Read igala 1 Iko Iko E̩wñ 15 Bible Online

1 Iko Iko E̩wñ 15 - igala bible

1 Iko Iko E̩wñ 15

¹Tak i fʼunyi unyi ko̩ ñw o̩la-wñ ef ewo Defid; oñ i ñwʼuña che tod akpati O̩jo̩, i la fʼunyabo fa ñw u.

²Taku Defid kakini, I dukpe̩ kʼene̩ du ki ne̩ akpati O̩jo̩ tʼabo Lifai le n; todu ama chʼabo ki Jihofa chi ma ku ma ne̩ akpati O̩jo̩, ku ma lañʼache̩ e̩wñ ñw u o̩gbe̩gbe̩le̩.

³Taku Defid kʼabo Israe̩l du wa jeju Je̩rusale̩m, ku ma dʼakpati Jihofa te̩gu wa uña-wñ e-kʼi ñwo̩che tane̩ ñw u.

⁴Defid la kʼamo̩ma Aro̩n kpai abo Lifai wa jʼugbokate.

⁵Abo ku ma chʼamo̩ma Kohat che, Urie̩l chʼagboji-ma, kpʼamo̩maye-wñ ku ma chʼone̩ o̩gbo̩ me̩fa;

⁶e-amo̩ma Me̩rari, Asaya chʼagboji-ma, oñ amo̩maye-wñ chʼo̩gwo̩ko̩ nyʼo̩gbo̩lo̩;

⁷e-amo̩ma Ge̩rsho̩m, Joe̩l chʼagboji-ma, amo̩maye-wñ la chʼo̩gbo̩ me̩fa nyoke me̩gwa;

⁸e-amo̩ma Ilaizefan, She̩maya chagboji-ma, amo̩maye-wñ la chʼo̩gwo̩ko̩;

⁹e-amo̩ma He̩bro̩n, Ilaie̩l chʼagboji-ma, amo̩maye-wñ la chʼo̩gbo̩ me̩le̩;

¹⁰e-amo̩ma Uzie̩l, Aminadab chʼagboji-ma, oñ amo̩maye-wñ chʼogu me̩lu nyoke me̩gweji.

¹¹Taku Defid fu Zedo̩k kpʼAbayata amatama do̩ wa, kpʼabo Lifai, owñ che Urie̩l kpai Asaya kpai Joe̩l kpai She̩maya kpai Ilaie̩l kpʼAminadab,

¹²oñ i ka ñwu ma kakini, A me̩ chʼabo ku ma dʼoji dufu ef amata abo Lifai: me̩ chʼo̩la-me̩ ku me̩ fo̩, tʼame̩ tʼamo̩maye-me̩, kʼame̩ ki dʼakpati Jihofa O̩jo̩ e-Israe̩l, wʼugbo kʼu ñwo̩che te̩ ñw u.

¹³Todabu ki ma chʼame̩ nʼe̩ e̩gba ejodudu le̩ n, Jihofa, O̩jo̩-wa, muke̩che̩ bʼuwa ma, todu a tene ugbo-wñ, alu kʼoji ajo̩ ka kʼa che n.

¹⁴Abe̩le̩ amatama kpʼabo Lifai chʼo̩la-ma ku ma fo̩ ku ma dʼakpati Jihofa, O̩jo̩ e-Israe̩l le̩, te̩gu wa.

¹⁵Tak amo̩ma Lifai mʼugbo̩lo̩ oli kʼakpati O̩jo̩ lo̩ko̩li o̩la-wñ du nʼika-ma alu ku Mose̩s ñwa ñwu ma teju o̩la ki Jihofa ka le̩.

¹⁶Taku Defid ko̩la ñw agboji abo Lifai ku ma kʼamo̩maye-ma ku ma keli dago jo̩, kʼe̩wñ iya ki jʼo̩wo̩-ma, kʼubo̩ kpʼumolo kpʼeicha ki ka dufu, ku ma chʼomu uyo̩ taa!

¹⁷Oñ abo Lifai chi Himan, o̩ma Joe̩l; ma chi Esaf o̩ma Be̩rakaya, kwef amo̩maye-wñ; oñ ma chi Etau, o̩ma Kushaya, kwef amo̩maye-ma ku ma chʼamo̩ma Me̩rari;

¹⁸ma laño̩ chi amo̩maye-ma ku ma chʼo̩gba ekeji ku ma de alo̩na; ama che Ze̩karaya, Be̩n kpai Jeezie̩l, She̩maira-mo̩t kpai Je̩haie̩l kpai Unai, E̩liab kpai Be̩naya kpai Maaseya kpai Matitaya kpai Ilife̩li kpai Mikneya kpai Obe̩d-ido̩m kpai Jeaye̩l.

¹⁹Abe̩le̩ amakeli Himan kpai Esaf kpai Itan jo̩ kpai oke ki chʼebijeikpa ku ma nu gogogogo,

²⁰kpai Ze̩karaya kpai Ezie̩l kpai She̩mairamo̩t kpai Jehaie̩l kpai Unai kpai E̩liab kpai Maaseya kpai Be̩naya kpai ubo̩ ku ma nu uko̩la Alamot;

²¹kpai Matataiya kpai Ilife̩li kpai Mikneya kpai Obe̩d-ido̩m kpai Jeaye̩l kpai Azazaya, umolo-ma la chʼuko̩la She̩minit ku ma tʼo̩gba eli.

²²Oñ Ke̩nanaya ki chʼagboji abo Lifai chʼutodu eli; i ko̩ ma eli edu kwane̩, todu kʼi chʼo̩ka-wñ.

²³Be̩rakaya kpai E̩lke̩na chʼamade alo̩na todu akpati le̩.

²⁴Oñ She̩banaya kpai Jiho̩shafat kpai Ne̩tane̩l kpai Amesai kpai Ze̩karaya kpai Be̩naya kpai E̩lieza, amatama le̩, nʼo̩kakachi afa o̩gba akpati O̩jo̩; oñ Obe̩d-ido̩m kpai Je̩haya chʼamadʼalo̩na tod akpati le̩.

²⁵Abe̩le̩ Defid kpʼabogijo Israe̩l kpʼamagboji one̩ icham nyʼo̩gwo̩ko̩, icham nyʼo̩gwo̩ko̩, nyʼadʼakpati alo Jihofa kwef unyi Obe̩d-ido̩m te̩gu wa kpʼuyo̩.

²⁶Oñ i lewatu e̩gba kʼO̩jo̩ te̩ko abo Lifai ku ma nʼakpati alo Jihofa, tak ama mʼamo̩kokuno̩ mebie kpʼamokolo mebie ko chʼiche̩bo̩.

²⁷Defid la nyi otogbo ku ma nʼukpo line̩n ku ma hi reju ga manyʼabo Lifai ku ma nʼakpati le̩ chaka kpʼamakeli kpai Ke̩nanaya kʼi chʼagboji kʼi adʼeli kpʼamakeli; Defid la nʼe̩fo̩d line̩n efufu o̩la.

²⁸Abe̩le̩ oñ abo Israe̩l du dʼakpati alo Jihofa te̩gu wa kpʼoga echi, kpʼuko̩la bijila, kpʼo̩kakachi, kpʼoke, ma la nu ubo̩ kpʼumolo kʼamone̩ agbo̩.

²⁹Oñ i lewatu, abu kʼakpati alo Jihofa lewa ewo Defid, Maikal, o̩ma So̩l le̩, nyʼope go, oñ i li abu ku Defid, ki chʼonu, do̩mo̩ atido, kʼi achiya, oñ i chʼe̩de̩te̩-wñ ef e̩do̩-wñ.