan, kpai Jo̩zabad, e̩ne̩ Ge̩dira;

⁵Iluzai kpai Je̩nmot kpai Bialaya kpai She̩maraya, kpai Sbe̩fataiya, e̩ne̩ Haruf,

⁶E̩lkana kpai Je̩saya kpai Azarie̩l kpai Joize̩r kpai Jo̩sho̩be̩am, abo Ko̩ra,

⁷kpai Joila kpai Ze̩badaya, amo̩ma Je̩roham e-Gedo̩r.

⁸Oñ abo Gad ku ma fʼo̩la-ma date̩ ñwu Defid ef akpolokuta ef aje̩tachi le̩ do̩mo̩, amagbiti ki nʼuwohi ma che, ma chʼaboke̩le̩ ku ma ko̩che̩ ogu, ku ma meju ikpako kpʼo̩kwo̩ ene̩ jogu; eju-ma la dab eju idu, ma le̩ dab amate̩ ku ma jʼoj uwo.

⁹Ize̩r chʼe̩ne̩ ejodudu, Obadaya chʼekeji, E̩liab chʼe̩ke̩ta,

¹⁰Mishmana chʼe̩ke̩le̩, Je̩re̩maya chʼe̩ke̩lu,

¹¹Ateai chʼe̩ke̩fa, Ilaie̩l chʼe̩kebie,

¹²Johanan chʼe̩ke̩jo̩, E̩lzebad chʼe̩ke̩la,

¹³Je̩re̩maya chʼe̩ke̩gwa, Makbanai chʼe̩ke̩gwaka.

¹⁴Amo̩ma Gad-i chʼabo ku ma dʼoji dufu ef abogu; e̩ne̩ ki nya efu ma bʼone̩ ogume̩lu jo̩, oñ e̩ne̩ ki tule bʼone̩ icham nyʼo̩gwo̩ko̩ jo̩.

¹⁵Abo le̩ chʼabo ku ma mu Jo̩rdan daba ochu ejodudu, e̩gba ki awobi lʼoj o̩gba-wñ; oñ ma fʼabo du ku ma jʼo̩go̩ o̩go̩ le̩ nʼule̩, rʼo̩wo̩ olodudu kpai rʼo̩wo̩ olane̩ ge̩.

¹⁶Amo̩ma Be̩njamin kpai Juda iche̩ka la wʼugbo akpolokuta le̩ ugbo Defid.

¹⁷Taku Defid dufu aledo ma, oñ i dohi ñwu ma kakini, Iche̩wñ ku me̩ nʼure̩do̩ wa ku me̩ te̩ko mi-i, mak e̩do̩-mi amanyu me̩; i muda chʼewa me̩ wa ku me̩ mʼumi du tʼef o̩wo̩ ame̩no̩la-mi abu kʼu ma nʼe̩wñ afuma du kʼomi nʼo̩wo̩-mi che n, O̩jo̩ e-amata-wa ki li, kʼi fʼuka nurʼume̩.

¹⁸Tak Afu lewa bʼo̩la Amesai kʼi chʼe̩ne̩ ki d oji dufu ef amagboji abo ogu le̩ ma, i kakini, Abo-we̩ a che, Defid, Ugbo e-we̩ oñ a de̩, uwe̩, o̩ma Je̩si: Ure̩do̩ ure̩do̩ ki chʼe-we̩, Ure̩do̩ ki la dʼugbo abo ku ma gbutu-we̩; Todu O̩jo̩-we̩ do̩mo̩ a te̩ko we̩. Taku Defid mʼuma gba, oñ i mʼuma ko chʼoji udala udala.

¹⁹Abo Manasa iche̩ka ño̩ chi o̩la-ma wʼugbo Defid, e̩gba kʼowñ kpʼabo Filistia kpe̩re̩ wa akogu bi So̩l le̩; ma muda gbutu ñwu ma n; todu abu kʼamodu abo Filistia fʼojuju o̩la le̩ nyi, ma je̩ ñwu Defid mudabi, ma kakini, I anʼoji-wa ñwa chʼef o̩wo̩ odu-wñ So̩l.

²⁰Abu kʼi dʼejo̩na alo tu Ziklag, abo Manasa ku ma ñwa chʼef o̩wo̩-wñ chʼAdna kpai Jo̩zabad kpai Je̩dieye̩l kpai Maike̩l kpai Jo̩zabad kpai E̩laihiu kpai Ziltai, amagboji one̩ icham nyʼo̩gwo̩ko̩ icham nyʼo̩gwo̩ko̩ e-abo Manasa.

²¹Oñ ma gbutu ñwu Defid ugbo amaja-kpa e̩wñ, todu o̩chaka-ma chʼamagbiti ku ma de̩ kpaka, ma la chʼamagboji agboji ef abogu le̩.

²²Amone̩ nawa bo̩ Defid o̩jo̩ñwa o̩jo̩ñwa ku ma te̩kʼo, gbogbo taku ma mud uru lile, dabe̩ne̩ kʼuru e-O̩jo̩.

