Read igala Jo̩n 13 Bible Online

Jo̩n 13 - igala bible

Jo̩n 13

¹Oñ o̩gba tak ujeju ucholo Elaloji le̩ wane̩, abu ku Jisus chema ka kʼauwa-wñ todu kʼi kwo bʼef ile̩ te̩ kʼi nyʼugbo Ata lewa me̩; alu kʼi te̩tafe̩do̩ abo e-wñ ku ma jʼef ile̩, i fe̩do̩ ma gbogbo tʼukpoji.

²Oñ abu ku ma jo̩ ajʼo̩je̩ o̩kpane̩, e̩gba le̩ Abulumone̩ mʼibe du tʼef e̩do̩ Judas e-Saimo̩n Iskario̩t todu kʼi mʼowñ du ñw amone̩ mu me̩,

³abu ku Jisus chema ka kʼAta mʼe̩wñ du ko jʼef o̩wo̩-wñ, kʼowñ la kwʼugbo O̩jo̩ dufu wa le̩, kʼowñ la anyʼugbo O̩jo̩ ge̩,—

⁴i kwane̩ kwʼugbo o̩je̩ o̩kpane̩ le̩, oñ i mʼe̩wñ o̩la-wñ ko lane̩: i la mʼugbogbo line̩n ku ma du li o̩wo̩ du lʼago-wñ de.

⁵Tak i chʼomiofo nyʼukpachi-ugwo̩wo̩, oñ i chane̩ egwʼe̩re̩ amako̩che̩-wñ kʼi dʼugbogbo line̩n ki lʼago-wñ de le̩ li e̩re̩-ma.

⁶Todule̩ i lewa ugbo Saimo̩n Pita, i ka ñw u kakini, Ondu, uwe̩ agwʼe̩re̩ e-mi?

⁷Jisus dohi ñw u kakini, E̩wñ kʼomi ache-i, e̩ ma fa-i ta n, e̩ muda ama ubi e̩wñ-i.

⁸Pita ka ñw u kakini, I nʼugbo du kʼuwe̩ agwʼe̩re̩-mi ogbegbele̩ n. Jisus dohi ñw u kakini, Iche̩wñ kʼu ma gwʼuwe̩ n, e̩ nʼukpe̩ du ugbo mi n.

⁹Saimo̩n Pita ka ñw u kakini, Ondu, i chʼe̩re̩-mi kate n, ama tʼo̩wo̩-mi tʼoji-mi du.

¹⁰Jisus ka ñw u kakini, E̩ne̩ ki fʼo̩la gwe̩ i nʼeku kʼi aku n chai e̩re̩ egwe̩, o̩gbo̩ o̩la-wñ la de̩ hiolo me̩; ame̩ la de̩ hiolo me̩, i muda chʼo̩chaka-me̩ n.

¹¹Todu i chema e̩ne̩ ki adʼowñ ñw amone̩ mu, tod e-kide̩ oñ i kakini, I chʼo̩chaka-me̩ de̩ hiolo n.

¹²Todule̩ e̩gba kʼi fʼe̩re̩-ma gwe̩ kpa kʼi la mʼe̩wñ o̩la-wñ ko, kʼi ño̩ dabi chekukane̩, i ka ñwu ma kakini, Me̩ chema e̩wñ kʼu che ñwu me̩-i?

¹³Ame̩ do̩ mi ko̩ Akone̩wñ kpai Ondu, o̩me̩me̩le̩ me̩ la ka-i, todu abe̩le̩ u de̩.

¹⁴Todule̩ iche̩wñ kʼomi kʼu chʼOndu kpai Akone̩wñ fʼume̩ e̩re̩ gwe̩, mak ame̩ chenʼo̩me̩ ku me̩ gwʼomune̩ e̩re̩.

¹⁵Todu e̩wñ ku me̩ awʼo̩li-wñ oñ omi du ñwu me̩-i, todu kʼame̩ ki ño̩ che alu kʼomi che ñwu me̩.

¹⁶Ami, ami, naka ñwu me̩ kakini, Adu atʼodu-wñ le n, e̩nukpuche̩ la tʼe̩ne̩ ki kpʼo̩ le n.

¹⁷Iche̩wñ ku me̩ ma e-kide̩, ku me̩ la che, me̩ gbede.

¹⁸I chʼo̩la-me̩ chaka oñ naka-i n. Omi chema abo kʼu chi ma tane̩; ama todu kʼo̩la ki dʼef O̩takada O̩la O̩jo̩ ki che̩ kakini, E̩ne̩ ki aje̩ akala-mi fʼagbe̩re̩ ro̩ nyu mi.

¹⁹Akwe̩gba-i naka ñwu me̩ o̩gba tak i wache, todu kʼe̩gba du kʼi wache kʼame̩ ki ke̩do̩no ka kʼomi de̩.

