Read igala Ekaluka 3 Bible Online

Ekaluka 3 - igala bible

Ekaluka 3

¹Abo-i la chʼo̩gba o̩gba Aro̩n kpai Mose̩s iko ku Jihofa ko̩la ñwu Mose̩s oj uwo Sainai.

²Odu odu amo̩ma Aro̩n la de̩: Nedab chʼo̩mo̩gba, kpai Abaihiu kpai E̩leaza kpai Itamar;

³odu odu amo̩ma Aro̩n, amatama ku ma fʼekpo ba tʼuma oji e-kʼi kʼe̩wn nyʼuma o̩wo̩ e̩ko̩ ku ma che e̩wñ atama la de̩.

⁴Nedab kpai Abaihiu la leku o̩gba Jihofa le̩, owñ chʼe̩gba ku ma kʼuna ejaduña wa o̩gba Jihofa, aje̩tachi Sainai le̩, ma la nʼo̩ma n. Abe̩le̩ tak E̩leaza kpai Itamar nache uko̩lo̩ atama eju Aro̩n ata-ma.

⁵Taku Jihofa ka ñwu Mose̩s kakini,

⁶Kʼabo o̩lo̩pu Lifai wʼemi, kʼe̩ ko ma jo̩ ñw Aro̩n atama le̩, ku ma che e̩wñ ñw u.

⁷Ama nʼide kʼi añwa ñwu ma, kpai e-o̩gbo̩ o̩gbadu-i du ede o̩gba unyabo ujeju, kʼama ki che e̩wñ uña ugugu;

⁸ama la anʼide e̩wñ eku unyabo ujeju chaka ede, kpai ide e̩wñ abo Israe̩l kʼama ki che e̩wñ uña ugugu.

⁹Oñ uwe̩ akʼabo Lifai le̩ ñw Aro̩n kpai amo̩ma-wñ; ma mʼuma ko kwef abo Israe̩l ñw u pioo.

¹⁰Oñ uwe̩ achi Aro̩n kpai amo̩ma-wñ jo̩, tak ama afejute̩ uko̩lo̩ atama-ma le̩; e̩ne̩ ejaduña du kʼi ate̩me̩ru, ekpa ma akpa.

¹¹Taku Jihofa ka ñwu Mose̩s kakini,

¹²I la chʼomi, go, omi mʼabo Lifai ko kwef abo Israe̩l koji amo̩mo̩gba du ku ma kpʼo̩gba iye-ma na ef abo Israe̩l. Oñ abo Lifai le̩ ache abo e-mi,

¹³todu amo̩mo̩gba du chʼe-mi; o̩jo̩ kʼomi fʼamo̩mo̩gba chaka kpa ane̩ Ijipti, u la che kʼamo̩mo̩gba abo Israe̩l du ki fo̩ ñwu mi, tʼe-one̩ tʼe-e̩la abe̩re̩me̩le̩; ama ache e-mi; omi Jihofa de̩.

¹⁴Taku Jihofa ka ñwu Mose̩s aje̩tachi Sainai kakini,

¹⁵Kʼabo Lifai aluka, ikpo unyi ikpo unyi amatama kpai akwo̩ra unyi akwo̩ra unyi-ma; e̩ne̩ke̩le̩ du akwo ochuʼka nyʼate̩to̩gba-wñ oñ uwe̩ akaluka.

¹⁶Abe̩le̩ Mose̩s fʼuma kaluka alu ki Jihofa dʼalu ñw u, owñ chʼalu ku ma ñwa ñw u le̩.

¹⁷Odu amo̩ma e̩ne̩ke̩le̩ e-Lifai la jo̩-i: Ge̩rsho̩n kpai Kohat kpai Me̩rari.

¹⁸Odu amo̩ma e̩ne̩ke̩le̩ Ge̩rsho̩n akwo̩ra unyi akwo̩ra unyi-ma la jo̩-i: Libni kpai Shimeai.

¹⁹Oñ amo̩ma e̩ne̩ke̩le̩ e-Kohat akwo̩ra unyi akwo̩ra unyi-ma che: Amram kpai Izhar kpai He̩bro̩n kpai Uzie̩l.

²⁰Oñ amo̩ma e̩ne̩ke̩le̩ Me̩rari akwo̩ra unyi akwo̩ra unyi-ma che: Mali kpai Mushi. Abo-i chʼakwo̩ra unyi akwo̩ra unyi abo Lifai, ikpo unyi ikpo unyi amata-ma.

