Read igala Izikie̩l 27 Bible Online

Izikie̩l 27 - igala bible

Izikie̩l 27

¹O̩la Jihofa ño̩ wʼugbo mi kakini,

²I chʼuwe̩, o̩ma one̩ e̩ ki nʼinaku Taya ada;

³kʼe̩ ka ñw Taya kakini, Uwe̩ kʼe̩ gugu alu ohimini abadi, kʼe̩ chʼe̩ne̩ kʼe̩ chʼanyaja e-amone̩ amone̩ ugbo ala ala wewe, abu kʼOndu Jihofa ka de̩ kakini: Uwe̩, Taya, kakini, Alifia-mi mufu kpa.

⁴Alo̩me̩-we̩ jʼo̩ge̩ge̩de̩ ohimini abadi; abo ku ma fʼuwe̩ ko̩ je̩ ñw alifia-we̩ mufu.

⁵Ma nʼoli fe̩r kwʼoko Senia fa ikatakpo-we̩ chaka; ma mʼoli sida Le̩bano̩n oka du ku ma du chʼoli lemo̩ ñw e̩,

⁶Ma mʼok e-Be̩shan du chʼoche-we̩; ma nʼoli bo̩ks ku ma kʼe̩nyi adagba chʼo̩ñwe̩ nyʼu kwo ala Saipro̩s wa che agbada o̩ko̩.

⁷Lemo̩-we̩ chʼukpo line̩n ku ma hi reju taku ma chiya nyʼu ku ma ne̩ kwʼIjipti wa, todu kʼi chʼagaliga ñw e̩; ukpo kʼe̩ du nʼala chʼodufa kpʼodu-fa ekpikpa ki kwʼala ala E̩lisha.

⁸Abo ku ma dodo Saido̩n kpai Arfad chʼabo ku ma gwʼo̩ko̩-we̩; ame̩nibe-we̩, O Taya, jʼef uwe̩, ama chʼabo-we̩ ku ma ña o̩ko̩ o̩na.

⁹Abogijo Gebal kpʼamanibe̩-ma jʼef uwe̩ akʼe̩kpana o̩ko̩ o̩ko̩-we̩ ji; o̩ko̩ ohimini chaka manyʼabo ku ma chʼuko̩lo̩ ef uwñ jʼef uwe̩ ku ma ta e̩wñ ku ma ño̩ la e̩wñ aja-we̩.

¹⁰Abo Pe̩rsia kpai Lud kpai Put jʼef abogu-we̩, abo-we̩ ku ma ajogu de̩; ma kʼo̩kpatabeli kpʼukata ogu lo̩ko̩li ef uwe̩; ama je̩ ñw alifia-we̩ kʼi ne̩reju.

¹¹Aboke̩le̩ Arfad manyʼabogu-we̩ jʼoj aku-we̩ daka, amagbiti la jʼef o̩do̩go̩-we̩; ma kʼo̩kpatabeli-ma lo̩ko̩li aku-we̩ daka; ama je̩ ñw alifia-we̩ ki mufu.

¹²Tarshjsh chʼachinyama-we̩ ukpe̩ kʼe̩wñ anana ojoji ojoji kʼe̩ ne̩ ta chʼo̩wo̩wo̩; ajifa kpai ebije kpʼokuja kpʼo̩de̩le̩ma, ma muko kpailo̩ ane̩-we̩.

¹³Jafan kpai Jubal kpai Me̩she̩k, abo le̩ chʼamanyaja ugbo we̩; ma kʼonugo one̩ kpʼe̩wñ eku ebije ikpa kpailo̩ tod e̩wñ aja-we̩.

¹⁴Abo unyi Togama ko amanya kpʼamanya ogu kpʼami-miulu wa kpailo̩ e̩wñ aja-we̩.

¹⁵Aboke̩le̩ Dedan chʼamagbagbata ugbo we̩ ge̩; ala ala wewe chʼaja ki atʼuwe̩ o̩wo̩; ma nʼenyi adagba kpai oli e̩boni rʼo̩me̩ ñw e̩.

¹⁶Siria achinyama-we̩ ukpe̩ kʼe̩wñ kʼe̩ che ata chʼe̩kute̩; ama ne̩ e̩me̩rald kpai ukpo ekpikpa odufa, kpʼukpo ku ma hi e̩gudu, kpai ukpo line̩n ku ma hi reju, kpai ko̩ral kpai okuta rubi wa kpailo e̩wñ aja-we̩.

¹⁷Juda kpʼane̩ Israe̩l chʼamanyaja ugbo-we̩, ama ko o̩ka wit e-mi nit kpai e̩wñ ayaga ki rinyo̩ kpai omi iño̩ kpai ekpo kpai balm kpailo e̩wñ aja-we̩.

