Read igala Mark 3 Bible Online

Mark 3 - igala bible

Mark 3

¹Tak i ño̩ mugudu tef unyi ujeju ge̩; oñ e̩ne̩ʼka do̩mo̩ kʼo̩wo̩-wñʼka chʼe̩gbe̩.

²Ma fejumʼu ne̩ tode̩gba kʼi ache o̩ga-wñ kpa o̩jo̩ uñmi, ku ma li uña ku ma gwo̩nyʼo̩la-wñ.

³Oñ i ka ñw e̩ne̩ kʼo̩wo̩-wñ chʼe̩gbe̩-i, kakini, Kwane̩ dago alumeji.

⁴Tak i ka ñwu ma, kakini, O̩da aje̩ ñw one̩ che e̩nyo̩ abe̩k e̩bie̩ne̩ o̩jo̩ uñmi? Ejadu oji one̩, abe̩k ekpa? Ama ma hi alu-ma de.

⁵Abu kʼe̩do̩-wñ chʼe̩kpabie̩ tod e̩do̩-ma kʼi gbiti, i rejuda go ma kpai uwe̩do̩, oñ i ka ñw e̩ne̩ le̩ kakini, Fʼo̩wo̩-we̩ nadala te̩. Tak i fʼu nadala, oñ o̩wo̩-wñ mudabi tʼiko.

⁶Tak amaFarisi ledufu, oñ ababale̩ ama kpai abo He̩ro̩d nyojuju nyʼu alu ku ma le ku ma fu kpa tinyo̩.

⁷Jisus kpai amako̩che̩-wñ la mudabi tʼo̩l ohimini; tak ugwe̩ko̩ amone̩ kwo Galili darʼo̩ ubi.

⁸Tak abu kʼugwe̩ko̩ amone̩ gbʼinabali e̩wñ du kʼi che, ma kwo Judia kpai Je̩rusale̩m kpʼIdumea kpʼejudaba Jo̩rdan, kpai ane̩ ki le Taya kpai Saido̩n daka wʼugbo-wñ.

⁹Tak i ka ñw amako̩che̩-wñ kʼo̩mo̩ko̩ ki tʼo̩mo̩ anede owñ todu ugwe̩ko̩ amone̩ le̩, tode̩gba ku ma kpʼo̩ ma;

¹⁰todu abo kʼi che o̩ga-ma kpa che wewe; todabe̩le̩ abo du ku ma chʼo̩bata o̩ga gulo̩ bʼowñ ma, ku ma ki do̩wo̩kadʼo.

¹¹Oñ e̩gba du kʼamafu ki ma de̩hiolo n, gʼo, ma fiane̩ o̩gba-wñ, ma kwukwa kakini, Uwe̩ chʼO̩ma O̩jo̩.

¹²Tak i fʼuma eti nana todu ku ma ki we eje̩ ñw o̩ja mʼo̩.

¹³Tak i mute̩gu tʼibe̩uwo le̩, oñ i fʼabo ki dʼowñ onugo e̩do̩ do̩ wʼugbo-wñ; ma la nyʼugbo-wñ.

¹⁴Oñ i chi one̩ me̩gweji ku ma jʼugbo-wñ, kʼi nakpe̩ ma nyʼatakoya,

¹⁵ku ma ño̩ nʼo̩da ku ma ne amebili dufu;

¹⁶i mʼodu Pita du manyu Saimo̩n;

¹⁷kpai Jeme̩s e-Ze̩be̩di kpai Jo̩n o̩maye Jeme̩s; i la mʼodu Boane̩rje̩s, kʼofe-wñ chʼAmo̩ma Akpabana, du manyu ma;

¹⁸kpai Anduru kpai Filip kpai Barto̩lomiu kpai Matiu kpai Tomas kpai Jeme̩s e-Alfio̩s kpai Tadio̩s kpai Saimo̩n abo Kenan,

¹⁹kpai Judas Iskario̩t e-ki mʼowñ du ñwu ma mu. Tak i wʼef unyiʼka.

²⁰Amone̩ ño̩ jeju tinyo̩ o̩mo̩ ge̩, todabe̩le̩ i chaka chʼakala ma neke je̩ n.

²¹E̩gba kʼabo-wñ gbo̩, ma ledufu ku ma gwo̩nyʼu; todu ma kakini, Ibe-wñ mukpatuka.

²²Amako̩takada ku ma gwo̩ru kwo Je̩rusale̩m wa kakini, I chene̩ Bee̩lze̩bul, lef agboji amebili i ane amebili dufu.

²³Tak i do̩ ma wʼugbo-wñ, oñ i kpita ñwu ma kakini, Abu Setan ale kʼi neke ne Setan dufu ke?

²⁴Iche̩wñ kʼojane̩ʼka mudareji ku ma kobʼo̩la-ma, ojane̩ le̩ neke dago n.

²⁵Iche̩wñ kʼunyi mudareji ku ma kobʼo̩la-ma, unyi le̩ aneke dago n.

²⁶Iche̩wñ ku Setan kwane̩ akobʼo̩la-wñ, kʼi mudareji, i neke dago n, ama ida-wñ de̩.

²⁷E̩ne̩ du muda neke gudu tef unyi agbiti kʼi mʼe̩wñ-eku-wñ ño̩ n, chai e̩gba kʼi fʼagbiti le̩ ji ejodudu e̩gba le̩ tak i añʼane̩-wñ.

²⁸Ami naka ñwu me̩ kakini, Ma atʼadure du kpai echakpabie̩ du kʼamo̩ma amone̩ adu kpʼO̩jo̩ bie̩ no̩ ñwu ma;

²⁹e̩ne̩ du ki muda achakpabie̩ Afu Kiafo̩, ma ato̩no̩ ñw u ogbegbele̩ n, i la fʼadure ogbegbele̩ ta me̩;

³⁰todabu ku ma kakini, I chenʼafu ki ma de̩hiolo n.

³¹Tak iye-wñ kpai amo̩maye-wñ lewa, oñ ma kwodago o̩do̩da, oñ ma fʼuche̩ kpe̩ nyʼugbo-wñ adʼo̩.

³²Amone̩ wewe la gugu kpenyʼu, oñ ma ka ñw u kakini, Go, iye-we̩ kpai amo̩maye-we̩ jʼo̩do̩da afeju we̩.

³³Tak i dohi ñwu ma kakini, E̩ne̩ chʼiye-mi kpai amo̩maye-mi?

³⁴Tak i rejuda go abo ku ma gugu kpenyʼu, oñ i kakini, Me̩ go iye-mi kpai amo̩maye-mi!

³⁵Todu e̩ne̩ du ki ache e̩wñ ki dʼO̩jo̩ e̩do̩, e̩ne̩ le̩ chʼo̩maye-mi e̩ne̩ke̩le̩ kpai omaye-mi onobule̩ kpai iye-mi.