²³Aluka oji one̩ ku ma mʼo̩logu wʼugbo Defid He̩bro̩n, ku ma mʼojane̩ So̩l gba ñw u, alu kʼo̩la Jihofa ka, de̩.

²⁴Abo Juda ku ma ne̩ ugbe̩yo̩ kpai o̩kwo̩ chʼicham nyʼo̩gwo̩ko̩ ugbo me̩fa nyʼicham oka oji.

²⁵Abo Simeo̩n chʼamagbiti ku ma nʼuwohi icham nyʼo̩gwo̩ko̩ ugbo mebie, nyʼogume̩lu oji.

²⁶Abo Lifai chʼicham nyʼo̩gwo̩ko̩ me̩le̩ nyʼulo̩gwa.

²⁷Je̩ho̩yada la chʼe̩nuto̩gba abo Aro̩n, oñ one̩ icham nyʼo̩gwo̩ko̩ ugbo me̩ta nyʼogume̩lu chʼicham oji jugbo-wñ.

²⁸Kpai Zado̩k kʼi chʼokolobia kʼi chʼagbiti kʼi nʼuwohi manyʼamagboji abogu ogu nyoke meji kwʼunyi ata-wñ.

²⁹Abo Be̩nja-min, efu So̩l le̩, chʼone̩ icham nyʼo̩gwo̩ko̩ ugbo me̩ta todu ojile-ma te̩tatʼabo unyi So̩l ubi akwoubi.

³⁰Abo Ifraim chʼicham nyʼo̩gwo̩ko̩ ugbo ogu nyʼicham oka oji, amagbiti ku ma nʼuwohi, ku ma chʼame̩n uwohi ef unyi amata-ma.

³¹Abo ku ma kwʼef ukpe̩reji abo o̩lo̩pu Manasa le̩ chʼicham nyʼo̩gwo̩ko̩ ugbo me̩gwe̩jo, ku ma chi ma odu odu ku ma ko, ku ma wa du Defid jʼonu.

³²Abo Isakar ku ma ma iko iko-wñ ku ma ma alu ki dukpe̩ kʼabo Israe̩l ache, abo ku ma dʼoji dufu ef uma chʼo̩gwo̩ko̩; amo̩maye-ma du agbʼo̩la-ma gbo̩.

³³Abo Ze̩biulo̩n ku ma dufu ef abogu kʼo̩la-ma che̩mu jo̩ ñw ogu kʼido̩na ogu ojoji du jʼef o̩wo̩-ma chʼicham nyʼo̩gwo̩ko̩ ugbo ooje. E̩do̩-ma la chʼokate abu ma tala jo̩.

³⁴Abo Naftali chʼamagboji icham nyʼo̩gwo̩ko̩, oñ abo ku ma nʼugbe̩yo̩ kpai o̩kwo̩ manyʼuma o̩la chʼicham nyʼo̩gwo̩ko̩ ugbo ogue̩gwa nyoke mebie.

³⁵Abo Dan kʼo̩la-ma che̩mu ogu chʼicham nyʼo̩gwo̩ko̩ ugbo ogu nyoke me̩jo̩ nyʼulo̩gwa.

³⁶Abo Ashe̩r ku ma chʼo̩ka ogu eja ku ma tala jo̩ ef abogu chʼicham nyʼo̩gwo̩ko̩ ugbo o̩gbo̩ meji.

³⁷Abo Rube̩n kpai abo Gad kpai ukpe̩reji o̩lo̩pu abo Manasa kʼo̩la-ma che̩mu ñw ogu ku ma kwʼudaba Jo̩rdan wa chʼicham nyʼo̩gwo̩ko̩ ugbo o̩gbo̩ me̩fa.

³⁸Abogu-i chaka ku ma tala jo̩ udala udala, e̩do̩-ma chʼofoo oñ ma lewa He̩bro̩n ku ma du Defid jʼonu abo Israe̩l chaka; abe̩le̩ e̩do̩ abo Israe̩l du ki bo̩ ño̩ chʼokate ku ma du Defid jʼonu ge̩.

³⁹Ma jʼugbo Defid o̩mo̩ aje̩ añmo̩ gbogbo o̩jo̩ me̩ta, todu amo̩maye-ma fʼo̩la mu tane̩ todu ma.

⁴⁰Abo ku ma me̩ru ma o̩mo̩ gbogbo nyʼIsakar kpai Ze̩biulo̩n kpai Naftali kʼuje̩wñ nʼubi amo̩ke̩ke̩te̩ kpai aminyakulumi kpai amimiulu kpai amokuno̩ wa; omu e̩wñ e̩yo̩ kpai e̩ro o̩gbaikolo ki gbe̩ mʼomune̩ kpai acha acha achiwebe̩te̩ma e̩gbe̩ kpai omi achiwebe̩te̩ma, kpai amokuno̩ kpai ame̩wño̩re̩ egini tabale, todu uyo̩ de̩ Israe̩l me̩.