Read igala Aizaya 61 Bible Online

Aizaya 61 - igala bible

Aizaya 61

¹Afu Ondu Jihofa dʼo̩la-mi, todabu ki Jihofa fʼekpo ba tʼumi oji kʼu fʼakoya uche̩nyo̩ ta ñw ame̩na-mi; i kpʼumi uche̩ wa kʼu fʼo̩ga abo kʼe̩do̩-ma kpabie̩ che kpa, kʼu ka ñw ame̩namu kakini, Ame̩ nʼo̩la-me̩-oo! kʼu ka ñw abo ku ma ji ma jo̩ kakini, O̩na unyuga mubi me̩;

²kʼu fʼakoya ta kakini, O̩do̩ ki anyo̩ Jihofa eju le̩ de̩, kpai o̩jo̩ kʼO̩jo̩-wa anache̩ i che; kʼu nyi abo du ku ma daido̩ e̩do̩;

³kʼu du te̩ ñw abo ku ma daido̩ Zayo̩n— ku ma kʼike̩be̩ ñw ma koji elulu, kpʼekpo uyo̩ koji eku eda, kpʼafe̩ uñwulo̩ koji e̩do̩ ki woji doli; kʼama ki do̩ ma ko̩ oli ok e-o̩kpakpa, e̩wñ ku Jihofa gbe̩ kʼi chʼalifia ñw u.

⁴Ma adabi ko̩ achigodo igbegbele le̩, ma akʼalache̩ igbele kwane̩; ma la añwʼewo ewo ki chʼalache̩ kʼi chʼe̩kpo̩fo̩ jo̩ kwo o̩gba o̩gba wewe che.

⁵Abo̩wo̩ e̩jaduña la adago akʼije̩ ñw ame̩wño̩re̩-me̩ egini je̩, oñ abo kʼame̩ ma ma ma n alʼuche̩ ñw me̩, ma la adejute̩ uche̩ achiwebe̩te̩ma-me̩;

⁶ma muda ado̩ me̩ ko̩, Amatama e-Jihofa, ama anʼo̩la-me̩ aka kakini, Amache̩wñ ñw O̩jo̩-wa ma che; ame̩ aje̩ e̩wñ anana abo uche̩ichi uche̩ichi, ame̩ la akwo tef ojima e-ma.

⁷Me̩ anʼukpe̩ meji koji anyo̩-me̩. Akoji ukata-ma ki chi le̩ ma ajo̩ ayo̩ ñw ukpe̩-ma; todule̩ ma anʼukpe̩ meji ojane̩-ma; uyo̩ ogbegbele̩ ade̩ ñw ma.

⁸Todu ajo̩ o̩kpakpa eka nyʼomi, Jihofa eju, oji eji manyʼe̩wñ bibi eche chʼe̩wñ ulaka-mi, omi la adʼakoji ñw ma lʼo̩na ochochi, tak omi akpʼalo ogbegbele̩ kpʼama.

⁹Ma ama ugbe̩-ma ef abo uche̩ichi uche̩ichi, kpai amo̩ma-ma ef amone̩ amone̩; abo duu ku ma fʼuma li aje̩ ka kʼama chʼugbe̩ ki Jihofa de̩nyo̩ ñw ma.

¹⁰Nayo̩ efu Jihofa ololo, onugo-mi agwoguyo̩ ef O̩jo̩-mi; todu i mʼe̩wñ o̩la ujadu ko nyʼumi o̩la me̩, i mʼotogbo o̩kpakpa ko nyʼumi o̩la, alu kʼo̩ko̩ o̩ya etito̩ akʼijaga nyʼo̩la dab atama, alu kʼo̩ya etito̩ akʼe̩wñ ijaga-wñ nyʼo̩la.

¹¹Todu alu kʼane̩ akʼiga e̩wñ dufu, kpai alu kʼane̩ uche̩ aje̩ ñw e̩wñ ku ma gbe̩ ef uwñ ki tiga, alu le̩ oñ Ondu Jihofa aje̩ ñw o̩kpakpa kpai uñwulo̩ ki tiga dufu eju abo uche̩ichi du.