Read igala Akwodufu 6 Bible Online

Akwodufu 6 - igala bible

Akwodufu 6

¹Taku Jihofa ka ñwu Mose̩s kakini, Ifai tak uwe̩ ali e̩wñ kʼu nache Fero; todu i anʼo̩wo̩ ukpahiu tʼuma no̩, ochochi, i la anʼo̩wo̩ ukpahiu ane ma kwo bʼane̩-wñ te̩.

²Oñ O̩jo̩ ka ñwu Mose̩s kakini, Omi che Jihofa.

³Omi kwotejugede ñw Ebraham kpai Aise̩k kpai Jeko̩b, kʼu chʼO̩jo̩ Odobao̩gagu; i muda chʼe-odu-mi Jihofa, u je̩ ñwu ma ma ka kʼomi de̩ n.

⁴U laño̩ fʼalo-mi kpe̩ kpai ama, todu kʼu dʼane̩ Kenan ñwu ma, owñ chʼane̩ ugbo ku ma ge̩ne̩ efu-wñ ale le̩.

⁵U laño̩ gbo̩ ifi amo̩ma Israe̩l, e-kʼabo Ijipti gwo̩nyu ma jʼef adu le̩, oñ ibe-mi kado alo-mi kʼu kpe̩ le̩.

⁶Todule̩ e̩ naka ñw amo̩ma Israe̩l kakini, Omi Jihofa de̩, nako me̩ kwef uko̩lo̩ adu e-abo Ijipti, oñ nagba me̩ kwef uko̩lo̩ adu-ma eche, nanʼo̩wo̩ ki nadala te̩ kpai udu elile ebu ñwu ma gba me̩ tane̩.

⁷Tak u nako me̩ chʼabo-mi, oñ omi achʼO̩jo̩-me̩; taku ame̩ ama ka kʼomi che Jihofa, O̩jo̩-me̩, kʼi ko me̩ kwʼef uko̩lo̩ adu e-abo Ijipti eche le̩.

⁸Omi ñʼako me̩ wa oj ane̩ e-kʼomi dʼo̩wo̩-mi nyate̩ ago̩ ñw Ebraham kpai Aise̩k kpai Jeko̩b ka kʼu nadu ñwu ma; nadʼu ñwu me̩ ku me̩ ne̩. Omi Jihofa de̩.

⁹Taku Mose̩s ko̩la abe̩le̩ ñw amo̩ma Israe̩l; ma muda nyi Mose̩s eti n, noji ubie̩do̩, kpai uko̩lo̩ adu ki bie̩ne̩ ñwu ma le̩.

¹⁰Taku Jihofa ka ñwu Mose̩s kakini,

¹¹Nyʼejefu, kʼe̩ ka ñwu Fero, onu Ijipti, kʼi tʼamo̩ma Israe̩l no̩ ku ma kwo bʼane̩-wñ te̩.

¹²Taku Mose̩s ka o̩gba Jihofa o̩mo̩, kakini, Go, amo̩ma Israe̩l la netirʼumi n; ab u nale ki Fero anetirʼumi? Omi, kʼuko̩la ma ya alu-mi n-i?

¹³Jihofa muda ko̩la ñwu Mose̩s kpai Aro̩n, oñ i ñwañwu ma alu ku ma aka ñw amo̩ma Israe̩l kpai alu ku ma aka ñwu Fero, onu Ijipti, ku ma kʼamo̩ma Israe̩l kwo bʼane̩ Ijipti te̩.

¹⁴Abo kuma dʼoji dufu unyi unyi amata-ma jo̩-i: amo̩ma e̩ne̩ke̩le̩ Rube̩n kʼi chʼo̩mo̩gba Israe̩l che: Hano̩k kpai Palu kpai He̩zro̩n kpai Karmi; abo-i chʼabo akwo̩ra unyi akwo̩ra unyi Rube̩n.

¹⁵Amo̩ma Simeo̩n e̩ne̩ke̩le̩ la che: Jemue̩l kpai Jamin kpai Ohad kpai Jachin kpai Zohar kpai Sho̩l kʼi che o̩ma kʼonobule̩ Kenan bi ñw u; abo-i chʼabo akwo̩ra unyi akwo̩ra unyi Simeo̩n.

¹⁶Odu odu amo̩ma e̩ne̩ke̩le̩ Lifai o̩gba o̩gba-ma jo̩-i: Ge̩rsho̩n kpai Kohat kpai Me̩rari, o̩do̩ udeju Lifai la chʼo̩gbo̩ me̩fa nyoke me̩gwebie.

¹⁷Amo̩ma Ge̩rsho̩n e̩ne̩ke̩le̩ che: Libni kpai Shimeai, akwo̩ra unyi akwo̩ra unyi-ma.

¹⁸Amo̩ma Kohat e̩ne̩ke̩le̩ che: Amram kpai Izhar kpai He̩bro̩n kpai Uzie̩l, o̩do̩ udeju Kohat la chʼo̩gbo̩ me̩fa nyoke me̩gwe̩ta.

¹⁹Amo̩ma Me̩rari e̩ne̩ke̩le̩ che: Mali kpai Mushi. Abo-i chʼakwo̩ra unyi akwo̩ra unyi abo Lifai o̩gba o̩gba-ma.

²⁰Amram la ne̩ Jo̩kebe̩d, o̩maye ata-wñ, chʼo̩ya, owñ le̩ fʼAro̩n kpai Mose̩s bi ñw u; o̩do̩ udeju Amram la chʼo̩gbo̩ me̩fa nyoke me̩gwebie.

²¹Amo̩ma Izhar e̩ne̩ke̩le̩ che: Ko̩ra kpai Nefe̩g kpai Zikri.

²²Amo̩ma Uzie̩l e̩ne̩ke̩le̩ che: Mishae̩l kpai E̩lzafan kpai Sitri.

²³Tak Aro̩n ne̩ E̩lisheba, o̩ma Aminadab o̩maye Nasho̩n, chʼo̩ya; i la fu Nedab kpai Abaihiu kpai E̩leaza kpai Itamar bi ñw u.

²⁴Amo̩ma Ko̩ra e̩ne̩ke̩le̩ che: Asir kpai E̩lkana kpai Abiasaf; abo-i chʼabo akwo̩ra unyi akwo̩ra unyi abo Ko̩ra.

²⁵Oñ E̩leaza, o̩ma Aro̩n, ne̩ o̩ma Putie̩l oka chʼo̩ya; i la fu Finehas bi ñw u. Abo ku ma dʼoji dufu ef amata abo Lifai, akwo̩ra unyi akwo̩ra unyi-ma de̩.

²⁶Abo-i che Aro̩n kpai Mose̩s e-ku Jihofa ka ñwu ma kakini, Me̩ ko amo̩ma Israe̩l kwo oj ane̩ Ijipti dufu wa, udala udala-ma.

²⁷Ama chʼabo ku ma ko̩la ñwu Fero onu Ijipti, ku ma ko amo̩ma Israe̩l kwʼoj ane̩ Ijipti dufu wa, Mose̩s le̩ kpai Aro̩n le̩ de̩.

²⁸Oñ o̩jo̩ ku Jihofa ko̩la ñwu Mose̩s ane̩ Ijipti,

²⁹Jihofa ka ñwu Mose̩s kakini, Omi Jihofa de̩; o̩la du kʼu naka ñw e̩-i, e̩ naka ñwu Fero, onu Ijipti.

³⁰Mose̩s muda ka o̩gba Jihofa kakini, Go, kʼo̩la ma ya alu-mi n-i, ab u na le ku Fero anyʼumi eti ge̩?