²⁰Ami, ami, naka ñwu me̩, e̩ne̩ ki agba e̩ne̩ du kʼu nakpe̩ wa, omi i agba le̩; e̩ne̩ ki la agba mi mak e̩ne̩ ki kpe̩ mi wa i agba le̩.

²¹Abu ku Jisus fʼe-kide̩ ka, e̩do̩-wuulu chane̩ echʼo ef afu-wñ, tak i gbibenu kakini, Ami, ami, naka ñwu me̩ kakini, E̩ne̩ʼka efu me̩ adu mi ñw amone̩ mu.

²²Oñ amako̩che̩-wñ gʼo̩la-ma eju, o̩la e̩ne̩ kʼi aka-i fitu ma.

²³E̩ne̩ʼka dʼef amako̩che̩-wñ ku Jisus afe̩do̩, e̩ne̩ le̩ chekukane̩ ugbo agbe̩do̩ Jisus.

²⁴Todule̩ Saimo̩n Pita dʼoji do̩ e̩ne̩ le̩, oñ i ka ñw u kakini, Ka e̩ne̩ ki che kʼi aka-i.

²⁵Abu kʼe̩ne̩ le̩ mubichiyo̩ agbe̩do̩ Jisus abe̩le̩, i ka ñw u kakini, Ondu, owñ chʼe̩ne̩?

²⁶Jisus dohi kakini, Owñ chʼe̩ne̩ kʼomi abʼo̩we̩ o̩je̩ kad obobo kʼu nadʼu ñw u. Todule̩ abu kʼi mʼo̩we̩ o̩je̩ le̩ du kad obobo, i la mʼu du ñwu Judas e-Saimo̩n Iskario̩t.

²⁷Tak ubi o̩we̩ o̩je̩ le̩, e̩gba le̩ Setan mugudu tef e̩ne̩ le̩. Todule̩ Jisus ka ñw u kakini, E̩wñ kʼe̩ che, e̩ kwoche piopio.

²⁸Ama e̩ne̩ du ef abo ki chekukane̩ le̩ ma e̩wñ ki chi kʼi ko̩la kide̩ ñw u n.

²⁹Todu iche̩kibo̩ do̩ kʼukpe̩ ku Judas nʼakpati le̩ oñ Jisus ka ñw u kakini, E̩ nyʼala e̩wñ kʼeku-wñ aku uwa tod ujeju ucholo; abe̩k utodu kʼi dʼe̩wñʼka ñw ame̩nale.

³⁰Todule̩ abu kʼi mʼo̩we̩ o̩je̩ le̩ gba e̩ne̩ le̩ ledufu ababa; odu i la che.

³¹Todule̩ e̩gba kʼi ledufu Jisus kakini, Fa-i O̩ma One̩ fojima ne̩ me̩, O̩jo̩ laño̩ fʼojima ne̩ ef uwñ.

³²Iche̩wñ kʼO̩jo̩ nʼojima ef uwñ, mak O̩jo̩ adʼojima ñw u ef uwñ. I la adʼojima ñw u ababa.

³³Amo̩ma-mi, nadʼugbo-me̩ pe̩ ta. Me̩ afeju mi, oñ alu kʼu ka ñw amaJu kakini, Ugbo kʼomi anyi, ame̩ neke wa n, fa-i naño̩ ka ñwu me̩ ge̩.

³⁴O̩la uko̩ tito̩ nadu ñwu me̩-i, todu ku me̩ ki fe̩do̩ omune̩; alu kʼu fe̩do̩ me̩ todu kʼame̩ ki ño̩ fe̩do̩ omune̩ abe̩le̩ ge̩.

³⁵Ef e-kide̩ oñ amone̩ du ama ka kʼame̩ chʼamako̩che̩-mi, iche̩wñ ku me̩ ne̩ ufe̩do̩ kpʼomune̩.

³⁶Saimo̩n Pita ka ñw u kakini, Ondu, ugbo uwe̩ anyi? Jisus dohi kakini, Ugbo kʼu nanyi e̩ neke tʼumi ubi fa-i ta n; e̩ muda atʼumi ubi e̩gba tʼe̩gba.

³⁷Pita ka ñw u kakini, Ondu, e̩wñ chi kʼu ma neke tʼuwe̩ ubi fa-i ta n? nadʼoji o̩la-mi tinyo̩ tod uwe̩.

³⁸Jisus dohi kakini, Uwe̩ adʼoji-we̩ tinyo̩ tod umi? Ami, ami, naka ñw e̩ kakini, I nʼugbo du kʼaiko̩ ako̩ gbogbo tak e̩ raire̩ mi onu me̩ta n.