Read igala Ekaluka 21 Bible Online

Ekaluka 21 - igala bible

Ekaluka 21

¹Tak e̩ne̩ Kenan, kʼi chʼonu Arad, kʼi dodo o̩pata o̩gane̩ gbo̩ ka kʼabo Israe̩l alʼo̩na Atarim wa, i kwokʼogu bʼabo Israe̩l, i la fʼiche̩kibo̩ efu-ma mu.

²Tak abo Israe̩l fʼoji da ñwu Jihofa, oñ ma kakini, Iche̩wñ kʼuwe̩ ako amone̩-i nyʼumi o̩wo̩ ochochi, mak u nakʼewo ewo-ma jo̩ ñw e̩.

³Taku Jihofa netirʼomu abo Israe̩l, oñ i mʼabo Kenan le̩ ko nyʼuma o̩wo̩; taku ma mʼabo le̩ kojo̩ ñw O̩jo̩ hioko, kpai ewo ewo-ma; ma dʼodu ugbo kide̩ ko̩ Ho̩rma.[8]

⁴Taku ma kʼe̩re̩ nyʼule̩ kwo uwo Ho̩r lʼo̩na ale tʼOhimini Ekpikpa, ku ma dagbala lʼiba ane̩ Ido̩m; oñ uhia fʼamone̩ le̩ hia ej o̩na le̩.

⁵Tak amone̩ le̩ chane̩ eko̩la nyʼO̩jo̩ kpai Mose̩s o̩la, kakini, E̩wñ chi kʼame̩ ko wa kwʼIjipti wa kʼa ku aje̩tachi-i? Todu uje̩wñ de̩ n, omiofo la de̩ n; uje̩wñ fuye̩ kide̩ kʼuwa o̩la me̩.

⁶Taku Jihofa fʼamejo una una kpe̩ nyʼef amone̩ le̩, oñ ma fʼamone̩ le̩ lo̩, abo Israe̩l wewe la leku.

⁷Tak amone̩ le̩ wʼugbo Mose̩s, oñ ma kakini, A fʼadure ta me̩, todabu kʼa ko̩la nyu Jihofa kpai uwe̩ o̩la; e̩ narodubo̩ Jihofa kʼi mʼamejo le̩ ko bʼuwa te̩. Taku Mose̩s chadua todu amone̩ le̩.

⁸Oñ Jihofa ka ñwu Mose̩s kakini, E̩ nafʼejo e-una che ñw o̩la-we̩, kʼe̩ dʼu dago oj oli; oñ e̩ne̩ du kʼejo lo̩ kʼi la ago adeju.

⁹Abe̩le̩ Mose̩s nʼebije ekpikpa che ejo, oñ i mʼu du manyʼoli dago; oñ i lewa, i la che̩wñ kʼejo fʼe̩ne̩ʼka lo̩, kʼi go ejo ebije ekpikpa le̩, i adeju.

¹⁰Tak abo Israe̩l kʼe̩re̩ nyʼule̩ alo, oñ ma lewa ru Obot.

¹¹Taku ma kʼe̩re̩ nyʼule̩ kwo Obot, oñ ma lewa ru Iye-abarim, ef aje̩tachi ki dʼo̩gba Moab o̩wo̩ olodudu.

¹²Akwo o̩mo̩ ma kʼe̩re̩ nyʼule̩, oñ ma lewa ru ef o̩go̩ Zere̩d.

¹³Akwo o̩mo̩ ma kʼe̩re̩ nyʼule̩, oñ ma lewa ru ejudaba Arno̩n, kʼi dʼaje̩tachi kʼi te̩ akwo alo̩me̩ abo Amo̩r alo le̩; todu Arno̩n le̩ chʼalo̩me̩ Moab, agbagba Moab kpai abo Amo̩r.

¹⁴Todule̩ ma ka ef O̩takada Ogu Jihofa, kakini, Waheb efu Sufa, Kpai o̩go̩ o̩go̩ Amo̩n,

¹⁵Kpai aji aji efoko o̩go̩ o̩go̩ Kʼi te̩ gbogbo nyʼodo̩ Ar, Kʼi la yamo̩ alo̩me̩ Moab.

¹⁶Akwo o̩mo̩ ma nyi Bir;[9] owñ chʼobuga e-ku Jihofa kʼo̩la-wñ ñwu Mose̩s kakini, Kʼamone̩ le̩ wa jo̩, kʼu nadʼomiofo ñwu ma.

