Read igala 2 Iko Iko E̩wn 35 Bible Online

2 Iko Iko E̩wn 35 - igala bible

2 Iko Iko E̩wn 35

¹Taku Josaya fʼElaloji de ñwu Jihofa Je̩rusale̩m; ma la fʼe̩wñ Elaloji le̩ kpa o̩jo̩ e̩ke̩gwe̩le̩ ochu ejodudu.

²Tak i hi amatama jo̩ ugugu ugugu e-ma, oñ i dʼugbe̩do̩ ñwu ma ku ma che e̩wñ-ma ef unyi Jihofa.

³Tak i ka ñw abo Lifai ku ma fo̩ todu Jihofa ku ma la ko abo Israe̩l e̩wñ kakini, Dʼakpati alo kiafo̩ le̩ tef unyi ki So̩lo̩mo̩n, o̩ma Defid kʼi chʼonu Israe̩l ko̩ le̩; i dʼugbo kʼume̩ ne̩ ika ge̩ n. Fa-i ame̩ ki re̩ Jihofa, O̩jo̩-me̩, kpʼabo-wñ Israe̩l.

⁴Me̩ ki la fʼo̩la-me̩ ñwo̩che jo̩ ukpe̩ru ukpe̩ru teju alu kʼunyi unyi amata-me̩ de̩, alu ku Defid onu Israe̩l kpai So̩lo̩mo̩n o̩ma-wñ ko̩ nyʼo̩takada.

⁵Taku me̩ kwodago jʼef uña kiafo̩ le̩ alu kʼuche̩ uche̩ unyi unyi amata todu amo̩maye ku ma chʼamo̩ma amone̩-i de̩, teju alu kʼakwo̩ra unyi akwo̩ra unyi abo Lifai chʼe̩kpe̩ru jo̩.

⁶Taku me̩ fʼElaloji kpa, ku me̩ fʼo̩la-me̩ che ku me̩ fo̩, oñ me̩ fʼu ñwo̩che jo̩ todu amo̩maye-me̩ ku ma ki che teju o̩la Jihofa kʼi lʼo̩wo̩ Mose̩s wa.

⁷Taku Josaya kʼame̩wño̩re̩ egini owñ chʼamo̩mala kpai amo̩mewo wa ne ate̩ tod amo̩ma amone̩ le̩, o̩chaka-wñ chʼutodu e̩wñ iche̩bo̩ Elaloji, tod abo du kʼeju mu dane̩ o̩mo̩; aluka-wñ che icham nyʼo̩gwo̩ko ogue̩gwa, manyʼamo̩kokuno̩ icham nyʼo̩gwo̩ko̩ me̩ta: e̩wñ-i kwef e̩wñ kʼonu ne̩.

⁸Tak amagboji-wñ gʼe̩do̩la-ma kʼe̩wñ nyʼate̩ jo̩ tod amone̩ kpʼamatama kpʼabo Lifai. Hilkaya kpai Ze̩karaya kpai Jehaye̩l, ku ma chʼame̩nuto̩gba unyi O̩jo̩, mʼame̩wño̩re̩ icham nyʼo̩gwo̩ko̩ meji nyʼulo̩gwa kpʼo̩kokuno̩ oli me̩fa ko ñw amatama ku ma kowa che Elaloji.

⁹Ko̩nanaya ge̩ kpai She̩maya kpai Ne̩tane̩l amo̩maye-wñ kpai Hashabaya kpai Jiaye̩l kpai Jo̩zabad, agboji abo Lifai, kʼame̩wño̩re̩ icham nyʼo̩gwo̩ko̩ me̩lu, kpʼamo̩kokuno̩ oli me̩gwa ñw abo Lifai ku ma ko wa che Elaloji.

¹⁰Abe̩le̩ ma fʼe̩wñ uko̩lo̩-wñ ñwo̩che jo̩, amatama la dago jʼuña e-ma, kpai uche̩ uche̩ abo Lifai, alu kʼonu tʼuko̩ ñwu ma le̩.

¹¹Taku ma fʼElaloji le̩ kpa, oñ amatama nʼe̩bie̩ ku ma gba kwʼo̩wo̩-ma tafio̩, oñ abo Lifai fʼe̩la-wñ kpanya jo.

¹²Taku ma kʼe̩wñ iche̩bo̩ e̩gujo jʼo̩wo̩ʼka kʼama ki ko ñw uche̩ uche̩ unyi unyi amata-ma amo̩ma amone̩ le̩, kʼama ki ko wa ñwu Jihofa alu ku ma ko̩ nyʼo̩takada Mose̩s le̩. Abe̩le̩ ma ño̩ che kpʼamo̩kokuno̩ le̩ ge̩.

¹³Taku ma nʼuna fʼe̩la Elaloji le̩ ro̩ alu kʼo̩da-wñ de̩; oñ e̩wñ ki bo̩ ki afo̩ ku ma ko wa le̩ ma fu hi ef ucha, kpʼef ucha o̩go̩ kpʼef e̩wñ omune̩ ku ma du gʼuna, taku ma hika ko nyʼugbo amo̩ma amone̩ le̩ chaka.

