Read igala Akwodufu 39 Bible Online

Akwodufu 39 - igala bible

Akwodufu 39

¹Oñ ma mʼodufa kpai odufa ekpikpa kpai ekpikpa le̩ ko ga e̩wñ o̩la ku ma nyi ache e̩wñ ef uña kiafo̩; ma fʼe̩wñ o̩la kiafo̩ ga todu Aro̩n; alu ki Jihofa ñwa ñwu Mose̩s.

²Tak i nʼo̩jamalia kpai odufa kpai odufa ekpikpa kpai ekpikpa kpai line̩n ku ma hi reju kʼowu-wñ chʼe̩da bie̩ che e̩fo̩d le̩.

³Ma la fʼo̩jamalia gwu pe̩te̩ke̩ oñ ma fʼu kpana mie̩le̩ mie̩le̩ ku ma du chiya o̩ka o̩ka nyʼodufa kpai odufa ekpikpa kpai ekpikpa kpai line̩n ku ma hi reju le̩.

⁴Ma fʼe̩wñ ojika-wñ che ku ma du gamʼo̩; eti-wñ meji chegamʼo̩.

⁵Ma nʼo̩jamalia kpai odufa kpai odufa ekpikpa kpai ekpikpa kpai line̩n ku ma hi reju kʼowu-wñ chʼe̩da bie̩ che e̩wñ ujiñmi e̩fo̩d ki dʼo̩la-wñ ku ma ne̩ damu mʼo̩, kʼi chʼalukate kpai owñ, uko̩lo̩-wñ chʼokate; alu ki Jihofa ñwa ñwu Mose̩s.

⁶Taku ma fʼuko̩lo̩ okuta one̩ks le̩ che, ma fʼo̩jamalia da nyʼu, oñ ma fʼina ko̩ nyʼu alu ku ma kʼma nyʼe̩wñ uhiuko̩, alu kʼodu amo̩ma e̩ne̩ke̩le̩ Israe̩l de̩.

⁷Tak i fʼu gamo̩ ukpo o̩j ika e-e̩fo̩d le̩, ki che okuta urewa todu amo̩ma Israe̩l; alu ki Jihofa ñwa ñwu Mose̩s.

⁸Tak i fʼe̩wñ ube̩do̩ma che, uko̩lo̩-wñ chʼuko̩lo̩ o̩ka alu kʼuko̩lo̩ e̩fo̩d le̩ de̩; i chʼo̩jamalia kpai odufa kpai odufa ekpikpa kpai ekpikpa kpai line̩n ku ma hi reju kʼowu-wñ chʼe̩da bie̩.

⁹Ago̩go̩-wñ me̩le̩ chʼokujo̩; ma fʼe̩wñ ube̩do̩ma le̩ che kʼi chʼeji nʼe̩do̩ o̩la-wñ, ujiji-wñ chʼo̩chali o̩wo̩ʼka, unabe̩-wñ la chʼo̩chali o̩wo̩ʼka, e̩ji nʼe̩do̩ omune̩.

¹⁰Oñ ma fʼokuta ganyʼu o̩gba o̩gba ugbo me̩le̩. O̩gbaʼka-wñ che sardius kpai topaz kpai karbunke̩l e-le̩ chʼo̩gba ejodudu;

¹¹o̩gba ekeji la che e̩me̩rald kpai safaya kpai daimo̩nd;

¹²o̩gba e̩ke̩ta la che jesint kpai age̩t kpai ame̩tist;

¹³o̩gba e̩ke̩le̩ la che be̩re̩l kpai one̩ks kpai jaspe̩r; ma fʼo̩jamalia danyʼokuta ugbo ki jo̩ le̩.

¹⁴Okuta le̩ la jo̩ alu kʼodu odu amo̩ma Israe̩l de̩, e̩gwe̩ji i che, alu kʼodu-ma de̩; i chʼe̩ko̩ nyʼu dab e̩wñ uhiuko̩, e̩ne̩ne̩ne̩ne̩ dʼalu kʼodu-wñ de̩, todu o̩lo̩pu me̩gweji le̩.