²¹Ge̩rsho̩n la chʼe̩te̩ akwo̩ra unyi abo Libni kpai akwo̩ra unyi abo Shimeai; abo-i la chʼakwo̩ra unyi akwo̩ra unyi abo Ge̩rsho̩n.

²²Abo ku ma kaluka efu-ma, owñ chʼaluka aboke̩le̩-ma akwo ochuʼka nyʼate̩to̩gba-wñ chaka, aluka-ma chʼone̩ icham nyʼo̩gwo̩ko̩ ugbo mebie nyʼone̩ oli me̩gwa.

²³Akwo̩ra unyi abo Ge̩rshon ñʼaru ejubi uña ugugu le̩ o̩wo̩ olodudu,

²⁴idachi abunyi ata abo Ge̩rsho̩n chʼEliasaf, o̩ma Lae̩l.

²⁵E̩wñ ide kʼamo̩ma e̩ne̩ke̩le̩ Ge̩rsho̩n ade ef unyabo ujeju chʼuña ugugu, kpai unyabo ki bʼo ma, kpai ukpo uro̩na e-unyabo ujeju le̩,

²⁶kpai ukpo ku ma ko bʼologbo kpai ukpo uro̩na tod ologbo, owñ chʼe-kʼi lʼuña ugugu kpai ubo̩ iche̩bo̩ daka, kpai iku ku ma ne̩ che uko̩lo̩-wñ chaka.

²⁷Kohat la chʼe̩te̩ akwo̩ra unyi abo Amram kpai akwo̩ra unyi abo Izhar kpai akwo̩ra unyi abo He̩bro̩n kpai akwo̩ra unyi abo Uzie̩l: abo-i chʼakwo̩ra unyi akwo̩ra unyi abo Kohat.

²⁸Aluka aboke̩le̩-wñ chaka akwo ochuʼka nyʼate̩to̩gba-wñ chʼone̩ icham nyʼo̩gwo̩ko̩ ugbo me̩jo̩ nyʼulo̩gwa, ku ma ne̩ ide e̩wñ uña kiafo̩ le̩ ade.

²⁹Akwo̩ra unyi akwo̩ra unyi amo̩ma Kohat le̩ aru jo̩ akolo uña ugugu o̩wo̩ o̩pata o̩gane̩.

³⁰Oñ idachi unyi amata abo akwo̩ra unyi akwo̩ra unyi abo Kohat chʼElizafan o̩ma Uzie̩l.

³¹E̩wñ ide ku ma la ade chʼakpati kpai itebulu kpai agege kpai ubo̩ iche̩bo̩ meji le̩ kpai e̩wñ eku uña kiafo̩ e-ku ma ne̩ che e̩wñ kpai ukpo ugbeju, kpai ane̩ uko̩lo̩-wñ chaka.

³²Oñ E̩leaza, o̩ma Aro̩n atama achʼidachi ki tʼo̩gba ñw amidachi abo Lifai, i la afejutʼabo ku ma de e̩wñ ide e-uña kiafo̩ le̩.

³³Me̩rari chʼe̩te̩ akwo̩ra unyi abo Mali kpai akwo̩ra unyi abo Mushi: abo le̩ chʼakwo̩ra unyi akwo̩ra unyi Me̩rari.

³⁴Oñ abo ku ma fʼuma kaluka efu-ma, owñ chʼaluka aboke̩le̩ akwo ochuʼka nyʼate̩to̩gba-wñ chaka chʼone̩ icham nyʼo̩gwo̩ko̩ ugbo me̩fa nyʼone̩ o̩gwo̩ko̩.

³⁵Oñ idachi abo akwo̩ra unyi akwo̩ra unyi Me̩rari che Zurie̩l o̩ma Abihee̩l; ama le̩ arujo̩ o̩wo̩ o̩pata ate̩ uña ugugu le̩.

³⁶Oñ e̩wñ ide kʼamo̩ma Me̩rari ade chʼakatakpo uña ugugu kpai oli ugbo̩lo̩-wñ kpai oli urane̩-wñ kpai o̩ka-wñ kpai ane̩-wñ chaka; kpai uko̩lo̩ abʼe-le̩ chaka.

³⁷Kpai oli urane̩ ologbo-wñ kʼi lo daka, manyʼo̩ka-wñ kpai aba-wñ kpai iku-wñ.

