Read igala Abo Lifai 1 Bible Online

Abo Lifai 1 - igala bible

Abo Lifai 1

¹Jihofa la nomudala do̩ Mose̩s, oñ i dʼef unyabo le̩ ako̩la ñw u, kakini,

²E̩ nako̩la ñw amo̩ma Israe̩l, kʼe̩ ka ñwu ma kakini, E̩gba kʼe̩ne̩ke̩le̩ du efu-me̩ dʼe̩wñ O̩jo̩ wa ñwu Jihofa, me̩ adʼe̩wñ O̩jo̩-me̩ le̩ kwef ame̩la abe̩re̩me̩le̩ abe̩k okuno̩ abe̩k ame̩wño̩re̩ egini wa ñw u.

³I la che̩wñ kʼe̩wñ O̩jo̩-wñ chʼe̩wñ kʼi du kwef amokuno̩ wa gujo, mak o̩ko̩ ki mufu i adu wa; oñ i adʼu wa alugbo̩na unyabo ujeju, alu ki anyo̩ ñw u eju Jihofa;

⁴tak i adʼo̩wo̩-wñ nʼoji e̩wñ iche̩bo̩ e̩gujo kʼi duwa le̩, oñ e-le̩ anyʼo̩ eju kʼi chʼe̩wñ uboma todu-wñ.

⁵Tak i adʼo̩mokuno̩ le̩ kpa o̩gba Jihofa; oñ amo̩ma Aro̩n e̩ne̩ke̩le̩, amatama le̩, anʼe̩bie̩ le̩ wa ku ma ta fio̩ ubo̩ iche̩bo̩ kʼi dʼalugbo̩na unyabo ujeju le̩ daka.

⁶Oñ i anʼaño̩ e̩la iche̩bo̩ e̩gujo le̩ kʼi fʼu kpanya jo̩.

⁷Tak amo̩ma Aro̩n atama le̩ akʼuna jʼoj ubo̩ iche̩bo̩, ma la atʼiji jo̩ oj una le̩;

⁸tak amo̩ma Aro̩n, amatama le̩, akʼe̩la le̩ jo̩ oji-wñ aro̩ne aro̩ne, owñ chʼoji-wñ kpai ula-wñ, oj iji ki jʼoj una ki dʼoji ubo̩ iche̩bo̩ le̩;

⁹i muda anʼomiofo gwe̩ ifi-wñ kpai e̩re̩-wñ. Tak atama agu o̩gbo̩dudu-wñ jo oj ubo̩ iche̩bo̩ le̩, kʼi chʼe̩wñ iche̩bo̩ e̩gujo, owñ chʼe̩wñ ku ma duwa lʼugbo una kʼi akpo ru Jihofa.

¹⁰I la che̩wñ kʼe̩wñ O̩jo̩-wñ kʼi du wa kʼi chʼiche̩bo̩ kwef ame̩wño̩re̩ egini owñ chʼamala abe̩k amewo, mak o̩ko̩ kʼi mufu i aduwa.

¹¹Tak i adʼu kpa o̩la ubo̩ iche̩bo̩ o̩wo̩ o̩pata ate̩ o̩gba Jihofa, oñ amo̩ma Aro̩n, amatama, atʼe̩bie̩-wñ fio̩ ubo̩ iche̩bo̩ le̩ daka.

¹²Tak i akpanya jo̩ manyʼoji-wñ kpai ula-wñ, oñ atama le̩ akʼo̩gbo̩dudu-wñ wa te̩re̩ jʼoji iji ki dʼoj una kʼi jʼoj ubo̩ iche̩bo̩ le̩;

¹³i muda anʼomiofo gwe̩ ifi-wñ kpai e̩re̩-wñ. Oñ atama le̩ akʼo̩gbo̩dudu-wñ wa kʼifʼu gujo oj ubo̩ iche̩bo̩ le̩; e̩wñ iche̩bo̩ e̩gujo i che, owñ chʼe̩wñ eduwa lʼugbo una kʼi akpo ru Jihofa.

¹⁴I la che̩wñ kʼe̩wñ O̩jo̩ kʼi aduwa ñwu Jihofa chʼame̩we̩ e̩gujo ñw u, mak amikede abe̩k amo̩mo̩ke̩te̩be̩ chʼe̩wñ O̩jo̩ kʼi ako wa.

¹⁵Tak atama adʼe-le̩ʼka wʼugbo ubo̩ iche̩bo̩, oñ i amʼoji-wñ lida, tak i agujo oj ubo̩ iche̩bo̩ le̩; oñ e̩bie̩-wñ awelo wʼane̩ akolo ubo̩ iche̩bo̩;

¹⁶oñ i amʼujo̩kanyi-wñ kpai edudu-wñ ko kʼi dʼu rikpolo tʼane̩ e̩re̩ ubo̩ iche̩bo̩ o̩wo̩ olodudu-wñ, uña elulu le̩.

¹⁷I agwo̩nyu ika-wñ meji kʼi fʼu fana, i muda afana nyane̩ kpa n. Tak atama agu e-le̩ jo oj ubo̩ iche̩bo̩, oj iji ki jʼoj una le̩; e̩wñ iche̩bo̩ e̩gujo i che, owñ chʼe̩wñ eduwa lʼugbo una kʼi akpo ru Jihofa.