Read igala Aizaya 6 Bible Online

Aizaya 6 - igala bible

Aizaya 6

¹O̩do̩ kʼUzaya onu le̩ ku, u fʼOndu li abu kʼi gugu oj ede, i chʼe̩hine tʼatate̩; e̩rane̩ otogbo-wñ che̩ko̩ ef unyi O̩jo̩.

²Amise̩rif dago jʼatate̩ ñw u: e̩ne̩ne̩ne̩ne̩-ma nʼika me̩fa e̩fa: eji i ko bʼeju ma, eji i ko bʼe̩re̩ ma, eji i la nʼawu.

³Oñ oka-wñ nakwado̩ ekeji kakini: I afo̩, i afo̩, Jihofa ki nʼe̩wñ du afo̩; o̩gbo̩ ile̩ du che̩ko̩ ñw ojima-wñ.

⁴Tak e̩rane̩ alugbo̩na alugbo̩na kwo miejo tod omu e̩ne̩ ki akwa, unyi le̩ la che̩ko̩ ñw odudu.

⁵Tak u kakini, Atogwo chʼe-mi! e-mi ta me̩! todabu kʼomi chʼe̩ne̩ kʼi nʼuko kʼi chechiwa, kʼu laño̩ dodo alumeji amone̩ kʼuko-ma chechiwa: todu eju-mi dʼOnu, owñ che Jihofa ki nʼe̩wñ du!

⁶Tak ise̩rif oka muwu wʼugbo mi, e̩ge̩ una kʼi nʼalapa du kwʼoj ubo̩ iche̩bo̩ dʼo̩wo̩-wñ.

⁷Oñ i mʼu du kad alu-mi, i kakini, Go, e̩wñ-i kad uko-we̩ me̩; udu kʼe̩ fe̩ kwo bʼe̩ te̩, e̩wñ bʼadure-we̩ ma me̩.

⁸Tak u gbʼomu Ondu kʼi akakini, E̩ne̩ nakpʼo̩ uche̩? E̩ne̩ ale todu wa? Tak u kakini, Omi de̩! Kpe̩ mi.

⁹Tak i kakini, Lo, kʼe̩ ka ñw amone̩-i kakini: Me̩ gbo̩ waa, me̩ la amʼoji-wñ n; me̩ go waa, me̩ la amʼo̩ n.

¹⁰E̩ che kʼe̩do̩ amone̩-i ki mud agbo̩go̩, e̩ che kʼeti-ma ki woji, kʼe̩ la fʼe̩wñ fo̩ nyʼuma eju; tode̩gba ku ma nʼeju-ma gane̩, ku ma nʼeti-ma gbʼo̩la, ku ma la mʼoji e̩wñ ef e̩do̩-ma, ku ma murida ku ma fʼo̩ga-ma che kpa.

¹¹Tak u kakini, Ondu gbogbo nyʼe̩gba ta? I kakini: Gbogbo tak ewo ewo ki mud alache̩ kʼe̩ne̩ du ma ñʼadodo ef uwñ ge̩ n, kʼunyi unyi ma ñʼanʼone̩ ge̩ n, kʼane̩-i mud alache̩ hioko,

¹²ki Jihofa mʼamone̩ ko kwʼemi rʼo̩najiji, kʼachigodo alumeji ane̩-i ki wewe jo̩.

¹³Dagba e̩kpe̩gwa-wñ oka chaka bo̩ jʼef uwñ, ma ñʼadabi kʼe-le̩ mi ge̩, oñ alu kʼikakpunu oli te̩re̩bint kpʼoli ok bo̩, e̩gba ku ma fʼoli-wñ lo̩ wane̩. Abe̩le̩ ugbe̩ kiafo̩ le̩ chʼikakpunu-wñ.