³⁸Oñ abo ku ma arujo̩ o̩gba uña ugugu o̩wo̩ olodudu-wñ, owñ chʼo̩gba unyabo ujeju o̩wo̩ ugbo kʼolu akwane̩, che Mose̩s kpai Aro̩n kpai amo̩ma-wñ, ku ma nʼide uña kiafo̩ ade, owñ chʼide kʼamo̩ma Israe̩l nʼede-wñ le̩; e̩ne̩ ejaduña du kʼi la te̩me̩rʼu, ekpa ma akpa.

³⁹Oñ abo Lifai ku ma kaluka ma du, owñ chʼabo ku Jihofa nʼalu-wñ ka ñwu Mose̩s kpai Aro̩n ku ma kʼuma aluka le̩, akwo̩ra unyi akwo̩ra unyi-ma, e̩ne̩ke̩le̩-ma akwo ochuʼka nyʼate̩to̩gba-wñ chaka chʼone̩ icham nyʼo̩gwo̩ko̩ ugbo ogu nyoke meji.

⁴⁰Taku Jihofa ka ñwu Mose̩s kakini, Fʼamo̩mo̩gba abo Israe̩l e̩ne̩ke̩le̩ akwo ochuʼka nyʼate̩to̩gba-wñ kaluka, kʼe̩ la fʼaluka odu-ma ma.

⁴¹Tak uwe̩ akʼabo Lifai todu mi (omi Jihofa de̩), ama akoji amo̩mo̩gba du ef amo̩ma Israe̩l, oñ ame̩la abe̩re̩me̩le̩ abo Lifai akoji amo̩ma ojo̩do̩ ame̩la abe̩re̩me̩le̩ abo Israe̩l chaka.

⁴²Abe̩le̩ Mose̩s fʼamo̩mo̩gba du ef abo Israe̩l kaluka alu ki Jihofa ñwa ñwu.

⁴³Oñ amomo̩gba e-e̩ne̩ke̩le̩ chaka owñ chʼaluka odu one̩ odu one̩, akwo ochuʼka nyʼate̩to̩gba-wñ, abo ku ma kaluka ma le̩ chʼone̩ icham nyʼo̩gwo̩ko̩ ugbo ogu nyoke meji nyʼone̩ o̩gwo̩ko̩ nyʼe̩te̩gwa nyoke me̩ta.

⁴⁴Taku Jihofa ka ñwu Mose̩s kakini,

⁴⁵E̩ ki mʼabo Lifai ko koji amo̩mo̩gba du ku ma jʼef abo Israe̩l, kpai ame̩la abe̩re̩me̩le̩ abo Lifai koji ame̩la abe̩re̩me̩le̩ e-ma; oñ abo Lifai achʼabo e-mi: omi Jihofa de̩.

⁴⁶Todu kʼe̩ gba amo̩mo̩gba abo Israe̩l o̩gwo̩ko̩ nyʼo̩gbo̩ me̩ta nyoke me̩gwe̩ta ku ma kwu aluka abo Lifai bo̩ le̩,

⁴⁷e̩ nagba she̩ke̩l me̩lu e̩lu oji okoke-ma; alu ku she̩ke̩l uña kiafo̩ de̩ alu le̩ e̩ gba, (she̩ke̩l e-le̩ la che gera ogu),

⁴⁸e̩ la mʼo̩ko̩ ku ma ne̩ gba aluka one̩ ki kwu ma bo tane̩ le̩ ko ñw Aro̩n kpai amo̩ma-wñ.

⁴⁹Abe̩le̩ Mose̩s mʼo̩ko̩ ulʼone̩ tane̩ le̩ gba kwʼo̩wo̩ abo ku ma kwubo̩ noji abo kʼabo Lifai la tane̩ le̩;

⁵⁰i mʼo̩ko le̩ gba kwʼo̩wo̩ amo̩mo̩gba abo Israe̩l, owñ che she̩ke̩l icham nyʼo̩gwo̩ko̩ nyʼoli mebie nyoke me̩gwe̩lu, alu ku she̩ke̩l uña kiafo̩ de̩;

⁵¹oñ Mose̩s mʼo̩ko̩ ulone̩tane̩ le̩ ko ñw Aro̩n kpai amo̩ma-wñ, alu kʼo̩la Jihofa de̩, owñ chʼalu ku Jihofa ñwa ñwu Mose̩s.