¹⁷E̩gbale̩ Israe̩l fʼeli-i ko̩ kakini: Obuga-i, bi dufu—me̩ kʼeli ñw u!—

¹⁸Obuga, e-kʼamagboji gwa le̩ E-kʼame̩numo̩la ef amone̩-i nʼokute̩ kpai o̩kpa gwa. Oñ akwo aje̩tachi le̩ ma nyi Matana,

¹⁹akwo Matana ma la nyi Nahalie̩l, akwo Nahalie̩l ma nyi Bamot,

²⁰oñ akwo Bamot ma nyi o̩go̩ kʼi dʼegbili Moab, nyʼoji Pisga kʼi bʼo̩do̩go̩ nʼane̩ aje̩tachi le̩.

²¹Tak Israe̩l fʼamonuche̩ kpe̩ nyʼugbo Siho̩n kʼi chʼonu abo Amo̩r, kakini,

²²Je̩ ñwu mi lale gu ef ane̩-we̩ du; a ana rʼo̩wo̩ʼka tef uche̩ abe̩k achiwebe̩te̩ma n; a la añmo̩ omi obuga-me̩ n; a ale ojikpadala onu, gbogbo tak a lale gu ane̩-we̩ du.

²³Siho̩n muda je̩ ñw Israe̩l lale gu ane̩-wñ du n. Oñ Siho̩n mʼaboke̩le̩-wñ du ko wa jo̩, i dufu wa akobo̩ Israe̩l aje̩tachi le̩ oñ i lewa Jahaz; i la kogu bʼabo Israe̩l.

²⁴Tak Israe̩l nʼalu o̩kwo̩chageli gwʼo da, oñ i mʼane̩-wñ gba akwo Arno̩n gbogbo nyi Jabo̩k, gbogbo wʼane̩ abo Amo̩n; todu alo̩me̩ abo Amo̩n chʼe̩gbiti.

²⁵Tak Israe̩l mʼewo ewo-i ko chaka, oñ Israe̩l kwogugu ewo ewo abo Amo̩r le̩ chaka, owñ che He̩shbo̩n, kpai adogbe-wñ chaka.

²⁶Todu He̩shbo̩n le̩ chʼewo Siho̩n kʼi chʼonu abo Amo̩r, e-kʼi kʼogu bo̩ onu Moab o̩gbo̩gba, kʼi la mʼane̩-wñ gba bʼo̩ o̩wo̩ te̩ chaka, gbogbo wa Amo̩n le̩.

²⁷Todule̩ abo ku ma kpʼita kakini, Me̩ lewa He̩shbo̩n, je̩ ñw ma nʼo̩do̩ ewo Siho̩n kʼe̩re̩-wñ ki lonyane̩.

²⁸Todu una kwo He̩shbo̩n dufu, o̩go̩ unaʼka la kwʼewo Siho̩n dufu. I fu Ar e-Moab liye̩, amodu uña ki dago atate̩ o̩la Arno̩n le̩.

²⁹Atogwo ñw uwe̩, Moab! Me̩ lenyo̩ me̩, O abo Chemosh! I mʼamo̩ma-wñ e̩ne̩ke̩le̩-wñ ko chʼame̩nara, amo̩ma-wñ onobule̩ la chʼame̩namu, oñ i inʼuma ko ñw Siho̩n, onu abo Amo̩r le̩.

³⁰A la tʼo̩fa ñw ma, He̩shbo̩n lenyo̩ rane̩ gbogbo nyi Dibo̩n, a la fʼuma kpo̩fo̩ gbogbo wa Nofa, e-kʼi te̩ kado Me̩deba.

³¹Abe̩le̩ Israe̩l kwogugu ane̩ abo Amo̩r.

³²Taku Mose̩s fʼone̩ kpe̩ nyʼatu ane̩ Jeza; taku ma mʼadogbe-wñ adogbe-wñ gba, oñ ma fʼabo Amo̩r ku ma jo̩ o̩mo̩ ne.

³³Taku ma murida le o̩na Beshan; oñ O̩g, onu Beshan, dufu wa akobʼuma, owñ kpai amone̩-wñ chaka, ku ma jogu E̩drei.

³⁴Taku Jihofa ka ñwu Mose̩s kakini, E̩ ki railo-wñ n: todu omi mʼowñ du tef o̩wo̩-we̩ me̩, tʼamone̩-wñ chaka, tʼane̩-wñ; uwe̩ ki la chʼo alu kʼuwe̩ che Siho̩n, onu abo Amo̩r, ku ma dodo He̩shbo̩n le̩.

³⁵Abe̩le̩ ma fʼowñ kpa, kpai amo̩ma-wñ e̩ne̩ke̩le̩ kpai amone̩-wñ chaka, gbogbo tak e̩ne̩ du ma bo̩ ñw u ge̩ n: oñ ma mʼane̩-wñ gba.