Read igala Ekaluka 32 Bible Online

Ekaluka 32 - igala bible

Ekaluka 32

¹Abo Rube̩n kpai abo Gad la nʼame̩wñukpa wewe tabale; oñ ma fʼane̩ Jeza kpai ane̩ Gilead li, e̩ go, ugbo le̩ chʼugbo ki nyo̩ ñw ame̩wñukpa.

²Oñ amo̩ma Gad kpai amo̩ma Rube̩n lewa ka ñwu Mose̩s kpai E̩leaza atama kpai amidachi abo o̩gbadu le̩ kakini,

³Atarot kpai Dibo̩n kpai Jeza kpai Nimra kpai He̩shbo̩n kpai Eleale kpai Sebam kpai Nebo kpai Beon,

⁴owñ chʼane̩ ku Jihofa gwoda rʼo̩gba abo o̩gbadu Israe̩l le̩, o̩mo̩ chʼane̩ ki nyo̩ ñw ame̩wñukpa, amadu-we̩-i la chenʼame̩wñukpa.

⁵Oñ ma kakini, Iche̩wñ kʼuwe̩ li wa eju, je̩ ñwu ma dʼane̩-i ñw amadu-we̩-i kʼa ne̩; e̩ ki ko wa wʼudaba Jo̩rdan-i n.

⁶Ama Mose̩s ka ñw abo Gad kpai abo Rube̩n kakini, Amo̩maye-me̩ anyʼoko ogu, kʼame̩ ki gugu emi-i?

⁷E̩wñ chi kʼame̩ la akpa abo Israe̩l e̩do̩ bie̩ ku ma we edaba nyʼoj ane̩ ku Jihofa ko ñwu ma le̩?

⁸Abe̩le̩ amata-me̩ che e̩gba kʼu kpʼuma uche̩ akwo Kede̩sh-barne̩a ku ma nyʼago ane̩-i.

⁹Todu e̩gba ku ma nyʼef o̩go̩ E̩shko̩l, ku ma fʼane̩ le̩ li, ma fʼabo Israe̩l e̩do̩ kpabie̩, kʼama ki we enyʼoj ane̩ ki Jihofa ko̩ ñwu ma.

¹⁰Tak uwe̩do̩ Jihofa mutajo o̩jo̩ le̩, oñ i go̩ kakini,

¹¹Ochochi, eju aboke̩le̩ du ku ma kwʼ Ijipti dufu wa-i, kʼo̩do̩-ma chʼogu nyʼate̩to̩gba-wñ ado ane̩ kʼomi go̩ ñw Ebraham kpai Aise̩k kpai Jeko̩b in, todabu ku ma ma tʼumi ubi ogbolo n;

¹²e̩ne̩ du ale n chai Kele̩b o̩ma Jefune e̩ne̩ Kiniz le̩ kpai Jo̩shua o̩ma Nun, todu ama le̩ ti Jihofa ubi ogbolo.

¹³Oñ uwe̩do̩ Jihofa mutajo abʼIsrae̩l ma, oñ i je̩ ñwu ma chʼila jʼef aje̩tachi ale o̩do̩ o̩gbo̩ meji, gbogbo tak abo o̩gba ki fʼe̩bie̩ne̩ le̩ che eju Jihofa chaka lie̩ rinyo̩.

¹⁴Me̩ la go, ame̩ kwane̩ koji amata-me̩ le̩, ato̩ ame̩nadure me̩ che, kʼuwe̩do̩ inaina e-Jihofa le̩ ki ño̩ buto̩ nyo̩gba abʼIsrae̩l ma!

¹⁵Todu iche̩wñ kʼame̩ murida bʼo̩ ubi te̩, i ñʼatʼuma no̩ jʼef aje̩tachi-i ge̩; oñ ame̩ akpʼamone̩-i chaka bie̩ rinyo̩.

¹⁶Taku ma te̩wʼugbo-wñ, oñ ma kakini, A afʼo̩gba ame̩wño̩re̩ egini bu ugbo kʼame̩wñukpa-wa ajʼefu-wñ emi, oñ a akʼunyi tod amo̩ma-wa egini,

¹⁷awa onugo muda amʼo̩la ogu kʼa tʼabo Israe̩l o̩gba, gbogbo tak a ko ma wʼugbo e-ma ku ma ajo̩; oñ amo̩ma-wa egini la ajʼef ewo ki nʼaku-i tod abo ane̩ emi.

¹⁸A adabi wʼunyi-wa gbogbo tak abo Israe̩l okoke ki gbʼe̩wñ ogu-wñ n.

¹⁹Todu a aje̩ e̩wñ oguk pai ma ejudaba Jo̩rdan kpai ejʼano̩mo̩ ano̩mo̩-wñ n; todabu kʼe̩wñ ogu-wa ko tʼuwa o̩wo̩ ejemi ñwu Jordan o̩wo̩ olodudu-wñ-i.

