Read igala Ekaluka 15 Bible Online

Ekaluka 15 - igala bible

Ekaluka 15

¹Taku Jihofa ka ñwu Mose̩s kakini,

²E̩ ki ka ñw abo Israe̩l kakini, E̩gba ku me̩ lewa oj ane̩ kʼomi du ñwu me̩ ugbo ku me̩ adodo le̩,

³kʼi la dʼume̩ e̩do̩ ku me̩ ko e̩wñ wa ñwu Jihofa lugbo una, dagba kʼi chʼokuno̩ dagba kʼi chʼame̩wño̩re̩ egini abe̩k iche̩bo̩ e̩gujo, abe̩k iche̩bo̩ ku me̩ dʼoji-wñ, abe̩k e-ku me̩ gʼe̩do̩la-me̩ duwa, abe̩k ef uje̩wñ uyo̩ ku ma dʼiko-wñ te̩ le̩, ku me̩ che e̩wñ ki akpo ru Jihofa,

⁴e̩gbale̩ e̩ne̩ kʼi ako e̩wñ O̩jo̩-wñ wa, adʼe̩wñ ele kʼi chʼukpe̩gwa e̩fa omu te̩ke̩te̩ke̩ kʼekpo e̩kpe̩le̩ hinʼka kpe̩ gwa nyʼu wa ñwu Jihofa;

⁵kpai omi achiwebe̩te̩ma e̩kpe̩le̩ hin oka todu iche̩bo̩ omi-wñ, uwe̩ añwʼe-le̩ che manyʼe̩wñ iche̩bo̩ e̩gujo, abe̩ku todu iche̩bo̩ le̩, todu o̩mala-wñ okoka.

⁶Abe̩k i chʼokolo e̩ duwa, uwe̩ ane̩ omu te̩ke̩te̩ke̩ e̩kpe̩gwa e̩fa meji e-kʼekpo e̩kpe̩gwa hinʼka kpe̩gwa nyʼu kʼi chʼe̩wñ ele-wñ;

⁷e̩ ki du omi achiwebe̩te̩ma hin oka wa chʼiche̩bo̩ omi-wñ, kʼi chʼe̩wñ kʼi akpo ru Jihofa.

⁸Oñ e̩gba kʼe̩ dʼo̩mokuno̩ o̩ko̩ wa chʼiche̩bo̩ e̩gujo, abe̩ku iche̩bo̩ e̩wñ ku ma dʼoji-wñ, abe̩ku iche̩bo̩ ure̩do̩ eche ñwu Jihofa,

⁹maku me̩ akʼe̩wñ ele e̩kpe̩gwa omu te̩ke̩te̩ke̩ kʼe̩kpe̩reji hin ekpo kpe̩gwa nyʼu wa chʼe̩wñ ele manyʼomokuno̩ o̩ko̩ le̩,

¹⁰iche̩bo̩ omi-wñ ku we̩ adu wa achʼomi achiwebe̩te̩ma e̩kpe̩reji hin oka, kʼi chʼiche̩bo̩ ku ma che lugbo una, kʼi akpo ru Jihofa.

¹¹Abe̩le̩ ma ache tod o̩kokuno̩ okoka, abe̩k okolo okoka, abe̩k o̩ma e̩wño̩re̩ egini okoka.

¹²Alu kʼaluka-wñ kʼe̩ ñwo̩che de̩ abe̩le̩ uwe̩ ache ñw okoke-wñ du.

¹³Abo du ku ma chʼo̩mane̩ ache e̩wñ-i alu kʼu ka-i, e̩gba ku ma kʼe̩wñ wa lugbo una, kʼi akpo ru Jihofa.

¹⁴I la che̩wñ kʼilowa ge̩ne̩ ugbo me̩, abe̩k e̩ne̩ du kʼi dʼefu-me̩ gbogbo nyʼohio̩gu-me̩, kʼi dʼe̩ e̩do̩ kʼi du e̩wñ wa lugbo una, ki akpo ru Jihofa, alu ku me̩ che, alu le̩ e̩ne̩ le̩ ache.

¹⁵Todu ujeju-i, uhio̩me̩ todu me̩ kpai ilowa kʼi ge̩ne̩ efu-me̩ chʼoka, uhio̩me̩ ogbegbele̩ gbogbo nyʼo̩hio̩gu-me̩ i che; alu kʼame̩ de̩, abe̩le̩ ilowa ade̩ eju Jihofa.

¹⁶Uko̩o̩la-wñ kpai alu ku ma du oji ajo̩-wñ te̩ todu me̩ kpai tod ilowa kʼi ge̩ne̩ efu-me̩ achʼoka.

¹⁷Taku Jihofa ka ñwu Mose̩s kakini,

¹⁸E̩ ki ka ñw abo Israe̩l kakini, E̩gba ku me̩ lewa oj ane̩ kʼu nako me̩ nyi le̩

¹⁹ku me̩ la jʼuje̩wñ e-ane̩ le̩, ame̩ ki ko e̩wñ iche̩bo̩ edu nyʼate̩ wa ñwu Jihofa.

²⁰Me̩ adʼakala ku me̩ ne̩ omu-me̩ e-ejo̩ga che wa todu iche̩bo̩ edu nyʼate̩; alu kʼiche̩bo̩ eko̩ nyʼate̩ e-ajita ugwo̩ka de̩, abe̩le̩ me̩ adu nyʼate̩.

