Read igala Izikie̩l 19 Bible Online

Izikie̩l 19 - igala bible

Izikie̩l 19

¹Anubi le̩ ge̩, uwe̩ ki dinaku tod amidachi Israe̩l,

²kʼe̩ kakini; E̩wñ iye-we̩ che? Ole idu i che; i dachi ef amidu, i ne̩ aroo̩ma-wñ gba ef amagba-dufu idu.

³I la nʼo̩ma-wñ oka gba, oñ i mud agbadufu idu, tak i ko̩che̩ e̩la emu; i kʼamone̩ je̩.

⁴Abo uche̩ichi uche̩ichi ño̩ gbʼinabali-wñ; ma fʼu mu ef ura ku ma gwa te̩; ma la dʼo̩bo̩go̩li ta tʼelika iñmo̩-wñ oñ madʼu wa ane̩ Ijipti.

⁵Oñ e̩gba kʼiye-wñ li ka kʼenede-wñ chʼofofo, kʼukibeno-wñ le̩ lenyo̩, tak i mʼo̩ma-wñ omune̩ du che agbadufu idu.

⁶Owñ le̩ le̩lo lewa ef amidu; i mud agbadufu idu, oñ i ko̩che̩ e̩la emu; i kʼamone̩ je̩.

⁷I la fʼachigodo achigodo-ma ma, oñ i fʼewo ewo-ma chihi rinyo̩; tak ane̩ le̩ te̩ o̩fo̩, kpʼe̩wñ du ki jʼef uwñ, noj ekuku ukwa-wñ.

⁸Tak abo uche̩ichi uche̩ichi kwʼojane̩ ojane̩ wa ado nyʼu o̩wo̩ tʼo̩wo̩ du; ma la fʼiga-ma fa bʼo̩ oji ma; ma fʼu mu ef ura-ma.

⁹Taku ma dʼo̩bo̩go̩li ta tʼelika iñmo̩-wñ adʼu tef akpati ebije, oñ ma mʼu du wa ñw onu Babilo̩n; ma mʼu du wʼef aku, kʼama ki we egbo̩ ukwa-wñ oj uwo uwo Israe̩l.

¹⁰Iye-we̩ la dab ikeli ef e̩bie̩-we̩[1] ku ma ne eti omi omi, i ro̩ nana, i tʼe̩to̩ nyañwu, tod omi ki chʼebʼowñ jo̩ le̩.

¹¹I la nʼo̩kpa ki gbiti ki mud okute abo ku ma nʼo̩da, o̩gba-wñ la dʼatate̩ ef e̩tʼoli ki hʼidu le̩; oñ ma liʼi abʼi dʼatate̩ ef e̩to̩-wñ ki wewe le̩.

¹²Ma muda kʼe̩do̩fulu mʼu wu tʼili tʼili, oñ ma mʼu du ro̩ fiʼane̩; afu olodudu fʼe̩ro-wñ gbe̩ rinyo̩ o̩kpa-wñ ki gbiti le̩ muguche̩, oñ i gbe̩ rinyo̩; una la fʼu lie̩.

¹³Fai ma chi ne ef aje̩tachi, ane̩ e̩gbe̩ ugbo kʼalugbe̩ akpʼo̩.

¹⁴Una la kwʼo̩kpa e̩to̩-wñ oka dufu, oñ i fʼe̩ro-wñ lie̩, todule̩ i ño̩ nʼo̩kpa ki gbiti kʼi mud okute̩ kʼi anʼo̩da ge̩ n. Inaku eda de̩, i la ade̩ tod inaku eda ate̩to̩gba-i ge̩.