¹⁴Ubi le̩ taku ma fʼe̩wñ ñwo̩che ñw o̩la-ma kpai todu amatama, todabu kʼo̩wo̩ amatama, amo̩ma Aro̩n le̩, jʼef e̩wñ iche̩bo̩ e̩gujo kpʼula-wñ ekowa che gbogbo dʼo̩jo̩: todule̩ oñ abo Lifai ñwo̩che ñw o̩la-ma kpai todu amatama ku ma chʼamo̩ma Aro̩n.

¹⁵Oñ amakeli, amo̩ma Esaf le̩, jʼuña e-ma alu ku Defid kpai Esaf kpai Heman kpai Jedutun, agane̩ onu le̩ fʼuko̩-wñ te̩; amadʼalo̩na la jʼalaku alaku okoke du; i nʼugbo ku ma kwo bʼoj uko̩lo-ma te̩ n todu amo̩maye-ma, abo Lifai, fʼu ñwo̩che ñwu ma.

¹⁶Abe̩le̩ ma fʼe̩wñ uko̩lo̩ unyi Jihofa ñwo̩che jo̩ o̩jo̩ le̩ gbage̩de̩, kʼama ki fʼElaloji de ku ma ño̩ kʼe̩wñ iche̩bo̩ e̩gujo wa che oj ubo̩ iche̩bo̩ Jihofa alu ku Josaya, onu fʼuko̩-wñ te̩.

¹⁷Oñ amo̩ma Israe̩l kʼeju-ma dʼane̩ o̩mo̩, fʼElaioji kpʼuje̩wñ uyo̩ akala kʼo̩jo̩wu ma do̩ n de iko le̩ gbogbo nyʼo̩jo̩mebie.

¹⁸Akwe̩gba Samiue̩l akache̩ le̩, ma de Elaloji e̩go̩-wñ ane̩ Israe̩l-i n. I nʼamonu Israe̩l du ku ma de Elaloji alu ku Josaya kpʼamatama kpʼabo Lifai kpʼabo Juda chaka kpʼabo Israe̩l du kʼeju-ma dʼane̩ kpʼabo ku ma dodo Je̩rusale̩m chaka de le̩ n.

¹⁹Ma fʼElaloji-i de o̩do̩ e̩ke̩gwe̩jo̩ ku Josaya jʼonu.

²⁰Anubi e̩wñ-i du abu ku Josaya fʼunyi O̩jo̩ ñwo̩che jo̩, Niko, onu Ijipti, mute̩gu wa kʼi kʼogu bo̩ Karkemish, kʼi dʼo̩la Yufretis le̩: taku Josaya le dufu kʼi kobʼo.

²¹Niko muda fʼonuche̩ kpe̩rʼu kakini, E̩wñ chʼe-mi kpʼuwe̩? Uwe̩ onu Juda? I chʼuwe̩ omi wa kobʼo eñini-i n; chai abo unyi kʼomi kpʼama nʼuja; O̩jo̩ la ñwa ñwu mi kʼu hika che. We ekobʼO̩jo̩ kʼi dʼugbo-mi-i, kʼi we ekpʼuwe̩ bie̩.

²²I chaka dʼabe̩le̩ Josaya ko̩ erejuda bʼo̩ te̩, i muda fʼafe̩ kpalu todu kʼi bʼo̩ ja; i la netiru o̩la ku Niko ka kwʼalu O̩jo̩ le̩ n, oñ i wa ja ef o̩go̩ Me̩gido.

²³Oñ amato̩fa tʼo̩fa ñwu Josaya onu; tak onu ka ñwu abuko̩lo̩-wñ kakini, Mʼumi du kwʼemi alo todu agbe̩ ku ma che mi che bie̩ne̩.

²⁴Abe̩le̩ abuko̩lo̩-wñ mʼu du kwef okogu le̩ oñ ma mʼu du tef o̩kogu ekeji kʼi ne̩, taku ma mʼu du wa Je̩rusale̩m; i la leku, oñ ma mʼu du ji ef ojinoji amata-wñ. Tak abo Juda kpʼabo Je̩rusale̩m chaka kwodaido̩ Josaya.

²⁵Oñ Je̩re̩maya dinaku Josaya; oñ amakeli du tʼaboke̩le̩ tʼabobule̩ nʼo̩la Josaya aka ef inaku ku ma da gbogbo tʼo̩jo̩ oluñini; taku ma dʼo̩da-wñ te̩ ñw o̩la-ma Israe̩l. E̩ la go, i che̩ko̩ rʼef o̩la Edinaku le̩.

²⁶Oñ e̩wñ ki bo̩ ki Josaya che, kpʼe̩wñ e̩nyo̩ kʼi che teju e̩wñ ku ma ko̩ ef uko̩-o̩la Jihofa,

²⁷oñ e̩wñ kʼi che, tʼe-ejodudu tʼe-otitala, go, inabali-wñ che̩ko̩ rʼef o̩takada amonu Israe̩l kpai Juda.