¹⁵Taku ma fʼiyagba che tʼo̩la e̩wñ ube̩do̩ma le̩ dabe̩ne̩ kʼiku, uko̩lo̩-wñ chʼo̩jamalia hiolo ku ma fuba;

¹⁶oñ ma nʼo̩jamalia chʼagbamune̩-wñ meji kpai elika o̩jamalia meji, taku ma fʼelika meji le̩ gamo̩ akolo e̩wñ ube̩do̩ma le̩ meji.

¹⁷Taku ma mʼiyagba o̩jamalia meji ku ma ba le̩ ko tunyʼelika meji ki jʼeti e̩wñ ube̩do̩ma le̩.

¹⁸Ma la kʼoji iyagba ku ma ba meji ki bo̩ jane̩ tunyʼagbamune̩ meji le̩; abe̩le̩ ma fʼu gamo̩ ukpo oj ika e̩fo̩d le̩, e̩j o̩gba-wñ.

¹⁹Taku ma fʼelika o̩jamalia meji da, oñ ma fʼu gamo̩ iba e̩wñ ube̩do̩ma le̩ mejeji, eli-wñ kʼi me̩ru e̩fo̩d ejefu oñ ma du ne.

²⁰Ma la fʼelika o̩jamalia meji da, oñ ma fʼu gamo̩ o̩wo̩ o̩gane̩ ukpo ojika e̩fo̩d le̩ ejefu-wñ, e̩jo̩gba-wñ me̩ru ugbo ku ma ko gbako omune̩ ate̩ ñw e̩wñ ujiñmi e-e̩fo̩d le̩.

²¹Taku ma mʼo̩jaja odufa ko tunyʼelika e̩wñ ube̩do̩ma kpai elika e-e̩fo̩d ku ma fuji mʼomune̩, todu ki nʼoji e̩wñ ujiñmi e-e̩fo̩d le̩ kʼe̩wñ ube̩do̩ma le̩ ki we etachi bʼe̩fo̩d te̩; alu ki Jihofa ñwa ñwu Mose̩s.

²²I laño̩ fʼotogbo e̩fo̩d le̩ hi, o̩chaka-wñ chʼodufa;

²³e̩gudu alumeji otogbo le̩ dʼalu ku ma dʼo̩fa adika ogu; ma fʼe̩gba du nʼalu e̩gudu-wñ daka, kʼi we efana.

²⁴Taku ma ne̩ odufa kpai odufa ekpikpa kpai ekpikpa kpai ukpo line̩n kʼowu-wñ chʼe̩da bie̩ ga mʼeti otogbo le̩ dab e̩ro oli ku ma do̩ ko̩ po̩me̩grane̩t.

²⁵Ma laño̩ ne̩ o̩jamalia hiolo da ilo ilo, oñ ma mʼilo le̩ ko tunyʼagbagba po̩me̩grane̩t le̩ lʼe̩re̩ otogbo le̩ daka kʼi kpe̩gwa nyu po̩me̩grane̩t le̩;

²⁶ilo kpai po̩me̩grane̩t, ilo kpai po̩me̩grane̩t nʼeti e̩re̩ otogbo le̩ daka, ku ma nyi ache e̩wñ-ma; alu ki Jihofa ñwa ñwu Mose̩s.

²⁷Oñ ma nʼukpo line̩n ki chʼe̩hi reju gʼafe̩ todu Aro̩n, kpai amo̩ma-wñ,

²⁸alawoni-wñ laño̩ che ukpo line̩n ki chʼe̩hi reju, o̩tajia ki fe̩rʼeju ño̩ che ukpo line̩n ki chʼe̩hi reju, ichaka-wñ che line̩n efufu ku ma hi reju ku ma dʼowu-wñ bie̩.

