Read igala Aizaya 2 Bible Online

Aizaya 2 - igala bible

Aizaya 2

¹O̩la Juda kpai Je̩rusale̩m kʼAizaya, o̩ma Emo̩z li de̩.

²I awatu e̩gba o̩jo̩ otitala kʼe̩re̩ uwo unyi Jihofa alonyane̩ oj uwo uwo du, ma la ahiʼu nyʼate̩ tʼotete otete du le; oñ abo uche̩ichi uche̩ichi du atukpo̩o̩ awʼugbo-wñ,

³tak amone̩ ojoji ojoji wewe anyʼaka kakini: Me̩ lewa kʼa mute̩gu nyʼuwo Jihofa, nyʼunyi O̩jo̩ e-Jeko̩b; tak i ako wa o̩na o̩na-wñ oñ a ale ikpa-wñ ikpa-wñ. Todu efu Zayo̩n oñ uko̩-o̩la le̩ akwo dufu nyʼugbo du, o̩la Jihofa la akwo Je̩rusale̩m wa.

⁴Owñ la akajo̩ agbagba abo uche̩ichi uche̩ichi, i akpoji o̩la amone̩ ojoji ojoji wewe; tak ama akʼo̩kwo̩chageli-ma gwʼuko̩che̩, ma la akʼo̩kwo̩-ma gwʼujegbe; abo uche̩ichiʼka ñʼakʼo̩kwo̩chageli akobʼabo uche̩ichi omune̩ n, ma ñʼako̩che̩ ogu eja ge̩ n.

⁵O abunyi Jeko̩b, me̩ lewa, kʼa lule̩ ef ugane̩ Jihofa.

⁶Todu uwe̩ fʼabo-we̩ hi tinyo̩, owñ chʼabunyi Jeko̩b le̩, todu e̩wñ abo o̩wo̩ olodudu chʼe̩kʼefu-ma todu ama chʼamagʼakpa dab abo Filistia, ma la dʼo̩wo̩ ñw abononojo.

⁷Ajifa kpʼo̩jamalia la che̩ko̩ ane̩-ma, e̩wñ akoko-ma la nʼuloji n; ane̩-ma laño̩ che̩ko̩ ñw amanya, o̩kogu-ma la nʼo̩me̩ n.

⁸Ode ño̩ che̩ko̩ ane̩-ma; ma jʼadojikane̩ ñw uko̩lo̩ kʼo̩wo̩-ma onugo che, owñ chʼe-kʼo̩mo̩wo̩ e-ma che.

⁹Abe̩le̩ oñ one̩ achʼo̩la-wñ ukata, oñ ma ahi ame̩ne̩lile wane̩— uwe̩ ki tʼo̩ no̩ ñw ma n!

¹⁰Mugudu tʼef okuta le̩, kʼe̩ la dʼo̩la-we̩ maja ef ebutu bʼailo Jihofa o̩gba te̩, kpai bʼojima e̩gahi-wñ te̩.

¹¹Ma ahi eju eke e-one̩ wane̩, oñ ma adʼeñwo̩ kʼamone̩ añwo̩ oji lo; Jihofa kate la achʼe̩ne̩ kʼi adʼatate̩ o̩jo̩ kʼa ka-i.

¹²Todu Jihofa ki nʼe̩wñ du chenʼiko o̩jo̩ ki abʼabo ku ma ñwo̩ kpʼabo ku ma ke ma, kpʼabʼoji e̩wñ du kʼi chehine ma, oñ ma ahiʼu wane̩;

¹³kpai abʼoli sida e-Le̩bano̩n du kʼi hi o̩la-wñ ne tʼatate̩ le̩ oji ma; kpai abʼoli ok e-Beshan le̩ oji ma chaka;

¹⁴kpai abʼoji uwo uwo du ki gbo̩gba ma, kpai abʼoji otete otete du kʼi hi o̩la-wñ dago ma;

¹⁵kpai abʼoji o̩do̩go̩ du ki gbo̩gba ma, kpai abʼoji aku du ma;

¹⁶kpai abʼoji o̩ko̩ Tarshish ma chaka, kpai abʼoji e̩wñ uñeju du ma.

¹⁷Tak ehine e-one̩ adʼoji lo̩, ma la ahi eke e-amone̩ wane̩; oñ Jihofa kate chʼe̩ne̩ kʼi adʼatate̩ o̩jo̩ kʼa ka-i.

¹⁸Ode ode du la atakpa rʼeju hioko.

¹⁹Tak amone̩ anyʼef owo owo okuta kpʼef ura ura ane̩pe̩te̩ ku ma kwo bʼubailo Jihofa te̩, kpai kwo bʼojima e̩gahi-wñ te̩, e̩gba kʼi akwane̩ kʼi aje̩ ñw ailo fʼabo ile̩ mu.

²⁰O̩jo̩ le̩ amone̩ akʼode-ma e-ajifa kpai e-o̩jamalia, ku ma da ñw o̩la-ma ku ma dojikane̩ ñw u, rinyo̩ ñw amikeleku kpʼamido̩,

²¹kʼama ki nyʼef owo okuta kpʼef e̩kpana okuta, ku ma kwo bʼailo Jihofa o̩gba te̩, kpai kwo bʼojima e̩gahi-wñ te̩, owñ chʼe̩gba kʼi akwane̩ kʼi je̩ ñw ailo fʼabo ile̩ mu.

²²Me̩ ki we eke̩do̩nʼone̩ kʼiñmi dʼef iñmo̩-wñ ofo, todu ab i de̩ kʼi awʼe̩ne̩ du eju?