²¹Me̩ ki kʼe̩wñ iche̩bo̩ edu nyʼate̩ ñwu Jihofa kwef e̩jo̩ga omu-me̩ gbogbo nyʼo̩hio̩gu-me̩.

²²I la che̩wñ ku me̩ la, ku me̩ ma fʼuko̩-i du de n, owñ chʼe-ki Jihofa ka ñwu Mose̩s-i,

²³owñ chʼe-du ku Jihofa ñwa ñwu me̩ lugbo Mose̩s, akwʼo̩jo̩ ku Jihofa ñwa ñwu me̩ kpai ate̩to̩gba-wñ gbogbo nyʼohio̩gu-me̩,

²⁴iche̩wñ ki chʼela i la, kʼabo o̩gbadu-i ma ma n, abo o̩gbadu-i chaka adu o̩mokuno̩ o̩ko̩ʼka wa todu iche̩bo̩ e̩gujo, kʼi kpo ru Jihofa, manyʼe̩wñ ele-wñ kpai iche̩bo̩ omi-wñ, alu kʼoji ajo̩-wñ de̩, kpai o̩mʼobuko̩ʼka tod iche̩bo̩ adure.

²⁵Tak atama afʼe̩bo-ma che todu abo o̩gbadu abo Israe̩l chaka, taku ma ato̩no̩ ñwu ma; todu ela i la, ma la mʼe̩wñ O̩jo̩-ma duwa ñwu Jihofa lugbo una, ma fʼiche̩bo̩ adure-ma che o̩gba Jihofa me̩, tod ela ku ma la le̩;

²⁶taku ma ato̩no̩ ñw o̩gbadu abo Israe̩l chaka, kpai ilowa kʼi ge̩ne̩ efu-ma; todu ela amone̩ le̩ chaka la.

²⁷I la che̩wñ kʼe̩ne̩ kate la kʼi fʼadure ta, mak i adʼolewo o̩mo̩do̩ʼka wa todu iche̩bo̩ adure.

²⁸Tak amatama le̩ ache e̩wñ e̩boma o̩gba Jihofa todu onugo e̩ne̩ kʼi la le̩, e̩gba kʼi ma ma n kʼi dure, kʼi che e̩boma todu owñ; taku ma ato̩no̩ ñw u.

²⁹Ame̩ anʼuko̩-o̩la okate tod e̩ne̩ kʼi ache e̩wñ kʼi ma gwejugede n, tod e̩ne̩ kʼi che o̩mane̩ ef abo Israe̩l, kpai tod ilowa kʼi age̩ne̩ efu-ma.

³⁰Ama onugo e̩ne̩ du kʼi gwejugede fʼo̩wo̩ kʼe̩do̩ ache, dagba i chʼo̩mane̩ dagba i chʼilowa, kʼi bu Jihofa ina, ma akʼonugo e̩ne̩ le̩ da bʼef amone̩-wñ te̩.

³¹Todabu kʼi chʼe̩de̩te̩ o̩la Jihofa, kʼi la mʼuko̩ kʼi te̩ daba, ma akʼonugo e̩ne̩ le̩ da pioo; udu-wñ kʼi fe̩ anʼo oji.

³²Oñ abu kʼabo Israe̩l jʼef aje̩tachi le̩, ma fʼe̩ne̩ʼka li kʼi achʼiji o̩jo̩ uñmi.

³³Oñ abo ku ma fʼu li abu kʼi achʼiji mʼowñ du wʼugbo Mose̩s kpai Aro̩n kpai ugbo abo̩gbadu le̩ chaka.

³⁴Oñ ma mʼu du nyʼabo ide o̩wo̩, todabu ku ma ma dʼoji e̩wñ ku ma achʼo dufu ta n.

³⁵Taku Jihofa ka ñwu Mose̩s kakini, Ekpa ma akpa e̩ne̩ le̩; abo̩gbadu-i du akʼokuta ro̩ dʼo ejo̩do̩da uru-i.

³⁶Tak abo o̩gbadu le̩ chaka mʼu duwa ejo̩do̩da uru le̩, oñ ma kʼokuta ro̩ dʼo, ma la mʼu du kpa, alu ku Jihofa ñwa ñwu Mose̩s le̩.

³⁷Taku Jihofa ka ñwu Mose̩s kakini,

³⁸E̩ nako̩la ñw abo Israe̩l, kʼe̩ je̩ ñwu ma fo̩jaja da nyʼetiba e̩wñ o̩la-ma gbogbo nyʼo̩hio̩gu-ma, ku ma fʼiku odufa dakulu nyʼu etiba-wñ le̩;

³⁹oñ e-le̩ achʼo̩jaja ñwu me̩ kʼame̩ ki kejurʼu ku me̩ dibekado uko̩ du ki Jihofa te̩ ku me̩ ki fʼu de; ku me̩ la we etʼe̩wñ kʼe̩do̩-me̩ onugo abe̩k eju-me̩ kado ubi, owñ chʼe̩wñ ku me̩ te̩tajʼo̩ko̩ bʼo̩ akwoubi le̩.

⁴⁰Abe̩le̩ ame̩ ki dibekado, ku me̩ la che e̩wñ kʼomi tʼuko̩-wñ le̩ du, kʼame̩ ki fo̩ ñw O̩jo̩-me̩.

⁴¹Omi che Jihofa, O̩jo̩-me̩, kʼu ko me̩ kwʼoj ane̩ Ijipti dufu kʼu chʼO̩jo̩-me̩: omi Jihofa O̩jo̩-me̩ de̩.