¹⁸Damaskus chʼachinyama-we̩ todu kʼe̩wñ kʼe̩ che ta chʼe̩kute̩, ukpe̩ kʼe̩wñ anana ojoji ojoji chʼo̩wo̩wo̩, manyʼomi achiwebe̩te̩ma e-He̩lbo̩n, kpʼedudu ala efufu,

¹⁹Fedan kpai Jafan nʼowu e̩da kpailo̩ e̩wñ aja-we̩; ebije efufu kpai kesia kpai kalamus jʼef e̩wñ aja-we̩.

²⁰Dedan chʼanyaja ukpo o̩me̩me̩le̩ tod ofidi anya ugbo we̩.

²¹Arabia kpʼamidachi Kedar chaka, ama chʼamachinyama kʼe̩wñ mʼo̩wo̩-ma amo̩mala kpʼamokolo, kpʼamobuko̩ chʼe̩wñ kʼabo le̩ chʼamachinyama-we̩ ef uwñ.

²²Abo Shiba kpai abo Raama ku ma chʼamanyaja, abo le̩ chʼama-nyaja ugbo-we̩. Ama la nʼe̩wñ ido̩ro̩ ki tʼo̩gba manyʼokuta akoko du kpʼo̩jamalia wa kpailo̩ e̩wñ aja-we̩.

²³Haran kpai Kane̩ kpai Ide̩n, amanyaja e-Shiba kpʼAshur kpai Chilmad le̩ chʼamanyaja ugbo we̩.

²⁴Abo le̩ chʼamanyaja ugbo we̩ ef ukpo ki nʼo̩ko̩, ef ukpo odufa kpʼukpo ku ma chiya nyʼu, kpai ukpo ojoji ojoji kʼaja-wñ che̩kpuna, ku ma nʼiku ji tʼef akpati akpati oli sida jʼef e̩wñ aja-we̩.

²⁵O̩ko̩ o̩ko̩ Tarshish koji aminyakulumi nʼadu e̩wñ aja-we̩. E̩wñ-we̩ ki dabu la dabi ko̩, oñ uwe̩ nʼojima nana o̩ge̩ge̩de̩ ohimini abadi o̩mo̩.

²⁶Amagwo̩ko̩-we̩ mʼuwe̩ du dufu tʼugbo kʼomi nana. Afu olodudu fʼuwe̩ kpo̩fo̩ o̩ge̩ge̩de̩ ohimini, ohimini abadi.

²⁷E̩wñ anana-we̩ kpʼaja-we̩ kpʼe̩wñ aja-we̩, abo ku ma chʼuko̩lo̩ o̩ko̩-we̩ kpʼamañʼo̩ko̩-we̩ o̩na, abo ku ma kʼe̩kpana-wñ ji kpʼabo ku ma nyʼaja kpʼuwe̩, kpʼabogu-we̩ chaka ku ma jʼef uwe̩, manyʼabo-we̩ du ku ma jʼalumeji-we̩, ma alawo̩nye̩ tʼo̩gane̩ ohimini o̩jo̩ kʼe̩ lo̩ wane̩.

²⁸Ukwa amañʼo̩ko̩-we̩ o̩na ku ma gbo̩ ala gbaa ugbo tʼugbo du aga,

²⁹tak abo du ku ma nʼoche chʼuko̩lo̩ agwo̩ru kwef o̩ko̩-ma tane̩. Amachʼuko̩lo̩ o̩ko̩ kpʼamañʼo̩ko̩ o̩na ohimini du dago jʼeto̩ba

³⁰oñ amone̩ agbo̩ ogu-we̩ ku ma kpa, ma la araku anyanyi. Ma akʼebutu rʼo bʼo̩la-ma oji ma, ma la ajʼane̩ ali gbigbili ef elulu.

³¹Ma alʼoji-ma o̩bobo̩lo todu we̩, ma la akʼe̩gbanukpo lʼago, ma la araku we̩ ef e̩do̩dudu, ma adaido̩ ololo.

³²Oñ ef aku ku ma aro̩ le̩ ma adinaku we̩, ma adinaku kakini, E̩ne̩ dabu Taya? E̩ne̩ kʼoli kpo tʼalu alumeji ohimini abadi-i?

³³E̩gba kʼane̩-we̩ kʼe̩ ta kwʼohimini abadi kpatuka, uwe̩ je̩ ñw efu amone̩ wewe ki ko̩; uwe̩ nʼe̩wñ anana-we̩ kpai e̩wñ aja-we̩ e̩kute̩ le̩ je̩ ñw amonu ane̩-ile̩ mud amanana tule.

³⁴Iko̩ kʼohimini abadi fʼuwe̩ kpo̩fo̩, ugbo unefu omi le̩; e̩wñ aja-we̩ kpʼabo-we̩ chaka lewane̩ alumeji-we̩.

³⁵Ugoju-we̩ mʼabo̩ du ku ma dodo ala ala da; amonu-ma la arailo bie̩ne̩ bie̩ne̩; eju-ma chʼe̩kpa.

³⁶Amanyaja ku ma jʼef amone̩ amone̩ kibo̩ chʼe̩ chui; uwe̩ mud e̩wñ ubailo me̩ uwe̩ ñʼadede̩ o̩gbegbele̩ ge̩ n.