²⁰Taku Mose̩s ka ñwu ma kakini, Iche̩wñ kʼame̩ ache e-le̩, iche̩wñ kʼame̩ ajʼo̩logu ku me̩ tu Jihofa Ogba nyʼoko ogu le̩,

²¹kʼe̩ne̩ke̩le̩ du efu-me̩ kʼi nʼebije ogu adaba o̩gba Jihofa, gbogbo tak i fʼame̩nebi-wñ ne dufu bʼeju-wñ te̩,

²²ku ma fʼane̩ le̩ dolo te̩ o̩gba Jihofa; ubile̩ tak ame̩ adabi, kʼame̩ ma ñʼanʼudu ugbo Jihofa kpai ugbo abo Israe̩l-i ge̩ n, tak ane̩-i achʼe-me̩ ku me̩ ne̩ eju Jihofa.

²³I muda che̩wñ kʼame̩ ma che abe̩le̩ n, go, Jihofa oñ ame̩ adure le̩; adure-me̩ la adʼofe-me̩ dufu chuu.

²⁴Fʼewo ko̩ ñw amo̩ma-me̩ egini, me̩ fʼo̩gba bu nyʼame̩wño̩re̩-me̩ egini; me̩ ki la che alu ku me̩ ka le̩.

²⁵Tak amo̩ma Gad kpai amo̩ma Rube̩n ka ñwu Mose̩s kakini, Amadu-we̩-i ache alu kʼodu-mi ñwa ñwu ma.

²⁶Amo̩ma-wa egini kpai amo̩ya-wa kpai ame̩wñ-ukpa-wa kpai ame̩la-wa abe̩re̩me̩le̩ chaka ajʼef ewo ewo Gilead le̩;

²⁷amadu-we̩-i muda adaba eiu Jihofa anyʼoko ogu, owñ chʼe̩ne̩ du kʼe̩wñ ebije ogu jʼef o̩wo̩-wñ, alu kʼodu-mi ka le̩.

²⁸Abe̩le̩ Mose̩s mʼo̩la-ma du tʼef o̩wo̩ E̩leaza, atama kpai Jo̩shua o̩ma Nun, kpai abo ku ma dʼoji dufu ef unyi unyi amata o̩lo̩pu o̩lo̩pu abo Israe̩l.

²⁹Taku Mose̩s ka ñwu ma kakini, Iche̩wñ kʼamo̩ma Gad kpai amo̩ma Rube̩n kʼe̩ne̩ne̩ne̩ne̩-ma fʼo̩logu ji eju Jihofa adaba Jordan kpʼame̩, ku ma la fʼane̩ le̩ dolo te̩ o̩gba-me̩; mak e̩gba le̩ me̩ akʼane̩ Gilead ñwu ma ku ma ne̩;

³⁰i muda che̩wñ kʼama ma je̩ ajʼo̩logu adaba kpai ame̩ n, mak ama ane̩ e̩wñ kpʼame̩ oj ane̩ Kenan.

³¹Tak amo̩ma Gad kpai amo̩ma Rube̩n dohi kakini, Alu ki Jihofa ka ñw amadu-we̩-i, alu le̩ a ache.

³²A afʼo̩la ogu ji kʼa daba Jo̩rdan nyʼoj ane̩ Kenan eju Jihofa, oñ e̩wñ ogu-wa kʼa ane̩ ajʼugbo-wa ejemi Jo̩rdan-i.

³³Taku Mose̩s mʼu ko ñwu ma, owñ chʼamo̩ma Gad kpai amo̩ma Rube̩n kpai ukpe̩reji abo o̩lonu Manasa, o̩ma Jose̩f le̩, oj ane̩ Sihon, onu abo Amo̩r, kpai ojane̩ O̩g, onu Beshan, owñ chʼane̩ le̩ kpai ewo ewo ane̩ le̩ gbogbo wa kad alo̩me̩-wñ, owñ chʼewo ewo ane̩ ki lʼuma daka le̩.

³⁴Tak amo̩ma Gad fu Dibo̩n kpai Ataro̩t kpai Aroe̩r

³⁵kpai Atrot-shofan kpai Jeza kpai Jo̩gbeha

³⁶kpai Be̩t-nimra kpai Be̩t-haran ne, ewo ewo ki nʼaku i che, i la nʼo̩gba ku ma bu tod ame̩wño̩re̩ egini.

³⁷Tak amo̩ma Rube̩n fu He̩shbo̩n kpai Eleale kpai Kiria-taim

³⁸kpai Nebo kpai Beal-meo̩n, (ma la fʼodu ewo ewo le̩ rida), kpai Sibna ne; taku ma kʼodu ojoji ñw ewo ewo ku ma ne le.

³⁹Tak amo̩ma Makir o̩ma Manasa nyi Gilead, oñ ma fʼu du, ma la fʼabo Amo̩r ki jʼefu-wñ ne bʼo̩ te̩.

⁴⁰Mose̩s la du Gilead ñwu Makir o̩ma Manasa; oñ i fʼodo do o̩mo̩.

⁴¹Taku Jair, o̩ma Manasa, le namʼadogbe ado̩gbe-ma gba, oñ i dʼodu-wñ ko̩ Hafo̩t-jair.

⁴²Taku No̩ba le namu Kenat kpai adogbe adogbe-wñ gba, oñ i dʼodu-wñ rʼodu onugo o̩la e-wñ ko̩ Noba.