²⁹E̩wñ ujiñmi-wñ la che line̩n ku ma hi reju kʼowu-wñ chʼeda bie̩ kpai odufa kpai odufa ekpikpa kpai ekpikpa, uko̩lo̩ e̩ne̩ kʼi achiya nyʼukpo jʼo̩la-wñ; alu ki Jihofa ñwa ñwu Mose̩s.

³⁰Oñ ma fʼo̩jamalia hiolo gwu pe̩te̩ke̩ todu ike̩be̩ kiafo̩ le̩, ma la fʼolubutu ko̩ nyʼu alu ku ma kina nyʼe̩wñ uhiuko̩ kakini, EFO̩ ÑWU JIHOFA.

³¹Taku ma fʼowu odufa daku nyʼu ku ma dʼu ji manyʼala-woni ate̩-wñ; alu ki Jihofa ñwa ñwu Mose̩s.

³²Abe̩le̩ ma fʼuko̩lo̩ uña ugugu e-unyabo ujeju le̩ che kpa; amo̩ma Israe̩l la fʼu che teju alu du ki Jihofa ñwa ñwu Mose̩s; abe̩le̩ ma che.

³³Taku ma mʼuña ugugu le̩ ko wʼugbo Mose̩s, unyabo kpai ane̩-wñ du kpai atanyi-wñ kpai akatakpo-wñ kpai oli ugbo̩lo̩-wñ kpai oli urane̩-wñ kpai o̩ka-wñ;

³⁴kpai año̩ okolo ku ma hi ekpikpa ku ma ko bʼoji-wñ ate̩ ma, kpai año̩ e̩la omi ku ma ko bʼoji e-le̩ ma, kpai ukpo ugbeju;

³⁵kpai akpati ibenu le̩ manyʼoli ugbo̩lo̩-wñ, kpai ugugu unye̩do̩;

³⁶itebulu-wñ kpai e̩wñ eku-wñ chaka kpai akala e-eju le̩,

³⁷akete ku ma nʼo̩jamalia hiolo che kpai agege-wñ, kʼagege-wñ tala jʼoji-wñ aro̩ne aro̩ne kpai e̩wñ eku-wñ chaka, kpai ekpo todu ugane̩;

³⁸kpai ubo̩ iche̩bo̩ e-o̩jamalia kpai ekpo ku ma du batʼo̩la kpai otulale ku ma gujo ki akpo kpai ukpo uro̩na tod alo̩na unyabo le̩;

³⁹ubo̩ iche̩bo̩ e-ebijeikpa kpai ebijeikpa kpataka ki che̩gudu e̩gudu kʼi dʼefu-wñ, oli ugbo̩lo̩-wñ kpai e̩wñ eku-wñ chaka; ukpachi ugwo̩-wo̩ kpai e̩wñ ugugu-wñ;

⁴⁰ukpo ku ma du bʼologbo oli urane̩-wñ kpai o̩ka-wñ kpai ukpo uro̩na alu ologbo le̩, iku-wñ kpai ale-wñ; kpai e̩wñ eku chaka ku ma ne̩ che e̩wñ ef uña ugugu, owñ chʼutod unyabo ujeju le̩:

⁴¹e̩wñ o̩la ku ma hi ku ma nyi ache e̩wñ ef uña kiafo̩, kpai afe̩ kiafo̩ todu Aro̩n atama le̩, kpai afe̩ todu amo̩ma-wñ, ku ma ne̩ che e̩wñ amatama.

⁴²Likpa alu du ki Jihofa ñwa ñwu Mose̩s, alu le̩ amo̩ma Israe̩l fʼuko̩lo̩-wñ che chaka.

⁴³Taku Mose̩s fʼuko̩lo̩ le̩ li chaka, me̩ la go, ma fʼu che me̩; alu ki Jihofa ñwa ñwu ma abe̩le̩ ma fu che. Taku Mose̩s kadua ñwu ma.